Read Mandeali मत्ती 14 Bible Online

मत्ती 14 - Mandeali bible

मत्ती 14

¹तेस टैम चौथाई देसा रे गलील जिल्ले रा राजा हेरोदेस राजे यीसू रे सामर्था रे कामा रे बारे मन्झ सुणेया।

²होर तिन्हें आपणे सेऊआदारा किन्हें बोल्या कि, “यहून्ना बपतिस्मा देणे वाल़ा मरिरे मन्झा ले जिउंदा हुई गईरा, इधी कठे यीसू ले सामर्था रे काम हुंहाँ ऐं।”

³हेरोदेस राजे ये इधी कठे सोच्या, क्यूंकि हेरोदेसे आपणे भाई फिलिप्पुसा री लाड़ी हेरोदियासा किन्हें ब्याह करी लईरा था, जेब्की तेसरा भाई फिलिप्पुस हल्ली तक जिउंदा था, होर यहून्ना बपतिस्मा देणे वाल़ा हमेसा ये गल हेरोदेसा जो बोल्दा रैंहयां था कि, जो तैं कितेया से परमेसरा री व्यवस्था ले बरखलाफ आ! तेबे, हेरोदियासा री खुसी री वजहा ले हेरोदेसे आपणे स्पाहीया जो यहून्ना जो गिरफ्तार करणे रा हुक्म दितेया, होर तिन्हें स्पाहिये से जंजीरा किन्हें बान्ह्या होर जेल्हा मन्झ पाई दितेया।

⁴क्यूंकि यहून्ना तेस किन्हें बोल्या था कि, एसरी लाड़ी रखणा मूसा री व्यवस्था रे बरखलाप आ।

⁵होर हेरोदेस यहून्ना बपतिस्मा देणे वाल़े जो मारी देणा चाहां था, पर से लोका ले डरहा था, क्यूंकि स्यों तेस जो नबी मन्हां ऐं थे।

⁶पर जेबे हेरोदेस राजे रा जन्म ध्याड़ा आया, ता हेरोदियासा री मह्ठीऐ समारोहा मन्झ नाच दसी किन्हें हेरोदेस राजा खुस करी दितेया।

⁷इधी कठे तिन्हें कसम खाध्ही कि, “जो कुछ तू मेरे ले मान्घगी, मां तुजो देणा।”

⁸आपणी माऊआ री सलाह मनी किन्हें तेस्से बोल्या, “यहून्ना बपतिस्मा देणे वाल़े रा मूंड एक थाली मन्झ मंगवाई दे।”

⁹राजा हेरोदेस दु:खी हुआ, पर आपणी कसमा री वजहा ले, होर साउगी बैठी किन्हें खाणा खाणे वाल़े री वजहा ले तिन्हें हुक्म दितेया कि, तेस्सा मह्ठी री इच्छा पूरी करी दिती जाए।

¹⁰होर जेल्हा मन्झ लोक भेजी किन्हें यहून्ना बपतिस्मा देणे वाल़ा रा मूंड कटवाई दितेया।

¹¹होर तिन्हें तेसरा मूंड थाली मन्झ ल्यान्देया, होर मह्ठी जो दितेया; होर मह्ठीये तेसरा मूंड आपणी माऊआ वाले लई गई।

¹²होर यहून्ना रे चेले आई किन्हें तेसरी ल्हास लिती होर दबाई दिती, होर जाई किन्हें यीसू जो खबर दिती।

¹³यहून्ना रे बारे मन्झ सुणने ले बाद यीसूए किस्तिया पर चढ़ी किन्हें तेथी ले केसी सुनसान जगहा मन्झ कल्हे रैहणे रे कठे चली गया। पर लोक ये सुणी किन्हें यीसू तेथी आ स्यों गांऊँआं ले पैदल चली किन्हें तेसरे साउगी चली पये।

¹⁴यीसूए किस्ती ले निकली किन्हें एक बडी भीड़ देखी। तेस जो तिन्हा पर तरस आई, होर तिन्हें तिन्हारे ब्मार ठीक किते।

¹⁵जेबे सांझ हुई, ता तेसरे चेले तेस वाले आई किन्हें बोल्दे लगे, “ये ता सुनसान जगहा ई होर देर हुएया करहा ई। लोका जो भेजी देआ कि स्यों बस्ती मन्झ जाई किन्हें आपणे कठे खाणा खरीदी ले।”

¹⁶यीसू ये तिन्हा किन्हें बोल्या, “तिन्हारा जाणा जरूरी नी आ! तुस्से ई इन्हा जो खाणे जो देआ।”

¹⁷तिन्हें तेस किन्हें बोल्या, “एथी आस्सा वाले पांज रोटी होर दो मछिया जो छाडी किन्हें होर कुछ नी हाया।”

¹⁸होर तिन्हें बोल्या, “तिन्हा जो एथी मेरे वाले लई आऊआ।”

¹⁹तेबे यीसूए लोका जो घाहा प्रयाल्हे बठयाल्णे जो बोल्या। होर तिन्हें पांज रोटिया होर दो मछिया लई किन्हें स्वर्गा वखा जो देखी किन्हें परमेसरा रा धन्यावाद कितेया, होर रोटिया तोड़ी-तोड़ी किन्हें चेले जो दिती होर चेले लोका जो बांडी।

²⁰होर सब खाई किन्हें रजी गये। होर खाणे ले बाद बी रोटी होर मछिया बची गई, होर तिन्हें बचीरे रोटिया री भर्हिरी बारा छड़ोल्लू चक्के।

²¹होर तेथी खाणे वाल़े स्यों पांज हज़ार मर्ध थे पर तिन्हें ज्नानिया होर बच्चे नी गिणीरे थे

²²होर यीसूए झटपट आपणे चेले जबरदस्ती किस्ती पर चढ़ाए, ताकि स्यों तेस ले पैहले गलील समुद्रा रे पारली तरफ चली जाए, जेबे तक की से लोका जो भेजी नी दे।

²³लोका जो भेजणे ले बाद यीसू प्रार्थना करणे रे कठे कल्हे जे प्हाड़ा पर चढ़ी गया। होर जेबे सांझ हुई ता से तेथी कल्हा ही था।

²⁴तेस टैम चेले जेस किस्ती पर थे से किस्ती समुद्रा रे बीच डगमगाया करहा ई थी, क्यूंकि बागरा रा असर तिन्हा पर भारी था।

²⁵होर से भ्यागा तीन बजे रे करीब से समुद्रा पर चली किन्हें तिन्हा वाले आया।

²⁶चेले तेस जो समुद्रा पर चल्दे हुए देखी किन्हें डरी गये! होर स्यों बोल्दे लगे कि, “से भूत आ,” होर डरा रे मारे स्यों चिंगा पान्दे लगे।

²⁷यीसूए झटपट तिन्हा किन्हें गल्ला किती, होर बोल्या, “हिम्मत रखा: हांऊँ यीसू आ, डरा मत।”

²⁸पतरसे यीसू जो जवाब दितेया, “हे प्रभु, अगर ये तुस्से ऐं, ता मुंजो आपणे वाले पाणी पर चली किन्हें आऊणें रा हुक्म देआ।”

²⁹यीसूए बोल्या, “आऊ!” तेबे पतरस किस्ती ले उतरी किन्हें यीसू वाले जाणे रे कठे पाणी पर चल्दा लग्या।

³⁰पर जेबे पतरसे तूफाना री वजहा ले उठदी तेज लैहरा देखी ता से बौह्त डरी गया, होर जेबे पतरस डुबदा लग्या, ता तिन्हें चिंगी किन्हें बोल्या, “हे प्रभु, मुंजो बचाई ले।”

³¹यीसूए झटपट आपणा हाथ बढ़ाई किन्हें से पकड़ी लया, होर तेस किन्हें बोल्या, “हे कम विस्वास करणे वाल़े, तैं किधियो सक कितेया?”

³²जेबे स्यों किस्ती पर चढ़ी गये, ता बागर रुकी गई।

³³होर जो किस्ती पर थे, तिन्हें तेस जो अराधना करी किन्हें बोल्या, “सच्चे, तू परमेसरा रा मह्ठा आ।”

³⁴होर यीसू समुद्रा रे पार करी किन्हें गन्नेसरत ईलाके मन्झ पूजी गया।

³⁵होर तेथी रे लोके यीसू पछयाणी लया, होर ओरले परले सारे ईलाके मन्झ खबर किती, होर सभ लोक आपणे-आपणे ब्मार ठीक करणे रे कठे तेस वाले ल्यांदे।

³⁶होर स्यों तेस ले अर्ज करहा ऐं थे कि, ब्मार लोका जो तेसरे कपड़े रा पल्लू ई छूणे दे। होर जितने तेस जो छुहां ऐं थे, स्यों सब ठीक हुई जाहें थे।