Read Mandeali मत्ती 27 Bible Online

मत्ती 27 - Mandeali bible

मत्ती 27

¹भ्यागा तड़के ही सारे मुख्य याजक होर लोका रे यहूदी मुखिये यीसू जो मारणे री सलाह बनाणे रे कठे कठ्ठा हुए

²तिन्हें से बान्ह्या होर लई जाई किन्हें पिलातुस हाकमा रे हाथा मन्झ सौंपी दितेया।

³जेबे यीसू जो पकड़वाणे वाल़े यहूदा इस्करयोति जो पता लगया कि यीसू जो मारे जाणे रा फैसला हुई चुकिरा ता यहूदा इस्करयोति पछताया होर तिन्हें स्यों चांदी रे तीह सिक्के मुख्य याजका होर यहूदी मुखिये जो वापस करी दिते।

⁴होर तिन्हें बोल्या, “मैं एक बेकसूर माह्णुं जो मारणे रे कठे पकड़वाई किन्हें पाप कितेया।” एता पर तिन्हें लोके बोल्या, “आस्सा जो क्या? तू ई जाण।”

⁵तेबे से तिन्हा सिक्के जो मन्दरा रे आंघणा मन्झ सट्टी किन्हें चली गया, होर तिन्हें जाई किन्हें आपणे आपा जो फांसी लगाई।

⁶मुख्य याजके स्यों सिक्के लई किन्हें बोल्या, “ये सिक्के भण्डारा मन्झ रखणा व्यवस्था रे बरखलाफ आ, क्यूंकि इन्हा पैसे रा इस्तेमाल केसी रा खून कुराणे रे कठे कितेया गईरा।”

⁷फेरी तिन्हें सलाह करी किन्हें तिन्हा सिक्के किन्हें परदेसिया जो दफनाणे रे कठे कुम्हारा रा खेत मूल्ले लई लया।

⁸एस वजहा ले तेस खेता जो आजा तक खूना रा खेत बोल्या जाहाँ।

⁹ये इधी कठे हुआ कि जो बचन यिर्मयाह नबी रे ज्रीए बोल्या गईरा था से पूरा हो। यिर्मयाह नबिये एह्ड़ा बोल्या कि: “तिन्हें स्यों तीह चांदी रे सिक्के, से तय कितिरी कीमत लई ली। जो इस्राएल देसा रे लोक मन्झा ले कईऐ तय कितिरा था।

¹⁰होर प्रभु रे हुक्मा रे मताबक तेता किन्हें कुम्हारा रा खेत मुल्ले लई लया।”

¹¹जेबे यीसू हाकमा रे साम्हणें खड़ीरा था ता हाकमे तेस ले पूछेया कि, “क्या तू यहूदी लोका रा राजा आ?” यीसूए तेस किन्हें बोल्या, “तू आप्हुए बोल्या करहा।”

¹²जेबे मुख्य याजक होर यहूदी मुखिये तेस पर दोस ल्गाया करहा ऐं थे, ता तिन्हें कोई जवाब नी दितेया।

¹³एता पर पिलातुस हाकमे तेस किन्हें बोल्या, “क्या तू नी सुणदा कि, ये तेरे व्रोधा मन्झ कई गुआहिया देआ करहा ऐं?”

¹⁴पर यीसूए तेस जो एक भी गल्ला रा जवाब नी दितेया, एथी तक कि पिलातुस हाकमा जो बड़ी हरानी हुई।

¹⁵होर हाकमा रा ये रूआज था कि, तेस साजे मन्झ लोका रे कठे केसी एक कैदी जो जेस जो स्यों चाहें थे, छाडी देहां था।

¹⁶तेस टैम तिन्हा मन्झ एक बरअब्बा नांऊँआं रा नामी कैदी था।

¹⁷इधी कठे जेबे स्यों कठे हुए ता पिलातुस हाकमे तिन्हा किन्हें बोल्या, “तुस्से केस जो चाहें कि हांऊँ तुस्सा रे कठे छाडी देऊं? बरअब्बा जो, या यीसू जो, जेस जो मसीह बोल्या जाहाँ?”

¹⁸क्यूंकि से जाणहां था कि तिन्हें से जलन रखणे री वजहा ले से पकड़वाईरा था।

¹⁹जेबे से न्याया री गद्दी पर बैठीरा था ता तेसरी लाड़िए तेस वाले एक खबर भेजी कि, “तू तेस धर्मी रे मामले मन्झ हाथ देख्या पांदा; क्यूंकि मैं आज सुपणे मन्झ तेसरी वजहा ले बौह्त दुःख सैहन कितेया।”

²⁰मुख्य याजके होर यहूदी मुखिये लोक भड़काए, ताकि स्यों बरअब्बा जो मांगी ले, होर यीसू री मौत कुराये।

²¹हाकमे तिन्हा ले पूछेया कि, “इन्हा दुंहीं मन्झा ले तुस्से केस जो चाहें कि हांऊँ तुस्सा रे कठे छाडी देऊं?” तिन्हें बोल्या, “बरअब्बा जो।”

²²पिलातुस हाकमे तिन्हा ले पूछेया, “फेरी यीसू जो, जेस जो मसीह बोल्या जाहाँ, तेसरा हांऊँ क्या करूं?” सभीए तेस किन्हें बोल्या, “एस जो क्रूसा प्रयाल्हे चढ़ाई देआ।”

²³हाकमे बोल्या, “किधियो, तिन्हें क्या बुराई कितिरी?” पर स्यों होर भी चिंगी-चिंगी किन्हें बोलदे लगे, “एस जो क्रूसा प्रयाल्हे चढ़ाई देआ।”

²⁴जेबे पिलातुस हाकमे देख्या कि कुछ नी लगीरा बणदा पर उल्टा हुल्लड़ हुएआ करहा। ता तिन्हें पाणी लई किन्हें भीड़ा रे साम्हणें आपणे हाथ धोये होर बोल्या, “हांऊँ एस धर्मी रे खूना ले बेकसूर आ; तुस्से ई जाणां।”

²⁵सभ लोके जवाब दितेया, “एसरे खूना रा दोस आस्सा पर होर आस्सा रे बंसा पर हो!”

²⁶तेबे तिन्हें तिन्हारे कठे बरअब्बा छाडी दितेया, होर यीसू जो कोड़े ल्गाई किन्हें सौंपी दितेया, ताकि तेस जो क्रूसा प्रयाल्हे चढ़ाई दितेया जाए।

²⁷तेबे हाकमा रे स्पाहिये यीसू जो किले मन्झ लई जाई किन्हें सारी पलटन तेसरे चहुँ वखा जो कट्ठा करी दिती।

²⁸होर तेसरा मजाक डुआणे रे कठे तेसरे कपड़े तुआरी किन्हें तेस जो चमकीले लाल रंगा रे कपड़े पन्ह्याये।

²⁹होर काण्डे रा ताज गुन्धी किन्हें तेसरे मूंडा पर रख्या; होर तेसरे दायें हाथा मन्झ सरकंडा पकड़ाई दितेया होर तेसरे अगे घुटणे टेकी किन्हें बोल्या, “हे यहूदी लोका रे राजे, नमस्कार।”

³⁰होर स्यों तेसरे मूंडा पर सरकंडे मारदे, होर तेस पर थुकदे लगे।

³¹जेबे स्यों तेसरा मजाक डूआई बैठे ता तिन्हें से चोगा तेस प्रयाल्हे ले तुआरी किन्हें कपड़े पन्हयाई दिते, होर तेबे तेस जो क्रूसा प्रयाल्हे चढ़ाणे रे कठे यरुस्लेम सैहरा ले बाहर लई गये।

³²बाहर जांदे हुए तिन्हा जो समौन नांऊँआं रा एक कुरेनी सैहरा रा माह्णुं मिल्या, तिन्हें से बगारी मन्झ पकड़ेया ताकि से यीसू रा क्रूस चकी किन्हें लई चले।

³³तेबे स्यों गुलगुता नांऊँआं री जगहा पुज्हे, “जेस जगहा जो खोपड़ी री जगहा” बोल्या जाहाँ था।

³⁴तिन्हें यीसू जो सिरका मिलाईरा अंगूरा रा रस पीणे जो दितेया, पर तिन्हें से सुआदेया पर पितेया नी।

³⁵तेबे तिन्हें यीसू क्रूसा प्रयाल्हे चढ़ाई दितेया, होर चिट्ठिया पाई किन्हें तेसरे कपड़े आपु मन्झ बांडी लये।

³⁶होर तेथी बैठी किन्हें तेसरा पैहरा देंदे लगे।

³⁷होर तिन्हें यीसू रे मूंडा ले थोड़े जे गास तेसरे क्रूसा प्रयाल्हे एक दोष पत्र लगाया कि, “ये यहूदी लोका रा राजा यीसू आ।”

³⁸तेबे तेस साउगी क्रूसा प्रयाल्हे दो डाकू भी चढ़ाये गये एक ओरली वखो होर दूजे जो परली वखा जो।

³⁹होर आऊणें जाणे वाल़े मूंड हिल्लाई-हिल्लाई किन्हें ये बोली किन्हें तेसरी निंदा करहा ऐं थे,

⁴⁰होर ये बोल्हा थे कि, “हे मन्दरा जो ढाणे वाल़े होर तीन ध्याड़े मन्झ बनाणे वाल़े, आपणे आपा जो बचा, अगर तू परमेसरा रा मह्ठा आ, ता क्रूसा प्रयाल्हे ले उतरी जा।”

⁴¹इंहां ईं मुख्य याजक व्यवस्था स्खाणे वाल़े होर यहूदी मुखिये ये बोली किन्हें मजाक डूआया करहा ऐं थे,

⁴²“इन्हें होर बचाए, होर आपणे आपा जो नी बचाई सक्दा। इस्राएल देसा रे राजा मसीह ऐबे क्रूसा प्रयाल्हे ले उतरी किन्हें आई जा कि, आस्से देखी किन्हें विस्वास करिए।”

⁴³इन्हें परमेसरा पर भरोसा रखिरा, अगर से एस जो चाहां, ता ऐबे एस जो छुड़ाई ले, क्यूंकि इन्हें बोलिरा था कि, “हांऊँ परमेसरा रा मह्ठा आ।”

⁴⁴इंहां ईं डाकू भी जो तेसरे साउगी क्रूसा प्रयाल्हे चढ़ाए गईरे थे स्यों भी तेसरा मजाक डूआदें लगे।

⁴⁵दोपहरा ले लई किन्हें तीन बजे तक सारे देसा मन्झ न्हयारा हुई गया।

⁴⁶लगभग तीन बजे रे टैमा पर यीसूए जोरा किन्हें बोल्या, “एली, एली, लमा सबक्तनी? हे मेरे परमेसर, हे मेरे परमेसर, तुस्से हांऊँ किधियो छाडी दितेया?”

⁴⁷जो तेथी खड़ीरे थे, तिन्हा मन्झा ले कई लोका जो गलतफैह्मी हुई; की से एलिय्याह नबी जो सादेया करहा।

⁴⁸तिन्हा मन्झा ले एक झटपट दोड़ेया, होर स्पंज लई किन्हें सिरके मन्झ डूबोया, होर सरकंडे पर रखी किन्हें तेस जो चुसणे जो दितेया,

⁴⁹होरिये बोल्या, “रुकी जाऊआ; देख्हा ऐं, एलिय्याह नबी तेस जो बचाणे रे कठे आहूँआं कि नी।”

⁵⁰तेबे यीसूए फेरी जोरा किन्हें चिंगी किन्हें आपणे प्राण छाडी दिते।

⁵¹होर देखा मन्दरा रा पर्दा ऊपरा ले लई किन्हें हेठा तक फटी किन्हें दो टुकड़े हुई गया। होर धरती हिली गई होर चट्टाना मन्झ दरार पई गई।

⁵²होर कब्रा खुल्ही गई, होर मरिरे परमेसरा रे पवित्र लोका री कई ल्हासा जिउंदी हुई गई।

⁵³होर तेसरे मरिरे मन्झा ले जी उठणा ले बाद स्यों कब्रा मन्झा ले निकली किन्हें पवित्र गांऊँआं मन्झ गये, होर कईया जो सुज्हे।

⁵⁴तेबे सूबेदार होर जो तेस साउगी यीसू रा पैहरा देंदे लगिरे थे, हिलण होर जो कुछ हुआ था, तेता जो देखी किन्हें स्यों बौह्त ज्यादा डरी गये, होर बोल्या, “सच्चे ये ता परमेसरा रा मह्ठा था!”

⁵⁵तेथी बौह्त सारी ज्नाने जो गलील जिल्ले ले यीसू री सेऊआ करदी हुई तेस साउगी आईरी थी, स्यों दूरा ले देख्या करहा ई थी।

⁵⁶तिन्हा मन्झ मगदल गांऊँआं री मरियम [37] होर याकूब होर योसेसा री माऊ मरियम, होर जब्दी रे मह्ठे री माऊ थी।

⁵⁷जेबे सांझ हुई ता अरिमतियाह सैहरा रा रैहणे वाल़ा युसुफ आया जो एक सेठ माह्णुं था होर आपु भी से यीसू रा चेला था।

⁵⁸तिन्हें पिलातुस हाकमा वाले जाई किन्हें यीसू री ल्हास मांगी तेबे पिलातुस हाकमे हुक्म दितेया कि, ल्हास तेस जो देई देआ।

⁵⁹युसुफे यीसू री ल्हास लई होर साफ चादरा मन्झ लपेटी लई।

⁶⁰होर तिन्हें से ल्हास आपणे नंऊँऐं डुआरा मन्झ रखी, जो तिन्हें चटाना रे बीचा मन्झ खणीरी थी, तेबे से डुआरा रे दुराजे पर बड्डा पात्थर धकेली किन्हें चली गया।

⁶¹मगदल गांऊँआं री मरियम होर दूजी मरियम तेथी डुआरा रे साम्हणें बैठीरी थी।

⁶²अगले ध्याड़े अरामा रे ध्याड़े था, जो त्यारी रे ध्याड़े रे बादका ध्याड़ा था, तेस ध्याड़े मुख्य याजके होर फरीसी लोके पिलातुस हाकमे वाले आई किन्हें बोल्या,

⁶³“हे माहराज, आस्सा जो याद आ कि तिन्हें धोखे देणे वाल़े आपणे जिन्दे जी बोलिरा था कि, मेरे मरणे रे तीन ध्याड़े ले बाद मां जी उठणा।

⁶⁴इधी कठे हुक्म दे कि त्रीजे ध्याड़े तक डुआरा री रखवाली किती जाए। एह्ड़ा नी हो कि तेसरे चेले आई किन्हें तेसरी ल्हासा जो चोरी किन्हें लई जाए, होर लोका किन्हें बोल्दे लगे कि, यीसू मरिरे मन्झा ले जीउन्दा हुई गया। तेबे ये जी उठणे रा धोखा पैह्ल्के धोखे ले भी बुरा हूंणां जेथी यीसू आपणे आपा जो मसीहा बोलिरा था।”

⁶⁵पिलातुस हाकमे तिन्हा किन्हें बोल्या, “तुस्सा वाले स्पाही ता हाए, जाउआ आपणी समझा रे मताबक रखवाली करा।”

⁶⁶इधी कठे स्यों स्पाहीया जो आपणे साउगी लई गये, होर पात्थर पर मोहर ल्गाई किन्हें डुआरा री रखवाली किती।