Read Mandeali मरकुस 15 Bible Online

मरकुस 15 - Mandeali bible

मरकुस 15

¹होर भ्याग हुंदे ई झटपट मुख्य याजके, यहूदी मुखिये होर व्यवस्था स्खाणे वाल़े ये होर माहसभा रे लोके सलाह करी किन्हें यीसू जो बान्हेया, होर तेस जो लई जाई किन्हें यहूदिया ईलाके रे पिलातुस हाकमा रे हाथा मन्झ सौंपी दितेया।

²होर पिलातुस हाकमे तेस ले पूछेया, “क्या तू यहूदी लोका रा राजा आ?” यीसूए तेस जो जवाब दितेया कि, “तू आप्हुए बोल्या करहा।”

³होर मुख्य याजक तेस पर बौह्त गल्ला रा दोस ल्गाया करहा ऐं थे।

⁴पिलातुस हाकमे तेस ले दबारा पूछेया, “क्या तू कुछ जवाब नी लगीरा देंदा, देख, यूं तेरे पर दोस ल्गाया करहा ऐं?”

⁵यीसूए दबारा कुछ नी बोल्या; एथी तक कि पिलातुस हाकमे जो बड़ी हरानी हुई।

⁶होर हर साल फसहा रे साजे रे टैमा मन्झ एक कैदी जो लोका री मांगा रे मताबक छाडणे रा हाकमा रा रुआज था।

⁷होर बरअब्बा नांऊँआं रा एक माह्णुं तिन्हा बंदी साउगी कैदी था, जिन्हें जे दंगे मन्झ हत्या कितिरी थी।

⁸होर भीड़ पिलातुस हाकमा वाले जाई किन्हें तेस ले अर्ज करदी लगी कि, जिहां तू हमेसा ले आस्सा रे कठे करदा आईरा तेह्ड़ा ई तू एक कैदी जो आस्सा रे कठे छाडी दे।

⁹पिलातुस हाकमे तिन्हा जो जवाब दितेया, जेस जो तुस्से यहूदी लोका रा राजा बोल्हा ऐं क्या तुस्से चाहें कि, हांऊँ तेस जो छाडी देऊँ।

¹⁰क्यूंकि पिलातुस जाणहां था कि, मुख्य याजके यीसू किन्हें जलन रखणे री वजहा ले से पकड़वाईरा था।

¹¹पर मुख्य याजके भीड़ भड़काई ताकि स्यों पिलातुसा हाकमा किन्हें अर्ज करहे कि मसीह यीसू री जगहा पर बरअब्बा जो छाडी दे।

¹²ये सुणी किन्हें पिलातुस हाकमे तिन्हा ले दबारा पूछेया, “तेबे जेस जो जे तुस्से यहूदी लोका रा राजा बोल्हा ऐं, तेसरा हांऊँ क्या करूं?”

¹³स्यों दबारा चिंगे कि, यीसू जो क्रूसा प्रयाल्हे चढ़ाई किन्हें मुकाई देआ।

¹⁴पिलातुस हाकमे तिन्हा किन्हें बोल्या, “किधियो, इन्हें क्या बुराई कितिरी?” पर स्यों होर भी चिंगी-चिंगी किन्हें बोलदे लगे कि, “यीसू जो क्रूसा प्रयाल्हे चढ़ाई किन्हें मुकाई देआ।”

¹⁵तेबे पिलातुस हाकमे भीड़ा जो खुस करणे रे कठे, बरअब्बा जो तिन्हारे कठे छाडी दितेया, होर यीसू जो कोड़े ल्गाई किन्हें स्पाहीया रे हाथा सौंपी दितेया कि, तेस जो क्रूसा प्रयाल्हे चढ़ाई किन्हें मुकाई दितेया जाए।

¹⁶होर स्पाही यीसू जो किले रे अंदर आंघणा मन्झ लई गये, (जेस जो प्रीटोरियन मतलब पिलातुस हाकम रा सानदार घर बोल्या जाहाँ) होर सारी पलटना जो सादी लया।

¹⁷होर तिन्हें तेसरा मजाक डुआणे रे कठे तेस जो बैंगणी रंगा रा चोगा पन्ह्याये होर काण्डे रा ताज गुन्धी किन्हें तेसरे मूंडा पर रख्या।

¹⁸होर ये बोली किन्हें स्यों तेस जो नमस्ते करदे लगे कि, “हे यहूदी लोका रे राजे, नमस्कार!”

¹⁹होर स्यों तेसरे मूंडा पर सरकंडे लेई किन्हें बार-बार मारदे, होर तेस पर थुकदे होर घुटने टेकी किन्हें तेस जो नमस्कार करदे रहे।

²⁰होर जेबे स्यों तेसरा मजाक डूआई बैठे ता तिन्हें जो बैंगणी रंगा रा चोगा तेस जो पन्ह्याईरा था से तुआरी किन्हें तिन्हें तेस जो तेसरे कपड़े पन्ह्याई दिते, होर तेबे तेस जो क्रूसा प्रयाल्हे चढ़ाणे रे कठे यरुस्लेम सैहरा ले बाहर लई गये।

²¹कुरेनी[29] सैहरा रा एक समौन नांऊँआं रा माह्णुं से जे सिकंदर होर रूफसा रा बापू आ, से यरुस्लेम सैहरा वखा जो आई करहा था; तिन्हें तेस जो बगारी मन्झ जबरदस्ती पकड़ेया कि से यीसू रा क्रूस चकी किन्हें लई चले।

²²होर स्यों तेस जो गुलगुता नांऊँआं री जगहा पर लई गये जेसरा मतलब आ, खोपड़ी री जगहा।

²³होर स्यों तेस जो लोहबान[30] मिलाईरा अंगूरा रा रस देंदे लगे कि तेस जो पीड़ ना हो, पर तिन्हें से नी लया।

²⁴तेबे तिन्हें यीसू क्रूसा प्रयाल्हे चढ़ाई दितेया, होर तेसरे कपड़े पर चिठिया पाई, ताकि ये फैसला हुई सके कि केस-केस जो क्या बांड मिलणी।

²⁵होर ये भ्यागा रे नो बजे जेबे जे तिन्हें से यीसू क्रूसा प्रयाल्हे चढ़ाया।

²⁶होर तेसरा दोस पत्र लिखी किन्हें क्रूसा प्रयाल्हे टांगी दितेया जेस पर लिखिरा था, “ये यहूदी लोका रा राजा आ।”

²⁷होर तिन्हें यीसू साउगी दो डाकू, एकी जो ओरली वखो होर दूजे जो परली वखा क्रूसा प्रयाल्हे चढ़ाए, होर इंहां करी किन्हें पवित्र सास्त्रा मन्झ लिखिरा से वचन पूरा हुआ कि से, “डाकूआ साउगी गिणेया गया।”

²⁸

²⁹होर पैंडे मन्झ आऊणें जाणे वाले मूंड हिल्लाई-हिल्लाई किन्हें ये बोली किन्हें तेसरी निंदा करहा ऐं थे कि, वाह! मन्दरा जो ढाणे वाले होर तीन ध्याड़े मन्झ बनाणे वाले![31]

³⁰क्रूसा प्रयाल्हे ले उतरी किन्हें आपणे आपा जो बचाई ले।

³¹इंहां ईं मुख्य याजक व्यवस्था स्खाणे वाल़े साउगी, आपु मन्झ मजाक करेया करहा ऐं थे कि, “इन्हें होर बचाए, होर से आपणे आपा जो नी बचाई सक्दा?

³²इस्राएल देसा रा राजा मसीह ऐबे क्रूसा प्रयाल्हे ले उतरी किन्हें आई जा कि, आस्से देखी किन्हें विस्वास करिए।” होर जो कैदी तेस साउगी क्रूसा प्रयाल्हे चढ़ाई रे थे, स्यों भी यीसू रा मजाक डूआया करहा ऐं थे।

³³होर पुरे देसा मन्झ बारा बजे ले तीन बजे तक सब जगहा न्हयारा हुई गया।

³⁴तीन बजे यीसूए चिंगी किन्हें जोरा किन्हें बोल्या, “इलोई, इलोई, लमा सबक्तनी?” जेसरा मतलब आ, “हे मेरे परमेसर, हे मेरे परमेसर तैं हांऊँ किधियो छाडी दितेया?”

³⁵होर जो तेसरे नेडे खड़ीरे थे, तिन्हा मन्झा ले कई लोका जो गलतफैह्मी हुई; की से एलिय्याह नबी जो सादेया करहा।

³⁶होर एकिये दौड़ी किन्हें स्पंज जो सिरके मन्झ डूबोया, होर सरकंडे पर रखी किन्हें तेस जो चुसणे जो दितेया, होर बोल्या, “रुकी जाऊआ; देख्हा ऐं कि, एलिय्याह नबी तेस जो थाले तुआरने रे कठे आहूँआं कि, नी।”[32]

³⁷तेबे यीसूए बड़े जोरा किन्हें चिंगी किन्हें आपणे प्राण छाडी दिते।

³⁸होर मन्दरा रा पर्दा ऊपरा ले लई किन्हें हेठा तक फटी किन्हें दो टुकड़े हुई गया।

³⁹जो सूबेदार तेसरे साम्हणें खड़ीरा था, जेबे तिन्हें यीसू जो चिंगी किन्हें प्राण छाडदे हुए देख्या, ता तेस किन्हें बोल्या, सच्चे ये माह्णुं, ता परमेसरा रा मह्ठा था।

⁴⁰कई ज्नाने भी दूरा ले देख्या करहा ई थी; तिन्हा मन्झ मगदल गांऊँआं री मरियम होर छोटे याकूब होर योसेसा री माऊ मरियम होर सलोमी थी।

⁴¹जेबे यीसू गलील जिल्ले मन्झ था, ये ज्नानिया जो तेसरी चेल्णिया थी स्यों तेसरी सेऊआ करहा ई थी। होर इन्हा साउगी होर भी बौह्त सारी ज्नाने थी, जो तेस साउगी यरुस्लेम सैहरा मन्झ आईरी थी। स्यों भी यीसू जो दूरा ले देखी करहा ई थी।

⁴²ये अरामा रे ध्याड़े ले एक ध्याड़े पैहले री त्यारी रा ध्याड़ा था। होर ऐबे सांझ हुई गईरी थी।

⁴³तेथी अरिमतियाह सैहरा रा रैहणे वाल़ा युसुफ आया, जो एक महासभा रा इज्जतदार माह्णुं था होर आपु भी परमेसरा रे राजा रा इंतजार करेया करहा था; से हिम्मत करी किन्हें पिलातुस हाकमे वाले गया होर यीसू री ल्हास मांगी।

⁴⁴पिलातुस हाकमे जो हरानी हुई कि, से इतने छोड़े ई मरी गया; होर तिन्हें सूबेदारा जो सादी किन्हें पूछेया कि, “क्या तेस जो मरिरे काफी देर हुई गई?”

⁴⁵जेबे सुबेदारा ले तिन्हें सारा हाल जाणी लया, ता ल्हास युसुफा जो देई दिती।

⁴⁶तेबे यूसुफे एक पतली चादर मुले खरीदी, होर ल्हास तुआरी किन्हें चादरा मन्झ लपेटी, होर तिन्हें तेसरी ल्हास चटाना रे बीचा मन्झ खणीरी एक डुआरा मन्झ रखी दिती, होर डुआरा रे खोले पर एक पात्थर धकेली दितेया।

⁴⁷होर मगदल गांऊँआं री मरियम होर योसेसा री माऊ मरियमे ये देखी लया कि तिन्हें यीसू केथी जे रख्या।