Read Mandeali यहून्ना 10 Bible Online

यहून्ना 10 - Mandeali bible

यहून्ना 10

¹“हांऊँ तुस्सा किन्हें सच्च -सच्च बोल्हा कि, जो कोई दुराजे ले हुई किन्हें भेडा रे बाड़े मन्झ दाखल नी हुन्दा पर होर दूजे पैंडे ले हुई किन्हें दाखल हुंहाँ से माह्णुं चोर होर डाकू आ।

²पर भेडा रा पुहाल दुराजे ले हुई किन्हें दाखल हुंहाँ।

³तेसरे कठे दरबान दुराजा खोल्ही देहां। होर भेडा तेसरी अवाज पछयाणहां ईं, होर से आपणी भेडा जो नांऊँ लई किन्हें साद्हा होर बाहार लई जाहाँ।

⁴होर जेबे से आपणी सभ भेडा जो बाहर काढी देहां, ता से तिन्हारे अगे-अगे चल्हा, होर भेडा तेसरे पीछे-पीछे चल्हा ई; क्यूंकि स्यों तेसरी अवाज पछयाणहां ईं।

⁵पर तिन्हा पराये रे पीछे नी जाणा, पर तिन्हा तेस ले दूर भगणा, क्यूंकि स्यों पराये री अवाज नी पछयाणंदी।”

⁶यीसूए तिन्हा किन्हें ये उदाहरण बोली, पर स्यों नी समझे कि इन्हा गल्ला रा क्या मतलब आ, जो से आस्सा किन्हें बोल्हा।

⁷तेबे यीसूए तिन्हा किन्हें दबारा बोल्या, “हांऊँ तुस्सा किन्हें सच्च -सच्च बोल्हा कि, भेडा रे कठे दुराजा हांऊँ से आं।

⁸जितने मेरे ले पैहले आये स्यों सब चोर होर डाकू ऐं पर मेरी भेडे तिन्हारी नी सुणी।

⁹दुराजा हांऊँ आं, अगर कोई मेरे ज्रीए अंदर जाए ता तेस उद्धार पाणा। होर तेस अंदर बाहर आऊंणा जाणा करेया करणा होर चारा पाणा।

¹⁰चोर केसी होर कामा रे कठे नी आऊंदा पर सिर्फ चोरी करदे, मारणे रे कठे होर नास करणे रे कठे आहूँआं। हांऊँ एता कठे आया कि स्यों जिन्दगी पाए होर भरपूर जिन्दगी पाए।”

¹¹“हांऊँ बधिया पुहाल आ; बधिया पुहाल भेडा रे कठे मरी जाहाँ।

¹²मजदूर जो न ता पुहाल आ, होर न ता भेडा रा माल्क आ, से भेड़िये जो आऊंदे देखी किन्हें, भेडा जो छाडी किन्हें भगी जाहाँ। होर भेड़िया भेडा जो पकड़ा आ होर ओरे परे भगाई देहां।

¹³से इधी कठे भगी जाहाँ क्यूंकि से मजदूर आ, होर तेस जो भेडा री फिकर नी ई।”

¹⁴“बधिया पुहाल हांऊँ आं; जिहां बापू मुंजो जाणहां, होर हांऊँ बापू जो जाणहां।

¹⁵इंहां ईं हांऊँ आपणी भेडा जो जाणहां, होर मेरी भेडा मुंजो जाणहां ईं, होर हांऊँ आपणी भेडा रे कठे मरणे जो तैयार आ।

¹⁶होर मेरी होर भी भेडा ई, जो एस भेड बाड़े री नी ई। मेरा तिन्हें जो भी ल्याऊणा जरूरी आ, तिन्हा मेरी अवाज पछयाणी; तेबे एक ई झुंड होर एक ई पुहाल हूंणां।”

¹⁷“बापू इधी कठे मेरे किन्हें प्यार करहा, क्यूंकि हांऊँ आपणी भेडा रे कठे मरणे जो तैयार आ, ताकि मेरे मरणे ले बाद हांऊँ दबारा जिउन्दा हुई जांऊँ।

¹⁸कोई मेरी जान जो मेरे ले नी लैंदा, पर हांऊँ आपणे आप तेता जो देहां। तेता जो देणे रा हक मेरे वाले आ, होर तेता जो दबारा वापस लेणे रा भी हक आ, ये हुक्म मेरे बापू ले मुंजो मिलिरा।”

¹⁹इन्हा गल्ला री वजहा ले यहूदी लोका मन्झ दबारा फूट पई।

²⁰होर तिन्हा मन्झा ले बौह्त बोल्दे लगे कि, “तेस मन्झ दुस्टात्मा ई, होर से पागल आ, तेसरी मत सुणहां।”

²¹होरिये बोल्या, “ये गल एह्ड़े माह्णुं री नी ई जेस मन्झ दुस्टात्मा हो, दुस्टात्मा केसी री भी हाखिया ठीक नी करी सकदी।”

²²ठंडा रा मौसम था होर यरुस्लेम सैहरा मन्झ स्थापना रा साजा[6] मनाया जाया करहा था।

²³होर यीसू सुलेमाना रे बणाईरे मन्दरा रे आंघणा मन्झ घुमेया करहा था।

²⁴तेबे यहूदी लोके से घेरी लया होर पूछेया, “तु कई ध्याड़े ले आस्सा रा मना जो सक करणे पर मजबूर करेया करहा। तू आस्सा जो साफ-साफ दसी दे। क्या तू मसीह आ?”

²⁵यीसूए तिन्हा जो जवाब दितेया, “कि मैं तुस्सा किन्हें दसी दितिरा, होर तुस्से विस्वास नी करदे, जो काम हांऊँ आपणे बापू रे हका ले करहा स्यों काम ई मेरे गुआह ऐं।

²⁶तुस्से इधी कठे विस्वास नी करदे, क्यूंकि तुस्से मेरी भेडा मन्झा ले नी ये।

²⁷मेरी भेडा मेरी अवाज पछयाणा ईं, होर हांऊँ तिन्हा जो जाणहां, होर स्यों मेरे पीछे-पीछे चल्हा ई।

²⁸होर हांऊँ तिन्हा जो अनंत जिन्दगी देहां, होर तिन्हा कधी नी मरणा, होर कोई तिन्हा जो मेरे हाथा ले नी छुड़ाई सक्दा।

²⁹मेरा बापू, जिन्हें जे स्यों मुंजो दितिरे, सभी ले बडा आ, होर कोई तिन्हा जो मेरे बापू रे हाथा ले पकड़ी किन्हें दूर नी करी सक्दा।

³⁰हांऊँ होर मेरा बापू एक ऐं।”

³¹यहूदी अगुवे एक होर बारी यीसू पर पथराव करणे रे कठे पात्थर चके।

³²एता पर यीसूए तिन्हा जो जवाब दितेया, “मैं तुस्सा जो आपणे बापू री तरफा ले बौह्त भले काम दसे। तिन्हा कामा मन्झा ले केस कामा रे कठे तुस्से मेरे पर पथराव करहा ऐं?”

³³यहूदी अगुवे तेस जो जवाब दितेया कि, “आस्से भले कामा रे कठे तुजो पथराव नी करदे, पर तू परमेसरा री निंदा करहा होर माह्णुं हुई किन्हें आपणे आपा जो परमेसर बोल्हा।”

³⁴यीसूए तिन्हा जो जवाब दितेया, “पवित्र सास्त्रा मन्झ लिखिरा कि परमेसरे आपणे लोका रे अगुवे किन्हें बोल्या: कि स्यों इस्वर ऐं।”

³⁵“होर तुस्से जाणहां ऐं कि पवित्र सास्त्रा जो तुस्से नी बदली सकदे होर अगर से लोका रे अगुवे जो परमेसरे ‘इस्वर बोल्हा,’

³⁶ता फेरी जेबे हांऊँ बोल्हा कि हांऊँ परमेसरा रा मह्ठा आ, फेरी तुस्से किधियो बोल्हा ऐं कि, ‘हांऊँ परमेसरा री निंदा करहा?’ क्यूंकि परमेसरे हांऊँ पवित्र ठैहराई किन्हें संसारा मन्झ भेज्या।

³⁷अगर मैं आपणे बापू रे काम नी किते, ता मेरा विस्वास भी मत करदे।

³⁸पर अगर हांऊँ आपणे बापू रे काम करहा, ता चाहे तुस्से मेरा विस्वास भी नी करा, पर तिन्हा कामा रा ता विस्वास करा। ताकि तुस्से जाणी होर समझी सको कि बापू मेरे मन्झ वास करहा, होर हांऊँ बापू मन्झ वास करहा।”

³⁹तेबे तिन्हें दबारा यीसू जो पकड़ने री कोसिस किती पर से तिन्हारे हाथा ले निकली गया।

⁴⁰फेरी यीसू यरदन दराऊआ ले पार तेस जगहा चली गया, जेथी यहून्ना बपतिस्मा देणे वाल़ा पैहले बपतिस्मा देहां था, होर से तेथी रैंहयां।

⁴¹होर बौह्त लोक तेस वाले आई किन्हें बोल्हा ऐं थे कि, “यहून्ना बपतिस्मा देणे वाल़े ता कोई चिन्ह नी दसेया, पर जो कुछ यहून्ना बपतिस्मा देणे वाल़े एस आदमी रे बारे मन्झ बोलिरा था से सच्च था।”

⁴²होर तेथी कई लोके तेस पर विस्वास कितेया।