Read Mandeali लूका 24 Bible Online

लूका 24 - Mandeali bible

लूका 24

¹पर हप्ते रे पैहले ध्याड़े भ्यागा ई स्यों ज्नानिया तिन्हा खुस्बूदार चीजा जो लई किन्हें जो तिन्हें त्यार कितरी थी, डुआरा पर आई।

²तिन्हा जो डुआरा वाले ले पात्थर हट्टीरा मिल्या।

³होर तिन्हा जो अंदर जाई किन्हें प्रभु यीसू री ल्हास नी मिली।

⁴जेबे स्यों ज्नानिया एस गल्ला ले हरान हुएया करहा ई थी ता दो मर्ध जिन्हें जे चमकीले कपड़े पैहनीरे थे तिन्हा वाले खड़ी गये।

⁵जेबे स्यों डरी गयी, होर धरती वखा आपणे मुंह फेरी दिते, तेबे तिन्हें तिन्हा ज्नानिया ले पूछ्या, “तुस्से जिउंदेया जो मरिरे मन्झ किधियो टोल्हा ई?

⁶से एथी नी आ, पर जिउंदा हुई गईरा। याद करा कि, तिन्हें गलील जिल्ले मन्झ रैहणे रे टैमा तुस्सा किन्हें क्या बोलिरा था

⁷कि, ‘जरूरी आ, हांऊँ माह्णुं रा मह्ठा पापिया रे हाथा मन्झ पकड़ाया जाऊँ, होर क्रूसा प्रयाल्हे चढ़ाया जाऊँ, होर त्रीजे ध्याड़े जिउंदा हुई जाऊँ।’”

⁸तेबे तिन्हा ज्नानिया जो यीसू री याद आई।

⁹होर स्यों सभ ज्नानिया डुआरा वाले ले वापस आई होर तिन्हा ग्यारा चेलेया जो, होर बाकि सभी जो ये गल्ला सुणाई दिती।

¹⁰जिन्हे जे चुणिरे चेले किन्हें ये गल्ला बोली, स्यों ये ज्नानिया थी, मगदल गांऊँआं री मरियम होर योअन्ना होर याकूबा री माऊ मरियम होर तिन्हा साउगी होर ज्नानिया भी थी।

¹¹पर तिन्हारी गल्ला तिन्हा जो कहाणी साहीं लगी, होर तिन्हें तिन्हारा विस्वास नी कितेया।

¹²तेबे पतरस उठी किन्हें डुआरा वाले दौड़ी किन्हें गया, होर झुकी किन्हें सिर्फ कपड़े पईरे देखे, होर जो कुछ हुईरा था तेता ले हरान हुई किन्हें, से आपणे घरा जो चली गया।

¹³तेस ई ध्याड़े तेसरे चेले मन्झ ले दो जण इम्माउस नांऊँआं रे एकी गांऊँआं जो जाया करहा ऐं थे, जो यरुस्लेम सैहरा ले ग्यारा किलोमीटर दूर था।

¹⁴होर स्यों इन्हा सभी गल्ला पर जो हुईरी थी, आपु मन्झ गलबात करेया करहा ऐं थे।

¹⁵होर जेबे स्यों आपु मन्झ गलबात होर पूछ-ताछ करेया करहा ऐं थे, ता यीसू आप्हुए तेथी आया होर तिन्हा साउगी चलदा लग्या।

¹⁶पर तिन्हारी हाखिया एह्ड़ी बंद करी दितीरी थी कि, स्यों तेस जो नी पछ्याणी सके।

¹⁷यीसूए तिन्हा ले पूछेया, “ये क्या गल्ला ई, जो तुस्से चल्दे-चल्दे आपु मन्झ करेया करहा ऐं?” स्यों दुआस हुई किन्हें तेथी रुकी गये।

¹⁸ये सुणी किन्हें, तिन्हा मन्झा ले क्लियुपास नांऊँआं रे एक आदमिये बोल्या, “तू यरुस्लेम सैहरा मन्झ कल्हा माह्णुं आ, जो नी जाणदा कि, इन्हा ध्याड़े मन्झ एथी क्या-क्या हुआ।”

¹⁹यीसूए तिन्हा ले पूछेया, “कुण गल्ला?” तिन्हें यीसू किन्हें बोल्या कि, “ये गल्ला नासरता रा यीसू रे बारे मन्झ आ। जेह्ड़ा एक नबी था, जिन्हें सामर्थी चमत्कार कितरे थे। परमेसरा रा होर सभ लोका रे हाखिया मन्झ एक नौखा गुरु था।

²⁰होर मुख्य याजके होर आस्सा रे मुखिये से पकड़वाई दितेया, ताकि तेस पर मौता रा हुक्म दितेया जाए; होर तेस जो क्रूसा प्रयाल्हे चढ़ाया जाए।

²¹पर आस्सा जो आस थी कि, एस ई इस्राएल देसा रे लोका जो रोम देसा रे राज ले छुटकारा देणा। होर इन्हा सभ गल्ला रे अलावा एस घटना जो घटी रे आज त्राय ध्याड़े हुई गईरे।

²²होर आस्सा साउगी मन्झा ले कई ज्नाने भी आस्से हरान करी दिते, जो भ्यागा-भ्यागा ई डुआरा पर गईरी थी।

²³होर जेबे तेसरी ल्हास नी मिली, ता ये बोल्दी हुई आई कि, आस्से स्वर्गदूता रा दर्सन देख्या, तिन्हें तिन्हा किन्हें बोल्या कि यीसू जिउंदा हुई गईरा।

²⁴तेबे आस्सा रे साथिया मन्झा ले कई डुआरा वाले गये, होर जेह्ड़ा तिन्हें ज्नानिया बोलिरा था, तिन्हें तेह्ड़ा ई तेथी पाया, तिन्हें यीसू नी देख्या।”

²⁵तेबे यीसूए तिन्हा दुहीं चेलेया किन्हें बोल्या, “हे नर्क्कलेयो, तुस्सा रे कठे नबिया री सभ गल्ला पर विस्वास करणा कितना कठण लगा!

²⁶मसीह रे कठे जरूरी था कि, से दुःख सही किन्हें आपणी महिमा मन्झ दाखल करहे।”

²⁷तेबे यीसूए मूसा री व्यवस्था ले होर सभ नबिया ले सुर्हू करी किन्हें सारे पवित्र सास्त्रा मन्झा ले, आपणे बारे मन्झ कितिरी गला रा मतलब तिन्हा जो समझाया।

²⁸इतने मन्झ स्यों तेस गांऊँआं वाले पूजी गये, जेथी जे स्यों जाया करहा ऐं थे, होर तेसरे व्यवहारा ले एह्ड़ा मैहसूस हुएया कि से होर अगे जाणा चाहां।

²⁹पर तिन्हें यीसू ये गल्ला बोली किन्हें रुकणे रे कठे राजी करी लया कि, “आज राती आस्सा साउगी रुकी जा; क्यूंकि सांझ हुएया करहा ई होर ध्याड़ा भी ढल्या करहा होर जल्दी ई रात भी हुई जाणी।” तेबे से तिन्हारी गल मन किन्हें तिन्हा साउगी रैहणे रे कठे अंदर गया।

³⁰जेबे यीसू तिन्हा साउगी खाणा खांदे बैठ्या, ता यीसूए रोटी लई किन्हें धन्यावाद कितेया, होर रोटी तोड़ी किन्हें तिन्हा जो देंदा लग्या।

³¹तेबे परमेसरे तिन्हारी हाखिया खोल्ही दिती; होर तिन्हें से प्छ्याणी लया, होर से तिन्हारे साम्हणें गायब हुई गया।

³²तिन्हें आपु मन्झ बोल्या, “जेबे से पैंडे मन्झ आस्सा किन्हें गल्ला करहा था, होर पवित्र सास्त्रा रा मतलब आस्सा जो समझाहां था, ता क्या आस्सा रा मन आसा किन्हें नी भरेया था?”

³³स्यों तेस ई टैम उठी किन्हें यरुस्लेम सैहरा जो वापस चली गये, होर तेथी तिन्हा जो स्यों ग्यारा चेले होर तिन्हा साउगी तिन्हारे होर साथी सभ कठे मिले।

³⁴स्यों बोल्हा ऐं थे, “प्रभु सच्चे जिउंदा हुई गईरा! होर तिन्हें समौना पतरसा जो दर्सन दिते।”

³⁵तेबे तिन्हें दुहींऐं जो कुछ पैंडे मन्झ हुईरा था तेता रा ब्यौरा दितेया होर दसेया कि किहाँ रोटी तोड़ने रे टैमा तिन्हें यीसू पछ्याणी लितेया।

³⁶स्यों ये गल्ला हल्ली बोल्या ई करहा ऐं थे, यीसू आप्हुए तिन्हारे बीचा मन्झ आई किन्हें खड़ी गया, होर तिन्हा किन्हें बोल्या, “तुस्सा जो सांति मिले।”

³⁷पर स्यों घबराई गये होर डरी गये, होर तिन्हा जो ये लग्या कि स्यों केसी भूता जो देख्या करहा ऐं।

³⁸होर तिन्हें तिन्हा किन्हें बोल्या, “तुस्से किधियो डरहा ऐं? होर तुस्सा रे मना मन्झ सक कि हुएया करहा?

³⁹मेरे हाथा होर पैरा जो देखा कि, हांऊँ सेई आ। मुंजो छुही किन्हें देखा, क्यूंकि भूता री हड्डी मास नी हुन्दा जेह्ड़ा तुस्से मेरे मन्झ देख्हा ऐं।”

⁴⁰ये बोली किन्हें यीसूए तिन्हा जो आपणे हाथ पैर दसे।

⁴¹जेबे खुसी रे मारे तिन्हा जो विस्वास नी हुएया कि यीसू जिउंदा हुई गईरा, होर हरानी हुई। ता यीसूए तिन्हा ले पूछेया, “क्या एथी तुस्सा वाले कुछ खाणा हाया?”

⁴²होर तिन्हें यीसू जो भुनी री मछि रा एक टुकड़ा दितेया।

⁴³यीसूए से मछि रा टुकड़ा लया होर तिन्हारे साम्हणें खाध्या।

⁴⁴फेरी तिन्हें तिन्हा किन्हें बोल्या, “ये मेरी स्यों गल्ला ई, जो मैं तुस्सा साउगी रही किन्हें, तुस्सा किन्हें बोली थी कि, जरूरी आ कि, जितनी गल्ला मूसा री व्यवस्था होर नबिया री होर भजना री कताबा मन्झ, मेरे बारे मन्झ लिखिरी, स्यों सभ पूरी हो।”

⁴⁵तेबे यीसूए पवित्र सास्त्रा जो समझणे रे कठे तिन्हारी समझ खोल्ही दिती।

⁴⁶होर तिन्हा किन्हें बोल्या, “पवित्र सास्त्रा मन्झ एह्ड़ा लिखिरा कि, मसीहा दुःख सहन करणा, होर त्रीजे ध्याड़े मरिरे मन्झा ले जिउंदे हुई जाणा।

⁴⁷होर यरुस्लेम सैहरा ले लई किन्हें सभ जातिया रे लोका मन्झ तेसरे नांऊँआं रे हका ले पापा जो छाडणे, पापा री माफी रा प्रचार कितेया जाणा।

⁴⁸तुस्से इन्हा सभी गल्ला रे गुआह ऐ।

⁴⁹होर मां आपु पवित्र आत्मा भेजणी जेह्ड़ा मेरे बापूए वादा कितिरा। पर जेबे तक स्वर्गा ले सामर्थ नी पाओ, तेबे तक तुस्से एस सैहरा मन्झ ई रुकी रैहया।”

⁵⁰तेबे यीसू तिन्हा जो सैहरा रे बाहर बैतनिय्याह गांऊँआं तक लई गया, होर आपणे हाथ स्वर्गा वखा जो करी किन्हें तिन्हा जो आसीस दिति।

⁵¹होर तिन्हा जो आसीस देंदे हुए से तिन्हा ले लग हुई गया होर स्वर्गा जो चकी लितेया गया।

⁵²इधी कठे तिन्हें तेस जो अराधना करी किन्हें बड़ी खुसी किन्हें यरुस्लेम सैहरा जो वापस चली गये।

⁵³होर स्यों हर रोज लगातार मन्दरा मन्झ जाई किन्हें आपणा सारा टैम परमेसरा रा धन्यबाद करणे मन्झ लगाया।