Read Mandeali यहून्ना 2 Bible Online

यहून्ना 2 - Mandeali bible

यहून्ना 2

¹फेरी त्रीजे ध्याड़े गलील जिल्ले रे काना गांऊँआं मन्झ केसी रा ब्याह था। होर यीसू री माऊ भी तेथी थी।

²होर यीसू होर तेसरे चेले भी तेस ब्याहा मन्झ सादीरे थे।

³जेबे ब्याह मन्झ पीणे रे कठे अंगूरा रा रस खत्म हुई गया, ता यीसू री माऊऐ तेस किन्हें बोल्या कि, “तिन्हा वाले अंगूरा रा रस खत्म हुई गया।”

⁴यीसूए तेस्सा किन्हें बोल्या, “माऊए, तू मुंजो किधियो दसदी लगिरी? हल्ली मेरा टैम नी आया कि हांऊँ मसीहा कहलाया जाऊँ।”

⁵पर तेसरी माऊऐ सेऊआदारा किन्हें बोल्या, “जो कुछ से तुस्सा किन्हें बोले, तेह्ड़ा ई करेया।”

⁶तेथी यहूदी लोका रे रुआजा रे मताबक लोका रे सुद्ध हूंणे रे कठे तेथी पात्थरा रे छेह हाण्डू रखिरे थे, जिन्हा मन्झ दो-दो मण[3], तीन-तीन मण आहूँआं था।

⁷यीसूए तिन्हा किन्हें बोल्या, “घड़े मन्झ पाणी भरा।” तेबे तिन्हें स्यों हाण्डू रे मुंहा तक भरी दिते।

⁸तेबे यीसूए नौकरा जो बोल्या, “ऐबे थोह्ड़ा पाणी काढी किन्हें धामा रे मुखिये वाले लई जा।”

⁹होर तिन्हें एह्ड़ा ही कितेया। जेबे धामा रे मुखिये से पाणी सुआदेया से जे अंगूरा रा रस बणी गईरा था, होर से नी जाणदा था कि, से केथी ले आईरा था। पर जिन्हे नौकरे से पाणी काढी किन्हें ल्यान्दिरा था, सिर्फ तिन्हा जो पता था। तेबे धामा रे मुखिये लाड़े जो सादी किन्हें बोल्या,

¹⁰“हर एक माह्णुं पैहले बधिया अंगूरा रा रस देहां, फेरी जेबे जे लोक पी किन्हें रजी जाहें, तेबे घटिया अंगूरा रा रस देहां ऐं; पर तैं बधिया अंगूरा रा रस हली तक बचाई रखिरा।”

¹¹यीसूए गलील जिल्ले रे काना गांऊँआं मन्झ आपणा ये पैहला चिन्ह दसी किन्हें आपणी महिमा दसी। होर तेसरे चेले तेस पर विस्वास कितेया कि से ही मसीहा आ।

¹²तेता ले बाद से, होर तेसरी माऊ, होर तेसरे भाई, होर तेसरे चेलेया साउगी कफरनहूम सैहरा जो गये, होर कुछ ध्याड़े तक तेथी रहे।

¹³यहूदी लोका रा फसहा रा साजा नेडे था होर यीसू यरुस्लेम सैहरा जो गया।

¹⁴होर तेस मन्दरा मन्झ तिन्हें बोल्ह्द, होर भेड होर कबूतरा रे बेचणे वाले, होर ढब्बे री अदला-बदली करणे वाले री पीढ़िया देखी।

¹⁵होर तिन्हें रस्सिया रा कोड़ा बणाई किन्हें सभ भेडा होर बोल्ह्द मन्दरा ले काढी दिते, होर अदला-बदली करणे वाले रे ढब्बे सटी दिते, होर बैठणे री पीढ़िया पलटी दिती।

¹⁶होर कबूतर बेचणे वाल़ेया किन्हें बोल्या, “इन्हा जो एथी ले बाहर लई जा। मेरे बापू रे घरा जो वपारा रा घर नी बणाऊआ।”

¹⁷तेबे तेसरे चेले जो याद आया कि राजा दाऊदे ये वचन पवित्र सास्त्रा मन्झ लिखिरा, “तेरे घरा रा जनून मेरे अंदर आगी साहीं भख्हा।”

¹⁸एता पर यहूदी अगुवे तेस किन्हें बोल्या, “तू जे ये सभ करहा ता तू आस्सा जो कुण जे चिन्ह दस्हा?”

¹⁹यीसूए तिन्हा जो जवाब दितेया कि, “एस मन्दरा जो ढाई देआ, होर मां ये त्रीजे ध्याड़े मन्झ दबारा बणाई देणा।”

²⁰यहूदी लोके बोल्या, “एस मन्दरा जो बनाणे रे कठे छयाली साल लगे, होर क्या तुध ये मन्दर तीन ध्याड़े मन्झ बणाई देणा?”

²¹पर यीसूए आपणे सरीरा जो मन्दरा साहीं बोल्या था।

²²इधी कठे जेबे यीसू मरिरे मन्झा ले जिउंदा हुई गया ता यीसू री बोलिरी गल्ला चेलेया जो याद आया। होर तिन्हें पवित्र सास्त्रा पर होर यीसू रे बोलिरे बचणा पर दुहीं रा विस्वास कितेया।

²³फसहा रे साजे रे टैमा मन्झ जेबे यीसू यरुस्लेम सैहरा मन्झ था, ता कई लोके स्यों चिन्ह देखी किन्हें तेस पर विस्वास कितेया।

²⁴पर यीसूए भरोसा नी कितेया कि लोके तेस पर विस्वास करी लईरा, क्यूंकि से माह्णुं रा स्वभाव जाणहां था।

²⁵होर तेस जो एस गल्ला री कोई ज्रूरत नी थी कि, कोई आई किन्हें तेस जो लोका रे बारे मन्झ दसे, क्यूंकि से आपु जाणहां था कि, लोका रे मना मन्झ क्या?