Read Managalasi Revaresiani 15 Bible Online

Revaresiani 15 - Managalasi bible

Revaresiani 15

¹'E'eme na ka'eme kahi akúpa 'ahi unenu'u pina ni'ima'ura mavarasa'ini renana. 'E'ejume na kivume 'ona oji'ina iropu no'o túchamaa huni siseiji iropu no'o 'uninamiara. Ijihuni maijaho ijaho Godoni senijara pa'are parahunijina.

²'E'ejume na kavume soha mane'a 'ee vena puna'i renana. 'Ejumakavi'i ea ka'ene hanuhiji pataarohe hua'ina ka'ene iji vejaji pataarohe 'ee huni ihijihuni asura ka'ene vejaji harura vena pataarohajija pu soha ka'ene mane'a sa'ina 'ahiji Godoni hurisia 'uninamie namijara.

³'Ene pu Mosisi ka'ene Godoni kaukara veji'ini jihuni javaa vejara. 'Ene Remui jihuni javaa 'u'o venareja ika'ina vejara.Raka ka'ene A venujaho ni'ima'ura 'ee mavarasa'ina. Oo Godi Natohwa A harusima'ura ariramaa 'ee Oni 'unama nimaa nimaa 'ee A kwaa kwaa kihipuni Kinia.

⁴'Ene ea irara Oni iha ta'arorahe 'ee A pajuha'ena? A a'asu nimaa arira maa. 'Ene kwaa kwaakija Oni una'i roe oja mahuna. Ara ariramaa ka'ene venujara roe samaahirahuna 'wame vejara.

⁵Uneunecha ikihipuni túna'ijino na niri'i kavume Hu Godi ichá'ini jihuni vu'a Temiporu ka'ene harai vejara'omo akúpa 'ahi namujaho jarausahana.

⁶'E'eme 'ona oji'ina iropu no'o puni ija vaji sisea iropu no'o 'uninamie Temiporu vaji rene roe usevara. 'Ene pu ateha niho'o sajasa'ini same 'ee túra hwana ka'ene korutia vejajino puni túra hwavara.

⁷'Ejume unenu'u 'aho'a mai'o hiji'ina no'ona no'o puni vajijino pini 'ona oji'ina iropu no'o ijihija tevua korutia veji'ina iropu no'o vajihana. Ijí tevua kajaho Godi ka'ene majama hiji'ini jihuni seni itu'o'uma navi'ina.

⁸'Ejumakame Temiporu vajijaho Godoni hanaji'ina 'ee Huni harurijara u'a puna'i itu'o'una paranana. Ea pina Temiporu vaja kajaho niho'o areri pava'eje sisea iropu no'o ka'ene 'ona oji'ina iropu no'o ijipo 'uninamiajaho pa'are'eje iji'a túna'i ea va aruhuna areri re'ena.