Read Mandeali मरकुस 2 Bible Online

मरकुस 2 - Mandeali bible

मरकुस 2

¹कुछ ध्याड़े ले बाद यीसू दबारा कफरनहूम सैहरा मन्झ आया होर लोके ये सुणया कि, यीसू घरा अंदर आ।

²फेरी इतने लोक कठे हुए, कि दुराजे वाले भी जगहा नी मिली; होर तिन्हें तिन्हा जो परमेसरा रा वचन सुणाया।

³होर चार लोके एक अध्रन्गा रा मरीज सणे बिस्त्रे यीसू वाले ल्यान्देया।

⁴पर बौह्त भीड़ा री वजहा ले स्यों यीसू वाले नी पूजी सके, तेबे जेस घरा मन्झ जे यीसू था, तिन्हें तेस घर रा छापर घ्वाड़ेया होर अध्रन्गा रा मरीज सण बिस्त्रे हेठ तुआरी दितेया।

⁵यीसूए, तिन्हारा विस्वास देखी किन्हें, तेस अध्रन्गा रे मरीजा किन्हें बोल्या, “मेरे मह्ठे, मैं तेरे पाप माफ करी दिते।”

⁶तेबे कई व्यवस्था स्खाणे वाल़े जो तेथी बैठीरे थे, आपणे मना मन्झ सोच विचार करदे लगे,

⁷“कि ये आदमी एह्ड़ा किधियो बोल्हा? ये ता परमेसरा री निंदा करहा! परमेसरा जो छाडी किन्हें कोई होर पाप माफ नी करी सक्दा।”

⁸यीसूए झटपट जाणी गया कि, स्यों आपणे-आपणे मना मन्झ एह्ड़ा सोच विचार करेया करहा ऐं, होर यीसूए तिन्हा किन्हें बोल्या, “तुस्से आपणे-आपणे मना मन्झ ये विचार किधियो करेया करहा ऐं?

⁹असान क्या आ? एस अध्रन्गा रे मरीजा जो ये बोलणा कि तेरे पाप माफ हुई गये, या ये बोलणा कि उठ आपणा बिस्त्रा चक होर हांडदा लग?

¹⁰ताकि हांऊँ तुस्सा जो साबित करी सकूं कि हांऊँ माह्णुं रा मह्ठा धरती पर पाप माफ करणे रा हक रख्हा आ।”

¹¹“यीसूए तेस अध्रन्गा रे मरीजा किन्हें बोल्या, उठ, आपणा बिस्त्रा चक होर आपणे घरा जो चली जा।”

¹²होर से मरीज उठेया, होर झटपट आपणा बिस्त्रा चकी किन्हें होर सभी रे साम्हणें निकली किन्हें चली गया; एता पर स्यों लोक बौह्त हरान हुए, होर परमेसरा री बड़ाई करी किन्हें बोल्दे लगे, “कि आस्से एह्ड़ा कधी नी देख्या।”

¹³होर फेरी यीसू निकली किन्हें गलील समुद्रा रे बाढे गया, होर सारी भीड़ तेसरे पीछे चली, होर से तिन्हा जो उपदेस देंदा लग्या।

¹⁴जांदे हुए तिन्हें हलफईस रे मह्ठे लेवी जेसरा नांऊँ मती भी था जो चुंगी लैणे री चौकी पर बैठीरे देख्या, होर तेस किन्हें बोल्या, “आ मेरा चेला बण,” होर से उठी किन्हें, यीसू रा चेला बणने रे कठे तेस साउगी चली गया।

¹⁵होर जेबे यीसू मती रे घरा खाणा खांदे बैठीरा था; ता कई एह्ड़े लोक थे जिन्हा जो लोक पापी बोल्हा ऐं थे होर दूजे चुंगी लैणे वाल़े थे, स्यों यीसू होर तेसरे चेले साउगी खाणा खांदे बैठे, क्यूंकि बौह्त लोक यीसू साउगी आईरे थे।

¹⁶होर व्यवस्था स्खाणे वाल़े जेह्ड़े फरीसी लोक थे तिन्हें देखेया कि, यीसू चुंगी लैणे वाल़ेया होर तिन्हा लोका साउगी जिन्हा जो लोक पापी बोल्हा ऐं थे खाणा खाया करहा था, तिन्हें यीसू रे चेले किन्हें बोल्या, “से ता चुंगी लैणे वाल़े होर पापिया साउगी खांहां पीहां!”

¹⁷यीसूए ये सुणी किन्हें, तिन्हा किन्हें बोल्या, “भले चंगे जो बैदा री ज्रूरत नी ई, पर ब्मारा जो बैदा री ज्रूरत ई। जो आपणे आपा जो धर्मी सोच्हा ऐं तिन्हा जो मेरी ज्रूरत नी ई, पर तिन्हा जो मेरी जरूरत ई स्यों जे आपणे आपा जो पापी मन्हां ऐं।”

¹⁸यहून्ना बपतिस्मा देणे वाल़े रे चेले होर फरीसी लोक ब्रत रख्हा ऐं थे; इधी कठे कुछ लोक आई किन्हें यीसू के बोल्या कि, “यहून्ना रे चेले होर फरीसी लोक ब्रत किधियो रख्हा ऐं, पर तेरे चेले ब्रत की नी करदे?”

¹⁹होर यीसूए तिन्हा किन्हें बोल्या, “जेबे तक नंऊँआं लाड़ा बरातिया साउगी रैंहयां ता स्यों कधी भी ब्रत नी करदे, मतलब जेबे तक नंऊँआं लाड़ा तिन्हा साउगी आ, तेबे तक तिन्हा जो ब्रत रखणे री कोई ज्रूरत नी ई।

²⁰पर एह्ड़े ध्याड़े आऊणें कि, नंऊँआं लाड़ा तिन्हा ले लग कितेया जाणा, तेस टैम तिन्हा ब्रत रखणा।”

²¹“नंऊँऐं कपड़े री टाल्ही पुराणे कपड़े पर कोई नी ल्गान्दा नी ता धोणे ले बाद नंऊँऐं कपड़े री टाल्हिया कठी हुई जाहीं, होर तेस कपड़े ज्यादा फटी जाणा।

²²नंऊँऐं अंगूरा रा रस पुराणे चामड़े रे थैलू मन्झ कोई नी रख्दा, नी ता अंगूरा रे रसा सीजी किन्हें चामड़े रे थैलू फाड़ी देणा, होर अंगूरा रा रस होर चामड़े रे थैलू दुंहींया बर्बाद हुई जाणा; पर अंगूरा रा नंऊँआं रस नौंऐं चामड़े रे थैलू मन्झ भरेया जाहाँ।”

²³होर एह्ड़ा हुआ कि अरामा रे ध्याड़े यीसू होर तेसरे चेले नाजा री डोहर्रिया मन्झा ले हुई किन्हें जाया करहा थे; होर तेसरे चेले चल्दे-चल्दे नाजा री सीरी तोड़ी-तोड़ी किन्हें खांदे लगे।

²⁴तेबे फरीसी लोके यीसू किन्हें बोल्या, “तेरे चेले अरामा रे ध्याड़े एह्ड़ा काम किधियो करहा ऐं, जो मूसा री व्यवस्था रे बरखलाफ आ?”

²⁵यीसूए तिन्हा किन्हें बोल्या, “क्या तुस्से कधी पवित्र सास्त्रा मन्झ नी पढ़ेया कि, जेबे आस्सा रे बापदादे राजा दाऊदा जो ज्रूरत थी होर जेबे से होर तेसरे साथी भूखे थे, तेबे तिन्हें क्या कितेया था?

²⁶तिन्हें अबियातार बडे याजका रे टैमा, परमेसरा रे घरा मन्झ जाई किन्हें चढ़ाईरी रोटिया खाध्ही, जिन्हा रोटिया जो याजका जो छाडी किन्हें कोई होर नी खाई सक्दा था, होर तिन्हें आपणे साथिया जो भी रोटिया दिती?”

²⁷होर यीसूए तिन्हा के बोल्या, “अरामा रा ध्याड़ा माह्णुं रे कठे बणाईरा, ना कि माह्णुं अरामा रे ध्याड़े रे कठे बणाईरा।

²⁸इधी कठे हांऊँ माह्णुं रा मह्ठा अरामा रे ध्याड़े रा भी प्रभु आ।”