Read Mandeali यहून्ना 13 Bible Online

यहून्ना 13 - Mandeali bible

यहून्ना 13

¹ऐबे ये फसहा रे साजे ले पैहले हुआ। यीसूए जाणी लया कि, तेसरा सही टैम पूरा हुई गईरा होर तेस संसारा जो छाडी किन्हें बापू वाले वापस चली जाणा। जो संसारा मन्झ तेसरे आपणे थे तिन्हा किन्हें तिन्हें आखरी तक तेह्ड़ा ई प्यार रख्या, जेह्ड़ा प्यार से तिन्हा किन्हें रख्दा आईरा था।

²यीसू होर तेसरे चेले राती बयाली खांदे बैठिरे थे। सैतान समौना रे मह्ठे यहूदा इस्करयोति रे मना मन्झ ये पाई चुकिरा था कि, से यीसू जो पकड़ाये।

³यीसूए ये जाणी किन्हें कि बापूए सब कुछ तेसरे हका मन्झ करी दितिरा होर से परमेसरा ले आईरा, होर परमेसरा वाले वापस जाया करहा।

⁴यीसू खाणा खांदे-खांदे उठी गया होर आपणा चोगा तुआरी किन्हें तौलिया आपणी कमरा मन्झ बान्ह्या।

⁵तेबे यीसूए तसले मन्झ पाणी भरी किन्हें चेले रे पैर धोणे सुर्हू किते होर जेस तौलिए किन्हें तिन्हें आपणी कमर बान्हिरा थी तेस तौलिए किन्हें से तिन्हारे पैर पुन्झ्दा लग्या जिहां एक गुलाम करहा।

⁶जेबे यीसू समौन पतरसा वाले आया; तेबे तिन्हें यीसू किन्हें बोल्या, हे प्रभु, क्या तू मेरे पैर धोहां?

⁷यीसूए तेस जो जवाब दितेया, “जो हांऊँ करहा, तू ऐबे एता रा मतलब नी जाणदा, पर तुध एता ले बाद समझणा।”

⁸पतरसे तेस किन्हें बोल्या, “तू मेरे पैरा जो कधी देख्या धोंदा।” ये सुणी किन्हें यीसूए तेस किन्हें बोल्या, “जे हांऊँ तुजो नी धोऊँ, ता मेरे साउगी तेरा कुछ भी नाता नी आ।”

⁹समौन पतरसे तेस किन्हें बोल्या, “हे प्रभु तेबे ता तू मेरे पैर ई नी, बल्कि हाथ होर मूंड भी धोई दे।”

¹⁰यीसूए तेस किन्हें बोल्या, “जो नहाई बैठीरा, तेस जो पैर धोणे रे अलावा होर कुछ धोणे ज्रूरत नी ई; पर से बिलकुल साफ़ आ, होर तुस्से सभ सुद्ध ऐं, पर एक सुध नी।”

¹¹क्यूंकि यीसू आपणे पकड़वाणे वाले जो जाणहां था, एता कठे तिन्हें बोल्या, “तुस्सा मन्झा ले एक सुद्ध नी आ।”

¹²जेबे यीसू तिन्हारे पैर धोई बैठया होर आपणे चोगा दबारा पैन्ही किन्हें खाणा खांदे बैठी गया, ता यीसू तिन्हा किन्हें बोल्दा लग्या, “क्या तुस्से समझी गये कि मैं तुस्सा साउगी क्या कितेया?”

¹³“तुस्से मुंजो ‘गुरू,’ होर ‘प्रभु,’ बोल्हा ऐं, होर ठीक ई बोल्हा ऐं, क्यूंकि हांऊँ तुस्सा रा गुरु होर प्रभु आ।

¹⁴अगर मैं गुरू प्रभु होर हुई किन्हें तुस्सा रे पैर धोये; ता तुस्सा जो भी दीन बणी किन्हें एक दूजे रे पैर धोणे चहिए।

¹⁵क्यूंकि मैं तुस्सा जो एक उदाहरण दसी दितेया, जो मैं तुस्सा साउगी कितेया, तुस्से भी एह्ड़ा ई करदे रहुआ।

¹⁶हांऊँ तुस्सा किन्हें सच्च-सच्च बोल्हा, गुलाम आपणे माल्का ले बडा नी हुन्दा, होर ना संदेसा लई किन्हें भेजिरा दूत आपणे भेजणे वाले ले बडा हुंहाँ।

¹⁷ऐबे तुस्से इन्हा गल्ला जो जाणहां ऐं, होर तिन्हा पर चला तेबे तुस्सा धन्य हूंणां।

¹⁸हांऊँ तुस्सा सभी रे बारे मन्झ नी बोल्दा, स्यों जे मैं चुणी लईरे, तिन्हा जो हांऊँ जाणहां। पर ये इधी कठे आ कि, पवित्र सास्त्रा रा बचन पूरा हो कि, ‘जिन्हें मेरी रोटी खाद्ही, तिन्हें मुंजो लात मारी।’

¹⁹ऐबे हांऊँ ये हूंणे ले पैहले तुस्सा जो दसी देऊँ, होर जेबे ये हुई जाए ता तुस्से विस्वास करी लया कि हांऊँ सेई आ।

²⁰हांऊँ तुस्सा किन्हें सच्च -सच्च बोल्हा कि, जो कोई मेरे भेजीरे जो अपनाहां, से मुंजो अपनाहां, होर जो मुंजो अपनाहां, से मेरे भेजणे वाले परमेसरा जो अपनाहां।”

²¹ये गल्ला बोली किन्हें यीसू आत्मा मन्झ दुआस हुआ। होर तिन्हें आपणे चेले किन्हें बोलेया, “हांऊँ तुस्सा किन्हें सच्च -सच्च बोल्हा कि तुस्सा मन्झा ले ऐकीया हांऊँ पकड़वाणा।”

²²चेले एक दूजे पर सक करदे हुए देखदे लगे कि, से केसरे बारे मन्झ बोल्या करहा।

²³यीसू रे चेले मन्झा ले यहून्ना जेस किन्हें जे यीसू प्यार करहा था, से यीसू साउगी बैठीरा था।

²⁴तेबे समौन पतरसे तेसरी तरफ इसारा करी किन्हें पूछेया कि, “दस यीसू केसरे बारे मन्झ बोल्हा?”

²⁵तेबे तिन्हें तिहां ईं यीसू री छाती री तरफ झुकी किन्हें पूछेया, “हे प्रभु, से कुणहां?” यीसूए जवाब दितेया, “जेस जो हांऊँ ये रोटी रा ग्रा चोक्की किन्हें देन्घा, तेस ई हूंणां,”

²⁶होर यीसूए रोटी रा ग्रा चोक्की किन्हें समौना रे मह्ठा यहूदा इस्करयोति जो दितेया।

²⁷जिहां ही तिन्हें रोटी रा ग्रा खांदे ही यीसूए तेस किन्हें बोल्या, “जो तू करणे वाल़ा आ, झटपट कर।” होर तेस टैम ही से सैतान रे बसा मन्झ आई गया।

²⁸पर जेह्ड़े भी तेथी खांदे बैठीरे थे तिन्हा मन्झा ले कोई नी समझी पाया कि यीसूए ये गल तेस किन्हें किधियो बोली?

²⁹क्यूंकि यहूदा इस्करयोति वाले पैसे री थैली थी, इधी कठे केसिए सोच्या कि यीसू तेस किन्हें बोल्या करहा कि साजे रे कठे जो कुछ चहिए से खरीदी ले, या गरीबा जो कुछ देई दे।

³⁰तेबे यहूदा रोटी रा ग्रा खाई किन्हें बाहर चली गया, होर रात का टैम था।

³¹जेबे यहूदा बाहर चली गया ता यीसूए बोल्या, “ऐबे हांऊँ माह्णुं रा मह्ठे री महिमा हुई, होर मेरे मन्झ परमेसरा री महिमा हुई।

³²क्यूंकि परमेसरा जो मह्ठे री वजहा ले महिमा मिलिरी, होर इधी कठे परमेसरा भी आपणे मह्ठे री महिमा करणी, होर एकदम करणी।

³³हे मेरे लाडलेयो, हांऊँ होर थोह्ड़ी देरा तक तुस्सा वाले आ, फेरी तुस्सा हांऊँ तोपणा, होर जो मैं यहूदी अगुवे किन्हें बोलिरा कि, ‘जेथी हांऊँ जाहाँ तेथी तुस्से नी आई सक्दे,’ तेह्ड़ा ही हांऊँ ऐबे तुस्सा किन्हें भी बोल्हा।

³⁴हांऊँ तुस्सा जो एक नंऊँआं हुक्म देहां एक दूजे किन्हें प्यार रखा, जो मैं तुस्सा किन्हें रखिरा, तेह्ड़ा ई तुस्से भी एक दूजे साउगी प्यार रखा।

³⁵अगर तुस्से एक दूजे किन्हें प्यार रखगे ता सभी लोका जाणी जाणा कि, तुस्से मेरे चेले ऐं।”

³⁶समौन पतरसे यीसू किन्हें बोल्या, “हे प्रभु, तुस्से केथीयो जाया करहा ऐं?” यीसूए जवाब दितेया कि, “जेथी हांऊँ जाहाँ, तेथी तू ऐबे मेरे पीछे नी आई सक्दा! पर बादा मन्झ तुध मेरे पीछे आऊंणा।”

³⁷पतरसे यीसू किन्हें बोल्या, “हे प्रभु, ऐबे हांऊँ तेरे साउगी की नी चली सक्दा? हांऊँ ता तेरे कठे जान भी देई सक्हा।”

³⁸यीसूए जवाब दितेया, “क्या तुध मेरे कठे आपणी जान देई देणी? हांऊँ तेरे किन्हें सच्च -सच्च बोल्हा कि कुकड़ा रे बांग देणे ले पैहले, तुध त्राय बारी मुखरी जाणा।”