Read Mandeali मत्ती 12 Bible Online

मत्ती 12 - Mandeali bible

मत्ती 12

¹तेस टैम यीसू अरामा रे ध्याड़े नाजा री डोहर्रिया मन्झा ले हुई किन्हें जाया करहा था, होर तेसरे चेले जो भूख लगी, इधी कठे स्यों नाजा री सीरी तोड़ी-तोड़ी किन्हें खांदे लगे।

²फरीसी लोके ये देखी किन्हें तेस किन्हें बोल्या, “तेरे चेले एह्ड़ा काम अरामा रे ध्याड़े करेया करहा ऐं, जो करणा मूसा रे व्यवस्था रे बरखलाफ ठीक नी आ।”

³यीसूए तिन्हा किन्हें बोल्या, “क्या तुस्से पवित्र सास्त्रा मन्झ नी पढ़ेया कि, आस्सा रे बापदादे राजा दाऊदे, जेबे से होर तेसरे साथी भूखे थे तिन्हें क्या कितेया?

⁴से परमेसरा रे घरा मन्झ किधियो गया, होर चढ़ाईरी रोटिया खाध्ही, तिन्हा जो खाणा तेसरे कठे होर तेसरे दोस्ता रे कठे व्यवस्था रे बरखलाफ था, होर सिर्फ याजका जो ही एतो खाणे रा हक था?

⁵या तुस्से मूसा री व्यवस्था मन्झ नी पढ़ेया कि, याजक अरामा रे ध्याड़े मन्दरा मन्झ अरामा रे ध्याड़े री बिधि जो तोड़णे पर भी बेकसूर ठैहरा ऐं।

⁶पर हांऊँ तुस्सा किन्हें सच्च बोल्हा कि, एथी एक एह्ड़ा, जो मन्दरा ले भी बडा आ।

⁷तुस्से जाणहां ऐं कि पवित्र सास्त्रा मन्झ एता रा मतलब क्या आ, ‘हांऊँ चाहां कि तुस्से दूजेया पर दया करो एता रे बजाय कि तुस्से मेरे कठे बलिदान चढ़ाओ,’ ता तुस्से मेरे बेकसूर चेलेया जो दोसी नी मन्नदे।[33]

⁸होर हांऊँ माह्णुं रा मह्ठा अरामा रे ध्याड़े रा भी प्रभु आ।”

⁹तेथी ले चली किन्हें यीसू तिन्हारी यहूदी सभा मन्झ आया।

¹⁰होर तेथी एक माह्णुं था, जेसरा हाथ बेजान हुई चुकिरा था; होर यहूदी सभा रे लोके यीसू पर दोस ल्गाणे रे कठे तेस ले पूछेया कि, “व्यवस्था रे मताबक अरामा रे ध्याड़े तेस जो ठीक करणा सही आ की नी?”

¹¹यीसूए तिन्हा किन्हें बोल्या, “उदाहरणा कठे तुस्सा मन्झ ले केसी एकी वाले एक भेड हो, होर से अरामा रे ध्याड़े गढे मन्झ पई जाए, तुस्सा से पक्का बचाणी।

¹²भला, माह्णुं री कीमत भेडा ले कितनी बढ़ी किन्हें ई, इधी कठे अरामा रे ध्याड़े भलाई करणा व्यवस्था रे मताबक ठीक आ।”

¹³तेबे यीसूए तेस माह्णुं किन्हें बोल्या, “आपणा हाथ अगे कर।” तिन्हें आपणा हाथ अगे कितेया, होर से हाथ दूजे हाथा साहीं खरा हुई गया।

¹⁴तेबे फरीसी लोके मिली किन्हें यीसू रे बरखलाफ कठा हुई किन्हें चर्चा करदे लगे कि, यीसू जो किहाँ खत्म करहे।

¹⁵ये जाणी किन्हें यीसू तेथी ले चली गया, होर बौह्त सारे लोक तेसरे पीछे हुई गये, होर तिन्हें सभ ठीक करी दिते।

¹⁶होर तिन्हा किन्हें बोल्या, “खबरदार केसियो देख्या दसदे कि हांऊँ कुणहां?”

¹⁷ताकि जो बचन परमेसरे यसायाह नबी रे ज्रीए बोल्या गईरा था, से पूरा हो:

¹⁸“देखा, ये मेरा सेऊआदार आ, जो मैं चुणिरा; मेरा प्यारा, जेस ले मेरा मन खुस आ: मां आपणा आत्मा तेस अंदर पाई देणा; होर तेस जाति-जाति रे लोका मन्झ न्याया रा प्रचार करणा।

¹⁹तेस ना लड़ाई करणी, होर ना रौला पाणा; होर ना बजारा मन्झ केसिया तेसरी अवाज सुणनी।

²⁰तेस कुच्ली रे सरकंडे नी तोड़णे; होर धुँआ छाडदी हुई बत्ती नी बुझाणी, जेबे तक न्याय प्रबल नी हुई जाए।

²¹होर जाति-जातिया रे लोका तेस पर आस रखणी।”

²²तेबे लोके एक आदमी जो काणा होर टाटा था जेस मन्झ जे दुस्टात्मा थी, यीसू वाले ल्यान्देया; होर यीसूए से ठीक कितेया; होर से आदमी बोल्दा होर देख्दा लग्या।

²³एता पर सभ लोक हरान हुई किन्हें बोल्दे लगे, “क्या ये राजे दाऊदा रा मह्ठा?”

²⁴पर फरीसी लोके ये सुणी किन्हें बोल्या, “सैतान दुस्टात्मा रा मुखिया आ से तेसरे सहारे दुस्टात्मा काढा आ।”

²⁵यीसूए तिन्हारे मना री गल्ला जाणी किन्हें तिन्हा किन्हें बोल्या, “जेस केसी राजा मन्झ फूट पई जाहीं, से उजड़ी जाहाँ, होर जेस केसी गांऊँआं या घराने मन्झ फूट पई जाहीं, तेस नी टिकणा।

²⁶होर अगर सैतान ई सैताना जो काढे, ता से आपणे ही बरखलाफ हुई गया, फेरी तेसरा राज किहाँ बणी रही सक्हा।

²⁷भला, अगर हांऊँ सैताना री मददा किन्हें दुस्टात्मा जो काढा, ता तुस्सा रे चेले केसरी मददा किन्हें दुस्टात्मा काढा ऐं? इधी कठे तिन्हा ई तुस्सा रा न्याय करणा।

²⁸पर अगर हांऊँ परमेसरा री आत्मा री सहायता ले दुस्टात्मा जो काढा, ता परमेसरा रा राज तुस्सा रे बीचा मन्झ आई पुजीरा।

²⁹या किहाँ कोई आदमी सैताना साहीं केसी पैहलवाना रे घरा मन्झ बड़ी किन्हें तेसरी चीजा जो चोरी सक्हा, जेबे तक कि से पैहले तेस पैहलवाना जो बान्ही नी ले? होर तेबे तेस तेसरा घरा लुटी लैणा।

³⁰जो मेरे साउगी नी आ, से मेरे व्रोधा मन्झ आ, होर जो मेरे साउगी काम नी करदा, से मेरे बरखलाफ काम करहा।

³¹इधी कठे हांऊँ तुस्सा किन्हें बोल्हा कि, माह्णुं रा सब किस्मा रा पाप होर जो बदनामी स्यों करहे से माफ किती जाणी, पर पवित्र आत्मा री निंदा माफ नी किती जाणी।

³²जो कोई माह्णुं रे मह्ठे रे बारे मन्झ कोई गल बोल्घा, तेसरा ये अपराध माफ कितेया जाणा, पर जो कोई पवित्र आत्मा रे बरखलाफ मन्झ कुछ बोल्घा, तेसरा अपराध ना ता एस लोका मन्झ होर ना परलोका मन्झ माफ कितेया जाणा।”

³³“एक डाल फला ले ई पछ्याणया जाहाँ। अगर डाल खरा, ता तेसरे फल भी खरे हूंणे, अगर डाल बुरा, ता तेसरे फल भी बुरे हूंणे।

³⁴तुस्से लोक जैहर्ले कीड़े रे बच्चे साहीं ऐं, तुस्से बुरे हुई किन्हें किहाँ खरी गल्ला बोली सक्हा ऐं? क्यूंकि जो मना मन्झ भरीरा, सेई मुंहा पर आई जाहाँ।

³⁵खरा माह्णुं मना रे भण्डारा ले खरी गल्ला काढा; होर बुरा माह्णुं मना ले भण्डार ले बुरी गल्ला काढा।

³⁶होर हांऊँ तुस्सा किन्हें बोल्हा कि, जो-जो निकम्मी गल्ला माह्णुं बोल्घे, न्याय रे ध्याड़े तिन्हा हर एक गल्ला रा लेखा देणा।

³⁷क्यूंकि तुध आपणी गल्ला री वजहा ले ई धर्मी होर आपणी गल्ला री वजहा ले ई दोसी बणना।”

³⁸होर एक ध्याड़े कई व्यवस्था स्खाणे वाल़े होर फरीसी लोके तेस किन्हें बोल्या, “हे गूरू, आस्से तेरे ले एक चिन्ह देखणा चाहें, ताकि आस्सा जो पता लगे कि तू परमेसरे ई भेजिरा।”

³⁹यीसूए तिन्हा जो जवाब दितेया कि, “एस युगा रे बुरे होर व्यभिचारी लोक चिन्ह तोप्हा ऐं, पर जेह्ड़ा योना नबी रे साउगी हुआ तेस चिन्हा जो छाडी किन्हें कोई होर चिन्ह तिन्हा जो नी दितेया जाणा।

⁴⁰योना नबी तीन रात होर तीन ध्याड़े बडी मछिया रे पेटा मन्झ रैहया, तिहां ईं मां माह्णुं रे मह्ठे भी तीन रात होर तीन ध्याड़े कब्रा रे अंदर रैंह्णां।

⁴¹नीनवे रे लोका न्याय रे ध्याड़े एस्सा पीढ़ी रे लोका साउगी उठी किन्हें स्यों दोसी ठैहराणे। क्यूंकि तिन्हें योना नबी रा प्रचार सुणी किन्हें, पाप करणा छाडी दितेया। होर ऐथी से आ जो योना ले बडा आ, फेरी भी तुस्से पाप करणा नी छाडदे।

⁴²इस्राएल देसा री दक्षिण दिसा ले सेबा नांऊँआं री राणिया न्याय रे ध्याड़े एस्सा पीढ़ी रे लोका साउगी उठी किन्हें स्यों दोसी ठैहराणे, क्यूंकि से सेबा राणी सुलेमाना राजे रा ज्ञान सुणने रे कठे बड़े दुरा ले आई। होर एथी एक एह्ड़ा आ जो सुलेमान राजे ले भी बडा आ, पर फेरी भी तुस्से पाप करणा नी छाडेया।”

⁴³“जेबे दुस्टात्मा माह्णुं मन्झा ले निकली जाहीं, ता से सुक्की जगहा मन्झ अराम टोल्हा ई, होर अराम नी पांदी।

⁴⁴तेबे से आपु किन्हें बोल्हा ई कि, ‘मां तेस माह्णुं मन्झ जेथी ले हांऊँ निकली री थी, तेथी मां वापस चली जाणा,’ होर से आई किन्हें तेस माह्णुं री जिन्दगी जो खाली, साफ-सुथरी होर सजरी-धजरी कमरे साहीं पाहीं।

⁴⁵तेबे से दुस्टात्मा जाई किन्हें आपणे ले भी ज्यादा बुरी सात दुस्टात्मा जो आपणे साउगी ल्याहूंआं ईं, होर से तेस माह्णुं अंदर आई किन्हें तेथी रैंहयां ईं, होर तेस माह्णुं री पिछली हालत पैहले ले भी बुरी हुई जाहीं। एस्सा पीढ़ी रे बुरे लोका री हालत भी एह्ड़ी ई हूणीं।”

⁴⁶जेबे यीसू भीड़ा किन्हें गल्ला करदा ई लगीरा था, ता तेसरी माऊ होर भाई बाहर खड़ीरे थे, होर तेस किन्हें गलबात करणा चाहें थे।

⁴⁷केसिए यीसूए किन्हें बोल्या, “देख तेरी माऊ होर तेरे छोटे भाई बाहर खड़ीरे, होर तेरे साउगी गलबात करणा चाहें।”

⁴⁸तेबे यीसूए तेस बोलणे वाल़े जो जवाब दितेया, “कुणहीं मेरी माऊ? होर कुणहें मेरे भाई?”

⁴⁹होर तिन्हें आपणे चेले वखा जो आपणे हाथ करी किन्हें बोल्या, “मेरी माऊ होर मेरे भाई ता यों ऐं।

⁵⁰क्यूंकि जो कोई मेरे स्वर्गीय बापू री इच्छा पर चले, सेई मेरा भाई, होर मेरी बैहण होर मेरी माऊ ई।”