Read Mandeali मत्ती 20 Bible Online

मत्ती 20 - Mandeali bible

मत्ती 20

¹“स्वर्गा रा राज एस उदाहरणा साहीं आं, एक माल्क तड़के-तड़के बाहर निकल्या, ताकि आपणी अंगूरा रे बगीचे मन्झ मजदूर लगाए।

²होर तिन्हें मजदूरा जो एक ध्याड़े री कमाई देणे रे बारे गल किती, होर तिन्हें स्यों आपणे अंगूरा रे बगीचे मन्झ काम करणे रे कठे भेजे।”

³“होर से भ्यागा नौ बजे बाहर गया, होर तिन्हें कुछ मजदूरा जो बेकार खड़ीरे देख्या।

⁴होर अंगूरा रे बगीचे रे माल्के मजदूरा किन्हें बोल्या, ‘तुस्से भी अंगूरा रे बगीचे मन्झ जाऊआ, मां तुस्सा जो ठीक मजदूरी देणी।’ होर स्यों भी जाई किन्हें बगीचे मन्झ काम करदे लगे।

⁵होर से ध्याड़ीया रे तीन बजे दबारा बाहर गया, होर कुछ होर मजदूर भी तिहां ही कामा पर लगाये।

⁶फेरी एक घंटा बाकि बचणे पर अंगूरा रे बगीचे रा माल्क पांज बजे दबारा बाहर गया। होर तिन्हें कुछ होर मजदूर भी बाहर खड़ीरे देखे। होर तिन्हें तिन्हा किन्हें बोल्या, ‘तुस्से पुरे ध्याड़े एथी बेकार किधियो खड़ीरे रहे?’

⁷तिन्हें माल्का किन्हें बोल्या, क्यूंकि आस्सा जो केसिए मजदूरी पर नी ल्गाया। अंगूरा रे बगीचे रे माल्के तिन्हा किन्हें बोल्या, ‘तुस्से भी अंगूरा रे बगीचे मन्झ जाई किन्हें काम करा।’”

⁸“सांझ्के टैमा अंगूरा रे बगीचे रे माल्के आपणे भण्डारी किन्हें बोल्या, ‘मजदूरा जो साद होर जो बादा मन्झ आईरे मजदूर ये तिन्हा ले लई किन्हें पैहले वाल़े मजदूरा तक सभी जो मजदूरी देआ।’

⁹होर जो पांज बजे आई किन्हें एक घंटे रे भरा रे कठे मजदूरी कितरी थी, जेबे स्यों आये, ता तिन्हा हर एकी जो पूरी एक ध्याड़े री कमाई दिती।

¹⁰जो तड़के-तड़के आईरे थे, तिन्हें ये समझ्या कि, आस्सा जो ज्यादा मिलणा; पर तिन्हा जो भी एक ही ध्याड़े री मजदूरी री कमाई मिली।

¹¹होर जेबे तिन्हा जो तिन्हारी कमाई मिली, ता स्यों माल्का के सिकायत करदे लगे,

¹²‘जो पांज बजे आईरे थे तिन्हें सिर्फ एक ई घंटा काम कितेया। होर आस्से जे पूरी ध्याड़ी रा भार चक्या होर चुभती गर्मी सैहन किती, तुस्से इन्हा जो आस्सा रे बराबर कमाई दिती।’

¹³पर बगीचे रे माल्के तिन्हा मन्झा ले एकी जो जवाब दितेया कि, ‘हे दोस्त, हांऊँ तुस्सा किन्हें कोई गलत नी कितेया; मैं तुस्सा साउगी एक पुरे ध्याड़े री मजदूरी री कमाई रे बारे मन्झ गल कितरी थी।

¹⁴आपणी कमाई लेई किन्हें चली जा। मेरी इच्छा येई कि जितनी कमाई मैं तुजो दिती, तितनी ई कमाई मां तिन्हा जो भी देणी स्यों जे बादा मन्झ काम करणे रे कठे आईरे थे।

¹⁵मेरे वाले हक आ कि जिहां हांऊँ चाहां तिहां ही आपणे पैसे जो इस्तेमाल करूं। तुस्सा जो मेरे किन्हें जलन नी रखणी चहिए कि हांऊँ दूजे रे कठे उदार आ।’

¹⁶इधी कठे जेह्ड़े ऐबे खास हुन्घे तिन्हा बादा मन्झ खास नी हूंणां, होर जो ऐबे खास नी ऐं तिन्हा बादा मन्झ खास हूंणां।”

¹⁷यीसू यरुस्लेम सैहरा जो जाणे रे टैमा बारा चेलेया जो सुनसान जगहा मन्झ लई गया, होर पैंडे मन्झ तिन्हा किन्हें बोल्दा लग्या।

¹⁸“आस्से यरुस्लेम सैहरा जो जाहें, होर हाऊँ माह्णुं रा मह्ठा मुख्य याजका होर व्यवस्था स्खाणे वाल़े रे हाथा पकड़ाई देणा, होर तिन्हा मुंजो मौता री सजा देणी।

¹⁹होर तिन्हा हांऊँ अन्यजाति लोका रे हाथा मन्झ पकड़वाणा कि स्यों मेरा मजाक ड़ुआयें, होर मुंजो कोड़े मारणे, होर हांऊँ क्रूसा प्रयाल्हे चढ़ाई देणा, होर त्रीजे ध्याड़े मां मरिरे मन्झ ले जिउंदे हुई जाणा।”

²⁰तेबे जब्दी री लाड़ी आपणे मह्ठे याकूब होर यहून्ना साउगी यीसू वाले आई होर तेसरे साम्हणें जांढू टेके होर से तेस ले कुछ मांग्दी लगी।

²¹यीसूए तेस्सा किन्हें बोल्या, “तू क्या चाहीं?” जब्दी री लाड़िए यीसू किन्हें बोल्या, “ये बोल कि, मेरे ये दो मह्ठे तेरे राज्या मन्झ एक तेरे ओरली वखा जो होर दूजा तेरी परली वखा जो बैठे।”

²²यीसूए जवाब दितेया, “तुस्से नी जाणदे कि क्या मान्घा ऐं। जो दुखा रा डोंगा हांऊँ पीणे वाल़ा आ, क्या तुस्से पी सक्हा ऐं?” तिन्हें तेस किन्हें बोल्या, “हां आस्से पी सक्हा ऐं।”

²³यीसूए तिन्हा किन्हें बोल्या, “जो दुखा रा डोंगा हांऊँ पीणे वाल़ा आ, तुस्सा भी पीणा। पर तुस्सा जो आपणे ओरली वखा जो होर परली वखा जो बठयाल्णा मेरा काम नी आ। पर जिन्हारे कठे से जगहा त्यार किती गईरी, से तिन्हारे कठे ई।”

²⁴ये सुणी किन्हें, दसा रे दस चेले तिन्हा दुंहीं भाईया याकूब होर यहून्ना पर गुस्सा हुए।

²⁵यीसूए स्यों सभ आपु वाले सादे, होर तिन्हा किन्हें बोल्या, “तुस्से जाणहां ऐं कि, अन्यजाति लोका रे हाकम तिन्हा पर राज करहा ऐं। होर जो बडे ऐं, स्यों तिन्हा पर हक जताहें।

²⁶पर तुस्सा मन्झ एह्ड़ा नी हूंणां; एता रे बजाय जो कोई तुस्सा मन्झ बडा हूंणां चाहां, से तुस्सा रा सेऊआदार बणे।

²⁷होर तुस्सा मन्झ जो कोई मुखिया बणना चाहे, तेस जो दूजे रा गुलाम बणना जरूरी आ।

²⁸हांऊँ माह्णुं रा मह्ठा इधी कठे नी आईरा कि, मेरी सेऊआ किती जाए, पर इधी कठे आईरा कि, हांऊँ आपु दूजे री सेऊआ करूं, होर कईया रे छुटकारे रे कठे आपणी जान देऊँ।”

²⁹जेबे यीसू होर तेसरे चेले यरीहो सैहरा ले निकल्या करहा ऐं थे, ता एक बडी भीड़ तेसरे साउगी चली पई।

³⁰होर दो काणे, जो सड़का रे बाढे बैठिरे थे, तिन्हें ये सुणी किन्हें कि यीसू जाया करहा, स्यों चिंगी किन्हें बोल्दे लगे कि, “हे प्रभु, राजा दाऊदा रे मह्ठे (यीसू दाऊदा रे बंसा रा था), आस्सा पर दया कर।”

³¹लोके स्यों प्रुआचे कि, चुपचाप रह, पर से होर भी ज्यादा चिंगी किन्हें बोल्या, “हे प्रभु, राजे दाऊदा रे मह्ठे, आस्सा पर दया कर।”

³²तेबे यीसूए खड़े हुई किन्हें, स्यों सादे, होर बोल्या, “तू क्या चाहां कि हांऊँ तेरे कठे करूं?”

³³तिन्हें तेस किन्हें बोल्या, “हे प्रभु, आस्से बस इतना चाहां कि हांऊँ देख्दा लगी जाऊं।”

³⁴यीसूए तरस खाई किन्हें तिन्हारी हाखिया छुही, होर स्यों झटपट देख्दे लगे; होर स्यों तेस साउगी रस्ते मन्झ चली पए।