Read Mandeali मत्ती 21 Bible Online

मत्ती 21 - Mandeali bible

मत्ती 21

¹जेबे यीसू होर तेसरे चेले यरुस्लेम सैहरा रे नेडे जैतूना रे प्हाड़ा पर बैतफगे गांऊँआं वाले आये, तेबे यीसूए दो चेले ये बोली किन्हें भेजे कि,

²“आपणे साम्हणें रे गांऊँआं मन्झ जाऊआ, तेथी पुज्दे ई तुस्सा जो एक गधी बझीरी होर तेस्सा रा बच्चा मिलणा; तिन्हा जो खोल्ही किन्हें, मेरे वाले लई आऊआ।

³अगर कोई कुछ पूछे, ता तुस्से बोल्या कि, प्रभु जो एसरी ज्रूरत ई: तेबे तेस से जल्दी ई भेजी देणा।”

⁴ये इधी कठे हुआ कि, जो बचन नबिया रे ज्रीए बोल्या गईरा था, से पूरा हो कि,

⁵“सिय्योन सैहरा री बेटी किन्हें ये ग्लाऊआ, ‘देख, तेरा राजा तेरे वाले आहूँआं; से नम्र आ होर गधे पर बैठिरा; बल्कि गधे रे बच्चे पर बैठिरा।’”

⁶चेले जाई किन्हें तेहड़ा ई कितेया, जो यीसूए तिन्हा किन्हें ग्लाईरा था।

⁷होर गधी होर तेस्सा रे बच्चे जो ल्याई किन्हें, तिन्हा पर आपणे कपड़े ब्छ्याये, होर यीसू तिन्हा पर बैठी गया।

⁸होर बौह्त लोके आपणे कपड़े पैंडे मन्झ ब्छ्याये, होर लोके यीसू रा स्वागत करणे रे कठे डाला रे पांगे काटी किन्हें पैंडे मन्झ ब्छ्याये।

⁹होर जो भीड़ तेसरे अगे-अगे चल्या करहा ई थी होर पीछे-पीछे आया करहा ई थी, चिंगी -चिंगी किन्हें बोल्हा ई थी कि, “राजे दाऊदा रे मह्ठे रे कठे परमेसरा री बड़ाई हो; धन्य आ से जो प्रभु रे हका ले आहूँआं, स्वर्गा मन्झ परमेसरा री बड़ाई हो।”

¹⁰जेबे यीसू यरुस्लेम सैहरा मन्झ आया, ता सारे गांऊँआं मन्झ हलचल मची गयी, होर लोक ग्लान्दे लगे, “ये कुणहां?”

¹¹लोके बोल्या, “ये गलील जिल्ले रे नासरत गांऊँआं रा नबी यीसू आ।”

¹²यीसूए परमेसरा रे मन्दरा मन्झ जाई किन्हें, स्यों सभ काढी दिते, जो मन्दरा मन्झ व्य्पारिये रा काम करेया करहा ऐं थे, तिन्हें ढब्बे रे लेण-देण करणे वाले री पीढ़िया पलटी दिती, होर कबूतर बेचणे वाल़ेया री चौकिया उलट दिती।

¹³होर यीसूए तिन्हा किन्हें बोल्या, “पवित्र सास्त्रा मन्झ लिखिरा कि, मेरा मन्दर प्रार्थना रा घर बोल्या जाणा, पर तुस्से ता ये डाकुआ रा आडा बणाई दितिरा।”

¹⁴होर काणे होर लंगड़े, मन्दरा मन्झ तेस वाले आये, होर तिन्हें स्यों ठीक किते।

¹⁵पर जेबे मुख्य याजके होर व्यवस्था स्खाणे वाल़े यूँ चमत्कार, जो तिन्हें किते, होर मह्ठे जो मन्दरा मन्झ राजे दाऊदा रे मह्ठे रे कठे परमेसरा री बड़ाई हो, बोल्दे हुए देख्या, ता स्यों गुस्सा हुई किन्हें तेस किन्हें ग्लान्दे लगे, “क्या तू सुणहां कि ये क्या ग्लाहें?”

¹⁶यीसू ये तिन्हा किन्हें बोल्या, “हां; क्या तुस्से ये कधी नी पढ़ेया कि: ‘बच्चे होर दूध पिन्दे बच्चे रे मुंहा ले तैं बड़ाई कुराई?’”

¹⁷तेबे से तिन्हा जो छाडी किन्हें गांऊँआं रे बाहर बैतनिय्याह गांऊँआं जो गया, होर तेथी तिन्हें रात काटी।

¹⁸भ्यागा तड़के जेबे यीसू यरुस्लेम सैहरा जो वापस आया करहा था, ता तेस जो भूख लगी।

¹⁹होर अंजीरा रा एक हरा भरा डाल पैंडे रे बाढे देखी किन्हें यीसू तेस वाले गया, पर पातरा जो छाडी किन्हें कुछ फल नी मिल्या, तिन्हें अंजीरा रे डाला किन्हें बोल्या, “ऐबे ले तुध मन्झ फेरी कधी फल नी लगणे।” होर अंजीरा रा डाल झटपट सुक्की गया।

²⁰ये देखी किन्हें चेले जो हरानी हुई, होर तिन्हें बोल्या, “ये अंजीरा रा डाल झटपट किहाँ सुक्की गया?”

²¹यीसूए तिन्हा जो जवाब दितेया कि, “हांऊँ तुस्सा किन्हें सच्च बोल्हा, अगर तुस्से विस्वास रख्घे, होर सक नी करघे; तेबे ना सिर्फ ये करणा, जो एस अंजीरा रे डाला किन्हें कितेया गया; पर अगर तुस्से एस प्हाड़ा किन्हें बोल्ह्गे कि पठ्ही जा, होर समुद्रा मन्झ पई जा, ता से हुई जाणा।

²²होर जो कुछ तुस्से प्रार्थना मन्झ विस्वास करी किन्हें मान्घगे से सभ तुस्सा जो मिलणा।”

²³यीसू मन्दरा जाई किन्हें उपदेस देई करेया करहा था कि मुख्य याजके होर लोका रे यहूदी मुखिये तेस वाले आई किन्हें पूछेया, “तू ये काम केस हका किन्हें करहा? होर तुजो ये हक कुने दितेया?”

²⁴यीसूए तिन्हा जो जवाब दितेया कि, “हांऊँ भी तुस्सा ले एक गल पूछ्हा; अगर से तुस्से मुंजो दस्घे, ता मां भी तुस्सा जो दसणा कि, ये काम हांऊँ केस हका ले करहा।

²⁵यहून्ना बपतिस्मा देणे वाल़े जो बपतिस्मा देणे रा हक कुने दितेया? ये हक परमेसरा री वखा ले था या माह्णुं वखा ले था?” तेबे स्यों आपु मन्झ बैहस करदे लगे कि, “अगर आस्से बोलिए कि परमेसरा री वखा ले, तेबे तेस आस्सा किन्हें बोलणा कि तुस्से विस्वास कि नी कितेया?

²⁶होर अगर आस्से बोलिए कि, ‘माह्णुं वखा ले’ ता आस्सा जो भीड़ा रा डर आ, क्यूंकि स्यों सभ यहून्ना बपतिस्मा देणे वाल़े जो नबी मन्हां ऐं थे।”

²⁷होर तिन्हें यीसू जो जवाब दितेया कि, “आस्से नी जाणदे।” तिन्हें भी तिन्हा किन्हें बोल्या, “ता मां भी तुस्सा जो नी दसणा कि, ये काम हांऊँ केस हका ले करहा।”

²⁸“तुस्से एस उदाहरणा ले क्या समझ्हा ऐं? केसी माह्णुं रे दो मह्ठे थे; तिन्हें पैहले माह्णुं वाले जाई किन्हें बोल्या, ‘मह्ठेया आज अंगूरा रे बगीचे मन्झ जाई किन्हें काम कर।’

²⁹तिन्हें जवाब दितेया, मां नी जाणा, पर बादा मन्झ से पछताई किन्हें चली गया।

³⁰फेरी दूजे माह्णुं वाले जाई किन्हें तिन्हें तेह्ड़ा ई बोल्या, तिन्हें जवाब दितेया, ‘ठीक आ, हांऊँ जाहाँ,’ पर से नी गया।

³¹इन्हा दुंहीं मन्झा ले कुने बापू री इच्छा पूरी किती?” तिन्हें बोल्या, “पैहले माह्णुंऐ।” यीसूए तिन्हा किन्हें बोल्या, “हांऊँ तुस्सा किन्हें सच्च बोल्हा कि, चुंगी लैणे वाल़े होर वेस्या तुस्सा ले पैहले परमेसरा रे राजा मन्झ दाखल हूंणां।

³²हांऊँ तुस्सा किन्हें इधी कठे बोल्हा क्यूंकि यहून्ना बपतिस्मा देणे वाल़े जेबे तुस्सा जो दसेया कि कियां धार्मिकता री जिन्दगी जिणी, पर तुस्से तेसरा विस्वास नी कितेया। पर वेस्या होर चुंगी लैणे वाल़े तेसरा विस्वास कितेया। होर तुस्से एतो देखदे हुए भी पाप करणा नी छाडे होर ना तेस पर विस्वास कितेया।”

³³“एक होर उदाहरण सुणां: एक जमीना रा माल्क था, जिन्हें अंगूरा रा बगीचा ल्गाया, होर तेता रे चारो तरफ बाड़ ल्गाया। होर अंगूरा रा रस काढणे रे कठे एक गड्ढा खणेया, होर उचा टापरा बणाया होर किसान जो तेता रा ठेका देई किन्हें परदेसा जो चली गया।

³⁴फेरी अंगूर काढणे रा टैम आया ता तिन्हें माल्के तेता रा फल काढणे रे कठे आपणा एक नौकर किसाना वाले भेज्या।

³⁵पर किसाने तेसरे नौकर पकड़े, कई पिटे, होर कई मारी दिते; होर कईया जो पात्थर मारे।

³⁶फेरी तिन्हें होर भी नौकर भेजे, जो पैहले ले ज्यादा थे; होर किसाने तिन्हा साउगी भी तेह्ड़ा ई कितेया।

³⁷पर बादा मन्झ तिन्हें आपणा बेटा तिन्हा वाले ये सोची किन्हें भेज्या कि, तिन्हा मेरे बेटे री इज्जत ज्रूर करणी।

³⁸पर किसाने मह्ठे जो देखी किन्हें आपु मन्झ बोल्या ये ता वारिस आ, आऊआ, आस्से एस जो मुकाई देहां ऐं, होर एसरी जमीन-जायदाद लई लैहां ऐं।

³⁹होर तिन्हें से पकड़ेया होर अंगूरा रे बगीचे ले बाहर काढी किन्हें मारी दितेया।

⁴⁰इधी कठे जेबे अंगूरा रे बगीचे रे माल्का आऊंणा, ता तेस तिन्हा किसाना साउगी क्या करणा?”

⁴¹तिन्हें तेस किन्हें बोल्या, “तेस स्यों बुरे लोक बुरी तरहा ले नास करी देणे; होर तेस अंगूरा रे बगीचा रे ठेका होरी किसाना जो देई देणा, जिन्हा टैमा पर तेस जो अंगूरा रा फल देआ करणा।”

⁴²यीसूए तिन्हा किन्हें बोल्या, “क्या तुस्से कधी पवित्र सास्त्रा मन्झ ये नी पढ़ेया कि: ‘जेस पात्थरा जो मिस्त्रिये बेकार जाणेया, सेई कुणे रा खास पात्थर बणी गया; ये प्रभु री तरफा ले हुएआ, होर ये देखी किन्हें आस्सा जो हरानी हुंहाँ ईं।’

⁴³इधी कठे हांऊँ तुस्सा किन्हें बोल्हा कि, परमेसरा रा राज तुस्सा मन्झा ले दूर करी दितेया जाणा; होर एह्ड़ी जाति रे लोका जो दितेया जाणा जो तेता रा फल ल्याए।

⁴⁴होर जेस एस पात्थरा पर पऊणा, तेस चकनाचूर हुई जाणा, होर जेस पर तेस पऊणा, तेस से पीसी किन्हें रखी देणा।”

⁴⁵मुख्य याजक होर फरीसी लोक तेसरे उदाहरणा जो सुणी किन्हें समझी गये कि से आस्सा रे बारे मन्झ बोल्हा।

⁴⁶होर तिन्हें से पकड़वाणा चाहेया, पर स्यों लोका ले डरी गये, क्यूंकि स्यों यीसू जो नबी मन्ना ऐं थे।