Read Mandeali यहून्ना 1 Bible Online

यहून्ना 1 - Mandeali bible

यहून्ना 1

¹पुरे संसारा जो रचणे ले पैहले से था, जेस जो बचन बोल्या जाहाँ था, होर से परमेसरा साउगी था, होर सेई परमेसर था।

²पैहले ले ही से परमेसरा साउगी था।

³परमेसरे सभ कुछ तेसरे ज्रीए रच्या, होर जो कुछ रच्या गया, तेता मन्झा ले कोई भी चीज तेसरे बगैर नी रची गई।

⁴से सारी जिन्दगीया रा सोता था, होर सेई आ जेह्ड़ा सभ माह्णुं जो जोती देआ।

⁵होर जोत नह्यारे मन्झ चम्का ई; होर नह्यारा तेस जो नी बुझाई सकेया।

⁶परमेसरे एक माह्णुं भेजेया जेसरा नांऊँ यहून्ना था।

⁷से इधी कठे आया कि से जोती रे बारे मन्झ दसे, ताकि सभ तेसरी गुआही रे ज्रीए विस्वास करहे।

⁸यहून्ना आपु ता जोती नी था, पर तेस्सा जोती रे बारे मन्झ गुआही देणे रे कठे आया।

⁹होर से जे सच्ची जोती, हर एक माह्णुं जो प्रयासा देहां ईं संसारा मन्झ आऊणें वाली थी।

¹⁰से आपणे ही संसारा मन्झ आया था, जेस जो परमेसरे तेसरे ज्रीए रच्या, पर एस संसारा रे लोके से नी पछयाणेया।

¹¹से आपणे ही लोका मन्झ आया होर तेसरे आपणे ही लोके से नी अपनाया।

¹²पर जिन्हें से अपनाया, जो तेस पर विस्वास रख्हा ऐं, तिन्हें तिन्हा जो परमेसरा रे बच्चे हूंणे रा हक दितेया।

¹³स्यों ना ता आपणे माऊ-बापू ले, ना सरीरा री इच्छा ले, ना लोका रे बच्चे जम्मणे री इच्छा ले, पर परमेसरा री इच्छा ले जम्मे।

¹⁴होर परमेसरा रे बचने माह्णुं रा रूप धारण कितेया, होर अनुग्रह होर सच्चाई किन्हें भर्ही किन्हें आस्सा मन्झ डेरा कितेया, होर आस्से तेसरी एह्ड़ी महिमा देखी, जेह्ड़ी बापू रे एकलौते मह्ठे री।

¹⁵यहून्ना बपतिस्मा देणे वाल़े तेसरे बारे मन्झ गुआही दिती होर चिंगी किन्हें बोल्या कि, “ये सेई आ, जेसरे बारे मन्झ मैं बोलिरा था, ‘जेह्ड़ा मेरे बाद आऊणें वाल़ा आ, से मेरे ले भी बढ़ी किन्हें आ, क्यूंकि से मेरे ले पैहले जिउंदा था।’”

¹⁶क्यूंकि तेसरे अनुग्रहा री भरपूरी ले आस्से सभीये अनुग्रहा पर अनुग्रहा हासल कितेया।

¹⁷इधी कठे कि मूसा री व्यवस्था मूसा रे ज्रीए मिली, पर अनुग्रह होर सच्चाई प्रभु यीसू मसीहा रे ज्रीए पूजे।

¹⁸परमेसरा जो केसिए कधी नी देख्या। पर एकलौते मह्ठे जो सच्चमुच परमेसर आ होर बापू रे सभी ले करीब आ, तिन्हें ई आस्सा जो परमेसर दसिरा।

¹⁹यहून्ना बपतिस्मा देणे वाल़े री गुआही येई कि जेबे यरुस्लेम सैहरा रे यहूदी लोका रे याजक होर लेवी घराने रा जो तेस ले ये पुछणे रे कठे भेज्या कि तू कुणहां?

²⁰होर तिन्हें साफ साफ बोली दिता कि, “हांऊँ से मसीह नी आ।”

²¹तेबे तिन्हें तेस ले पूछेया, “फेरी तू कुणहां? क्या तू एलिय्याह नबी आ?” तिन्हें बोल्या, “हांऊँ एलिय्याह नबी नी आं।” “ता क्या तू नबी आ?” होर तिन्हें जवाब दितेया, “नी।”

²²तेबे तिन्हें तेस ले दबारा पूछेया, “फेरी तू कुणहां? ताकि आस्से आपणे भेजणे वाले जो जवाब देई सके। तू आपणे बारे मन्झ क्या बोल्हा?”

²³यहून्ना बपतिस्मा देणे वाल़े आपणे बारे मन्झ से बोल्या, “जेह्ड़ा यसायाह नबिये तेसरे बारे मन्झ लिखिरा था कि, ‘बियाबान जगहा मन्झ एक हाका पाणे वाले री अवाज सुणह्या करहा ई कि, प्रभु रे कठे आपणे मन त्यार करा।’”

²⁴स्यों फरीसी लोका री तरफा ले भेजे गईरे थे।

²⁵तिन्हें तेस ले सुआल पूछेया कि, “अगर तू मसीह नी आ, होर ना तू एलिय्याह नबी आ, होर ना कोई दूजा नबी आ, फेरी तू बपतिस्मा कि देहां।”

²⁶यहून्ना बपतिस्मा देणे वाल़े तिन्हा जो जवाब दितेया कि, “हांऊँ ता तुस्सा जो पाणी किन्हें बपतिस्मा देहां, पर तुस्सा मन्झ एक एह्ड़ा आदमी खड़ीरा, जेस जो तुस्से नी जाणदे।

²⁷से मेरे बाद आऊणें वाल़ा आ, होर हांऊँ तेसरे बूटा रे तस्मे खोलणे रे लायक बी नी हाया।”

²⁸ये सारी गल्ला यरदन दराऊआ ले पार बैतनिय्याह गांऊँआं मन्झ हुई, जेथी जे यहून्ना लोका जो बपतिस्मा देहां था।

²⁹दूजे ध्याड़े यहून्ना बपतिस्मा देणे वाल़े यीसू जो आपणी तरफ आऊंदे देखी किन्हें बोल्या, “देखा, ये परमेसरा रा छेलू आ, जो संसारा रे पापा जो चक्की लैहां।

³⁰ये सेई आ, जेसरे बारे मन्झ मैं बोलिरा था कि, जो मेरे बाद आऊणें वाल़ा आ, से मेरे ले भी बढ़ी किन्हें आ, क्यूंकि से मेरे ले पैहले था।

³¹होर हांऊँ तेस जो नी पछयाणदा था कि से मसीहा, पर एता कठे हांऊँ पाणी किन्हें बपतिस्मा देंदा आया कि, इस्राएल देसा रे लोक जाणी ले से कुणहां।”

³²होर यहून्ना बपतिस्मा देणे वाल़े ये गुआही दिती कि, “मैं पवित्र आत्मा जो कबूतरा रे रूपा मन्झ आसमाना ले उतरदे देख्या। होर से तेस पर रुकी गया।

³³होर हांऊँ ता तेस जो पछयाणदा नी था, ‘पर जिन्हें मुंजो पाणी किन्हें बपतिस्मा देणे रे कठे भेजिरा, तिन्हें ई मुंजो बोलिरा कि जेस पर तू आत्मा उतरदे होर रूकदे देखे सेई पवित्र आत्मा किन्हें बपतिस्मा देणे वाल़ा आ।’

³⁴होर मैं देखी लईरा, होर हांऊँ तुस्सा किन्हें सच्च -सच्च बोल्हां कि सेई परमेसरा रा मह्ठा आ।”

³⁵अगले ध्याड़े यहून्ना बपतिस्मा देणे वाल़े आपणे दो चेले साउगी तेथी दबारा हाजर था।

³⁶होर यहून्ना बपतिस्मा देणे वाल़े यीसू जो जांदे देख्या होर बोल्या, “देखा, ये परमेसरा रा छेलू आ।”

³⁷तेबे स्यों दूहें चेले तेसरी सुणी किन्हें यीसू रे पीछे-पीछे चली पये।

³⁸यीसूए पीछे मुड़ी किन्हें स्यों आपणे पीछे आऊंदे देखे होर बोल्या, “तुस्से केस जो तोप्हा ऐं?” तिन्हें तेस किन्हें बोल्या, “हे गुरु, तू केथी रैंहयां?” यीसूए तिन्हा किन्हें बोल्या, “चला देखी लऊआ।”

³⁹होर जेबे सांझ्के चार बजी गईरे थे तेबे तिन्हें आई किन्हें तेसरे रैहणे री जगहा देखी, होर स्यों तेस ध्याड़े तेथी रही गये।

⁴⁰जिन्हें जे यहून्ना बपतिस्मा देणे वाल़े री गल सुणी होर यीसू रे पीछे चली पये, तिन्हा दुहीं मन्झा ले एक, समौन पतरसा रा भाई अन्द्रियास था।

⁴¹तिन्हें पैहले आपणे सगे भाई समौना किन्हें मिली किन्हें बोल्या कि, “आस्सा जो मसीह मिली गईरा।”

⁴²अन्द्रियासे समौन यीसू वाले ल्यांदेया; यीसूए तेस जो देखी किन्हें बोल्या कि, “तू यहून्ना रा मह्ठा समौन आ, तू कैफा[1] रा मतलब पतरस[2] बोल्या जाणा।”

⁴³अगले ध्याड़े यीसूए गलील जिल्ले जो जाणा चाहेया, होर तिन्हें फिलिप्पुसा साउगी मिली किन्हें बोल्या, “आ मेरा चेला बण।”

⁴⁴फिलिप्पुस, अन्द्रियास होर पतरस सभ के सभ गलील जिल्ले रे बैतसैदा गांऊँआं रे रैहणे वाले थे।

⁴⁵फिलिप्पुसा जो नतनएल मिल्या होर तिन्हें तेस किन्हें बोल्या, “आस्सा जो से मिली गईरा, जेसरे बारे मन्झ मूसा री व्यवस्था मन्झ होर नबिया री कताबा मन्झ लिखिरा आ। से युसुफा रा मह्ठा यीसू आ जेह्ड़ा नासरत गांऊँआं मन्झ रैंहयां।”

⁴⁶नतनएले तेस किन्हें बोल्या, “क्या कोई बांकी चीज भी नासरत गांऊँआं ले निकली सक्हा ई?” फिलिप्पुसे तेस किन्हें बोल्या, “चली किन्हें खुद देखी ले।”

⁴⁷यीसूए नतनएल जो आपणी तरफ आऊंदे देखी किन्हें तेसरे बारे मन्झ बोल्या, “देखा, ये सच्चे इस्राएल देसा रे लोक आ: एस मन्झ पाखंड नी आ।”

⁴⁸नतनएले तेस किन्हें बोल्या, “तू मुंजो किहाँ जाणहां?” यीसूए तेस जो जवाब दितेया, “एता ले पैहले कि फिलिप्पुसे तू सादेया, मैं तू देखी लईरा था जेबे तू अंजीरा रे डाला रे थाले था।”

⁴⁹नतनएले तेस जो जवाब दितेया कि, “हे गुरु, तू परमेसरा रा मह्ठा आ; तू इस्राएल देसा रा माहराजा आ।”

⁵⁰यीसूए तेस जो जवाब दितेया, “क्या तू इधी कठे विस्वास करहा कि, मैं जो तेरे किन्हें बोल्या कि, मैं तू अंजीरा रे डाला रे थाले देख्या था। तुध एता ले बी बडे-बडे काम देखणे।”

⁵¹फेरी यीसूए तेस किन्हें बोल्या, “हांऊँ तुस्सा किन्हें सच्च -सच्च बोल्हा कि, जिहां तुस्सा रे बापदादे याकूबे कई साल पैहले दर्सन देख्या था तिहां ईं तुस्सा स्वर्गा रा दुराजा खुलिरा होर परमेसरा रे स्वर्गदूत हांऊँ माह्णुं रे मह्ठे रे ऊपर, हेठ आऊंदे होर गास जांदे देखणे।”