Read Mandeali मत्ती 1 Bible Online

मत्ती 1 - Mandeali bible

मत्ती 1

¹यीसू मसीह राजा दाऊदा रे होर अब्राहमा रे बंस रा था। यीसू मसीह रे बापदादेया रे नांऊँआं री सूची येई।

²अब्राहमा रा मह्ठा इसहाक, इसहाका रा मह्ठा याकूब, होर याकूबा रा मह्ठे यहूदा होर तेसरे भाई।

³यहूदा होर तामारा[1] ले पेरेस, होर तेसरा भाई जोरह जम्मे, होर फिरिसा ले हिस्रोन, होर हिस्रोना ले एराम जम्मेया।

⁴एरामा रा मह्ठा अम्मीनादाब, होर अम्मीनादाबा रा मह्ठा नहसोन होर नहसोना रा मह्ठा सलमोन।

⁵सलमोन रा मह्ठा बोअज होर तेसरी माऊआ रा नाऊँ राहाब था। बोअज रा मह्ठा ओबेद होर तेसरी माऊआ रा नाऊँ रुत था। (राहब होर रुत यहूदी लोका मन्झ ले नी थे) होर ओबेदा रा मह्ठा यिसै,

⁶होर यिसै रा मह्ठा राजा दाऊद, होर राजा दाऊदा ले सुलेमान जम्मेया, होर सुलेमाना री माऊ से जन्नानी थी, जेहड़ी दाऊदा किन्हें ब्याह करणे ले पैहले उरिय्याहा री लाड़ी थी।

⁷सुलेमाना रा मह्ठा रहबाम, रहबामा रा मह्ठा अबिय्याह, होर अबिय्याहा रा मह्ठा आसा।

⁸आसा रा मह्ठा यहोसाफात, होर यहोसाफाता रा मह्ठा योराम, होर योरामा रा मह्ठा उज्जियाह।

⁹उज्जियाह रा मह्ठा योताम होर योतामा रा मह्ठा आहाज, होर आहाजा रा मह्ठा हिजकिय्याह।

¹⁰हिजकिय्याह रा मह्ठा मनसिस्ह, मनसिस्हा रा मह्ठा आमोन, होर आमोना रा मह्ठा योसिय्याह।

¹¹योसिय्याहा रा पोत्रू यकुन्याहा होर तेसरे भाई, इस्राएला लोका जो बन्दी बनाई किन्हें बाबेल देसा मन्झ लेई जाणे रे पैहले जम्मी गईरे थे।

¹²बंदी हुई किन्हें बाबेल देस पुज्हा ऐ जाणे ले बाद यीसू मसीह रे जन्मा तका री बापदादे री सूची इंहां ई: यकुन्याहा ले सलतियेल जम्मेया, होर सलतियेल रा मह्ठा जरुब्बाबिल।

¹³जरुब्बाबिल रा मह्ठा अबीहूद, होर अबीहूदा रा मह्ठा एलयाकीम, होर एलयाकीम रा मह्ठा अजोर।

¹⁴अजोरा रा मह्ठा सदोक, होर सदोका रा मह्ठा अखीम, होर अखीमा रा मह्ठा इलीहूद।

¹⁵होर इलीहूदा ले एलीआजर जम्मेया, होर इलीयाजारा ले मत्तान जम्मेया, होर मत्ताना ले याकूब जम्मेया।

¹⁶होर याकूबा ले युसुफ जम्मेया, जेह्ड़ा मरियमा रा लाड़ा था, होर युसुफा ले यीसू जम्मेया जेस जो जे मसीह बोल्हा ऐं।

¹⁷इंहां करी किन्हें अब्राहमा ले राजा दाऊदा तक सारी चौदा पीढ़िया हुई, होर दाऊदा ले बाबेल देसा जो बंदी हुई किन्हें पुजाई जाणे तक चौदा पीढ़ी, होर बंदी हुई किन्हें बाबेल देसा जो पूजाए जाणे रे टैमा ले यीसू मसीह रे जमणे तक चौदा पीढ़िया हुई।

¹⁸यूयाँ गल्ला यीसू मसीहा रा जन्म हूंणे रे पैहले हुई। जेबे तेसरी माऊ मरियमा री मांगणी युसुफा साउगी हुई गई, ता तिन्हारा ब्याह हूणें ले पैहले मरियम पवित्र आत्मा री तरफा ले गर्भवती पाई गई जेबकि से हाल्ले भी कुआरी थी।

¹⁹मरियमा रा बरेड़ युसुफ एक खरा माह्णुं था होर से सब लोका साम्हणें मरियमा जो बदनाम नी करणा चाहन्दा था (क्यूंकि से ब्याह हूणे ले पेहले गर्भवती थी), इधी कठे तिन्हें चुपचाप मांगणी तोड़णे रा फैसला कितेया।

²⁰जेबे से इन्हा गल्ला जो सोचदा लगिरा था, ता परमेसरा रे स्वर्गदूते तेस जो सुपणे मन्झ सुझ्ही किन्हें बोल्या, “हे युसुफ राजा दाऊदा रे बंस, तू मरियमा जो आपणी लाड़ी बनाणे ले मत डर, क्यूंकि जो तेस्सा रे गर्भा मन्झा आ, से पवित्र आत्मा री तरफा ले आ।

²¹तेस्सा एक बच्चा जमणा होर तू तेसरा नांऊँ यीसू रख्या, क्यूंकि तेस आपणे लोका रा तिन्हारे पापा ले उद्धार करणा।”

²²ये सब कुछ इधी कठे हुआ ताकि जो बचन प्रभुऐ यसायाह नबिया रे ज्रीए तेस बच्चे रे जन्मा रे बारे मन्झ बोलिरा था, से पूरा हो। होर यसायाह नबिये ने एह्ड़ा लिख्या,

²³“कि देखा, एक कुआरिया गर्भ धारण करणा होर तेस्सा एक बच्चे जो जन्म देणा, होर तेसरा नांऊँ इम्मानुएल रख्या जाणा,” इम्मानुएल रा मतलब आ “परमेसर आस्सा साउगी।”[2]

²⁴तेबे युसुफ निंद्रा ले जागी गया होर तिन्हें परमेसरा रे स्वर्गदूता रे हुक्मा रे मताबक मरियमा किन्हें ब्याह करी किन्हें तेस्सा जो आपणे घरा जो लई गया।

²⁵होर जेबे तक तेस्से बच्चे जो जन्म नी दितेया तेबे तक युसुफे मरियमा किन्हें कोई सबंध नी रख्या होर युसुफे तेस बच्चे रा नांऊँ यीसू रख्या।