Read Mandeali मरकुस 12 Bible Online

मरकुस 12 - Mandeali bible

मरकुस 12

¹फेरी यीसू उदाहरण मन्झ तिन्हा किन्हें गल्ला करदा लग्या कि: केसी माह्णुंऐ अंगूरा रा बगीचा ल्गाया, होर तेता रे चारो तरफ बाड़ ल्गाया, होर अंगूरा रा रस काढणे रे कठे एक गड्ढा खणेया, होर उचा टापरा बणाया; होर किसान जो तेता रा ठेका देई किन्हें परदेसा जो चली गया।

²फेरी अंगूर काढणे रा मौसम आया ता तिन्हें माल्के आपणा एक नौकर किसाना वाले भेज्या कि से जाई किन्हें अंगूरा रे बगीचे ले आपणा हिस्सा ल्याए।

³पर तिन्हें से पकड़ी किन्हें मारेया पिटेया होर खाली हाथ भेजी दितेया।

⁴फेरी माल्के एक होर नौकर तिन्हा वाले भेज्या, होर तिन्हें तेसरी बेज्जती किती होर तेसरा मूंड पुआड़ी दितेया।

⁵फेरी तिन्हें एक होर नौकर भेज्या, होर तिन्हें से मुकाई दितेया; तेबे तिन्हें होर भी बौह्त नौकर भेजे; तिन्हा मन्झा ले तिन्हें कितने पिटे, होर कितने मुकाई दिते।

⁶ऐबे माल्का वाले तेसरा प्यारा मह्ठा ही बचिरा था; जेस जो भेजी सके, सभी ले बादा मन्झ तिन्हें से भी तिन्हा वाले ये सोची किन्हें भेजी दितेया कि, तिन्हा मेरे बेटे री इज्जत ज्रूर करणी।

⁷पर तिन्हें किसाने आपु मन्झ बोल्या; येई ता वारीस आ; आऊआ, एस जो मुकाई देहां ऐं, तेबे ये जमीन-जायदाद आस्सा री हुई जाणी।

⁸होर तिन्हें से पकड़ी किन्हें मारी दितेया, होर अंगूरा रे बगीचे ले बाहर सट्टी दितेया।

⁹यीसूए पूछेया “एता कठे ऐबे अंगूरा रे बगीचे रे माल्का क्या करणा? तेस आई किन्हें स्यों किसान मुकाई देणे, होर अंगूरा रा बगीचा होरी किसाना जो ठेके पर देई देणा।

¹⁰तुस्से ये जाणहां ऐं कि पवित्र सास्त्रा मन्झ ये लिखिरा: ‘कि जेस पात्थरा जो मिस्त्रिये बेकार जाणेया, सेई कुणे रा खास पात्थर बणी गया;

¹¹ये परमेसर री तरफा ले हुआ, होर ये देखी किन्हें आस्सा जो हरानी हुंहाँ ईं!’”[18]

¹²तेबे सारे यहूदी अगुवे से पकड़ना चाहेया; क्यूंकि स्यों समझी गईरे थे कि, ये उदाहरण तिन्हें तिन्हारे बरखलाफ बोल्या: होर स्यों ई यीसू री काह्णी मन्झ दुस्ट किसान थे: पर स्यों लोका ले डरहा ऐं थे, होर स्यों तेस जो छाडी किन्हें चली गये।

¹³कुछ टैमा बाद यहूदी अगुवे, फरीसी लोक होर राजा हेरोदेसा रा साथ देणे वाल़े लोक भेजे जो यीसू जो तेसरी ई गल्ला मन्झ फसाए ताकि स्यों तेस जो पकड़ी सके।

¹⁴होर से आई किन्हें यीसू किन्हें बोल्या, “हे गुरू, आस्से जाण्हां ऐं कि, तू सच्चा आ, होर केसी री परवाह नी करदा। क्यूंकि तू माह्णुं रा मुंह देखी किन्हें गल्ला नी करदा, पर परमेसरा री गल्ला सच्चाई किन्हें स्खाहां। क्या महाराजे[19] जो कर देणा ठीक आ कि, नी?

¹⁵आस्से देईऐ कि नी?” तिन्हें तिन्हारा पाखंड जाणी किन्हें तिन्हा किन्हें बोल्या, “मुंजो किधियो परखदे लगिरे? एक सिक्के जो मेरे वाले लई आऊआ कि, हांऊँ देखूं।”

¹⁶होर स्यों लई आये, होर तिन्हें तिन्हा किन्हें बोल्या, “ये सिक्के मन्झ रूप होर नांऊँ केसरा?” तिन्हें बोल्या, “ये रूप होर नांऊँ महाराजे रा।”

¹⁷यीसूए तिन्हा किन्हें बोल्या, “जो महाराजे रा आ, से महाराजे जो देआ, होर जो परमेसरा रा आ, से परमेसरा जो देआ।” तेबे यीसू री गला सुणी किन्हें स्यों हरान हुए गई।

¹⁸फेरी सदूकी लोक जो यहूदी थे स्यों एह्ड़ा बोल्हा ऐं थे कि, मरणे वाले रा जी उठणा नी हुंदा, होर स्यों यीसू वाले आई किन्हें पुछदे लगे।

¹⁹कि “हे गुरू,” “मूसा जेह्ड़ी आस्सा रे कठे व्यवस्था लिखीरी कि, अगर केसी रा भाई बगैर बच्चे ही मरी जाए, होर तेसरी लाड़ी पीछे रही जाए, ता तेसरा भाई तेसरी लाड़ी किन्हें ब्याह करी ले होर आपणे भाई रे कठे बच्चे पैदा करहे।[20]

²⁰उदाहरणा कठे सात भाई थे, पैहला भाई ब्याह करी किन्हें बगैर बच्चे मरी गया।

²¹तेबे दूजे भाईऐ भी तेस्सा किन्हें ब्याह करी लितेया होर से भी बगैर बच्चे मरी गया; होर तिहां ईं त्रीजे भी।

²²होर साता रे सात भाईया री कोई बच्चा नी हुई; बादा मन्झ से ज्नाने भी मरी गयी।

²³मरिरे मन्झ ले जी उठणा ले बाद तिन्हा मन्झा ले से केसरी लाड़ी हूणीं? क्यूंकि से साता रे सात भाईया री लाड़ी हुई चुकीरी थी।”

²⁴यीसूए तिन्हा किन्हें बोल्या, “तुस्सा री गलती येई कि तुस्से पवित्र सास्त्रा जो होर परमेसरा री सामर्था जो नी जाण्दे,

²⁵क्यूंकि जेबे तिन्हा मरिरे मन्झा ले जी ऊठणा, ता तिन्हा मन्झ ब्याह नी हूणे, पर स्वर्गा मन्झ तिन्हा स्वर्गदूता साहीं हूंणां, जेह्ड़े ब्याह नी करदे।

²⁶जेथी तक मरिरे मन्झा ले जी ऊठणे रा सुआल आ, क्या तुस्से मूसा नबी री कताबा मन्झ भखी रे झाकड़ा रे बारे मन्झ नी पढ़ेया कि, परमेसरे तेस किन्हें बोल्या, ‘हांऊँ अब्राहमा रा परमेसर, होर इसहाका रा परमेसर, होर याकूबा रा परमेसर आ’ (इन्हा जो मरिरे कई साल हुई गईरे फेरी भी परमेसर आपणे आपा जो इन्हारा परमेसर बोल्हा। क्यूंकि परमेसर इन्हा जो मरिरा नी पर जिउंदा समझा।)

²⁷से मरिरे रा परमेसर नी आ, पर जिउंदे रा परमेसर आ, तुस्से विस्वास नी करी किन्हें बड़ी बडी गलती कितिरी।”

²⁸होर व्यवस्था स्खाणे वाल़े आ मन्झा ले एकिये आई किन्हें सदूकी लोका जो यीसू साउगी बैहस करदे सुणेया, होर ये जाणी किन्हें कि यीसूए तिन्हा जो बौह्त खरे तरीके किन्हें जवाब दितेया, तिन्हें यीसू ले पूछेया, “सभ हुक्मा ले खास हुक्म कुण जे आ?”

²⁹यीसूए तेस जो जवाब दितेया, “सभ हुक्मा मन्झा ले खास हुक्म ये आ कि: ‘हे इस्राएल देसा रे लोको सुणा, सिर्फ आस्सा रा प्रभु परमेसर ई एकमात्र परमेसर आ।

³⁰होर तू आपणे प्रभु परमेसरा किन्हें आपणे सारे मना ले, होर आपणे प्राणा ले, होर आपणी सारी बुद्धि ले, होर आपणी सारी सक्ति ले प्यार रख्या।’

³¹होर दूजा हुक्म ये आ कि, ‘तू आपणे पड़ोसी किन्हें आपणे साहीं प्यार रख्या।’ एता ले बडा होर कोई हुक्म नी आ।”[21]

³²व्यवस्था स्खाणे वाल़े ये तेस किन्हें बोल्या, “हे गुरू, बौह्त बढ़िया!” तैं ठीक बोल्या कि, परमेसर एक ई आ, होर तेसरे अलावा होर कोई परमेसर नी आ।[22]

³³होर तेस किन्हें सारे मन, होर सारी बुद्धि, होर सारे प्राण, होर सारी सक्ति किन्हें प्यार रखणा; होर तू आपणे पड़ोसी किन्हें आपणे साहीं प्यार रख्या, एह्ड़ा करना डांगरेया री बलि देणे होर दान चढ़ाणे ले बढ़ी किन्हें आ।[23]

³⁴जेबे यीसूए देख्या कि तिन्हें समझदारी किन्हें जवाब दितेया, इधी कठे यीसूए तेस किन्हें बोल्या, “तू परमेसरा रे राजा ले दूर नी आ।” होर फेरी केसी जो तेस ले कुछ होर पूछणे री हिम्मत नी हुई।

³⁵फेरी यीसूए मन्दरा मन्झ उपदेस देंदे हुए बोल्या कि, व्यवस्था स्खाणे वाल़े रा मतलब क्या आ जेबे स्यों बोल्हा ऐं कि, मसीह राजा दाऊदा रा मह्ठा?

³⁶क्यूंकि राजा दाऊदे आप्हुए पवित्र आत्मा री सामर्थ रे ज्रीए मसीह रे बारे मन्झ बोल्या कि: परमेसरे मेरे प्रभु किन्हें बोल्या, मेरी सीधी तरफ बैठ, जेबे तक कि हांऊँ तेरे सब दुस्मणा जो पूरी तरहा ले हराई नी देऊँ।

³⁷राजा दाऊद ता आपु ई मसीह जो मेरा प्रभु बोल्हा आ, फेरी से तेसरा मह्ठा केथी ले हुआ? होर भीड़ा रे लोके तेसरी गल्ला खुसी किन्हें सुणी।

³⁸यीसूए आपणे उपदेसा मन्झ तिन्हा किन्हें बोल्या, “व्यवस्था स्खाणे वाल़े ले चतन्न रैहया, जो आपणे लम्बे चोगे पैन्ही किन्हें घुमणा होर बजारा मन्झ नमस्कार पाणा पसंद करहा ऐं।

³⁹होर यहूदी सभा मन्झ खास जगहा पर बैठणा होर धामा मन्झ आदर देणे वाली जगहा पाणे री चाह रख्हा ऐं।

⁴⁰स्यों विधवा जो ठगी किन्हें तिन्हारे घर-बार होर जायदाद आपणे कठे लई लैहां ऐं, होर दिखावे रे कठे बड़ी देरा तक प्रार्थना करदे रैंहयां ऐं, इन्हा लोका जो कड़ी सजा मिलणी।”

⁴¹होर यीसूए मन्दरा रे दान पात्रा रे साम्हणें बैठी किन्हें देख्या करहा था कि, लोक किहाँ दान पात्रा मन्झ दान पाहें, होर कई अमीर लोके बौह्त सारा धन पाया।

⁴²इतने मन्झ एक गरीब विधवे आई किन्हें ताम्बे रे दो छोटे सिक्के पाये।

⁴³तेबे तिन्हें आपणे चेले जो नेडे सादी किन्हें तिन्हा किन्हें बोल्या, “हांऊँ तुस्सा किन्हें सच्च बोल्हा कि, मन्दरा रे दान पात्रा मन्झ सभी ले ज्यादा दान देणे वाली ये विधवा ई।

⁴⁴क्यूंकि सभिऐ आपणे धना री बढ़ती री वजहा ले दान दितेया, एस्से विधवे आपणे जीणे रे कठे जो कुछ तेस्सा वाले था से सभ तेस्से दान पात्रा मन्झ पाई दितेया।”