Read Mandeali यहून्ना 18 Bible Online

यहून्ना 18 - Mandeali bible

यहून्ना 18

¹जेबे यीसू ये प्रार्थना करी बैठेया ता आपणे चेले साउगी किद्रोना रे घाटी रे पार गया। तेथी एक बगीचा था, जेस मन्झ से होर तेसरे चेले गये।

²होर तेसरा पकड़वाणे वाल़ा यहूदा इस्करयोति भी तेस जगहा जो जाणहां था, क्यूंकि यीसू आपणे चेले साउगी तेथी जांदा रैंहयां था।

³तेबे यहूदा इस्करयोति मुख्य याजके होर फरीसी लोके रोम देसा रे स्पाही रा एक गुट होर कुछ मन्दरा रे स्पाहीया साउगी भेजे जो लालटेन, म्साल होर हथियार लई किन्हें तेथी आये।

⁴तेबे यीसू तिन्हा सब गल्ला जो जेह्ड़ी तेस पर हूंणे वाली थी, जाणी किन्हें अगे आया, होर तिन्हा ले पुछदा लग्या, “केस जो तोप्हा ऐं?”

⁵तिन्हें तेस जो जवाब दितेया, “नासरता रे यीसू जो तोप्दे लगीरे।” जो यीसूए तिन्हा किन्हें बोल्या, “हांऊँ से आं,” होर तेसरा पकड़वाणे वाल़ा यहूदा इस्करयोति भी स्पाहीया किन्हें साउगी खड़ीरा था।

⁶यीसू रे ये बोल्दे ई कि, “से हांऊँ आं,” स्यों पीछे हटी किन्हें जमीना पर पई गये।

⁷तेबे तिन्हें दबारा तिन्हा ले पूछेया, “तुस्से केस जो तोप्हा ऐं?” होर तिन्हें बोल्या, “आस्से नासरता रे यीसू जो तोप्हा करहा ऐ।”

⁸यीसूए जवाब दितेया, “मैं ता तुस्सा किन्हें बोली दितेया कि हांऊँ सेई आ। अगर तुस्से मुंजो तोप्हा ऐं ता बाकी सभिया जो जाणे देआ।”

⁹ऐं इधी कठे हुआ ताकि जो बचन यीसूए बोलिरा था से पूरा हो। क्यूंकि तिन्हें बोलिरा था कि, “जो तैं मुंजो दिते, तिन्हा मन्झा ले मैं एक भी नी गुआया।”

¹⁰समौन पतरसा वाले तलवार थी तिन्हें तलवार काढी होर बडे याजका रे नौकरा पर चलाई, होर तेसरा कान टुकी दितेया। तेस नौकरा रा नांऊँ मलखुस था।

¹¹तेबे यीसूए पतरसा किन्हें बोल्या, “आपणी तलवार म्याना मन्झ रख। जो दुःखा रा डोंगा मुंजो बापूए दितिरा क्या हांऊँ तेस जो नी पीयूं?”

¹²तेबे स्पाहिये होर तिन्हारे सुबेदारे होर यहूदी मन्दरा रे स्पाहिये यीसू जो पकड़ी किन्हें बान्ह्या।

¹³होर पैहले स्यों तेस जो हन्ना बडा याजका वाले लई गये क्यूंकि से तेस साला रा बडा याजक कैफा रा सौहरा था।

¹⁴ये सेई बडा याजक कैफा था, जिन्हें जे यहूदी लोका जो सलाह दितिरी थी कि आस्सा रे लोका रे कठे एक आदमी रा मरणा खरा आ।

¹⁵समौन पतरसा साउगी एक होर दूजा चेला था जो यीसू रे पीछे चली पया, ये दूजा चेला बडे याजका रा जाणा पैहचाणा था होर से यीसू साउगी बडे याजका रे आंघणा तक गया।

¹⁶पर पतरस दुराजे वाले खड़ीरा था, तेबे से दूजा चेला जो बडे याजका रा जाणा पैहचाणा था, बाहर निकल्या, होर से तेस्सा दुराजे री पैहरेदारणिया जो बोली किन्हें, पतरसा जो अंदर लई गया।

¹⁷से जेह्ड़ी पैहरेदारणीया थी, तेस्से पतरसा किन्हें बोल्या, “क्या तू भी एस माह्णुं रे चेले मन्झा ले एक आ?” तिन्हें बोल्या, “नी हांऊँ तेसरा चेला नी आं।”

¹⁸नौकर होर मन्दरा रे स्पाही ठंडा री वजहा ले खड़ी किन्हें आग तफ्या करहा ऐं थे। होर पतरस भी तिन्हा साउगी खड़ी किन्हें आग तफ्या करहा था।

¹⁹तेबे बडे याजके यीसू ले तेसरे चेले रे बारे होर तेसरे उपदेसा रे बारे मन्झ पूछेया।

²⁰यीसूए तेस जो जवाब दितेया कि, “मैं सभ लोका किन्हें खुल्ही किन्हें गल्ला किती। मैं तिन्हा जो मन्दरा मन्झ, यहूदी सभा मन्झ होर मन्दरा रे आंघणा मन्झ, होर एह्ड़ी जगहा जेथी कई यहूदी लोक कठे हुंहाँ ऐं थे, हमेसा उपदेस देयां था होर मैं चुपके-चुपके कुछ नी बोल्या।

²¹तू मेरे किन्हें ये सवाल किधियो पूछ्हा? सुणने वाले ले ही पूछी लेया कि मैं तिन्हा किन्हें क्या बोल्या? क्यूंकि स्यों जाणहां ऐं कि, मैं क्या-क्या बोल्या?”

²²जेबे तिन्हें ये बोल्या, ता मन्दरा रे स्पाहीया मन्झा ले एकिये जो तेसरे नेडे खड़ीरा था, यीसू जो थप्पड़ मारी किन्हें बोल्या, “क्या तू बडे याजका जो एह्ड़ा जवाब देहां?”

²³यीसूए तेस जो जवाब दितेया, “अगर मैं गलत बोल्या, ता दसा कि क्या गलत बोल्या, पर अगर ठीक बोल्या, ता तू मुंजो किधियो मारहा?”

²⁴हन्ना माहयाजके यीसू जो ऐबे भी बझिरा था, बडा याजका कैफा बडे याजका वाले भेजी दितेया।

²⁵समौन पतरस खड़ा हुई किन्हें आग तफ्या करहा था; तेबे लोके तेस ले पुछेया, “क्या तू भी यीसू रे चेले मन्झा ले एक आ?” पतरस मुखरी गया होर बोल्या, “से हांऊँ नी आं।”

²⁶बडे याजका रे नौकर मन्झा ले एकिये जो नौकरा रे टब्बरा मन्झा ले एक था, जेसरा जे कान पतरसे काटी दितिरा था, बोल्या, “मैं तू यीसू साउगी बगीचे मन्झ देखीरा था?”

²⁷पतरस दबारा मुखरी गया होर तेस ई टैम कुकड़े बांग दिती।

²⁸होर भ्यागा तड़के ही स्पाही यीसू जो बडे याजक कैफा वाले ले लई किन्हें रोम देसा रे हाकम पिलातुसा रे मैहला मन्झ लई आये। पर स्यों आपु पिलातुसा रे मैहला मन्झ नी गये। क्यूंकि तिन्हा मन्झा ले कोई अंदर जांदा ता तेस असुद्ध हुई जांदा होर फसहा रे साजे रा खाणा नी खाई सकदे थे। (क्यूंकि पिलातुस गैर-यहूदी था)

²⁹तेबे पिलातुस हाकम तिन्हा वाले बाहर आया होर बोल्या, “तुस्से एस माह्णुं पर क्या दोस ल्गाहें?”

³⁰तिन्हें तेस जो जवाब दितेया कि, “ये बुरा काम करणे वाल़ा आ इधी कठे आस्से ये तेरे वाले ल्यांदेआ ताकि तू एस जो सजा दे।”

³¹पिलातुस हाकमे तिन्हा किन्हें बोल्या, “तुस्से ई एस जो लई जाई किन्हें आपणी मूसा री व्यवस्था रे मताबक ऐसरा फैसला करा।” यहूदी अगुवे तेस किन्हें बोल्या, “आस्सा जो हक नी आ कि आस्से केसी री जान ले।”

³²तिन्हें ये इधी कठे बोल्या, ताकि यीसू री से गल पूरी हो जो तिन्हें बोलिरी थी कि, तेस केह्ड़ी मौत मरणा।

³³तेबे पिलातुस हाकमे दबारा मैहला रे अंदर गया होर यीसू जो सादी किन्हें, तेस ले पूछेया, “क्या तू यहूदी लोका रा राजा आ?”

³⁴यीसूए जवाब दितेया, “क्या तू ये गल आपणी आपा ले बोल्हा या होरिये मेरे बारे मन्झ तेरे किन्हें बोलिरा?”

³⁵पिलातुस हाकमे जवाब दितेया, “तू जाणा कि हांऊँ यहूदी नी आ?” तेरे लोके होर तेरे मुख्य याजके तुजो मेरे हाथा मन्झ दितिरा। तैं एह्ड़ा क्या कितिरा?

³⁶यीसूए जवाब दितेया कि, “मेरा राज एस संसारा नी आ। अगर मेरा राज एस संसारा रा हुन्दा, ता मेरे साउगी चलने वाले लोक लड़दे, होर हांऊँ यहूदी अगुवे मुंजो नी पकड़दे, पर सच्चाई ता येई कि ऐबे मेरा राज एथी रा नी आ।”

³⁷पिलातुस हाकमे तेस किन्हें बोल्या, “खरा ता तू राजा आ?” यीसूए जवाब दितेया, “तू बोल्हा कि, हांऊँ राजा आ। मैं इधी कठे जन्म लईरा, होर हांऊँ इधी कठे संसारा मन्झ आईरा कि हांऊँ सच्चाई रे बारे मन्झ सिखाई सकूं। होर जो कोई सच्चाई किन्हें प्यार करहा, स्यों मेरी गल्ला मनाएं।”

³⁸पिलातुस हाकमे तेस किन्हें बोल्या, “सच्च क्या आ?” होर ये बोली किन्हें से दबारा यहूदी अगुवे वाले चली गया होर तिन्हें तिन्हा किन्हें बोल्या, “मैं ता तेस मन्झ कोई दोस नी पांदा।”

³⁹“पर तुस्सा रा ये रूआज आ कि हांऊँ फसहा रे साजा मन्झ तुस्सा रे कठे एक माह्णुं जो छाडी देऊँ, ता क्या तुस्से चाहें कि तुस्सा रे कठे हांऊँ यहूदी लोका रे राजे जो छाडी देऊँ?”

⁴⁰तेबे तिन्हें दबारा चिंगी किन्हें बोल्या, “एस जो नी पर आस्सा रे कठे बरअब्बा जो छाडी दे!” होर बरअब्बा[8] एक डाकू था।