Read Mandeali मत्ती 9 Bible Online

मत्ती 9 - Mandeali bible

मत्ती 9

¹फेरी यीसू होर तेसरे चेले वापस किस्ती पर बैठी किन्हें समुद्रा रे पारली वखा जो चली गये, से आपणे गांऊँ कफरनहूमा गांऊँआं जो आई गया।

²होर कुछ लोके एक अध्रन्गा रा मरीज सण बिस्त्रे यीसू वाले ल्यान्देया, यीसूए तिन्हारा विस्वास देखी किन्हें अध्रन्गा रे मरीजा किन्हें बोल्या, हे “मेरे मह्ठे, हिम्मत रख; मैं तेरे पाप माफ करी दिते।”

³होर कई व्यवस्था स्खाणे वाल़े ये सोच्या कि, “ये ता परमेसरा री निंदा करेया करहा।”

⁴यीसूए तिन्हारी मना री गल्ला जाणी किन्हें बोल्या कि, “तुस्से लोक आपणे-आपणे मना मन्झ बुरा विचार किधियो करेया करहा ऐं?

⁵असान क्या आ, ये बोलणा कि, ‘तेरे पाप माफ हुई गये’ या ये बोलणा कि, ‘उठ आपणा बिस्त्रा चक होर हांडदा लग।’

⁶ताकि हांऊँ तुस्सा जो साबित करी सकूं कि हांऊँ माह्णुं रा मह्ठा धरती पर पाप माफ करणे रा हक रख्हा आ।” यीसूए तेस अध्रन्गा रे मरीजा किन्हें बोल्या, “उठ, आपणा बिस्त्रा चक होर हांडदा लग, होर आपणे घरा जो चली जा।”

⁷से माह्णुं उठी किन्हें आपणे घरा जो चली गया।

⁸लोक ये देखी किन्हें डरी गये होर परमेसरा री महिमा करदे लगे कि कुने माह्णुंऐ एस जो एह्ड़ा करणे रा हक दितिरा।

⁹तेथी ले अगे बढ़ी किन्हें यीसूए मत्ती नांऊँआं रे एक माह्णुं जो, चुंगी री चौकी पर बैठिरे देख्या, होर तिन्हें तेस किन्हें बोल्या, “मेरा चेला बण।” होर से उठी किन्हें, यीसू रा चेला बणने रे कठे तेस साउगी चली गया।

¹⁰फेरी एह्ड़ा हुआ जेबे यीसू मती रे घरा मन्झ खाणा खांदे बैठिरा था, ता बौह्त चुंगी लैणे वाल़े होर जिन्हा जो लोक पापी बोल्हा ऐं आई किन्हें यीसू होर तेसरे चेले साउगी खाणा खांदे लगे।

¹¹ये देखी किन्हें फरीसी लोके तेसरे चेले किन्हें बोल्या, “तुस्सा रा गुरू चुंगी लैणे वाल़े होर पापिया साउगी खांहां पीहां!”

¹²यीसूए ये सुणी किन्हें तिन्हा किन्हें बोल्या, “भले चंगे जो बैदा री ज्रूरत नी ई, पर ब्मारा जो बैदा री ज्रूरत ई।

¹³इधी कठे तुस्से जाई किन्हें एता रा मतलब सीखी लऊआ कि, हांऊँ बलिदान नी पर अनुग्रह चाहां; क्यूंकि जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं।”[26]

¹⁴होर एक ध्याड़े यहून्ना बपतिस्मा देणे वाल़े रे चेले यीसू वाले आई किन्हें बोल्या, “क्या वजहा ई कि आस्से होर फरीसी लोक ब्रत करहा ऐं, पर तेरे चेले ब्रत नी करदे?”

¹⁵यीसूए तिन्हा किन्हें बोल्या, “जेबे तक नंऊँआं लाड़ा बरातिया साउगी आ स्यों दुःखी बिलकुल नी हुई सक्दे। पर एह्ड़े ध्याड़े आऊणें कि, नंऊँआं लाड़ा तिन्हा ले लग कितेया जाणा, तेस टैम तिन्हा ब्रत रखणा।

¹⁶नंऊँऐं कपड़े री टाल्ही पुराणे कपड़े पर कोई नी ल्गान्दा नी ता धोणे ले बाद नंऊँऐं कपड़े री टाल्हिया कठी हुई जाहीं, होर तेस कपड़े ज्यादा फटी जाणा।

¹⁷होर कोई नंऊँआं अंगूरा रा रस पुराणे चामड़े रे थैलूया मन्झ नी भरदा, क्यूंकि एह्ड़ा करणे ले चामड़े रे थैलू फटी जाहाँ, होर अंगूरा रा रस खिंडही जाहाँ होर चामड़े रे थैलू रा भी नास हुई जाहाँ, पर नंऊँआं अंगूरा रा रस नौंईं चामड़े रे थैलू मन्झ भरहा ऐं होर स्यों दुहें बची रहें।”

¹⁸यीसू तिन्हा किन्हें यूँआं गल्ला करेया ई करहा था कि, एक यहूदी सभा रे मुखिये आई किन्हें तेसरे पैरा पर पई गया होर बोल्या, “मेरी मह्ठी ऐबे-ऐबे मरी; पर तुस्से चली किन्हें तेस्सा जो छुही ले, ता तेस्सा जिउंदी हुई जाणा।”

¹⁹यीसू उठी किन्हें आपणे चेले साउगी तेसरे पीछे चली गया।

²⁰होर एक ज्नाने जेस्सा जो बारा साला ले खून बैहणे री ब्मारी थी, से आपणे मना मन्झ बोल्हा ई थी कि, “अगर हांऊँ तेसरे कपड़े छुही लैन्घी, ता मां ठीक हुई जाणा।” होर तेस्से तेसरे पीछे आई किन्हें तेसरे कपड़े छुही लये।

²²यीसूए मुड़ी किन्हें से देखी होर बोल्या, मह्ठीऐ हिम्मत रख, तैं विस्वास कितेया कि हांऊँ तुजो ठीक करी सक्हा, इधी कठे तू ठीक हुई। होर से ज्नाने तेस ई टैम ठीक हुई गई।

²³जेबे यीसू तेस यहूदी सभा रे मुखिये रे घरा पूज्या ता तिन्हें बंसरी बजाणे वाल़े होर हाला पाणे वाली भीड़ देखी।

²⁴तेबे यीसूए तिन्हा किन्हें बोल्या, “हटी जाऊआ, मह्ठी नी मरीरी, पर सुत्तिरी।” ये सुणी किन्हें तेथी बैठिरे रे लोक हास्दे लगे।

²⁵पर जेबे भीड़ बाहर निख्ली गई, ता यीसूए अंदर जाई किन्हें मह्ठी रा हाथ पकड़ेया, होर से जिउंदी हुई किन्हें बैठी गई।

²⁶ये गल सारे ईलाके मन्झ फैल्ही गई।

²⁷जेबे यीसू तेस म्ह्ठी रे घरा ले निकल्या, ता दो काणे तेसरे पीछे ये बोल्दे हुए चले कि, “हे राजा दाऊद रे मह्ठे (यीसू दाऊदा रे बंसा रा था), आस्सा पर दया कर।”

²⁸जेबे से घरा पूजी गया, ता स्यों काणे तेस वाले आये, होर यीसूए तिन्हा किन्हें बोल्या, “क्या तुस्सा जो विस्वास आ कि, हांऊँ तुस्सा जो ठीक करी सक्हा?” तिन्हें तेस किन्हें बोल्या, “हां प्रभु, आस्से विस्वास करहा ऐं कि तू आस्सा जो ठीक करी सक्हा।”

²⁹तेबे यीसूए तिन्हारी हाखिया छुही किन्हें बोल्या, “क्यूंकि तुस्से विस्वास कितेया इधी कठे तुस्सा ठीक हुई जाणा।”

³⁰होर स्यों झटपट देखदे लगे होर यीसूए तिन्हा जो खबरदार करी किन्हें बोल्या, “केसी के देख्या बोलदे कि मैं तुस्सा रे कठे क्या कितरा।”

³¹पर तिन्हें निकली किन्हें सारे ईलाके मन्झ तेसरा नांऊँ फैल्हाई दितेया।

³²जेबे स्यों दो काणे घरा ले बाहर जाया करहा ऐं थे, ता लोके एक टाटा तेस वाले ल्यान्देया, जेस मन्झ जे दुस्टात्मा थी।

³³होर जेबे यीसूए दुस्टात्मा काढी दिती ता टाटा बोल्दा लगया, होर भीड़ हरान हुई किन्हें बोल्दी लगी कि, “इस्राएल देसा मन्झ कधी एह्ड़ा नी देख्या गया।”

³⁴पर फरीसी लोके बोल्या, “सैतान दुस्टात्मा रा मुखिया आ से तेसरे सहारे दुस्टात्मा काढा आ।”

³⁵तेबे यीसू होर तेसरे चेले गलील जिल्ले रे कई गांऊँआं ले हुई किन्हें गये होर यीसू यहूदी सभा मन्झ उपदेस देंदा, होर परमेसरा रे राजा री खुसी री खबर प्रचार करदा, होर कई किस्मा री ब्मारी होर कमजोरी जो दूर करदा रैहया।

³⁶जेबे तिन्हें भीड़ देखी ता तेबे तेस जो लोका पर तरस आया, क्यूंकि स्यों तिन्हा भेडा साहीं थे जिन्हारा जे कोई पुहाल नी हुंदा, स्यों दुःखी होर भटकीरे थे।

³⁷तेबे यीसूए आपणे चेले किन्हें बोल्या, “पक्किरी फसल ता बौह्त ई पर काम करणे वाल़े मजदूर थोह्ड़े ऐं।

³⁸इधी कठे फसला रे माल्का ले अर्ज करा कि स्यों फसल कटाई रे कठे मजदूर भेजी दे।”