Read Mandeali मत्ती 28 Bible Online

मत्ती 28 - Mandeali bible

मत्ती 28

¹अरामा रे ध्याड़े ले बाद तुआरा रे ध्याड़े तड़के ई मगदल गांऊँआं री मरियम होर दूजी मरियम डुआरा जो देख्दी आई।

²होर एक बौह्त बड़ा हिलण हुआ, क्यूंकि प्रभु रा एक स्वर्गदूत उतरेया, होर नेडे आई किन्हें तिन्हें पात्थर धकेली दितेया, होर तेस पर बैठी गया।

³तेसरा रूप बिजली साहीं चमकीला होर तेसरा कपड़ा बर्फा साहीं चीटा था।

⁴स्यों स्पाही, जो कब्रा री रखवाली करेया करहा ऐं थे स्यों डरा री वजहा ले काम्मी गये, होर मरिरे साहीं पई गये।

⁵स्वर्गदूते ज्नाने किन्हें बोल्या कि, “तुस्से मत डरा: हांऊँ जाणहां कि तुस्से जेस जो क्रूसा प्रयाल्हे चढ़ाईरा था, तेस जो तोप्हा ई; से जिउंदा हुई गईरा।

⁶से एथी नी आ, पर जेह्ड़ा तिन्हें बोलिरा था तेता रे मताबक से जिउंदा हुई गईरा, आऊआ, ये जगहा देखा, जेथी प्रभु पइरा था।

⁷होर जल्दी जाई किन्हें तेसरे चेले किन्हें बोला कि, से मरिरे मन्झा ले जिउंदा हुई गईरा। होर यीसूआ तुस्सा ले पैहले गलील जिल्ले जो जाणा, होर तेथी तुस्सा से देखणा, मैं तुस्सा किन्हें बोली दितेया।”

⁸होर स्यों ज्नानिया डरी किन्हें होर बड़ी खुसी किन्हें डुआरा वाले ले जल्दी वापस आई किन्हें तेसरे चेले जो खबर देणे रे कठे दोड़ी गई।

⁹होर यीसू तिन्हा जो मिल्या होर बोल्या, “नमस्ते” होर तिन्हें नेडे आई किन्हें होर तेसरे पैर पकड़ी किन्हें तेस जो अराधना कितेया।

¹⁰तेबे यीसूए तिन्हा किन्हें बोल्या, “मत डरा; मेरे चेलेया वाले जाई किन्हें बोला कि, गलील जिल्ले जो चली जाए होर तिन्हा हांऊँ तेथी देखणा।”

¹¹जेबे चेलेया जो खबर सुनाणे रे कठे ज्नानिया जाया करहा ई थी, स्पाही जो डुआरा मन्झ रखवाली करदे लगिरे थे ता कईऐ गांऊँआं मन्झ आई किन्हें सारा गल्ला जो हुई थी मुख्य याजका किन्हें बोली दितेया।

¹²तेबे मुख्य याजके यहूदी मुखिये साउगी कट्ठे हुई किन्हें सलाह किती। होर स्पाहीया जो बौह्त सारे ढब्बे देई किन्हें बोल्या,

¹³“कि तुस्से सभ लोका के ये बोलणा कि, राती जेबे आस्से सभ सया करहा ऐं थे, ता यीसू रे चेले आई किन्हें तेसरी ल्हासा जो चोरी किन्हें लई गये।

¹⁴होर अगर ये गल कि तुस्से सई गईरे थे, ये हाकमा रे काना तक पुज्ही, ता आस्सा से समझाई लैणा होर तुस्से खतरे ले बचाई लैणे।”

¹⁵ता तिन्हें ढब्बे लई किन्हें तेह्ड़ा ई कितेया; जेह्ड़ा तिन्हा जो स्खाईरा था, होर ये गल आजा तक यहूदी लोका मन्झ मसहूर ई।

¹⁶होर ग्यारा चेले गलील जिल्ले मन्झ तेस प्हाड़ा पर गये, जो यीसूए तिन्हा जो जाणे जो बोलिरा था।

¹⁷होर तिन्हें तेसरे दर्सन पाई किन्हें तेस जो अराधना कितेया, पर केसी-केसी जो सक हुआ कि यीसू मरिरे मन्झ ले जी उठीरा।

¹⁸यीसूए तिन्हा वाले आई किन्हें बोल्या कि, “स्वर्ग होर धरती रा सारा हक मुंजो दितिरा।

¹⁹इधी कठे तुस्से जाई किन्हें सारे जातिया रे लोका जो चेला बणाऊआ; होर तिन्हा जो बापू, मह्ठे होर पवित्र आत्मा रे नांऊँआं ले बपतिस्मा देआ।

²⁰होर इन्हा चेलेया जो, जो हुक्म मैं तुस्सा जो दितरे तिन्हारा पालन करणा सिखाऊआ: होर सूणां, हांऊँ संसारा रे खत्म हूंणे तक हमेसा तुस्सा साउगी आ।”