Read Mandeali यहून्ना 21 Bible Online

यहून्ना 21 - Mandeali bible

यहून्ना 21

¹इन्हा गल्ला ले बाद यीसूए तिब्रियुस झीला (ये गलील समुद्रा रा दूजा नाऊँ आ) रे बाढे दबारा आपणे चेले वाले आया, होर ये सभ कुछ इंहां हुआ;

²समौन पतरस होर थोमा जेस जो दिदुमुस भी बोल्हा ऐं, होर गलील जिल्ले रे काना गांऊँआं रा नतनएल होर जब्दी रे दुहें मह्ठे, होर यीसू रे चेले मन्झा ले दो होर दो जण तेथी समुद्रा रे बाढे कठे हुईरे थे।

³समौन पतरसे तिन्हा किन्हें बोल्या, “हांऊँ मछि पकड़दे चलीरा।” तिन्हें तेस किन्हें बोल्या, “आस्से भी तेरे साउगी चल्हा ऐं।” स्यों जाई किन्हें किस्ती मन्झ चढ़े होर मछिया पकड़दे गये, पर तेस राती तिन्हें कुछ नी पकड़ेया।

⁴होर भ्यागा ई यीसू समुद्रा रे बाढे खड़ेया, तेबे बी चेले से नी पछ्याणेया कि से यीसू आ।

⁵तेबे यीसूए तिन्हा किन्हें बोल्या, “हे बच्चेयो, क्या तुस्सा वाले कुछ खाणे जो आ? तिन्हें जवाब दितेया, नी आस्सा वाले खाणे रे कठे कुछ नी आ।”

⁶यीसूए तिन्हा किन्हें बोल्या, “किस्ती रे सीधे हाथा बखा जो जाल पाऊआ, तेबे तुस्सा जो कुछ माछिया मिली जाणी, तेबे तिन्हें जाल पाया, होर स्यों बौह्त सारी मछिया हूंणे री वजहा ले स्यों आपणे जाला जो नी खींजी सके।”

⁷फेरी तिन्हें चेले जेस किन्हें जे यीसू प्यार करहा था तिन्हें पतरसा किन्हें बोल्या, “ये ता प्रभु आ!” समौन पतरसे ये सुणी किन्हें कि, “ये प्रभु आ, समौन पतरसे आपणे बाहर्ले कपड़े लपेटी किन्हें समुद्रा मन्झ छलांग ल्गाई क्यूंकि तेस टैम से आधे कपड़े मन्झ था।”

⁸पर होर भी चेले किस्तिया मन्झ आये होर मछिया किन्हें भरीरा जाल खीन्जी किन्हें ल्यान्देया, क्यूंकि स्यों चेले समुद्रा रे बाढे ले ज्यादा दूर नी थे पर लगभग नब्बे मीटर दूर थे।

⁹जेबे स्यों बाढे पूजी गये, ता तिन्हें देख्या कि कोएले री आगा पर मछि पकणे रे कठे होर साउगी रोटिया रखिरी थी।

¹⁰यीसूए तिन्हा किन्हें बोल्या, “जो मछिया तुस्से ऐबे पकड़ीरी तिन्हा मन्झा ले थोह्ड़ी मेरे वाले लई आऊआ।”

¹¹समौन पतरसे किस्ती मन्झ चढ़ी किन्हें एक सौ त्रुन्जा बडी मछिया किन्हें भरीरा जाल बाढे तक खीन्जेया, होर इतनी मछिया हूंणे पर भी जाल नी फटेया।

¹²यीसूए तिन्हा किन्हें बोल्या, “आऊआ खाणा खाऊआ होर चेले मन्झा ले केसी जो भी हिम्मत नी हुई कि, स्यों तेस ले पूछी सको कि, तू कुणहां?” क्यूंकि तिन्हो पता लगी गईरा था कि से प्रभु आ।

¹³यीसूए रोटी लई किन्हें तिन्हा जो दिती, होर तिहां ईं मछि भी दिती।

¹⁴ये त्रीजी बारी हुआ कि, चेले यीसूए मरिरे मन्झा ले जिउंदे हूंणे ले बाद से देख्या।

¹⁵खाणा खाणे ले बाद यीसूए समौन पतरसा किन्हें बोल्या, “हे समौन यहून्ना रे मह्ठे, क्या तू इन्हा सभी ले बढ़ी किन्हें मेरे किन्हें प्यार रख्हा?” तिन्हें यीसू किन्हें बोल्या, “हां प्रभु तू ता जाणहां कि, हांऊँ तुजो चाहां।” यीसूऐ समौना किन्हें बोल्या, “मेरे चेले री रखवाली कर क्यूंकि स्यों छेलू साहीं ऐ।”

¹⁶यीसूए फेरी दूजी बारी भी समौना किन्हें बोल्या, “हे समौन यहून्ना रे मह्ठे, क्या तू मेरे किन्हें प्यार रख्हा?” तिन्हें यीसू किन्हें बोल्या, “हां प्रभु तू ता जाणहां कि, हांऊँ तुजो चाहां।” यीसूए तेस किन्हें बोल्या, “मेरी भेडा री रखवाली कर।”

¹⁷यीसूऐ त्रीजी बारी तेस किन्हें बोल्या, “हे समौन यहून्ना रे मह्ठे, क्या तू मुंजो चाहां?” पतरस दुआस हुई गया कि, तिन्हें तेस किन्हें त्रीजी बारी एह्ड़ा पूछेया कि, “क्या तू मुंजो चाहां?” होर तेस किन्हें बोल्या, “हे प्रभु तू ता सभ कुछ जाणहां, तू ये जाणहां कि हांऊँ तुजो चाहां।” यीसूए तेस किन्हें बोल्या, “मेरी भेडा जो चरा।”

¹⁸हांऊँ तुध किन्हें सच्च -सच्च बोल्हा, जेबे तू जुआन था, ता त्यार हुई किन्हें जेथी तू चाहां था तेथी तू जाहाँ था; पर जेबे तुध खपरे हूंणां, ता तुध आपणे हाथ पसारणे, होर होरिया तुजो त्यार करी किन्हें जेथी जे तुध नी जाणा तेथी तिन्हा तू लई जाणा।

¹⁹यीसूए इन्हा गल्ला ले पतरसा जो ये दसी दितेया कि तेस कियां मरणा होर तेसरे मरणे ले परमेसरा री महिमा हूणीं। होर तिन्हें ये बोली किन्हें तेस किन्हें बोल्या, “आ मेरा चेला बण।”

²⁰पतरसे मुड़ी किन्हें यीसू मसीह रे तेस चेले जो पीछे आऊंदे देख्या, जेस किन्हें जे यीसू प्यार करहा था, होर जिन्हें खाणा खाणे रे टैमा तेसरी छाती री तरफ झुकी किन्हें पूछेया था कि, “हे प्रभु, तुजो पकड़वाणे वाल़ा कुणहां?”

²¹तेस जो देखी किन्हें पतरसे यीसू किन्हें बोल्या, “हे प्रभु एस साउगी क्या हूंणा?”

²²यीसूए तेस जो बोल्या, “अगर हांऊँ चाहूँ कि ये मेरे आऊणें तक से जिउंदा रहे, ता तुजो क्या आ? तू मेरा चेला बण।”

²³इधी कठे भाईया मन्झ ये गल फैल्ही गयी कि तेस दूजे चेले नी मरणा। तेबे बी यीसूए पतरसा किन्हें ये नी बोल्या कि, “तेस नी मरणा, पर ये बोलिरा था कि अगर, हांऊँ चाहूँ कि ये मेरे आऊणें तक जिउंदा रहे, ता तुजो क्या आ?”

²⁴ये सेई चेला आ, जो इन्हा सब गल्ला गुआह आ। होर जिन्हें जे यों गल्ला लिखी, होर आस्से जाणहां ऐं कि, तेसरी गुआही सच्ची ई।

²⁵यीसूए होर भी बौह्त सारे काम किते, अगर तिन्हा सारी गल्ला जो एक-एक करी किन्हें लिखदे, तेबे हांऊँ समझा कि जेह्ड़ी कताबा लिखी जांदी तिन्हा कताबा जो रखणे री जगहा सारे संसारा मन्झ भी नी मिलणी थी।