Read Mandeali मरकुस 5 Bible Online

मरकुस 5 - Mandeali bible

मरकुस 5

¹यीसू होर तेसरे चेले समुद्रा री दूजी तरफ गिरासेनिया रे ईलाके मन्झ पूजी गये,

²होर जेबे से किस्तिया ले उतरेया ता झटपट एक माह्णुं जेस मन्झ जे दुस्टात्मा थी, समसान घाटा ले निकली किन्हें तेस किन्हें मिल्या।

³से समसान घाटा मन्झ रैंहयां था। होर कोई भी तेस जो सांगला किन्हें नी बान्ही सक्दा था,

⁴क्यूंकि से बार-बार बेड़िया होर सांगला किन्हें बान्हीरा हुंहाँ था, पर तिन्हें सांगल त्रोड़ी दिते होर बेड़िया रे टोटे-टोटे करी दिते, होर कोई तेस जो आपणे बसा मन्झ नी करी सक्दा था।

⁵से लगातार राती ध्याड़ी समसान घाटा होर प्हाड़ा मन्झ चिंगा था, होर आपणे आपा जो पात्थरा किन्हें मारहा था।

⁶जेबे तिन्हें यीसू देख्या से दौड़ी किन्हें तेस वाले आया, होर जांढू रे भारे यीसू रे पैरा पर पई गया।

⁷यीसूए तेस किन्हें बोल्या, “हे दुस्टात्मा, एस माह्णुं मन्झा ले निकली जा।”

⁸होर तिन्हें चिंगी किन्हें बोल्या, “हे यीसू, परमप्रधान परमेसरा रे मह्ठे, तेरा मेरे किन्हें क्या रिस्ता? हांऊँ तुजो परमेसरा री कसम देहां कि, मुंजो दुःख नी दे।”[4]

⁹यीसूए तेस ले पूछेया, “तेरा नांऊँ क्या आ?” तिन्हें यीसूए किन्हें बोल्या, “मेरा नांऊँ सेना आ; क्यूंकि आस्से बौह्त ऐं, जो एस माह्णुं मन्झ रैंहयां ऐं।”

¹⁰होर तिन्हें तेस ले बौह्त अर्ज किती, “आस्सा जो एस ईलाके ले बाहर नी भेज।”

¹¹तेथी प्हाड़ा पर सुअरा रा एक बडा झुंड चरेया करहा था।

¹²होर दुस्टात्मे तेस ले अर्ज करी किन्हें बोल्या कि, “आस्सा जो इन्हा सुअरा मन्झ भेजी दे, ताकि आस्से तिन्हा मन्झ जाई सको।”

¹³होर यीसूए तिन्हा जो हुक्म दितेया होर दुस्टात्मा निकली किन्हें सुअरा मन्झ चली गयी, होर तेस झुंडा मन्झ करीब दो हज़ार सुअर थे, से झुंड प्रचण्ड हुई किन्हें ढलाना परा ले समुद्रा मन्झ पई गया, होर डूबी मरेया।

¹⁴होर सुअरा रे पुहाल डरी किन्हें गांऊँआं मन्झ जाई किन्हें ये खबर दिती, होर जो कुछ हुआ तेता जो देखणे रे कठे लोक आये।

¹⁵होर स्यों यीसू वाले आये, होर देखा, जेस मन्झ जे दुस्ट आत्मा री सेना समाईरी थी, तेस जो तिन्हें कपड़े पैहनी किन्हें होर आपणे पुरे होसा मन्झ ठीक हुई किन्हें बैठीरे देख्या, होर स्यों ये देखी किन्हें डरी गये।

¹⁶होर देखणे वाले जेस मन्झ जे दुस्टात्मा थी, होर सुअरा रा पूरा हाल तिन्हा जो दसेया।

¹⁷होर स्यों यीसू वाले आई किन्हें अर्ज करदे लगे कि, आस्सा रे ईलाके ले बाहर चली जा।

¹⁸होर जेबे यीसू जाणे रे कठे किस्ती पर चढ़दा लग्या, ता से जेस मन्झ जे पैहले दुस्टात्मा थी, से यीसू ले अर्ज करदा लग्या कि, “मुंजो आपणे साउगी आऊणें दे।”

¹⁹पर यीसूए तेस जो आपणे साउगी आऊणें नी दितेया, होर तेस किन्हें बोल्या, “आपणे घरा जाई किन्हें आपणे लोका जो दस कि, तेरे पर दया करी किन्हें प्रभुए तेरे कठे केह्ड़े बडे-बडे काम किते।”

²⁰से जाई किन्हें दिकापुलिस ईलाके मन्झ एस गल्ला रा प्रचार करदा लग्या कि, यीसूए मेरे कठे केह्ड़े बडे-बडे काम किते; होर जिन्हें ये गल सुणी स्यों हरान हुए।

²¹जेबे यीसू गलील समुद्रा री दूजी तरफ पुज्हेया ता, एक बडी भीड़ तेसरे साम्हणें कठी हुई; होर से समुद्रा रे बाढे ई खड़ीरा था।

²²होर यहूदी सभा रे मुखिये मन्झा ले एक याईर नांऊँआं रा मुखिया आया, होर तेस जो देखी किन्हें से तेसरे पैरा पर पई गया।

²³होर तिन्हें ये बोली किन्हें बौह्त अर्ज किती कि, “मेरी छोटी बेटी मरणे वाली ई: तू आई किन्हें तेस्सा जो छुही ले, ताकि से ठीक हुई जाए होर जीऊन्दी रहे।”

²⁴तेबे यीसू होर तेसरे चेले यहूदी सभा रे मुखिये साउगी गये; होर बडी भीड़ तेसरे पीछे चली पई, एथी तक कि लोक तेस पर पई जाया करहा ऐं थे।

²⁵होर एक ज्नाने थी, जेस्सा जो बारा साला ले खून बैहणे री ब्मारी थी।

²⁶होर से कई बैदा ले लाज करान्दे-करान्दे बौह्त दुःखी हुई चुकीरी थी होर तेस्से आपणा सभ कुछ खर्च करी दितिरा था, पर कुछ फायदा नी हुआ, पर होर जादा ब्मार हुई गईरी थी।

²⁷जेबे तेस्से यीसू जो लोका जो ठीक करणे रे बारे मन्झ सुणेया से भीड़ा मन्झ तेसरे पीछे आई, होर तेसरे कपड़े छुही लये।

²⁸क्यूंकि तेस्से आपणे मना मन्झ बोल्हा ई थी कि, “अगर हांऊँ तेसरे कपड़े छुही लैन्घी, ता मां ठीक हुई जाणा।”

²⁹होर झटपट तेस्सा रा खून बैहणा बंद हुई गया; होर तेस्से आपणे सरीरा मन्झ जाणी लया कि, हांऊँ तेस्सा ब्मारी ले ठीक हुई गयी।

³⁰यीसूए तेबे ई जाणी लया कि, मेरी सामर्थे कोई ठीक किती रा, होर से भीड़ा मन्झा ले पीछे मुड़ेया होर पूछेया, “मेरे कपड़े कुने छुहे?”

³¹होर तेसरे चेले तेस किन्हें बोल्या, “तू देख्हा कि, भीड़ तेरे पर पई जाया करहा ई, होर तुस्से पुछ्हा ऐं; कि हांऊँ कुने छुहेया?”

³²तेबे यीसूए तेस्सा ज्नाने जो देखणे रे कठे जेस्से जे ये काम कितिरा था, चहुँ वखा जो देख्या।

³³तेबे तेस्से ज्नाने ये जाणी किन्हें कि, तेस्सा किन्हें केह्ड़ी भलाई हुई, से डरदी होर काम्दी हुई आई, होर तेसरे पैरा पर पई किन्हें, तेस किन्हें सारा हाल सच्च-सच्च बोली दितेया।

³⁴यीसूए तेस्सा किन्हें बोल्या, “मह्ठीऐ, तैं विस्वास कितेया कि हांऊँ तुजो ठीक करी सक्हा, इधी कठे तू ठीक हुई, सांति किन्हें जा, होर आपणी एस्सा ब्मारी ले बची रैह।” [5]

³⁵यीसू तेस्सा ज्नानिया साउगी हल्ली तक ये बोल्या ई करहा था, तेबे यहूदी सभा रा मुखिया, याईरा रे घरा रे लोके आई किन्हें तेस किन्हें बोल्या कि, “तेरी बेटी मरी गयी; ऐबे तू गुरु जो किधियो परेसान करेया करहा?”

³⁶जो गल्ला स्यों करेया करहा ऐं थे, यीसूए स्यों गल्ला अनसुणी करी किन्हें, यहूदी सभा रे मुखिये याईरा किन्हें बोल्या, “मत डर; सिर्फ विस्वास रख।”

³⁷होर तिन्हें पतरस होर याकूब होर याकूबा रे भाई यहून्ना जो छाडी किन्हें, होर केसी जो आपणे साउगी नी आऊणें दितेया।

³⁸होर यहूदी सभा रे मुखिये रे घरा मन्झ पुज्ही किन्हें, तिन्हें लोका जो बौह्त रोंदे होर चिंगदे देख्या।

³⁹तेबे यीसूए अंदर जाई किन्हें तिन्हा किन्हें बोल्या, “तुस्से किधियो हाल्ला पाईरा होर रोंदे लगिरे? मह्ठी मरीरी नी, पर सया करहा ई।”

⁴⁰स्यों सुणी किन्हें स्यों तेसरा मजाक डुआन्दे लगे, पर तिन्हें सभ बाहर काढे होर मह्ठी रे माऊ-बापू होर आपणे चेले लई किन्हें से अंदर गया, जेथी जे मह्ठी पईरी थी।

⁴¹होर मह्ठी रा हाथ पकड़ी किन्हें तिन्हें तेस्सा किन्हें बोल्या, “तलीता कूमी” जेसरा मतलब ये आ कि “हे मह्ठीऐ, हांऊँ तेरे किन्हें बोल्हा, उठी जा।”

⁴²होर मह्ठी झटपट उठी किन्हें चल्दी फिरदी लगी; होर से बारा साला री थी। होर स्यों लोक बौह्त हरान हुई गये।

⁴³फेरी यीसूए तिन्हा जो खबरदार करी किन्हें हुक्म दितेया कि ये गल केसी जो पता नी चले होर ये भी बोल्या कि, “एस्सा मह्ठीया जो कुछ खाणे रे कठे देआ।”