Read Mandeali मरकुस 9 Bible Online

मरकुस 9 - Mandeali bible

मरकुस 9

¹यीसूए चेलेया किन्हें ये भी बोल्या, “हांऊँ तुस्सा किन्हें सच्च बोल्हा कि एथी बौह्त लोक एह्ड़े खड़ीरे कि, जेबे तिन्हा परमेसरा रा राज सामर्था किन्हें आऊंदा देखणा, तेबे तिन्हा मरणा।”

²छेह ध्याड़े ले बाद यीसू, पतरसा होर याकूबा होर यहून्ना जो आपणे साउगी प्हाड़ा पर लई गया, होर जेबे स्यों प्हाड़ा पर कल्हे थे, तेबे तिन्हारे साम्हणें यीसू रा रूप बधली गया।

³होर तेसरे कपड़े एह्ड़े चमक्दे लगे होर एथी तक चीटे हुई गये कि धरती पर कोई माह्णुं भी तेहड़े चीटे नी करी सक्दा।

⁴होर तिन्हा जो मूसा नबी साउगी एलिय्याह नबी सुझ्या, होर स्यों यीसू साउगी गल्ला करेया करहा ऐं थे।

⁵होर पतरसे यीसू किन्हें बोल्या, “हे गुरु, आस्सा रा एथी रैहणां ठीक आ। इधी कठे आस्सा तीन तरपाला वाले डेरे बनाणे एक तेरे कठे, एक मूसा नबी रे कठे, होर एक एलिय्याह नबी रे कठे।”

⁶पतरस नी जाणदा था कि से क्या बोल्या करहा, क्यूंकि पतरस, याकूब होर यहून्ना बौह्त डरी गईरे थे।

⁷तेबे एक बादले स्यों घेरी लये, होर तेस बादला मन्झा ले परमेसरे बोल्या कि, “ये मेरा लाडला मह्ठा आ, एसरी सुणां।”[11]

⁸तेबे चेले झटपट चारो तरफ देख्या, होर यीसू जो छाडी किन्हें आपणे साउगी होर कोई नी सुझ्या।

⁹होर स्यों प्हाड़ा ले उतरेया करहा थे, यीसूए तिन्हा जो हुक्म दितेया कि, हांऊँ माह्णुं रा मह्ठा जेबे तक मरिरे मन्झा ले जिउंदा नी हूँगा तेबे तक जो कुछ तुस्से देख्या केसी किन्हें देख्या दसदे।

¹⁰होर तिन्हें स्यों गल्ला आपु तक ई रखी; होर आपु मन्झ बैहस करदे लगे कि, “मरिरे मन्झा ले जी ऊठणे रा क्या मतलब आ?”

¹¹होर चेले यीसू ले पूछेया, “व्यवस्था स्खाणे वाल़े किधियो बोल्हा ऐं कि, मसीहा रा एलिय्याह नबी ले पैहले आऊंणा जरूरी आ।”

¹²यीसूए तिन्हा जो जवाब दितेया कि, हां ये गल सच्च ई कि, “एलिय्याह नबिया पैहले आई किन्हें सब कुछ सुधारणा, फेरी तुस्से कि नी समझ्दे कि पवित्र सास्त्रा मन्झ मेरे बारे लिखिरा कि मां माह्णुं रे मह्ठे बौह्त दुःख उठाणा, होर हांऊँ बेकार गिणेया जाणा?

¹³पर हांऊँ तुस्सा किन्हें बोल्हा कि, एलिय्याह नबी साहीं एक माह्णुं ता आई चुकिरा जो यहून्ना बपतिस्मा देणे वाल़ा आ, होर जो तेसरे बारे पवित्र सास्त्रा मन्झ लिखिरा, तिहां ईं लोके तेस साउगी बुरा बर्ताव कितेया।”

¹⁴जेबे यीसू होर तेसरे तीन चेले होरी चेलेया वाले आये, ता तिन्हें तिन्हारे चारो तरफ बडी भीड़ लगिरी देखी। होर व्यवस्था स्खाणे वाल़े जो तिन्हा साउगी बैहस करदे देख्या।

¹⁵जेबे भीड़ा रे लोके यीसू देख्या ता सभ बौह्त हरान हुंदे लगे, होर भीड़ा रे लोक नमस्कार करणे रे कठे तेस वखा जो दौड़े।

¹⁶यीसूए तिन्हा ले पूछेया, “तुस्से इन्हा किन्हें क्या बैहस करेया करहा ऐं?”

¹⁷भीड़ा मन्झा ले एकिये तेस जो जवाब दितेया कि, “हे गुरू, मैं आपणे मह्ठा तेरे वाले ल्यान्दिरा, तू तेस जो छुही के ठीक कर क्यूंकि तेस मन्झ एक एह्ड़ी दुस्टात्मा ई से तेस जो बोलणा नी देंदी।

¹⁸जेबे केभे से दुस्टात्मा ऐस पर आहूँआं ईं, एस जो हेठ जमीना पर पटकी देहां ईं, होर एसरे मुंहा ले झाग निकल्दा लग्हा, होर दांद किर्डदा लग्हा, होर सुक्दा लगिरा; होर मैं तेरे चेले किन्हें बोल्या कि तेस्सा दुस्टात्मा जो काढी दे पर स्यों नी काढी सके।”

¹⁹ये सुणी किन्हें यीसूए तिन्हा जो जवाब दितेया कि, “हे विस्वास नी करणे वाले लोको, मां केभे तक तुस्सा साउगी रैहणां? होर कधी तक तुस्सा री सैहणी? तेस मह्ठे जो मेरे वाले ल्याऊआ।”

²⁰तेबे स्यों तेस जो तेस वाले लई आये जेबे दुस्टात्मे यीसू देख्या, ता तेस्से दुस्टात्मे से झटपट मरोड़ेया, होर से जमीना पर पया, होर मुंहा ले झाग काढी किन्हें रघड़धा लग्या।

²¹यीसूए तेसरे बापू ले पूछेया, “एसरी ये हालत कधी ले ई?” होर तिन्हें बोल्या, “बचपना ले एह्ड़ा ही आ।

²²दुस्टात्मे एस जो मारने रे कठे कधी आगी होर कधी पाणी मन्झ सट्टेया, पर अगर तू कुछ करी सक्हा, ता आस्सा पर तरस खाई किन्हें आस्सा री मदद कर।”

²³यीसूए तेस किन्हें बोल्या, “ये क्या गल हुई? की तू करी सका! विस्वास करणे वाले रे कठे कुछ भी हुई सक्हा।”

²⁴बच्चे रे बापूए झटपट गिड़गिड़ाई किन्हें बोल्या, “हे प्रभु, हांऊँ विस्वास करहा; होर तू मेरे अविस्वासा जो दूर कर।”

²⁵जेबे यीसूए देख्या कि, लोक दौड़ी किन्हें भीड़ कट्ठा करी करहा ऐं, ता तिन्हें दुस्टात्मा ये बोली किन्हें प्रुआची कि, “हे टाटी होर टऊणी करणे वाली दुस्टात्मा, हांऊँ तुजो हुक्म देहां, तेस मह्ठे मन्झा ले निकली जा, होर तेस मन्झ दबारा वापस देख्या आउंदी।”

²⁶तेबे से चिंगी किन्हें, होर तेस जो बौह्त मरोड़ी किन्हें, निकली गयी; होर मह्ठा मरीरे साहीं हुई गया, लोक एथी तक बोल्दे लगे कि, से ता मरी गया।

²⁷पर यीसूए तेसरा हाथ पकड़ी किन्हें से गास चक्या, होर से ठीक हुई किन्हें खड़ा हुई गया।

²⁸जेबे यीसू आपणे चेले साउगी घरा मन्झ कल्हा था, ता तेसरे चेले तेस ले पूछेया, “आस्से एस्सा दुस्टात्मा जो की नी काढी सके?”

²⁹तिन्हें तिन्हा किन्हें बोल्या कि, “एस किस्मा री दुस्टात्मा सिर्फ प्रार्थना रे ज्रीए ई निकली सक्हा ई।”

³⁰फेरी यीसू होर तेसरे चेले जेस ईलाके मन्झ थे तेथी ले चली पये, होर स्यों गलील जिल्ले मन्झा ले हुई किन्हें जाया करहा ऐं थे, होर यीसू नी चाहन्दा था कि केसी जो पता चले कि से तेस जगहा मन्झ आ क्यूंकि से आपणे चेलेया जो स्खाणा चाहां था।

³¹होर से आपणे चेलेया जो उपदेस देंदा होर तिन्हा जो बोल्हा था कि, “हांऊँ माह्णुं रा मह्ठा, मेरे दुसमणा हांऊँ पकड़णा, होर तिन्हा हांऊँ मारी देणा, होर मरणे ले बाद मां त्रीजे ध्याड़े जिउंदे हुई जाणा।”

³²पर चेले ये गला समझ नी पाए, पर यीसूए जेह्ड़ा बोल्या होर स्यों तेता रा मतलब पूछणे ले डरहा ऐं थे।

³³यीसू होर तेसरे चेले कफरनहूम सैहरा मन्झ आये, होर घरा मन्झ आई किन्हें तिन्हें तिन्हा ले पूछेया, “कि पैंडे मन्झ तुस्से केस गल्ला पर बैहस करेया करहा ऐं थे?”

³⁴पर स्यों चुप रहे, क्यूंकि पैंडे मन्झ तिन्हें आपु मन्झ ये बैहस किती थी कि, आस्सा मन्झा ले बडा कुणहां?

³⁵तेबे तिन्हें बैठी किन्हें स्यों बारा चेले सादे होर तिन्हा किन्हें बोल्या, “अगर कोई बडा हूंणां चाहां, ता से सभी ले छोटा होर सभिरा सेऊआदार बणे।”

³⁶होर यीसूए एक बच्चा लई किन्हें तिन्हा मन्झ खड़ा कितेया, होर आपणे गोदा मन्झ लई किन्हें चेले किन्हें बोल्या,

³⁷“क्यूंकि जो कोई मेरे साउगी प्यार रखी किन्हें इन्हा बच्चे साहीं केसी एकी जो अपनाहां, से मुंजो अपनाहां, होर जो कोई मुंजो अपनाहां, से मुंजो नी पर मेरे भेजणे वाले परमेसरा जो अपनाहां।”

³⁸तेबे यहून्ने यीसू किन्हें बोल्या, “हे गुरु आस्से एक माह्णुं तेरे हका किन्हें दुस्टात्मा काढदा देख्या होर आस्से तेस जो नांह करदे रहे, क्यूंकि से आस्सा साहीं तुस्सा रा चेला नी था।”

³⁹यीसूए बोल्या, “तेस जो नांह नी करा; कोई भी जो मेरे हका ले सामर्था रे काम करहा, से जल्दी ई मुंजो बुरा भला नी बोल्दा,”

⁴⁰क्यूंकि जो आस्सा रे बरखलाफ नी आ, से आस्सा वखा जो आ।

⁴¹अगर कोई तुस्सा जो एक ग्लास पाणी भी इधी कठे प्याये कि तुस्से मसीह रे लोक ऐं, ता हांऊँ तुस्सा किन्हें सच्च-सच्च बोल्हा कि परमेसरा तिन्हा जो पक्का इनाम देणा।

⁴²यीसूए ये भी बोल्या, “जो कोई मेरे पर विस्वास करणे वाले इन्हा छोटे मन्झा ले केसी ले पाप कुराहें ता तेसरे कठे खरा आ कि, एक बड़ा चक्की रा पाट तेसरे गला मन्झ टांग्या जाए, होर तेस जो समुद्रा मन्झ सट्टी दितेया जाए।

⁴³अगर तेरा हाथ तेरे ले पाप कुराणे जो त्यार हुई जाए, ता तेस हाथा किन्हें पाप करणा बंद करी दे, होर तुजो से हाथ काटणा भी पई जाए ता तू एह्ड़ा ई कर; टुंडा हुई किन्हें अनंत जिन्दगी मन्झ दाखल हूंणां तेरे कठे खरा आ, एता रे बजाय कि दो हाथ हुंदे हुए नरका मन्झ पाया जाए, जेथी री आग कधी बुझदी नी ई।

⁴⁴जेथी रे कीड़े कधी नी मरदे होर ना आग बुझ्हा ई।

⁴⁵होर अगर तेरा पैर तुजो पाप कुराणे जो त्यार हुई जाए, ता तेस पैरा किन्हें पाप करणा बंद करी दे, होर तुजो से पैर काटणा भी पई जाए ता तू एह्ड़ा ई कर। लंगड़ा हुई किन्हें अनंत जिन्दगी मन्झ दाखल हूंणां तेरे कठे खरा आ, एता रे बजाय कि दो पैर हुंदे हुए नरका री आगा मन्झ पाया जाए।

⁴⁶जेथी रे कीड़े कधी नी मरदे होर ना आग बुझ्हा ई।

⁴⁷होर अगर तेरी हाख तुजो पाप कुराणे जो त्यार हुई जाए, ता तेस हाखिया ले पाप करणा बंद करी दे, होर तुजो से हाख काढणी भी पई जाए ता तू एह्ड़ा ई कर। एक हाखी रा काणा हुई किन्हें परमेसरा रे राजा मन्झ दाखल हूंणां तेरे कठे खरा आ, एता रे बजाय कि दो हाखिया हुंदे हुए नरका री आगा मन्झ पाई जाए।

⁴⁸जेथी रे ‘कीड़े कधी नी मरदे होर ना आग बुझ्हा ई।’ [12]

⁴⁹हर एक माह्णुं जो आगा किन्हें सुध कितेया जाणा जिहां बलिदान लूणा रे ज्रीए सुध कितेया जाहाँ।

⁵⁰लूण बांका आ, पर अगर लूणा रा सुआद बिगड़ी जाए, ता से दबारा लूणका किहाँ बणाया जाणा? आपणे अंदर लूणा साहीं गुण रखा, होर तुस्से आपु मन्झ सांति किन्हें एक दूजे साउगी रहा।”