Read Mandeali मत्ती 13 Bible Online

मत्ती 13 - Mandeali bible

मत्ती 13

¹कुछ टैमा बाद तेस ई ध्याड़े यीसू घरा ले निकली किन्हें गलील समुद्रा रे बाढे जाई किन्हें बैठी गया।

²होर एह्ड़ी बडी भीड़ तेस वाले कठी हुई गयी होर से किस्ती पर चढ़ी किन्हें बैठी गया, होर सारी भीड़ बाढे खड़ीरी रही।

³होर से तिन्हा जो उदाहरणा मन्झ बौह्त सारी गल्ला बोल्दा लगेया कि, “सुणा, एक किसान बेजा बाह्णे रे कठे डोर्हीया जो गया।

⁴बाहन्दे टैम कुछ बेजा पैंडे रे बाढे पये होर चिड़ुऐ आई किन्हें स्यों बेजा चुगी लये।

⁵कुछ पात्थरा वाली जमीना पर पये, जेथी तिन्हा जो भरपूर माटा नी मिल्या होर गैहराई मन्झ माटा नी मिलणे री वजहा ले स्यों छोड़े ई जम्मी गये।

⁶पर सूरज निकल्दे ही स्यों फुख्ही गये, होर जड़ नी पकड़णे री वजहा ले स्यों सुक्की गये।

⁷कुछ झाकड़ा मन्झ पई गये, होर झाकड़े बढ़ी किन्हें स्यों दबाई दिते।

⁸पर कुछ बांकी जमीना पर पया, होर बौह्त फलेया, केसिए सौ गुणा, केसिए साठ गुणा, केसिए तीह गुणा।

⁹होर यीसूए बोल्या, जो मेरी गल्ला सुणदा लगीरा, से बड़े ध्याना किन्हें सुणें।”

¹⁰होर चेले यीसू वाले आई किन्हें बोल्या, “तू तिन्हा किन्हें उदाहरणा मन्झ किधियो गल्ला करहा?”

¹¹होर यीसूए बोल्या कि, “तुस्सा जो स्वर्गा रे राजा रे भेदा री समझ दितीरी, पर तिन्हा जो नी।

¹²क्यूंकि जेह्ड़े मेरी गल्ला जो सुणे, तिन्हा जो ज्यादा समझ आऊणीं; पर जेह्ड़े लोक नी सुणदे लगिरे तिन्हा वाले जो भी ज्ञान आ; से तिन्हा ले लेई लितेया जाणा।

¹³हांऊँ तिन्हा किन्हें उदाहरणा मन्झ इधी कठे गल्ला करहा, क्यूंकि स्यो मेरे कामा जो देख्दे हुये भी नी देख्दे; होर मेरी गल्ला जो सुणदे हुये भी नी सुणदे; होर नी समझ्दे।

¹⁴होर तिन्हारे बारे मन्झ यसायाह नबी री ये भविस्यवाणी पूरी हुंहाँ ई: ‘कि तुस्सा काना ले ता सुणना, पर समझणा नी; होर हाखिया ले ता देखणा, पर तुस्सा जो नी सूझणा।

¹⁵क्यूंकि इन्हा लोका रा मन सुस्त हुई गईरा, होर स्यों काना ले ऊँचा सुणहां ऐं, होर तिन्हें आपणी हाखिया बन्द करी लईरी; केथी एह्ड़ा नी हो कि स्यों हाखिया ले देखे, होर काना ले सुणे, होर मना ले समझे, होर फिरी जाए, होर हांऊँ तिन्हा जो ठीक करी देऊं।’

¹⁶पर धन्य ई तुस्सा री हाखिया, इधी कठे स्यों देख्हा ई, होर तुस्सा रे कान, इधी कठे स्यों सुणहां ऐं।

¹⁷क्यूंकि हांऊँ तुस्सा किन्हें सच्च बोल्हा कि, बौह्त नबिये होर धर्मिए चाहेया कि स्यों गल्ला देखे जो गल्ला तुस्से देख्हा ऐं, पर नी देखी सके; होर स्यों गल्ला सुणें, जो गल्ला तुस्से सुणहां ऐं; पर नी सुणी सके।”

¹⁸“एता रे कठे तुस्से बेजा बाह्णे वाल़े रा उदाहरण सुणा।

¹⁹जो कोई राज्या रा बचन सुणी किन्हें नी समझ्दा, तेसरे मना मन्झ जो कुछ बाहिरा था, तेता जो से दुस्ट सैतान आई किन्हें लेई जाहाँ। ये एह्ड़े लोक ऐ जो पैंडे रे बाढे बाहिरे थे।

²⁰होर कुछ लोक तेस बेजे साहीं ऐं जेह्ड़े गट्टे वाली जमीना पर बाही जाये, यूं स्यों माह्णुं ऐं, जो परमेसरा रे बचना जो सुणी किन्हें झटपट खुसी किन्हें मन्हां ऐं।

²¹पर आपणे अंदर जड़ नी पकड़णने री वजहा ले स्यों थोह्ड़े ही ध्याड़े तक विस्वास रख्हा ऐं, होर बचना री वजहा ले स्यों दुःखा रे टैमा बचना पर विस्वास करना छाडी देहां ऐं।

²²होर कुछ लोक तेस बेजे साहीं ऐं जेह्ड़े झाकड़ा मन्झ बाहिरे, यूं स्यों माह्णुं ऐं, जिन्हें परमेसरा रा बचन सुणेया, होर एस संसारा री चिन्ता, पैसे रे धोखा मन्झ फसी किन्हें बचना मन्झ बढ़ने ले रुकी गये, होर स्यों परमेसरा री इच्छा पर नी चली पांदे।

²³होर कुछ लोक तेस बेजे साहीं ऐं जो बढ़िया जमीना मन्झ बाहे, यूं स्यों माह्णुं ऐं, जो परमेसरा रे बचना जो सुणी किन्हें समझ्हे, होर परमेसरा री इच्छा रे मताबक करहा ऐं, यूं तेस फसला साहीं ऐं, जो सौ गुणा, साठ गुणा, होर तीह गुणा फल ल्याहूहाँ ऐं।”

²⁴यीसूए तिन्हा जो एक होर उदाहरण दसेया कि, “स्वर्गा रा राज एह्ड़ा आ।” केसी किसाने आपणी डोहर्रिया मन्झ बढ़िया बेजा बाह्या।

²⁵पर जेबे लोक निंद्रा मन्झ थे ता तेसरा दुस्मण आई किन्हें कणका रे बेजे मन्झ जंगली बेजा बाही किन्हें चली गया।

²⁶जेबे बेजे मन्झा ले टियूऐ फूटे होर सीरी लगी, ता जंगली बेजे रे दाणे भी बढ़े।

²⁷एता पर घर माल्का रे सेऊआदारे आई किन्हें तेस किन्हें बोल्या, “हे माल्का, क्या तुस्से आपणी डोहर्रिया मन्झ बढ़िया बेजा नी बाहिरा था? फेरी जंगली बेजे रा डाल तेता मन्झ केथी ले आये?”

²⁸माल्के तिन्हा किन्हें बोल्या, “ये केसी दुस्मणा रा काम आ। सेऊआदारे तेस किन्हें बोल्या, ‘क्या तुस्सा री इच्छा ई कि, आस्से जाई किन्हें तिन्हा जंगली दाणे जो पट्टी ले?’

²⁹तिन्हें बोल्या, ‘एह्ड़ा मत करा, केते एह्ड़ा नी हो कि जंगली बेजे रे डाल पट्टदे साउगी कणक भी पट्ठी जाए।

³⁰कटाई तक दुंहीं जो साउगी-साउगी बढ़ने देआ, होर कटाई रे टैमा मां कटाई करणे वाल़े किन्हें बोलणा; पैहले जंगली बेजे रे डाल पट्टी किन्हें फुकणे रे कठे तिन्हारे भारे बान्ही लऊआ, होर कणका जो मेरे गोदामा मन्झ कठा करा।’”

³¹यीसूए तिन्हा जो एक होर उदाहरण दितेया कि, “स्वर्गा रा राज राई रे एक दाणे साहीं आं, जेस जो केसी माह्णुंऐ लई किन्हें आपणी जमीना मन्झ बाही दितेया।

³²से राई रा दाणा सभ बेजे ले छोटा ता हाया पर जेबे से बाह्या जाहाँ तेबे से सभ छोटे बूटे ले बडा हुई जाहाँ; होर एह्ड़ा डाल बणी जाहाँ कि, आसमाना रे चिड़ुए आई किन्हें तेता रे पांगे पर बसेरा करहा ऐं।”

³³यीसूए एक होर उदाहरण तिन्हा जो दसेया कि, “स्वर्गा रा राज एह्ड़ा आ। केसी जनानिये स्जेड़ा लई किन्हें बौह्त सारे आटे मन्झ म्लाई दितेया, होर हुंदे-हुंदे से सारा आटा सीजी गया।”

³⁴यीसूए तिन्हा लोका जो उदाहरण बोली किन्हें सब कुछ स्खाया। जेबे भी यीसूए तिन्हा किन्हें बोल्या तिन्हें हमेसा एह्ड़े उदाहरण दिते।

³⁵ताकि जो बचन नबी रे ज्रीए बोल्या गईरा था, से पूरा हो कि: “मां तुस्सा किन्हें उदाहरणा मन्झ बोलणा, मां स्यों गल्ला जो संसारा री सुर्हूआता ले लुख्ही री रही स्यों जाहिर करणी।”

³⁶तेबे यीसू भीड़ा जो छाडी किन्हें घरा जो आया, होर तेसरे चेले तेस वाले आई किन्हें बोल्या, “डोहर्रिया रे जंगली बेजे रा उदाहरण आस्सा जो समझाई दे।”

³⁷यीसूए तिन्हा जो जवाब दितेया कि, “खरे बेजे रा बाह्णे वाल़ा माह्णुं रा मह्ठा जो बोल्हा ऐं, से हांऊँ आं।

³⁸डोहरिया संसार रे लोक ई, खरा बेजा परमेसरा रे राज्या रे लोक ऐं। होर जंगली बेजा स्यों लोक ऐं जो दुस्ट सैताना रे।

³⁹जिन्हें दुस्मणे जे स्यों बाहे से सैतान आ; कटाई तेस टैमा जो दसा जेबे संसारा रा अंत हूंणा आ: होर काटणे वाल़े स्वर्गदूत ऐं।

⁴⁰इधी कठे जिहां जंगली बेजे रे दाणे कठे किते जाहें होर फुकी दिते जाहें तिहां ई संसारा रे आखरी मन्झ हूंणां।

⁴¹मां माह्णुं रे मह्ठे आपणे स्वर्गदूत भेजणे, होर तिन्हा मेरे राजा मन्झा ले सभ पाप करणे वाल़े होर गन्दे काम करणे वाल़े काढी देणे।

⁴²होर स्वर्गदूता स्यों आगी रे गड्ढे मन्झ पाई देणे, तेथी रोणा होर दांत पिसणा हूंणां।

⁴³तेस टैम धर्मी माह्णुंआं आपणे बापू परमेसरा रे राजा मन्झ सूरजा साहीं चमकणा। होर यीसूए बोल्या, जो मेरी गल्ला सुणदा लगीरा, से बड़े ध्याना किन्हें सुणें।”

⁴⁴“फेरी स्वर्गा रा राज एह्ड़ा आ। एकी माह्णुं जो केसी डोर्ही मन्झ ल्कोई रा खजाना मिल्या, जेस जो तिन्हें माह्णुंऐ ल्कोई दितेया, होर खुसी रे मारे जाई किन्हें होर आपणा सब कुछ बेची किन्हें से डोर्ही खरीदी लई।”

⁴⁵“फेरी स्वर्गा रा राज एह्ड़ा आ। एक वपारी था जो खरे मोतिया री तोपा मन्झ था।

⁴⁶तेबे तेस जो एक कीमती मोती मिल्या होर तिन्हें जाई किन्हें आपणा सब कुछ बेची किन्हें से मोती खरीदी लया।”

⁴⁷“फेरी स्वर्गा रा राज तेस बडे जाला साहीं आं, जो समुद्रा मन्झ पाईरा था होर हर एक किस्मा री मछिया कठा करी किन्हें लई आया।

⁴⁸होर जेबे से जाल भर्ही गया, ता स्यों जाल खिन्जी किन्हें बाढे लई आये, होर तिन्हें बैठी किन्हें खरी-खरी मछिया ता भांडे मन्झ कठी किती, होर बेकार-बेकार सटी दिती।

⁴⁹संसारा रे आखरी मन्झ एह्ड़ा ही हूंणां; स्वर्गदूता आई किन्हें दुस्ट लोक धर्मी लोका ले लग करणे, होर दुस्ट लोक आगी रे गड्ढे मन्झ पाई देणे।

⁵⁰तेथी रोणा होर दांत पिसणा हूंणां।”

⁵¹तेबे यीसूए चेले ले पूछ्या, “क्या तुस्से ये सब उदाहरण समझी गये?” चेले यीसू किन्हें बोल्या, “हां, आस्से समझी गये।”

⁵²यीसूए तिन्हा किन्हें बोल्या, “इधी कठे हर एक व्यवस्था स्खाणे वाल़े जो स्वर्गा रे राज्या रा चेला बणी गईरा, से तेस घरा रे माल्का साहीं आं जो आपणे भण्डारा ले नौंईं होर पुराणी चीजा काढा।”

⁵³जेबे यीसू सभ उदाहरण बोली चुक्केया, ता से तेथी ले चली गया।

⁵⁴होर आपणे देस नासरत गांऊँआं मन्झ आई किन्हें तिन्हारी यहूदी सभा मन्झ तिन्हा जो एह्ड़ा उपदेस देंदा लग्या, स्यों हरान हुई किन्हें बोल्दे लगे कि, “एस जो ये ज्ञान केथी ले मिल्या, होर ये सामर्था रे काम किहाँ करहा?

⁵⁵आस्से एस जो जाणहां ऐं कि ये सेई तरखाण आ। होर एसरी माऊआ रा नांऊँ मरियम होर एसरे भाईया रे नांऊँ याकूब होर यूसुफ होर समौन होर यहूदा ऐं।

⁵⁶होर एसरी सभ बैहणीया एथी आस्सा रे बीच भरा रैंहयां ईं, फेरी इन्हें ये सभ गल्ला केथी ले सीखी?”

⁵⁷एस तरीके किन्हें तिन्हें यीसू पर विस्वास नी कितेया, इधी कठे यीसूए तिन्हा किन्हें बोल्या, “नबी आपणा गांऊँ आपणे घरा जो छाडी किन्हें हर जगहा आदर पांहा।”

⁵⁸होर तिन्हें तेथी तिन्हारे विस्वास नी करणे री वजहा ले बौह्त सामर्था रे काम नी किते।