Read Mandeali मरकुस 11 Bible Online

मरकुस 11 - Mandeali bible

मरकुस 11

¹जेबे यीसू होर तेसरे चेले यरुस्लेम सैहरा रे नेडे जैतूना रे प्हाड़ा पर बैतफगे होर बैतनिय्याह गांऊँआं वाले पुज्हे, ता तिन्हें आपणे चेले मन्झा ले दो चेले ये बोली किन्हें भेजे कि,

²“आपणे साम्हणें रे गांऊँआं मन्झ जाऊआ, होर तेथी पुज्दे ई तुस्सा जो एक गधी रा बच्चा जेस पर जे कोई कधी नी बैठिरा हो बझिरा मिलणा, तेस जो खोल्ही किन्हें लई आऊआ।

³अगर तुस्सा ले कोई पूछे कि, ‘तुस्से ये क्या करेया करहा ऐं?’ तेबे तुस्से एह्ड़ा बोल्या, ‘कि प्रभु जो ऐसरी ज्रूरत ई,’ होर तेस से गधी रा बच्चा जल्दी वापस भेजी देणा।”

⁴तिन्हें जाई किन्हें गल्लि रे एक घरा रे दुराजे वाले गधी रे बच्चे जो बझिरा देख्या, होर स्यों तेस जो खोल्दे लगे

⁵होर तिन्हा मन्झा ले कुछ लोके जो तेथी खड़ीरे थे, तिन्हा ले पूछेया कि “तुस्से क्या करेया करहा ऐं, गधी री बच्चे जो किधियो खोलेया करहा ऐं?”

⁶होर चेले तिन्हा किन्हें तेह्ड़ा बोल्या जेह्ड़ा यीसूए तिन्हा किन्हें बोलिरा था; होर तेबे तिन्हें गधे रे बच्चे जो जाणे दितेया।

⁷होर तिन्हें गधी रे बच्चे जो यीसू वाले ल्याई किन्हें तेस पर कपड़े ब्छ्याये होर से यीसू तेस पर बैठी गया।

⁸होर बौह्त लोके यीसू रा स्वागत करणे रे कठे पैंडे मन्झ आपणे कपड़े ब्छ्याये होर होरिये डोहर्रिया मन्झा ले पांगे काटी-काटी किन्हें पैंडे मन्झ ब्छ्यायी दिती।

⁹होर जो तेसरे अगे-अगे होर पीछे-पीछे चल्हा ऐं थे, स्यों खुसी किन्हें चिंगी -चिंगी किन्हें बोल्हा ऐं थे, “परमेसरा री बड़ाई हो; धन्य आ से, जो प्रभु रे हका ले आहूँआं।”

¹⁰धन्य आ! तू जेबे आस्सा रे बापदादे राजे दाऊदा साहीं राज करहा; “परमेसरा री बड़ाई हो जो स्वर्गा मन्झ आ।”

¹¹होर यीसू यरुस्लेम सैहरा पूजी किन्हें मन्दरा मन्झ आया, होर तिन्हें चारो वखा री सभ चीजा देखी। क्यूंकि सांझ हुई गईरी थी इधी कठे से आपणे बारा चेले साउगी बैतनिय्याह गांऊँआं जो चली गया।

¹²अगले ध्याड़े जेबे यीसू होर तेसरे चेले बैतनिय्याह गांऊँआं ले निकले ता तेस जो भूख लगी।

¹³होर से दूरा ले अंजीरा रा एक हरा भरा डाल देखी किन्हें तेता रे नेडे गया, ताकि कुछ फल मिली सके। पर पातरा जो छाडी किन्हें कुछ फल नी मिल्या, क्यूंकि फला रा मौसम नी था।

¹⁴यीसूए तेस डाला जो देखी के बोल्या कि, “ऐबे तेरे अंदर कधी फल नी लगणा।” होर तेसरे चेले सुणेया करहा ऐं थे।

¹⁵फेरी यीसू होर तेसरे चेले यरुस्लेम सैहरा मन्झ आये, होर यीसू मन्दरा मन्झ गया। होर तेथी जो व्य्पारिये जो लेण-देण करेया करहे थे, तिन्हा जो बाहर काढदा लग्या। होर ढब्बे री अदला-बदली करी करहे थे तिन्हारी पीढ़िया पलटी दिती, होर कबूतर बेचणे वाले री चौकिया ऊलट पुलट करी दिती।

¹⁶होर तिन्हें मन्दरा मन्झा ले केसी जो कुछ भी ले जाणे नी दितेया।

¹⁷होर तिन्हा जो उपदेस देई किन्हें बोल्या कि, पवित्र सास्त्रा मन्झ लिखिरा कि, “मेरे मन्दरा जो सब जातिया रे लोका रे कठे प्रार्थना रा घर बोल्या जाणा पर तुस्से ये डाकुआ रा आडा बणाई दितिरा।”[17]

¹⁸ये सुणी किन्हें मुख्य याजक होर व्यवस्था स्खाणे वाल़े यीसू जो मारणे रा मौका तोप्दे लगे; स्यों यीसू ले डरहा ऐं थे, क्यूंकि सभ लोक तेसरे उपदेसा ले हरान हुंहाँ ऐं थे।

¹⁹होर स्यों सांझ्के टैमा यरुस्लेम सैहरा ले निकली किन्हें बैतनियाह गांऊँआं मन्झ रात काटणे रे कठे चली गये।

²⁰होर भ्यागा ई जेबे यीसू होर तेसरे चेले बैतनिया गांऊँआं ले जेबे स्यों तेथी ले आऊंदे लगिरे थे, तिन्हें से अंजीरा रा डाल जड़ा तक सुक्किरे देख्या।

²¹पतरसा जो से गल याद आई, होर तिन्हें तेस किन्हें बोल्या, “हे गुरु, देख! ये अंजीरा रा डाल जेस जो तैं स्राप दितिरा था से सुक्की गया।”

²²यीसूए तेस जो जवाब दितेया कि, तुस्से हरान मत हुआ, “परमेसरा पर विस्वास रखा।”

²³हांऊँ तुस्सा किन्हें सच्च बोल्हा कि, “जो कोई ऐस प्हाड़ा जो बोले, ‘तू पठ्ही जा, होर समुद्रा मन्झ पई जा,’ होर आपणे मना मन्झ सक नी करहे, पर विस्वास करहे कि, जो बोल्हा ऐं, से हुई जाणा, ता से तेसरे कठे से हुई जाणा।

²⁴इधी कठे हांऊँ तुस्सा किन्हें बोल्हा कि, जो कुछ तुस्से प्रार्थना मन्झ मान्घगे, ता विस्वास करी लऊआ कि तुस्सा जो मिली गया, होर ये तुस्सा रे कठे हुई जाणा।

²⁵होर जेबे तुस्से प्रार्थना करहा ऐं, होर अगर तुस्सा जो केसी रे खलाफ सिकायत हो, ता तेस जो माफ करा: ताकि तुस्सा रा स्वर्गीय बापू तुस्सा रे पाप माफ करी दे।

²⁶होर अगर तुस्से तिन्हा जो माफ नी करघे ता तुस्सा रे बापू जो स्वर्गा मन्झ आ, तुस्सा रे पाप भी माफ नी करणे।”

²⁷यीसू होर तेसरे चेले फेरी यरुस्लेम सैहरा मन्झ आये। होर जेबे से मन्दरा मन्झ टैहल्या करहा था, ता मुख्य याजक होर व्यवस्था स्खाणे वाल़े होर यहूदी मुखिये तेस वाले आई किन्हें पुछदे लगे कि,

²⁸“तू ये काम केस हका किन्हें करहा? होर ये हक तुजो कुने दितेया कि तू ये काम करहे?”

²⁹यीसूए तेस किन्हें बोल्या, “हांऊँ भी तुस्सा ले एक गल पूछ्हा; मुंजो जवाब देआ, तेबे मां तुस्सा जो दस्णा कि ये काम हांऊँ केस हका ले करहा।

³⁰यहून्ना जो बपतिस्मा देणे रा हक परमेसरा री वखा ले था या माह्णुं वखा ले? मुंजो जवाब देआ।”

³¹तेबे स्यों आपु मन्झ बैहस करदे लगे कि “अगर आस्से बोलिए, ‘परमेसरा री वखा ले,’ ता तेस बोलणा, ‘फेरी तुस्से तेसरा विस्वास कि नी कितेया?’

³²होर अगर आस्से बोलिए, ‘माह्णुं वखा ले,’ ता लोका रा डर आ, क्यूंकि स्यों सभ भरोसा करहा ऐं थे कि यहून्ना बपतिस्मा देणे वाल़ा सच्चे नबी आ।”

³³होर तिन्हें यीसू जो जवाब दितेया कि, “आस्से नी जाणदे।” यीसूए तिन्हा किन्हें बोल्या ता, “हांऊँ भी तुस्सा जो नी दस्दा कि, हांऊँ ये काम केस हका किन्हें करहा।”