Read Mandeali यहून्ना 11 Bible Online

यहून्ना 11 - Mandeali bible

यहून्ना 11

¹मरियम होर तेसरी बैहण मार्था रा भाई लाज़र ब्मार था जो बैतनिय्याह गांऊँआं रा रैह्णे वाल़ा था।

²ये सेई मरियम ई जेस्से बादा मन्झ प्रभु रे पैरा पर कीमती खुस्बूदार इत्र मली किन्हें आपणे वाल़ा किन्हें पुन्झ्या, एस्सा रा भाई लाज़र ब्मार था।

³लाज़रा री बैहणीऐं यीसू जो बुलावा भेज्या कि, “हे प्रभु, देख जेस जो तू प्यार करहा, से ब्मार आ।”

⁴ये सुणी किन्हें यीसूए बोल्या, “ये ब्मारी मौता रे कठे नी ई पर परमेसरा री महिमा कठे ई कि, तेसरे जरिए परमेसरा रे मह्ठा री महिमा हो।”

⁵यीसू मार्था होर मरियम होर तिन्हारे भाई लाज़रा किन्हें प्यार करहा था।

⁶पर जेबे तिन्हें सुणेया कि, लाजर ब्मार आ, ता तेस जगहा पर से था, से तेथी दो ध्याड़े होर रुकी रया।

⁷फेरी दो ध्याड़े ले बाद तिन्हें चेलेया किन्हें बोल्या कि, “आऊआ, आस्से दबारा यहूदिया ईलाके जो वापस चल्हा ऐं।” (क्यूंकि लाजरा रा गांऊँ बैत्नीयाह यहूदी जिल्ले मन्झ था)

⁸चेले यीसू जो बोल्दे लगे, “हे गुरु, ऐबे ता यहूदी अगुवे तुजो पथराव करणा चाहें, होर क्या तू दबारा तेथी जाणा चाहां?”

⁹यीसूए जवाब दितेया, “क्या ध्याड़ी रे बारा घंटे नी हुंदे? अगर कोई ध्याड़ी-ध्याड़ी चले ता से ठोकर नी खांदा, क्यूंकि से सूरजा रा प्रयासा देख्हा।

¹⁰पर अगर कोई राती जो चले, ता से ठोकर खांहां, क्यूंकि तेस टैम प्रयासा नी हुंदा।”

¹¹तिन्हें ये गल्ला बोली होर एता ले बाद से तिन्हा किन्हें बोल्दा लग्या कि, “आस्सा रा दोस्त लाज़र सई गईरा, पर हांऊँ तेस जो जगांदे चलीरा।”

¹²तेबे चेले तेस जो बोल्या, “हे प्रभु, अगर से सूतिरा ता तेस ठीक हुई जाणा।”

¹³यीसूए ता तेसरी मौता रे बारे मन्झ बोल्या था, पर स्यों समझे कि तिन्हें निन्द्रा मन्झ सई जाणे रे बारे मन्झ बोल्या।

¹⁴तेबे यीसूए तिन्हा किन्हें साफ बोली दितेया कि, “लाज़र मरी गया।

¹⁵होर तुस्सा रे कठे ही खरा हुआ कि हांऊँ तेथी नी था, ताकि तुस्से विस्वास करी सको। पर ऐबे आई जाऊआ, आस्से तेस वाले चल्हा ऐं।”

¹⁶तेबे थोमा तेस जो जे दिदुमुस भी बोल्हा ऐं, आपणे साथी चेले किन्हें बोल्या, “आऊआ आस्से भी तेस साउगी मरदे चल्हा ऐं।”

¹⁷यीसू होर तेसरे चेले बैत्नीयाह गांऊँ मन्झ पूजे तेथी आई किन्हें तेस जो ये पता लग्या कि लाजरा री ल्हासा जो डुआर मन्झ रखीरे चार ध्याड़े हुई चुकिरे थे।

¹⁸बैतनिय्याह गांऊँआं यरुस्लेम सैहरा ले लगभग तीन किलोमीटर दूर था।

¹⁹होर बौह्त यहूदी लोक मार्था होर मरियमा वाले तिन्हारे भाई रे बारे मन्झ सांति देणे रे कठे आईरे थे।

²⁰मार्था यीसू रे आऊणें री खबर सुणी किन्हें तेस किन्हें मिलदे चली गयी, पर मरियम घरा बैठी रैही।

²¹मार्थे यीसू किन्हें बोल्या, “हे प्रभु, अगर तू एथी हुन्दा, ता मेरा भाई कधी नी मरदा।

²²पर ऐबे भी हांऊँ जाणहां ईं कि, जो कुछ तू परमेसरा ले मांगघा, परमेसरा तुजो देणा।”

²³यीसूए तेस्सा किन्हें बोल्या, “तेरे भाईया मरिरे मन्झ ले जिउंदे हुई जाणा।”

²⁴मार्थे तेस किन्हें बोल्या, “हांऊँ जाणहां ईं कि, आखरी ध्याड़े मरिरे मन्झा ले जी उठणा रे टैमा मेरे भाईया जिउंदे हुई जाणा।”

²⁵यीसूए तेस्सा किन्हें बोल्या, “हांऊँ से आ जेह्ड़ा मरिरे जो जिउंदा करहा, जो कोई मेरे पर विस्वास करहा से अगर मरी भी जान्घा, तेबे बी तेस जिउंदे रैहणा।

²⁶होर जो कोई जिउंदा आ, होर मेरे पर विस्वास करहा, तेस कधी भी नी मरणा, क्या तू ऐस्सा गल्ला पर विस्वास करहा ई?”

²⁷तेस्से तेस किन्हें बोल्या, “हां, हे प्रभु, हांऊँ विस्वास करी कि, परमेसरा रा मह्ठा मसीह जो संसारा मन्झ आऊणें वाल़ा था, से तू ई आ।”

²⁸होर ये बोली किन्हें मारथा चली गई, होर तेस्से आपणी बैहण मरियमा जो चुपके जे सादी किन्हें बोल्या, “गुरू एथी आ होर से तुजो सादेया करहा।”

²⁹होर से ये सुणदे ई झटपट उठी किन्हें तेस वाले चली गई।

³⁰यीसू हल्ली गांऊँआं रे बाहर था, जेथी जे मार्था तेस किन्हें मिली थी।

³¹तेबे जो यहूदी लोक तेस्सा रे घरा आईरे थे, तेस्सा जो सांति देआ करहा ऐं थे, तिन्हें देखेया कि मरियम झटपट उठी किन्हें बाहर चली गई। होर तिन्हें ये समझी किन्हें कि से डुआर पर रोणे रे कठे चली गई। इधी कठे स्यों भी तेस्सा रे पीछे चली गये।

³²जेबे मरियम तेथी पूजी जेथी यीसू था, ता तेस जो देखदे ही से तेसरे पैरा पई गई होर तेस किन्हें बोल्या, “हे प्रभु, अगर तू एथी हुन्दा ता मेरा भाई नी मरदा।”

³³जेबे यीसूए तेस्सा जो होर तिन्हा यहूदी लोका जो जेह्ड़े तेस्सा साउगी आईरे थे रोंदे देखे; से आत्मा मन्झ बौह्त दुआस हुआ, होर दुआस था।

³⁴होर तिन्हें बोल्या, “तुस्से तेसरी ल्हास केथी रखिरी?” तिन्हें तेस किन्हें बोल्या, “हे प्रभु, आऊआ चली किन्हें देखी लऊआ।”

³⁵होर यीसू रे आंसू बैह्न्दे लगे।

³⁶तेबे यहूदी लोक बोल्दे लगे, “देखा, से लाजरा किन्हें कितना प्यार करहा था!”

³⁷पर तिन्हा मन्झा ले कई बोल्हा ऐं थे, “इन्हें काणा माह्णुं ठीक कितेया। क्या से लाजरा जो मरणे ले नी बचाई सक्दा था?”

³⁸यीसू आत्मा मन्झ बौह्त दुआस हुई किन्हें डुआरा पर गया। से डुआर एक गुफा थी, होर एक पात्थर तेता पर रखिरा था।

³⁹यीसूए बोल्या, “पात्थरा जो हटाई देआ।” तेस लाजरा री बैहण मार्था तेस किन्हें बोल्दे लगी, “हे प्रभु, ऐबे ता ल्हासा ले बास आया करदी हुंगी; क्यूंकि तेस जो ता मरिरे चार ध्याड़े हुई चुकिरे।”

⁴⁰यीसूए मारथा किन्हें बोल्या, “क्या मैं तेरे किन्हें नी बोल्या था कि अगर तू विस्वास करघी, ता तुध परमेसरा री महिमा देखणी।”

⁴¹तेबे तिन्हें से पात्थर टाह्या, फेरी यीसूए स्वर्गा वखा जो देखी किन्हें बोल्या, “हे बापू, हांऊँ तेरा धन्यावाद करहा कि, तैं मेरी सुणी लई।

⁴²होर हांऊँ जाणहां था कि, तू हमेसा मेरी सुणहां, पर जो भीड़ ओरे परे खड़िरी, तिन्हारी वजहा ले मैं ये जोरा किन्हें बोल्या, ताकि स्यों विस्वास करी सके कि, तैं हांऊँ भेजिरा।”

⁴³ये बोली किन्हें से जोरा किन्हें बोलेया कि, “हे लाज़र बाहर निकल!”

⁴⁴जो मरी गईरा था, से कफना मन्झ हाथ पैर बान्हिरा बाहर निकली आया होर तेसरा मुंह कपड़े किन्हें लपेटिरा था, यीसूए तिन्हा किन्हें बोल्या, “एसरे कफना रे कपड़े जो खोल्ही देआ होर एस जो जाणे देआ।”

⁴⁵तेबे मरियमा साउगी आईरे कई यहूदी लोके, यीसू रा ये काम देखी किन्हें तेस पर विस्वास कितेया।

⁴⁶पर तिन्हा मन्झा ले कई एह्ड़े थे जिन्हें फरीसी लोका वाले जाई किन्हें यीसू रे कामा री खबर दिती।

⁴⁷एता पर मुख्य याजके होर फरीसी लोके खास सभा सादी होर बोल्या, “आस्से क्या करिए? ये माह्णुं ता बौह्त चिन्ह दस्हा।

⁴⁸अगर आस्से तेस जो इंहां छाडी देहंगे, ता सभीया तेस पर विस्वास करी लैणा होर रोम देसा रे लोक आई किन्हें आस्सा रे मंदर होर देस दुहींयां पर कब्जा जमाई लैणा।”

⁴⁹तेबे तिन्हा मन्झा ले कैफा बडा याजक जो यहूदी माहसभा रा सदस्य था, से तेस साला रा बडा याजक था। तिन्हें तिन्हा किन्हें बोल्या, “तुस्से ता एह्ड़ा बोल्हा ऐं जिहां जे तुस्से कुछ नी जाणदे।

⁵⁰होर ना ये जाणहां ऐं कि, तुस्सा रे कठे ये खरा आ कि, आस्सा रे लोका रे कठे एक माह्णुं मरे, होर ये नी कि पुरे देस रे लोक मरी जाए।”

⁵¹ये गल तिन्हें आपणी तरफा ले नी बोली, (क्यूंकि यीसूए कई बारी आपणे मरणे रे बारे बोल्हा था) पर तेस साला रे बडा याजक हुंदे हुए कैफे ये भविस्यवाणी किती कि यीसूआ इस्राएल देसा रे लोका रे कठे मरणा।

⁵²होर ना सिर्फ तिन्हारे कठे, पर तिन्हारे कठे भी कि से परमेसरा रे बाहर भटकीरे बच्चेया जो कठा करी सके।

⁵³एता कठे तेस ध्याड़े लेई किन्हें यहूदी अगुवे यीसू जो मारणे रे कठे सलाह करदे लगे।

⁵⁴इधी कठे यीसू तेस टैमा ले यहूदी लोका रे बीचा मन्झ सभिरे साम्हणें नी घुमदा था। पर से तेथी ले जंगला रे नेडे बस्सी रे ईफ्राइम सैहरा जो चली गये; होर आपणे चेले साउगी से तेथी रैहंदा लग्या।

⁵⁵होर ऐबे यहूदी लोका रा फसहा रा साजा नेडे था, होर बौह्त लोक फसहा रे साजे ले पैहले गांऊँआं ले यरुस्लेम सैहरा जो चली गये ताकि स्यों आपणे आपा जो मन्दरा मन्झ रूआजा रे मताबक सुध करी सको।

⁵⁶तेबे स्यों यीसू जो तोपदे लगे होर मन्दरा मन्झ खड़ी किन्हें आपु मन्झ बोल्दे लगे, “तुस्से क्या समझ्हा ऐं? तेस फसहा रे साजे मन्झ नी आऊंणा?”

⁵⁷मुख्य याजके होर फरीसी लोके भी हुक्म देई दितिरा था कि, अगर कोई ये जाणदा हो कि यीसू केथी आ ता जरूर दसे, ताकि स्यों तेस जो पकड़ी सके।