Read Managalasi 1 Joni 3 Bible Online

1 Joni 3 - Managalasi bible

1 Joni 3

¹Ike heha! Amora oja ni'ima'ura ka'ene nú múhe najuhaji kaha! Ijihuna'e nú Godoni harihija 'úmajihuna'e mwe'akaho nú pahene pakúmu. Ijihuni maijaho pu Hu pahena pakavura.

²Ehu nuna ka'ene na ja oja mihi'inakije nú iviamaa Godoni harihija'omo nú ichá'ina'e rehunijaho mai'o pakavi'ina. 'Enakaivo nú niheju Hura ro'amajaho nú Hua ka'ava jihuna'e Hua'ina rehuna.

³'Enajihuna'e ea irara ike nimaaroakaho Huni vaji namujihuna'e hu ori'ini vejume arira maa renana. Areri Hu arira maija'ina renuna.

⁴'Enakaivo ea irahipo sisea veji'i hijujaho pu 'u'o varapa 'ene avaju. Ijihuni maijaho siseijaho varapa 'ejujina.

⁵Ja nihejara. Hura roajaho sisea apena va'i roana kaivo Huni vaja sisea pa'ana.

⁶Ea irahipo Huni vaji hijujija pu niho'o sisea pavejura. 'Enakaivo ea irahipo sisea vejujaho pu niho'o Hu pakame 'ee pahejura.

⁷Sesahu nune paveje ea 'aho'a ja pisivi'avara. Ea irara arira maiji venujaho hu arira. 'Ene Hu arimai ja'ina'e hu 'u'o arira.

⁸Ea irara sisea venujaho hu 'avena sisei jihuni ea. Ijihuni maijaho 'avena siseijaho nitama anejijino sisea venana. Godoni Harihijara roajihuni maijaho 'avena sisei jihuni kaukara tiraku'i roana.

⁹Ea irara Godoni vaji nahejajaho hu sisea pavenuna. Ijihuni maijaho Huni 'Ina huni vaji hinujihuna'e hu sisea pavenuna. Ijihuni maijaho hu Godoni vaji nahejara.

¹⁰Ikaho 'unama ichá'ina ka'ene ea irara Godoni harihe 'ee ea irara 'avena sisei jihuni harihiji hena kihunijina. Ea irara sisea veji'i hine 'ee vweaha oja pamahujaho hu Godoni ea pana. Oja Ma'ara'avara

¹¹Vu'a ka'ene nitama aneja nú hejajaho ikena. Ja ea 'aho pu'úmo oja 'ekarahuna.

¹²Nú Keni vare'ina pana. Hu 'avena sisei jihuni ea ijihuna'e hu huni 'u'ua 'anaume kwamana. Hu 'u'uaha rakijihuna'e 'anaume kwamane? Ijihuni maijaho hura raka ka'ene venajaho sisei jihuna'e pamaranana. 'Enakaivo 'u'uahi venajara marana jihuna'e avanana.

¹³Vwehu nune mwe'akara ja sena'amajaho ja oja pahwa'usunaha'avara.

¹⁴Nú nihejujaho nú maraku ijaho nikwamasahara vaji hijara vo nú iviamaa kú'o 'urina hiju. Ijihuni maijaho nú vwehu núna oja mihujihuna'e. 'Enakaivo ea irara ea 'aho'a oja pamihujaho hu majaa kwamasahuri vaji hinu.

¹⁵Ea irara ea 'aho'a semujaho hu areri ea kaji 'anau'e kwamu ja'ina'e renu. 'Eju'ukamare'e ja niheju ea irara ea 'aho'a 'aniu'e kwamasahujaho hu majama hihunijaho huni oja vaja panamu.

¹⁶Ike 'unama ikehunakino Hura nú oja múhajaho hena kavu. Ijihuni maijaho Hu Huni hia núnijihuna'e múhana. 'Enajihuna'e nú 'u'o núni hia vwehu núna'e mihuna.

¹⁷'Enakaivo ei pini uneunecha mapoka rukina re'ika'i hu vweaha pivunu kajaho nika'ika'i patemu'amajaho vu ichá'ina'e Godoni oja mihujaho huni vaja na'ena?

¹⁸Sesahu nune ma iraru oja mihu pa'waha kaivo nimaa nimaiji vene 'ee oja miha. Godoni Una'i Paju'ika'i Matauma Namihunijina

¹⁹Ijihuna'e nú niheju nú nimaa nimai ijihuna. 'Enajihuna'e Huni una'i paju'ika'i namihuna.

²⁰Nú sisea vejujihuna'e núni oji vwihana heju. 'Enakaivo Godira núni oja asitaha jihuna'e nú raka ka'ene vejujaho Hu maho'o nihe paranu.

²¹Vwehu nuna ka'ene na ja oja mihunakije núni ojijara nú panamu'amajaho nú paju'ika'i Godoni una'i matauma namihuna.

²²'Enakaivo nú Huni tamana vene uneunechaka Hura ura renuji hena vejujihuna'e nú raka'e jarivujaho Hu nú vajúhuna.

²³Ikaho Huni tamana. Nú Huni Hariha Jesu Keriso oni iha nimaa rone 'ee ea 'aho pu'úmo oja 'ekarahuna areri Hura 'waruma ja'ina'e vehuna.

²⁴Ea irara Jesuni tamana hene venujaho hu Huni vaji hinu. 'Eju'e Jesu huni vaji hinu. Ijaho nú niheju Hu núni vaji hinu. Ijihuni maijaho Huni 'Avena ka'ene Hura nú múhajara reju'e nú niheju.