Read Mandeali लूका 22 Bible Online

लूका 22 - Mandeali bible

लूका 22

¹अस्जेह्ड़ी रोटी रा साजा जेस जो फसहा रा साजा भी बोल्हा ऐं, आऊणें वाल़ा था।

²होर मुख्य याजके होर व्यवस्था स्खाणे वाल़े एस गल्ला री ताका मन्झ थे कि यीसू जो किहाँ मारिये, पर स्यों लोका ले डरहा ऐं थे।

³होर सैतान यहूदा इस्करयोति मन्झ समाया, होर से तिन्हा बारा चेले मन्झा ले एक था।

⁴यहूदे जाई किन्हें मुख्य याजके होर मुखिया साउगी गलबात किती कि, से तिन्हारे हाथा मन्झ किहाँ पकड़वाणा?

⁵स्यों खुस हुई गये, होर तेस जो ढब्बे देणे रा वादा कितेया।

⁶तिन्हें मनी लया, होर मौका तोप्दा लग्या कि, जेबे भीड़ नी हो तेस जो तिन्हारे हाथा मन्झ पकड़वाई दे।

⁷तेबे अस्जेह्ड़ी रोटी रे फसहा रे साजे रा ध्याड़ा आया, जेस मन्झ फसहा रा छेलू बलि करणा जरूरी आ

⁸होर यीसूए पतरसा होर यहून्ना जो ये बोली किन्हें भेज्या कि, “जाई किन्हें आस्सा रे खाणे रे कठे फसहा रे साजे रा खाणा त्यार करा।”

⁹तिन्हें यीसू ले पूछेया, “आस्से फसहा रे साजे रा खाणा केथी त्यार करहे?”

¹⁰यीसूए तिन्हा किन्हें बोल्या, “गांऊँआं मन्झ जांदे ई एक माह्णुं जिन्हें जे पाणी रा घड़ा चक्किरा हूंणां तुस्सा जो मिलणा, जेस घरा मन्झ से जाए; तुस्से तेसरे पीछे चली जाया।

¹¹होर तेस घरा रे माल्का किन्हें बोला कि, ‘गुरु तुध किन्हें बोल्हा कि, प्रौह्णे रा कमरा जेथी जे मां आपणे चेलेया साउगी फसहा रे साजे रा खाणा, से केथी आ?’

¹²तेस तुस्सा जो एक सजा सजाईरा कमरा दसणा, तेथी ई त्यारी करणा।”

¹³तिन्हें जाई किन्हें, जेह्ड़ा यीसूए तिन्हा किन्हें बोल्या था, तेह्ड़ा ई पाया, होर तिन्हें फसहा रे साजे रे खाणे री त्यारी किती।

¹⁴जेबे टैम आई गया, ता यीसू आपणे चुणिरे चेलेया साउगी खाणा खांदे बैठी गया।

¹⁵होर तिन्हें तिन्हा किन्हें बोल्या, “मेरी बडी इच्छा थी कि, दुःख भोगी किन्हें मरणे रे ले पैहले ये फसहा रे साजे रा खाणा तुस्सा साउगी खाऊं।

¹⁶क्यूंकि हांऊँ तुस्सा किन्हें सच्च बोल्हा आ, मां ये साजे रा खाणा दबारा नी खाणा जेबे तक से परमेसरा रे राजा मन्झ पूरा नी हुई जाए।”

¹⁷तेबे यीसूए अंगूरा रे रसा रा डोंगा लई किन्हें परमेसरा रा धन्यावाद कितेया, होर बोल्या, “एता जो लई लऊआ होर आपु मन्झ बांडी लऊआ।

¹⁸क्यूंकि हांऊँ तुस्सा किन्हें बोल्हा कि, जेबे तक परमेसरा रा राज नी आये तेबे तक मां अंगूरा रा रस ऐबे ले कधी नी पीणा।”

¹⁹फेरी यीसूए रोटी लई होर परमेसरा रा धन्यावाद करी किन्हें रोटी तोड़ी, होर तिन्हा जो ये बोल्दे हुए रोटी दिती कि, “ये मेरा सरीर आ, जो तुस्सा रे कठे दितेया जाहाँ: मेरी यादगारा रे कठे एह्ड़ा ई करदे रैहया।”

²⁰इंहां ईं तिन्हें खाने रे बाद अंगूरा रे रसा रा डोंगा लितेया होर ये बोली किन्हें दितेया कि, “ये डोंगा मेरे तेस खूना मन्झ नौंईं वाचा ई, जेस जो तुस्सा रे कठे बहाया जाहाँ।

²¹पर मेरे पकड़वाणे वाल़े रा हाथ मेरे साउगी मेजा पर आ।

²²क्यूंकि हांऊँ माह्णुं रे मह्ठे रा मरणा ता पक्का आ, पर लानत ई तेस पर जेस हांऊँ पकड़वाणा, होर तेसरे कठे ये कितना ड्राऊणा हुणा!”

²³तेबे स्यों आपु मन्झ पूछ ताछ करदे लगे कि, आस्सा मन्झा ले कुणहां, जेस जे ये काम करणा?

²⁴चेले मन्झ ये बैहस भी हुई; कि आस्सा मन्झा ले सभी ले बडा कुण समझी जाहाँ?

²⁵यीसूए तिन्हा किन्हें बोल्या, “अन्यजाति लोका रे राजा तिन्हा पर राज करहा ऐं; होर जो तिन्हा पर हक रखणे वाले आपणे आपा जो तिन्हारे भलाई करणे वाल़ा बोल्हा ऐं।

²⁶पर तुस्सा मन्झ एह्ड़ा नी हो; एता रे बजाय जो तुस्सा मन्झ बडा हो, से छोटे साहीं होर जो मुखिया हो, से सेऊआदारा साहीं बणे।

²⁷क्यूंकि बडा कुणहां, से जो खाणा खांदे बैठिरा या से जे सेऊआ करहा? क्या से नी आ जेह्ड़ा खाणा खांदे बैठीरा? पर हांऊँ तुस्सा मन्झ सेऊआदारा साहीं आ।

²⁸पर तुस्से स्यों ऐं, जो मेरी परखणी मन्झ लगातार मेरे साउगी रहे।

²⁹होर हांऊँ तुस्सा जो तिहां ईं एक राज देआ करहा जिहां मेरे बापू जिए मुंजो दितिरा था, तिहां ईं हांऊँ भी तुस्सा रे कठे देहां।

³⁰ताकि तुस्से मेरे राजा मन्झ मेरी मेजा पर खाऊआ पिऊआ; बल्कि राजगद्दी पर बैठी किन्हें इस्राएल देसा रे बारा गोत्रा रा न्याय करा।”

³¹“समौन, हे समौन, सुण, सैताने परमेसरा ले तुस्से लोक मांगी लईरे कि तुस्सा जो कणका साहीं भूहा ले लग करी सके।

³²पर मैं तेरे कठे प्रार्थना कितिरी कि, तेरा विस्वास चली नी जाए, होर जेबे तू पाप करना छाडी दे, ता आपणे भाईया जो मजबूत करेया कि स्यों मेरे पर विस्वास करहे।”

³³तिन्हें तेस किन्हें बोल्या, “हे प्रभु, हांऊँ तेरे साउगी जेल्हा जाणे, बल्कि मरणे रे कठे भी त्यार आ।”

³⁴यीसूए बोल्या, “हे पतरस हांऊँ तेरे किन्हें बोल्हा कि, आज कुकड़ा रे बांग देणे ले पैहले, तुध त्राय बारी मुखरी जाणा कि, तू मुंजो नी जाणदा।”

³⁵होर यीसूए चेले ले पूछेया कि, “जेबे मैं तुस्से बगैर बटुऐ, होर बगैर झोले, होर बगैर जूते खुसी री खबर प्रचार करदे भेजे थे, ता क्या तुस्सा जो केसी चीजा री कमी हुई थी?” तिन्हें बोल्या, “केसी चीजा री कमी नी हुई।”

³⁶तिन्हें तिन्हा किन्हें बोल्या, “पर ऐबे लोक आस्सा रे बरखलाप हुई गईरे, जेस वाले जे बटुआ आ से लई ले; होर तिहां ईं झोला भी लई ले, होर जेस वाले तलवार नी हो से आपणे चोगा बेची किन्हें तेता जो खरीदी ले।

³⁷क्यूंकि हांऊँ तुस्सा किन्हें बोल्हा कि, पवित्र सास्त्रा मन्झ मेरे बारे जो लिखिरा से पूरा हो। तेता मन्झ लिखिरा कि, ‘से एक पापी समझ्या गया।’ हां मेरे बारे मन्झ लिखी गईरी ये गल पूरी हूंणे वाली ई।”

³⁸तिन्हें बोल्या, “हे प्रभु, देख एथी दो तलवारा ई,” तिन्हें तिन्हा किन्हें बोल्या, “बस बौह्त ई।”

³⁹तेबे यीसू बाहर निकली किन्हें आपणे रूआजा रे मताबक जैतूना रे प्हाड़ा पर गया, होर चेले तेसरे साउगी चली गये।

⁴⁰तेस जगहा पुज्ही किन्हें यीसूए तिन्हा किन्हें बोल्या, “प्रार्थना करा, ताकि तुस्से परखणी मन्झ नी पई जाए।”

⁴¹होर जिहां कोई दूरा तक पात्थर डयाई सक्हा, से तिन्हा ले लगभग तीह मीटर दूर चली गया होर घुटने टेकी किन्हें प्रार्थना करदा लग्या।

⁴²“हे मेरे बापू, तेरे ले सभ कुछ हुई सक्हा; एस दुःखा रा डोंगें जो मेरे वाले ले हट्टाई दे, तेबे भी जेह्ड़ा हांऊँ चाहां तेह्ड़ा नी, पर जो तू चाहां तेह्ड़ा ई हो।”

⁴³तेबे स्वर्गा ले एक स्वर्गदूत तेस जो सुझ्या जो तेस जो सामर्थ देहां था।

⁴⁴होर से बौह्त बेचैन हुई किन्हें होर भी ज्यादा प्रार्थना करदा लग्या; होर तेसरा पसीना खूना रे टेपे बणी किन्हें थाले जमीना पर पया करहा था।

⁴⁵तेबे से प्रार्थना ले उठेया होर आपणे चेले वाले आया ता तिन्हें स्यों दुआसी रे मारे सूती रे देखे?

⁴⁶होर यीसूए चेले किन्हें बोल्या, “तुस्से किधियो सया करहा ऐं? उठा, प्रार्थना करा, ताकि परखणी मन्झ नी पई सको।”

⁴⁷यीसू एह्ड़ा बोल्या ई करहा था कि, एक भीड़ आई, यहूदा इस्करयोति, जो बारा चेले मन्झा ले एक था, से तिन्हारे अगे-अगे आया करहा था, से यीसू वाले आया, ताकि से तेस जो गले लगाई सको।

⁴⁸यीसूए तिन्हा किन्हें बोल्या, “हे यहूदा इस्करयोति, क्या तू गले लगाई किन्हें माह्णुं रे मह्ठे जो पकड़वाहां?”

⁴⁹तेसरे साथिये जेबे देख्या कि क्या हूंणे वाल़ा आ, ता तिन्हें बोल्या, “हे प्रभु, क्या आस्से तलवार च्लाईए?”

⁵⁰होर तिन्हा मन्झा ले एकिये तलवार काढी होर बडे याजका रे नौकरा पर चलाई, होर तेसरा कान टुकी दितेया।

⁵¹एता पर यीसूए बोल्या, “ऐबे बस करा।” होर तिन्हें तेसरा कान छुही किन्हें से ठीक करी दितेया।

⁵²तेबे यीसूए मुख्य याजके होर मन्दरा रे मुखिये होर यहूदी मुखिये जो तेसरे व्रोधी बणी किन्हें आईरे थे, तिन्हा बोल्या कि, “क्या तुस्से डाकू समझी किन्हें मुंजो पकड़णे रे कठे तलवारा होर डंडे लई किन्हें निकली रे?

⁵³जेबे हांऊँ मन्दरा मन्झ हर ध्याड़े तुस्सा साउगी था, ता तुस्से मेरे पर हाथ नी पाया; पर ये तुस्सा री घड़ी ई, होर न्यहारे रे राज आ।”

⁵⁴फेरी स्यों यीसू जो पकड़ी किन्हें लई चले, होर कैफा बडे याजका रे घरा मन्झ ल्याए होर पतरस दूरा-दूरा ले ई तेसरे पीछे-पीछे चल्या करहा था।

⁵⁵होर जेबे स्यों आंघणा मन्झ आग भ्खाई किन्हें कठे बैठिरे थे, ता पतरस भी तिन्हारे मन्झ भरा बैठी गया।

⁵⁶होर नौकराणिया मन्झा ले एक तेथी आई होर तेस जो आग तफदे देख्या होर तेस जो ध्याना किन्हें देखी के बोलदी लगी, “ये भी ता तेस साउगी था।”

⁵⁷पर पतरस मुखरी गया कि, “ओ जनानिये, हांऊँ तेस जो नी जाणदा।”

⁵⁸थोह्ड़ी देरा बाद केसी होरिये तेस जो देखी किन्हें बोल्या, “तू भी ता तिन्हा मन्झा ले एक आ।” पतरसे बोल्या, “ओ जनाब, से हांऊँ नी आं।”

⁵⁹कोई घंटे भरा ले बाद एक होर आई किन्हें बोल्दा लग्या, “पक्का ये भी ता तेस साउगी था; क्यूंकि ये गलील जिल्ले रा आ।”

⁶⁰पतरसे बोल्या, “ओ जनाब, हांऊँ नी जाणदा कि तू क्या बोल्हा?” से बोल्या ई करहा था कि झटपट कुकड़े बांग दिती।

⁶¹होर तेबे प्रभुए घूमी किन्हें पतरसा वखा देख्या, होर पतरसा जो प्रभु री से गल याद आई जो तिन्हें बोलिरी थी कि, “आज कुकड़ा रे बांग देणे ले पैहले, तुध त्राय बारी मेरी नांह करणी।”

⁶²होर से बाहर निकली किन्हें बड़ा भारी रोंदा लग्या।

⁶³जिन्हें माह्णुंऐ जे यीसू पकड़िरा था, तिन्हें तेसरा मजाक डूआया होर तेस जो मारदे पीटदे लगे।

⁶⁴होर तिन्हें यीसू री हाखिया पर पट्टी बान्ही दिती होर तेस ले पूछेया, “भविस्यवाणी करी किन्हें दस कि तू कुने मारेया?”

⁶⁵होर तिन्हें बौह्त सारी निंदा री गल्ला तेसरे बरखलाफ किती।

⁶⁶जेबे ध्याड़ा सुर्हू हुएया ता लोका रे यहूदी मुखिये होर मुख्य याजके होर व्यवस्था स्खाणे वाल़े कठे हुए, होर फेरी स्यों लोक तेस जो आपणी माहसभा मन्झ लई गये। होर पूछेया,

⁶⁷“अगर तू मसीह आ, ता आस्सा किन्हें बोली दे!” यीसूए तिन्हा किन्हें बोल्या, “अगर हांऊँ तुस्सा किन्हें बोलू ता तुस्सा विस्वास नी करणा।

⁶⁸होर अगर हांऊँ पूछूं, ता तुस्सा जवाब नी देणा।

⁶⁹पर ऐबे ले मां माह्णुं रे मह्ठे सर्वसक्तिमान परमेसरा री सीधी वखा जो बैठी रेहणा।”

⁷⁰एता पर सभिए बोल्या, “ता क्या तू परमेसरा रा मह्ठा आ?” यीसूए तिन्हा किन्हें बोल्या, “तुस्से आपु ई बोल्हा ऐं कि, हांऊँ आं।”

⁷¹तेबे तिन्हें बोल्या, “ऐबे आस्सा जो होर गुआहा रा क्या काम आ? क्यूंकि आस्से आप्हुए तेसरे मुंहा ले सुणी लया।”