Read Mandeali यहून्ना 4 Bible Online

यहून्ना 4 - Mandeali bible

यहून्ना 4

¹फेरी जेबे यीसू जो पता लगया कि, फरीसी लोका रे बीचा मन्झ तेसरे बारे मन्झ गल्ला हुएआ करहा ई कि, यीसू यहून्ना बपतिस्मा देणे वाल़े ले ज्यादा चेले बणाहां, होर तिन्हा जो बपतिस्मा देंहां।

²बल्कि यीसू आपु नी पर तेसरे चेले बपतिस्मा देंहां ऐं थे।

³तेबे यीसू यहूदिया ईलाके जो छाडी किन्हें गलील जिल्ले जो चली गया।

⁴होर परमेसरा री इच्छा थी कि से सामरिया ईलाके ले हुई किन्हें जाए।

⁵एता कठे से सामरिया ईलाके रे सूखार सैहरा मन्झ आया, जो तेस जमीना वाले आ, जो याकूबे आपणे मह्ठे युसुफा जो दितिरा था।

⁶होर याकूबे जो कुंआं तेथी बणाईरा था से हाल्ले तक तेथी था। यीसू आपणे सफरा रा थकीरा तेस कुएं पर बैठी गया। होर ये गल दप्हैरा रे टैमा हुई।

⁷इतने मन्झ एक सामरिया ईलाके री एक ज्नाने पाणी भरणे रे कठे आई। यीसूए तेस्सा जो बोल्या, “मुंजो पाणी प्या।”

⁸क्यूंकि तेसरे चेले ता गांऊँआं मन्झ खाणा मूल्ले लैंदे गईरे थे।

⁹तेस्से सामरिया ईलाके री ज्नाने यीसू जो बोल्या, “तू यहूदी हुई किन्हें मेरे ले पाणी किहाँ मांघ्हा?” क्यूंकि यहूदी लोक सामरिया ईलाके रे लोका साउगी केसी भी तरीके रा रिस्ता नी रखदे थे।

¹⁰यीसूए जवाब दितेया, “अगर तू परमेसरा रे वरदाना जो जाणदी, होर ये भी जाणदी कि से कुणहां जो तेरे किन्हें बोल्हा, ‘मुंजो पाणी प्या,’ ता तू तेस ले मांगदी, होर से तुजो जिन्दगी रा पाणी देंदा।”

¹¹जनानिये तेस जो बोल्या, “हे प्रभु, तेरे वाले पाणी भरणे रे कठे कुछ भी नी आ, होर कुंआं बौह्त डुघ्हा। ता फेरी से जिन्दगी रा पाणी तेरे वाले केथी ले आया?

¹²क्या तू आस्सा रे बापदादे याकूबा ले बडा आ, जिन्हें जे आस्सा जो ये कुंआं दितेया। होर आपु होर आपणे बच्चे होर आपणे जानवरा समेत एता मन्झा ले पींदे रैहे।”

¹³यीसूए तेस्सा जो जवाब दितेया कि, “जेस भी ये पाणी पीणा तेस जो फेरी सोख लगणी।

¹⁴पर जो कोई तेस पाणी मन्झा ले पिंघा जो मां तेस जो देणा, तेस फेरी कधी भी सोखे नी हूंणां: पर जो पाणी मां तेस जो देणा, तेस तेता मन्झ एक सोता बणी जाणा जेस अनंत जिन्दगी रे कठे मुट्दे रैंह्णां।”

¹⁵ज्नाने यीसू जो बोल्या, “हे प्रभु तेस पाणी जो मुंजो देई दे ताकि हांऊँ सोखी नी रहूँ होर ना पाणी भरणे रे कठे इतनी दूर आऊँ।”

¹⁶यीसूए तेस्सा जो बोल्या, “जा, आपणे लाड़े जो एथी सादी किन्हें लई आऊ।”

¹⁷तेस्से ज्नाने जवाब दितेया कि, “हांऊँ बगैर लाड़े ई:” यीसूए तेस्सा किन्हें बोल्या, “तू ठीक बोल्हा ई कि हांऊँ बगैर लाड़े ई।

¹⁸क्यूंकि तू पांज लाड़े करी चुकीरी, होर जेस मर्धा वाले तू ऐबे हाई से भी तेरा लाड़ा नी आ; ये ता तैं सच्च बोल्या।”

¹⁹तेस्से ज्नाने यीसू जो बोल्या, “हे प्रभु, मुंजो लग्हा कि तू नबी आ।

²⁰आस्सा रे सामरिया सैहरा रे बापदादे भी एस प्हाड़ा पर ई अराधना किती: होर यहूदी लोक बोल्हा ऐं कि यरुस्लेम सैहरा से जगहा ई जेथी लोका जो अराधना करणी चहिए।”

²¹यीसूए तेस्सा जो बोल्या, “हे ज्नाने, मेरी गल्ला रा विस्वास कर कि से टैम आहूँआं कि तुस्सा ना ता एस प्हाड़ा पर बापू री अराधना करणी ना यरुस्लेम सैहरा मन्झ।

²²तुस्से सामरिया सैहरा रे लोक जेस जो नी जाणदे, तेसरा भजन करहा ऐं; होर आस्से यहूदी लोक जेस जो जाणहां ऐं तेसरी अराधना करहा ऐं; क्यूंकि उद्धार यहूदी लोका री तरफा ले आ।

²³पर से टैम आहूँआं, बल्कि ऐबे भी आ तेता मन्झ सच्चे बापू परमेसरा री अराधना आत्मा होर सच्चाई किन्हें करणा, क्यूंकि बापू आपणे कठे एह्ड़े ई भजन करणे वाल़ेया जो तोप्हा।

²⁴परमेसर आत्मा आ, इधी कठे जरूरी आ कि तेसरी अराधना करणे वाले आत्मा होर सच्चाई किन्हें भजन करहे।”

²⁵ज्नाने यीसू किन्हें बोल्या, “हांऊँ जाणहां ईं कि मसीह जेस्जो जे ख्रीस्ट बोल्हा ऐं, से आऊणें वाल़ा आ; जेबे तेस आऊंणा, तेबे तेस आस्सा जो सभ गल्ला दसी देणी।”

²⁶यीसूए तेस्सा जो बोल्या, “हांऊँ जो तेरे किन्हें बोल्या करहा, हांऊँ सेई आ।”

²⁷इतने मन्झ यीसू रे चेले आई गये, होर हरान हुए कि, यीसू ज्नाने किन्हें क्या गल्ला करेया करहा; तेबे बी केसिए नी बोल्या कि, “तू क्या चाहां?” या “किधियो तेस्सा किन्हें गल्ला करेया करहा था।”

²⁸तेबे से ज्नाने आपणा घड़ा छाडी किन्हें गांऊँआं मन्झ चल्ली गयी, होर से लोका किन्हें बोल्दी लगी।

²⁹“आऊआ, एक माह्णुं जो देखा, जिन्हें मेरी पिछली जिन्दगी रे बारे मन्झ मुंजो सभ कुछ दसेया। हलांकि हांऊँ तेस किन्हें पैहले कधी नी मिली, ऐई मसीह ता नी आ?”

³⁰इधी कठे स्यों गांऊँआं ले निकली किन्हें यीसू जो देखणे रे कठे आये।

³¹तेस ई टैम तेसरे चेले यीसू किन्हें अर्ज करदे लगे कि, “हे गुरु, कुछ खाई ले।”

³²पर यीसूए तिन्हा किन्हें बोल्या, “मेरे वाले खाणे रे कठे एह्ड़ा खाणां आं जेस जो तुस्से नी जाणदे।”

³³तेबे चेले एक दूजे किन्हें बोल्दे लगे, “जेबे आस्से एथी नी थे ता केसिए गुरु रे कठे खाणा ता नी ल्यान्द्रा?”

³⁴यीसूए तिन्हा किन्हें बोल्या, “मेरा खाणा ये आ कि, हांऊँ आपणे भेजणे वाले री इच्छा रे मताबक चलूं होर तेसरा काम पूरा करूं।

³⁵क्या तुस्से नी बोल्दे कि, ‘कटणी हूंणे मन्झ हल्ली बी चार म्हीने बाकि ये?’ देखा, हांऊँ तुस्सा किन्हें बोल्हा, आपणी हाखिया जो खोली किन्हें डोहर्रिया जो देखा कि, स्यों डोहर्रिया कटणी रे कठे पक्की चुकीरी।

³⁶होर काटणे वाल़ा मजदूरी पाहां, होर काटिरा फल तिन्हा लोका साहीं ऐं जिन्हों से अनंत जिन्दगी मन्झ लेई आऊआ; ताकि बाह्णे वाल़ा होर काटणे वाल़ा दुहें मिली किन्हें आनंद मन्नाहें।

³⁷क्यूंकि एता पर ये कहावत ठीक बैठणी कि, ‘बेजा बाह्णे वाल़ा होर आ होर काटणे वाल़ा होर आ।’

³⁸मैं तुस्से तेस खेता री कटाई रे कठे भेजे, तेता मन्झ तुस्से मैहनत नी किती: होरिये मैहनत किती होर तुस्से तिन्हारी मैहनता रे फला मन्झ भागी बणे।”

³⁹सामरिया ईलाके मन्झ रैहणे वाले कई लोके तेस्सा ज्नानिया रे कैहणे री वजहा ले यीसू पर विस्वास कितेया। क्यूंकि तेस्से जन्नानिए तिन्हा किन्हें बोल्या कि, “तिन्हें मेरी पिछली जिन्दगी रे बारे मन्झ मुंजो सभ कुछ दसेया।”

⁴⁰जेबे सामरिया ईलाके रे लोक तेस वाले आये, स्यों यीसू ले अर्ज करदे लगे कि, आस्सा वाले एथी रही जा: होर से तेथी दो ध्याड़े तक रैंहयां।

⁴¹होर यीसू री गल्ला जो सुणी किन्हें होर भी कईऐ लोके तेस पर विस्वास कितेया।

⁴²होर तिन्हें तेस्सा ज्नाने किन्हें बोल्या, “ऐबे आस्से तेरे कैहणे ले ई विस्वास नी करदे, क्यूंकि आस्से आप्हुए सुणी लैया, होर जाणहां ऐं कि सच्चे येई संसारा रा उद्धारकर्ता आ।”

⁴³फेरी से दो ध्याड़े ले बाद से तेथी ले निकली किन्हें गलील जिल्ले जो चली गया।

⁴⁴क्यूंकि यीसूए आप्हुए गुआही दिती कि नबी आपणे गांऊँ मन्झ इज्जत नी पांदा।

⁴⁵जेबे से गलील जिल्ले मन्झ आया, ता गलील जिल्ले रे लोके चाऊआ किन्हें तेस किन्हें मिले, क्यूंकि जितने काम तिन्हें यरुस्लेम सैहरा मन्झ साजे रे टैमा मन्झ कितिरे थे, तिन्हें सभ कुछ देखिरा था, क्यूंकि स्यों भी साजे मन्झ गईरे थे।

⁴⁶तेबे यीसू दबारा गलील जिल्ले रे काना गांऊँआं मन्झ आया, जेथी तिन्हें पाणी ले अंगूरा रा रस बणाया था: होर एक राजे रा कामी था जेसरा मह्ठा कफरनहूम सैहरा मन्झ ब्मार था।

⁴⁷तिन्हें ये सुणी किन्हें कि यीसू यहूदिया ईलाके रे गलील जिल्ले मन्झ आई गईरा, से यीसू वाले गया होर तेस किन्हें अर्ज करदा लग्या कि चली किन्हें मेरे मह्ठे जो ठीक करी दे: क्यूंकि से मरणे ई वाल़ा था।

⁴⁸यीसूए तेस जो बोल्या, “जेबे तक तुस्से चिन्ह होर नौखे काम नी देख्घे तेबे तक तुस्सा कधी विस्वास नी करणा कि हांऊँ मसीहा आ।”

⁴⁹राजे रे कामीये तेस किन्हें बोल्या, “हे प्रभु, मेरे मह्ठे री मौत हूंणे ले पैहले चली पऊ।”

⁵⁰यीसूए तेस जो बोल्या, “जा, तेरा मह्ठा नी मरदा, तेस ठीक हुई जाणा।” तिन्हें आदमिये यीसू री गल्ला रा विस्वास कितेया, होर से चली गया।

⁵¹होर से पैंडे मन्झ जाया ही करहा था कि, तेसरे सेऊआदारे तेस वाले आई किन्हें मिले होर बोल्दे लगे कि, “तेरा मह्ठा नी मरिरा से जिउंदा आ।”

⁵²तिन्हें तिन्हा ले पूछेया कि, “केस टैम से ठीक हुन्दा लग्या था?” तिन्हें तेस जो बोल्या, “दप्हैरा रे एक बजे एसरा बुखार उतरी गया।”

⁵³तेबे बापू जाणी गया कि, ये तेस ई टैम ठीक हुई गया जेस टैमा जे यीसूए तेस जो बोल्या, “तेरा मह्ठा नी मरदा, तेस जिउंदे रेहणा।” होर तिन्हें होर तेसरे सारे टब्बरे विस्वास कितेया।

⁵⁴ये दूजा चिन्ह था, जो यीसूए यहूदिया ईलाके ले निकली किन्हें गलील जिल्ले मन्झ आई किन्हें दसेया।