Read Mandeali लूका 13 Bible Online

लूका 13 - Mandeali bible

लूका 13

¹तेस टैम कुछ लोक आई पूजे, होर तिन्हें यीसू किन्हें बोल्या, रोम देसा रे पिलातुस हाकमे गलील जिल्ले रे कुछ लोक मारी दिते जेबे स्यों मन्दरा मन्झ बलिया चढ़ान्दें लगिरे थे।

²ये सुणी किन्हें यीसूए तिन्हा किन्हें ये बोल्या, “क्या तुस्से ये समझ्या करहा ऐं कि, ये गलील जिल्ले रे लोक, बाकि होरी गलील जिल्ले रे लोका ले ज्यादा पापी थे कि स्यों मारी दिते?”

³हांऊँ तुस्सा किन्हें बोल्हा, नंई स्यों इधी कठे नी मारे। पर अगर तुस्से पाप करणा नी छाडेया ता तुस्सा सभिया भी इंहां नास हुई जाणा।

⁴तुस्से क्या समझ्या करहा ऐं कि, स्यों ठारा लोक जिन्हा पर जे सिलोहा रा गुम्मट पया था होर स्यों दभी किन्हें मरी गये, क्या स्यों यरुस्लेम सैहरा रे सब रैहणे वाल़े लोका ले ज्यादा पापी थे?

⁵हांऊँ तुस्सा किन्हें बोल्हा कि, बिल्कुल नंई; पर अगर तुस्से मन नी फेरघे ता तुस्सा सभिया भी इंहां ई नास हुई जाणा।

⁶फेरी यीसूए ये उदाहरण भी बोल्या कि, “केसिए आपणे बगीचे मन्झ एक अंजीरा रा डाल लगाईरा था। से तेस डाला मन्झ हर साल फल तोप्दा आहूँआं था, पर नी मिलदा था।

⁷तेबे तिन्हें बगीचे रे माली किन्हें बोल्या, ‘देखा, तीन साला ले हांऊँ एस अंजीरा रे डाला मन्झ फल तोप्दा आया करहा, पर नी मिलदा। एस जो काटी दे क्यूंकि इन्हें बगीचे री बांकी जमीना रोकिरी।’

⁸तिन्हें मालिए तेस जो जवाब दितेया कि, हे माल्का, एस जो एस साल होर रैहणे दे; कि हांऊँ एसरे चारो तरफ खणी किन्हें खाद पाई देऊँ।

⁹होर अगली साला जो ये फल्गा ता खरा, नंई ता एस जो काटी देआ।”[24]

¹⁰केसी अरामा रे ध्याड़े यीसू एक यहूदी सभा मन्झ उपदेस देआ करहा था।

¹¹एक ज्नाने थी, जेस्सा जो ठारा साला ले एक दुस्टात्मे से कुबड़ी करी दितीरी थी। होर केसी भी तरीके ले से सीधी नी हुई सक्दी थी।

¹²होर जेबे यीसूए से देखी, तिन्हें से सादी लई, होर बोल्या, “हे जन्नाने, तू आपणी ब्मारी ले छुटी गई।”

¹³तेबे तिन्हें तेस्सा पर हाथ रखे, होर से झटपट सीधी हुई गई, होर परमेसरा री बड़ाई करदी लगी।

¹⁴इधी कठे कि यीसूए तेस जन्नाने जो अरामा रे ध्याड़े से ठीक कितिरी थी, यहूदी सभा रा मुखिया गुस्सा हुई किन्हें लोका ले बोल्दा लग्या कि, “हफ्ते मन्झ छेह ध्याड़े ऐं, जिन्हा मन्झ आस्सा जो काम करणा चहिए। इधी कठे तिन्हा ध्याड़े मन्झ ई आई किन्हें ठीक हुई जाऊआ; पर अरामा रे ध्याड़े मत आऊआ।”

¹⁵ये सुणी किन्हें प्रभु यीसूए जवाब दितेया, “हे पाखंडियो, क्या अरामा रे ध्याड़े तुस्सा मन्झा ले हर एक आपणे बोल्ह्द या गधे जो गुआणिया ले खोल्ही किन्हें पाणी पियांदे नी लई जांदा?

¹⁶होर क्या ये ठीक नी था कि, ये ज्नाने जो एक यहूदी ई होर अब्राहमा री मह्ठी ई, जेस्सा जो सैताने ठारा साला ले बान्ही किन्हें रखिरा था, ये अरामा रे ध्याड़े एस बंधना ले छुड़ाई जांदी?”

¹⁷जेबे यीसूए ये गल्ला बोली, ता तेसरे सब व्रोधी बेज्जत हुई गये, होर सारी भीड़ तेसरे महान काम जो से करहा था देखी किन्हें खुस हुई।

¹⁸फेरी यीसूए बोल्या, “परमेसरा रा राज केस साहीं आं? होर हांऊँ तेसरा बखान केस किन्हें करूं?

¹⁹से राई रे एक दाणे साहीं आं, जेस जो केसी माह्णुंऐ लई किन्हें आपणे बगीचे मन्झ बाह्या: होर से बढ़ी किन्हें बौह्त बड़ी डाल बणी गया; होर आसमाना रे चिड़ुऐ तेता री पांगे पर बसेरा कितेया।”[25]

²⁰यीसूए दबारा बोल्या, “हांऊँ परमेसरा रे राजा री तुलना केस किन्हें करूं?

²¹परमेसरा रा राज तेस स्जेड़े साहीं आं, जेस जो केसी जनानिये स्जेड़ा लई किन्हें बौह्त सारे आटे मन्झ म्लाई दितेया, होर हुंदे-हुंदे से सारा आटा सीजी गया।”

²²यीसू आपणे चेल्या साउगी सैहर-सैहर, होर गांऊँ-गांऊँ हुई किन्हें उपदेस देंदा हुआ यरुस्लेम सैहरा वखा जो जाया करहा था।

²³होर केसिए यीसूए ले पूछेया, “हे प्रभु, क्या परमेसरा ले उद्धार पाणे वाल़े थोह्ड़े ऐं?” तिन्हें तिन्हा किन्हें बोल्या,

²⁴“संगड़े दुराजे ले अंदर जाणे री कोसिस करा, क्यूंकि हांऊँ तुस्सा किन्हें बोल्हा कि, बौह्त एह्ड़े हूंणे जिन्हां जे अंदर जाणा चाहणा, पर नी जाई पाणा।

²⁵जेबे घरा रा माल्क परमेसरा उठी किन्हें दुराजा बंद करी चुके, होर तुस्से बाहर खड़ी किन्हें दुराजे जो खटखटान्दे लगो होर अर्ज करदे लगे, ‘हे प्रभु आस्सा रे कठे दुराजा खोल्ही दे,’ होर से जवाब दे कि हांऊँ तुस्सा जो नी जाणदा, तुस्से कुणहें होर केथी ले आईरे?

²⁶तेबे तुस्सा बोल्दे लगणा, ‘कि आस्से तेरे साम्हणें खाध्या पितेया होर तुस्से आस्सा रे कठे बजारा मन्झ उपदेस दितेया।’

²⁷पर तेस बोलणा, हांऊँ तुस्सा किन्हें बोल्हा, ‘हांऊँ नी जाणदा तुस्से केथी ले आईरे? हे दुस्ट काम करणे वाल्यो! तुस्से सभ मेरे वाले ले दूर हुई जाओ।’

²⁸तेथी रोणा होर दांद किर्ड़णें हूंणां, जेबे तुस्से अब्राहम होर इसहाक होर याकूब होर सब नबी जो परमेसरा रे राजा मन्झ ब्ठयाले, होर आपणे आपा जो बाहर काढदे हुए देखणा।

²⁹होर पूर्व होर पस्चिमा; उत्तर होर दक्सिण ले लोका आई किन्हें परमेसरा रे राजा रे धामा मन्झ साझी हूंणां।

³⁰होर ये जाणी लो कितने एह्ड़े जो ऐबे खास हुन्घे तिन्हा बादा मन्झ खास नी हूंणां, होर कितने ऐबे एह्ड़े जो खास नी ऐं तिन्हा बादा मन्झ खास हूंणां।”

³¹तेस ध्याड़े कुछ फरीसी लोके आई किन्हें यीसू किन्हें बोल्या, “एथी ले निकली किन्हें चली जा, क्यूंकि हेरोदेस राजा तुजो मारी देणा चाहां।”

³²यीसूए तिन्हा किन्हें बोल्या, “जाई किन्हें तेस्सा लोमड़ी साहीं तेस च्लाक माह्णुं किन्हें बोली दे कि, देख हांऊँ आज होर काल्ला दुस्टात्मा जो काढा होर ब्मारा जो ठीक करहा होर त्रीजे ध्याड़े मां काम पूरा करणा।

³³तेबे भी मुंजो ये जरूरी आ कि आज होर काल्ला होर परसी यरुस्लेम सैहरा वखा जो आपणा सफर करदा रहूँ, क्यूंकि एक नबी यरुस्लेम सैहरा मन्झ ही मारेया जाणा।”

³⁴“हे यरुस्लेम सैहर रे लोको! हे यरुस्लेम सैहर रे लोको! तुस्से पैहल्के नबी मारी दिते, होर जो तुस्सा वाले भेजे गये, तिन्हा जो पत्थरवाह कितेया। कितनी बारी मैं चाहेया कि जिहां कुकड़ी आपणे बच्चे जो आपणे फान्खा हेठ कट्ठा करहा ई, तिहां ईं हांऊँ भी तेरे लोका जो बचाऊं, पर तुस्से एह्ड़ा नी चाहेया।

³⁵तुस्सा रा घर तुस्सा रे कठे पूरी तरहा ले उजड़ी जाणा। होर हांऊँ तुस्सा किन्हें बोल्हा कि, ऐबे ले जेबे तक तुस्सा नी बोलणा कि, धन्य आ से, जो प्रभु रे हका ले आहूँआं, तेबे तक तुस्सा हांऊँ दबारा नी देखणा।”[26]