Read Mandeali मरकुस 8 Bible Online

मरकुस 8 - Mandeali bible

मरकुस 8

¹तिन्हा ध्याड़े, जेबे जे दबारा बडी भीड़ कठी हुई, होर तिन्हा वाले ऐबे खाणे रे कठे कुछ भी नी बच्या। तिन्हें आपणे चेले जो आपु वाले सादी किन्हें तिन्हा किन्हें बोल्या,

²“मुंजो ऐस्सा भीड़ा पर तरस आया करहा आ, क्यूंकि ये त्राय ध्याड़े ले मेरे साउगी ऐं, होर ऐबे तिन्हा वाले खाणे रे कठे कुछ नी बचिरा।

³अगर हांऊँ तिन्हा जो वापस भूखा घरा भेजी दूं, ता तिन्हा पैंडे मन्झ ई थकी किन्हें बेहोस हुई जाणा; क्यूंकि इन्हा मन्झा ले कई ता बौह्त दूरा ले आईरे।”

⁴यीसू रे चेले तेस जो जवाब दितेया कि, “एथी सुनसान जगहा मन्झ इतनी रोटिया केथी ले ल्याईये ताकि स्यो रजी जाए?”

⁵यीसूए तिन्हा ले पूछेया, “तुस्सा वाले कितनी रोटिया ई?” तिन्हें बोल्या, आसा वाले “सात रोटिया ई।”

⁶तेबे यीसूए लोका जो जमीना पर बैठणे रा हुक्म दितेया, होर तिन्हें सात रोटिया लई। होर परमेसरा रा धन्यावाद करी किन्हें तोड़ी, होर बांडणे रे कठे आपणे चेले जो देंदे गये होर चेले रोटिया भीड़ा मन्झ बांडी दिती।

⁷तिन्हा वाले थोह्ड़ी छोटी मछिया भी थी; होर तिन्हें परमेसरा रा धन्यावाद करी किन्हें तिन्हा रोटिया जो लोका जो बांडणे रा हुक्म दितेया।

⁸होर स्यों खाई किन्हें रजी गये होर रोटिया बची गई। तिन्हें बचिरे रोटिया रे भर्हिरे सात छड़ोल्लू चक्के।

⁹स्यों लोक लगभग चार हज़ारा रे करीब थे, (एता मन्झ ज्नानिया होर बच्चे री गिणती नी कितिरी थी) होर यीसूए खाने रे बाद स्यों भेजी दिते।

¹⁰होर से झटपट आपणे चेले साउगी किस्ती पर स्वार हुई किन्हें दलमनुता जिल्ले मन्झ चली गया।

¹¹होर फरीसी लोके सुणेया कि यीसू पूजी गईरा, स्यों आये होर यीसू जो फसाणे रे कठे सुआल जवाब करदे लगे। होर तेस जो परखणे रे कठे तेस ले कोई स्वर्गा रा चिन्ह मान्गेया, ताकि तिन्हा जो पता लगे कि परमेसरे ई यीसू भेजिरा।

¹²से आपणी आत्मा मन्झ दुःखी हुआ, “एस पीढ़ी रे लोक चिन्ह किधियो तोप्हा ऐं? हांऊँ तुस्सा किन्हें सच्च बोल्हा कि, एस्सा पीढ़ी री लोका जो कोई चिन्ह नी दितेया जाणा।”

¹³होर से तिन्हा जो छाडी किन्हें दबारा किस्तिया पर आया, होर समुद्रा रे पारली तरफ गया।

¹⁴होर चेले रोटिया ल्याऊणा भूली गईरे थे, पर किस्ती मन्झ तिन्हा वाले एक ई रोटी थी।

¹⁵होर यीसूए स्यों तिन्हारी गलत उपदेस रे बारे मन्झ खबरदार किते होर बोल्या कि, “फरीसी लोका रे स्जेड़े होर हेरोदेस राजा रे स्जेड़े ले चतन्न रैहया।”

¹⁶चेले ये समझी नी पाए स्यों आपु मन्झ सोच विचार करदे लगे कि, “आस्सा वाले सभी रे कठे रोटिया नी हाई इधी कठे यीसूए एह्ड़ा बोल्या।”

¹⁷ये जाणी किन्हें यीसूए तिन्हा किन्हें बोल्या, “तुस्से रोटिया रे बारे मन्झ सोच विचार किधियो करेया करहा ऐं कि तुस्सा वाले रोटी नी हाई? क्या हल्ली तक तुस्से जाणदे होर समझ्दे नी ऐं? क्या तुस्सा रा मन सख्त हुई गईरा?

¹⁸क्या हाखिया हुंदे हुए भी नी देख्दे? होर कान हुंदे हुए भी नी सुणदे? होर तुस्सा जो याद नी आ।

¹⁹कि जेबे मैं पांज हज़ार लोका रे कठे पांज रोटिया तोड़ी थी ता तुस्से बचीरे रोटिया रे कितने छड़ोल्लू भरी किन्हें चके थे?” चेले जवाब दितेया, “बारा छड़ोल्लू” चक्के थे।

²⁰यीसूए तिन्हा ले पुछेया, “होर जेबे मैं चार हज़ार लोका रे कठे सात रोटिया तोड़ी, ता तुस्से बचीरे रोटिया रे कितने छड़ोल्लू चक्के?” होर चेले तेस किन्हें बोल्या कि, “आस्से सात छड़ोल्लू चक्के थे।”

²¹यीसूए तिन्हा किन्हें बोल्या, “क्या हल्ली तक तुस्से नी समझे?”

²²यीसू होर तेसरे चेले बैतसैदा गांऊँआं मन्झ आये; होर लोके एक काणा तेस वाले ल्यांदेआ होर तेस ले अर्ज किती कि, तेस जो छुही किन्हें ठीक करी दे।

²³होर यीसूए तेस अंधे रा हाथ पकड़ेया होर तेस जो गांऊँआं ले बाहर लई गया, होर तिन्हें आपणा थूक तेसरी हाखिया पर लगाई किन्हें तेसरी हाखिया छुही, होर तेस ले पूछेया, “क्या तुजो कुछ सुझ्हा करहा?”

²⁴गास देखी किन्हें तिन्हें बोल्या, “हांऊँ माह्णुंआं जो देख्हा” क्यूंकि स्यों मुंजो डाला साहीं चल्दे फिरदे नजर आया करहा ऐं।

²⁵तेबे तिन्हें दबारा तेसरी हाखिया छुही, होर तिन्हें ध्याना किन्हें यीसू देख्या। होर से ठीक हुई गया, होर सब कुछ साफ-साफ सुझ्दा लग्या।

²⁶होर तिन्हें से ये बोली किन्हें घरा जो भेज्या कि, “एस टैम तू एस गांऊँआं मन्झ नी जा पर घरा जो चली जा।”

²⁷बैतसैदा गांऊँआं जो छाडी किन्हें यीसू होर तेसरे चेले कैसरिया फिलिप्पी सैहरा रे ओरले परले गांऊँआं मन्झ चली गये; होर पैंडे मन्झ यीसूए आपणे चेले ले पूछेया कि, “लोक मुंजो क्या बोल्हा ऐं की हांऊँ कुणहां?”

²⁸चेले तेस जो जवाब दितेया कि कुछ बोल्हा ऐं कि “तू यहून्ना बपतिस्मा देणे वाल़ा आ; कई बोल्हा ऐं कि तू एलिय्याह नबी आ; होर कुछ लोक बोल्हा ऐं कि तू पुराणे नबिया मन्झा ले कोई एक आ।”

²⁹यीसूए तिन्हा ले पूछेया, “पर तुस्से मुंजो क्या बोल्हा ऐं की हांऊँ कुणहां?” पतरसे तेस जो जवाब दितेया, “तू मसीह आ।”

³⁰तेबे तिन्हें तिन्हा जो खबरदार करी किन्हें बोल्या कि, तुस्से मेरे बारे मन्झ केसी जो देख्या दस्दे कि हांऊँ मसीह आ।

³¹तेबे यीसू तिन्हा जो स्खान्दा लग्या कि, हांऊँ माह्णुं रे मह्ठे रे कठे जरूरी आ कि हांऊँ बौह्त दुःख उठाऊँ, होर यहूदी मुखिये, मुख्य याजक होर व्यवस्था स्खाणे वाल़े मुंजो बेकार समझी किन्हें मारी दे, होर हांऊँ त्रीजे ध्याड़े जिउंदा हुई जाऊँ।

³²यीसूए ये गल तिन्हा किन्हें साफ-साफ बोली दिती। एस गल्ला पर पतरस तेस जो लग जे लई जाई किन्हें झिड़क्दा लग्या क्यूंकि तेस जो लग्हा था कि मसीह कधी मरी नी सक्दा।

³³पर तिन्हें मुड़ी किन्हे आपणे चेले वखा जो देख्या होर यीसूए पतरस प्रुआचेया, “एह्ड़ा सोचणा बंद करी दे! सैतान तुध ले एह्ड़ी गल्ला बुलाया करहा! जेह्ड़ा परमेसर मेरे ले कुराणा चाहां तेहड़ा नी चाही किन्हें तू मेरे ले से कुराणा चाहां जेहड़ा लोक चाहें।”

³⁴यीसूए भीड़ा समेत आपणे चेले जो सादी किन्हें बोल्या, “जो कोई मेरा चेला बणना चाहां, से आपणी इच्छा पूरा करणे रे बजाए दुःखा रा क्रूस चकी किन्हें मेरा चेला बणे।

³⁵क्यूंकि जो कोई आपणी जान बचाणा चाहां, तेस अनंतकाला री जिन्दगी खोई देणी, पर जो कोई मेरे होर मेरे खुसी री खबरा रे कठे आपणी जान गुआई देह्न्गा, तेस हमेसा री जिन्दगी पाणी।

³⁶होर अगर तुस्से पूरे संसारा री चीज़ा कठा करी ले, पर फेरी भी अनंत जिन्दगी नी पाई सके, ता तेता ले तुस्सा जो क्या फायदा?

³⁷क्यूंकि कोई भी माह्णुं केसी चीजा री तुलना अनंत जिन्दगी किन्हें नी करी सक्दा।

³⁸एस गल्ला पर सोच विचार करा, जो कोई एस व्यभिचारी होर पापी जाति रे बीच मेरे होर मेरे बचना री वजहा ले मेरा इनकार करणा, मां माह्णुं रे मह्ठे जेबे पवित्र स्वर्गदूता किन्हें आपणे बापू री महिमा साउगी आऊंणा, तेबे मा भी, तिन्हारा इनकार करणा।”