Read Mandeali मत्ती 3 Bible Online

मत्ती 3 - Mandeali bible

मत्ती 3

¹जेबे यीसू नासरत गांऊँआं मन्झ था तिन्हा ध्याड़े यहून्ना बपतिस्मा देणे वाल़े आई किन्हें यहूदिया ईलाके रे बियाबान जगहा मन्झ एह्ड़ा प्रचार करदा लग्या,

²“पाप करणा छाडी देआ, क्यूंकि स्वर्गा रा राज नेडे आई गईरा।”

³ये सेई आ जेसरी चर्चा यसायाह नबी रे ज्रीए कितिरी कि: “बियाबान जगहा मन्झ एक हाका पाणे वाल़े री अवाज सुणह्या करहा ई, कि प्रभु रे कठे आपणे मन त्यार करा, होर तेसरी सड़का सीधी करा।”[9]

⁴ये यहून्ना बपतिस्मा देणे वाल़ा ऊंटा रे बाला रे बणिरे कपड़े पैहन्ना था, होर आपणी कमरा मन्झ चामड़े रा पट्टा बान्ही रख्हा था, होर टिटले होर जंगली म्खीर खांहां था।[10]

⁵तेबे यरुस्लेम सैहरा रे होर सारे यहूदिया ईलाके ले, होर यरदन दराऊआ रे ओरले परले सारे जगहा रे लोक तेस वाले आये।

⁶होर तिन्हें आपणे-आपणे पापा जो मनी किन्हें यरदन दराऊआ मन्झ बपतिस्मा लया।

⁷जेबे तिन्हें फरीसी लोक होर सदूकी लोक जो बपतिस्मा लेणे रे कठे आपणे वाले आऊंदे देख्या, तेबे यहून्ने तिन्हा किन्हें बोल्या कि, “तुस्से लोक जैहर्ले कीड़े रे बच्चे साहीं ऐं, तुस्सा जो कुने दसेया कि परमेसरा रे आऊणें वाल़े गुस्से ले भगा।

⁸एह्ड़ा काम करा कि जेता ले पता लगी सके कि तुस्से पाप करणा छाडी दितेया।

⁹होर फेरी आपणे-आपणे मना मन्झ एह्ड़ा मत सोचा कि, ‘आस्सा रा बापू अब्राहम आ,’ क्यूंकि हांऊँ तुस्सा किन्हें बोल्हा कि, परमेसर इन्हा पात्थरा ले भी तुस्सा रे बदले अब्राहम रे कठे बच्चे पैदा करी सक्हा।”

¹⁰होर ऐबे ता छहू डाला री जड़ा पर रखी दितिरा, इधी कठे जो-जो डाल खरा फल नी देंदा तेस जो काटी किन्हें आगी मन्झ पाई किन्हें फुकी देहां ऐं।

¹¹“पाप करणा छाडी देआ तेबे मां तुस्सा जो पाणी किन्हें बपतिस्मा देणा, पर से जे मेरे बाद आऊणें वाल़ा आ, से मेरे ले भी ज्यादा सक्तिसाली आ, हांऊँ ता तेसरे बूट चकणे रे लायक भी नी हाया, तेस तुस्सा जो पवित्र आत्मा होर आगी किन्हें बपतिस्मा देणा।

¹²से आपणा सूप हाथा मन्झ लई किन्हें त्यार आ, होर तेस आपणा खेत या डोर्ही ठीक ढंगा किन्हें साफ करणी, होर आपणी गाही री कणक ता तेस आपणे गोदामा मन्झ कठी करणी, पर भूह तेस आगी मन्झ फूकी देणा, जो आग कधी बूझणे वाली नी ई।”

¹³तेस टैम यीसू गलील जिल्ले ले यरदन दराऊआ रे बाढे पर यहून्ना बपतिस्मा देणे वाल़े वाले बपतिस्मा लेणे रे कठे आया।

¹⁴पर यहून्ना बपतिस्मा देणे वाल़ा तेस जो ये बोली किन्हें रोक्दा लग्या कि, “मुंजो ता तेरे हाथा ले बपतिस्मा लैणे री ज्रूरत ई, होर तू मेरे वाले आईरा।”

¹⁵यीसूए तेस जो ये जवाब दितेया कि, “ऐबे ता तू एह्ड़ा ई हूंणे दे, क्यूंकि आस्सा जो इंहां करी किन्हें सब धार्मिकता पूरी करणी ठीक रैहणी।” तेबे यहून्ना बपतिस्मा देणे वाल़े तेसरी गल मनी लई।

¹⁶होर यीसू बपतिस्मा लई किन्हें झटपट पाणी ले बहार आया, होर तेसरे कठे आसमान खुल्ही गया; होर परमेसरा री आत्मा जो कबूतरा रे रूपा मन्झ आपणे गास उतरदे देख्या।

¹⁷होर परमेसरे स्वर्गा ले बोल्या कि, “ये मेरा लाडला मह्ठा आ, हांऊँ तुध किन्हें बौह्त खुस आ।” [11]