Read Mandeali यहून्ना 7 Bible Online

यहून्ना 7 - Mandeali bible

यहून्ना 7

¹इन्हा गल्ला ले बाद यीसू गलील जिल्ले मन्झा फिरदा रैहया, होर से यहूदिया ईलाके मन्झ जाणा नी चाहन्दा था। क्यूंकि तेथी यहूदी अगुवे यीसू जो मारणे रे कठे कोसिस करेया करहा ऐं थे।

²होर यहूदी लोका रे तम्बूआ रा साजा[5] नेडे था।

³इधी कठे यीसू रे छोटे भाईये तेस जो बोल्या, “एथी मत रुक होर यहूदिया ईलाके मन्झ साजे रे कठे चली जा, क्यूंकि जो चमत्कार तू करहा तिन्हा जो तेरे चेले भी देखी सके।

⁴क्यूंकि जो कोई मसहूर हूंणां चाहां होर ल्हुखी किन्हें काम नी करदा। क्यूंकि तू ये काम करहा, ता संसारा रे लोक तुजो देखी सके।”

⁵क्यूंकि तेसरे भाई भी तेस पर विस्वास नी करदे थे।

⁶तेबे यीसूए तिन्हें किन्हें बोल्या, “हल्ली तक मेरे जाणे रे कठे सही टैम नी आईरा, पर तुस्से कधी भी जाई सक्हा ऐं।

⁷संसारा रे लोक तुस्सा किन्हें नफरत नी करी सक्दा। पर से मेरे किन्हें बैर करहा, क्यूंकि हांऊँ तिन्हो दसा कि स्यों बुरे काम करहा ऐं।

⁸तुस्से साजे मन्झ जाउआ, मां हल्ली एस साजे मन्झ नी जाणा; क्यूंकि हल्ली तक मेरे जाणे रे कठे सही टैम नी आईरा।”

⁹से यूं गल्ला करी किन्हें गलील जिल्ले मन्झ ई रही गया।

¹⁰पर जेबे यीसू रे छोटे भाई झोपड़ी रे साजे मन्झ चली गये, ता यीसू सभी रे साम्हणें नी गया पर चुपके जे गया।

¹¹साजे मन्झ यहूदी अगुवे तेस जो तोप्दे लगे होर लोका ले पुछदे लगे कि, “क्या यीसू आईरा?”

¹²होर लोका मन्झ यीसू रे बारे मन्झ चुपे-चुपे बौह्त गल्ला हुई: कुछ बोल्हा ऐं थे कि, “यीसू भला माह्णुंआं।” होर कुछ बोल्हा ऐं थे कि “नंईं, यीसू लोका जो भरमाहां।”

¹³तेबे बी यहूदी अगुवे रे डरा रे मारे कोई आदमी यीसू रे बारे मन्झ खुल्ही किन्हें खरी गल्ला नी बोल्दे थे।

¹⁴होर साजे रे ध्याड़े रे बीचा मन्झ यीसू मन्दरा मन्झ जाई किन्हें उपदेस देंदा लग्या।

¹⁵तेबे यहूदी अगुवे हरान हुई किन्हें बोल्दे लगे कि, “एस जो बगैर पढ़े ये पवित्र सास्त्रा रा ज्ञान केथी ले आया?”

¹⁶यीसूए तिन्हा जो जवाब दितेया कि, “मेरा उपदेस मेरा नी आ, पर परमेसरा री जिन्हें हांऊँ भेजीरा आ।

¹⁷अगर कोई परमेसरा री इच्छा पर चलणा चाहां, ता से एस उपदेस रे बारे मन्झ जाणी लेया कि से परमेसरा री तरफा ले आ, या हांऊँ आपणी तरफा ले बोल्हा।

¹⁸जो आपणी तरफा ले कुछ बोल्हा, से आपणी ई बड़ाई चाहां, पर जो आपणे भेजणे वाले री बड़ाई चाहां सेई सच्चा आ, होर तेस मन्झ पाप नी आ।

¹⁹मूसे तुस्सा जो व्यवस्था दितीरी, तेबे बी तुस्सा मन्झा ले कोई व्यवस्था जो नी मनदा। एता रे बजाय तुस्से मुंजो मारणा चाहें?”

²⁰लोके जवाब दितेया, “तेरे मन्झ दुस्टात्मा ई! कुण तुजो मारणा चाहां?”

²¹यीसूए तिन्हा जो जवाब दितेया कि, “मैं एक काम कितिरा, होर तुस्से हरान हुंहाँ ऐं।

²²एता कठे मूसे तुस्सा जो खतने रा हुक्म दितेया (ये मूसा री तरफा ले नी आ, पर बापदादे ले आ) होर तुस्से अरामा रे ध्याड़े माह्णुंआं रा खतना करहा ऐं।

²³जेबे अरामा रे ध्याड़े माह्णुंआं रा खतना कितेया जाहाँ ताकि मूसा री व्यवस्था रा हुक्म टली ना जाए। तुस्से मेरे प्रयाल्हे किधियो गुस्सा करहा ऐं कि, मैं अरामा रे ध्याड़े एक आदमी जो पूरी तरहा ले ठीक कितेया?

²⁴मुंह देखी किन्हें फैसला नी करा, पर ठीक-ठीक न्याय करा।”

²⁵तेबे कितने यरुस्लेम सैहरा मन्झ रैहणे वाले लोक बोल्दे लगे, “क्या ये यीसू नी आ, जेस जो मारणे रे कठे कोसिस करेया करहा ऐं।

²⁶पर देखा, यीसू ता बिना डरे गल्ला करहा होर अधिकारी तेस जो कुछ नी बोल्दा! केते एह्ड़ा ता नी आ कि तिन्हो पता लगी गया कि, येई मसीह आ।

²⁷ये मसीहा किहाँ हुई सकां? क्यूंकि आस्से जाणहां ऐं कि ये केथीरा आ। पर जेबे मसीहा आऊंणा, ता केसी जो पता नी चलणा कि से केथी ले आऊंणा।”

²⁸तेबे यीसूए मन्दरा मन्झ उपदेस देंदे हुए जोरा किन्हें बोल्या, “तुस्से मुंजो जाणहां ऐं होर ये भी जाणहां ऐं कि हांऊँ केथीरा आ। हांऊँ आपणे आपा ले नी आईरा पर मेरा भेजणे वाल़ा सच्चा आ, तेस जो तुस्से नी जाणदे।

²⁹पर हांऊँ तेस जो जाणहां, क्यूंकि मैं तेसरी तरफा ले आ, होर तिन्हें ही हांऊँ भेजिरा।”

³⁰तेबे यहूदी अगुवे यीसू जो गिरफ्तार करणा चाहेया तेबे भी केसिए तेस जो हाथ नी ल्गाया, क्यूंकि तेसरा मरणे रा सही टैम हल्ली तक नी आईरा था।

³¹होर भीड़ा मन्झा ले कई लोके तेस पर विस्वास कितेया, होर बोल्दे लगे कि, “मसीहा जेबे आऊंणा, ता क्या एता ले ज्यादा तेस चिन्ह दसणे जो इन्हें दसे?”

³²फरीसी लोके भीड़ा रे लोका जो यीसू रे बारे मन्झ चुपे-चुपे ये गल्ला करदे सुणेया, होर मुख्य याजके होर फरीसी लोके यीसू जो पकड़ने रे कठे स्पाही भेजे।

³³एता पर यीसूए बोल्या, “हांऊँ थोह्ड़ी देरा तक तुस्सा साउगी आ, तेबे मां आपणे भेजणे वाल़े, वापस वाले चली जाणा।

³⁴तुस्सा हांऊँ तोपणा पर नी मिलणा होर जेथी हांऊँ आ, तेथी तुस्से नी आई सक्दे।”

³⁵यहूदी अगुवे एक दूजे मन्झ बोलदे लगे, “एस केथी जाणा कि, आस्सा जो ये नी मिलणा? क्या एस यहूदी लोका वाले जाणा, जो यूनान देसा रे सैहरा मन्झ तितर बीतर हुई किन्हें रैहें, होर तिन्हो जो भी स्खाणा चाहां?

³⁶एसरा क्या मतलब आ जो गल इन्हें बोली कि, ‘तुस्सा हांऊँ तोपणा, पर नी मिलणा; होर जेथी हांऊँ आ, तेथी तुस्से नी आई सक्दे?’”

³⁷साजे रे आखरी ध्याड़े बौह्त खास ध्याड़ा हुंहाँ था। तेस ध्याड़े यीसू खड़ा हुई किन्हें होर जोरा किन्हें बोल्या, “अगर कोई सोखा हो ता मेरे वाले आई किन्हें पीये।

³⁸जेस मेरे पर विस्वास करणा, जिहां पवित्र सास्त्रा मन्झ बोलिरा, ‘तेसरे दिला मन्झा ले जिन्दगी देणे वाली पाणीया रा दराऊ बैह्णा।’”

³⁹पर यीसूए ये गल्ला तेस पवित्र आत्मा रे बारे मन्झ बोल्या, जेस जो तेस पर विस्वास करणे वाले, पाणे वाले थे। क्यूंकि पवित्र आत्मा हल्ली तक उतरीरा नी था; क्यूंकि यीसू हल्ली तक आपणी महिमा जो नी पुज्ही रा था।

⁴⁰तेबे भीड़ा मन्झा ले केसी केसिए ये गल्ला सुणी किन्हें बोल्या, “सच्चे ये माह्णुं ही से नबिया कि जेसरे आऊणें रा आस रखिरी।”

⁴¹होरिये बोल्या, “ये मसीह आ,” पर केसिए बोल्या, “क्या मसीहा गलील जिल्ले ले आऊंणा?

⁴²पवित्र सास्त्रा मन्झ लिखिरा कि, मसीह राजा दाऊदा रे बंसा ले होर बैतलैहम गांऊँआं ले आऊंणा, जेथी दाऊद रैंहयां था।”

⁴³इन्हा गल्ला री बजहा ले लोका मन्झ फूट पई गई।

⁴⁴तिन्हा मन्झा ले कितने तेस जो पकड़ना चाहें थे, “पर केसिए तेस जो हाथ नी लगाया।”

⁴⁵तेबे स्पाही मुख्य याजक होर फरीसी लोका वाले वापस आये, होर तिन्हें स्पाहीया किन्हें बोल्या, तुस्से यीसू गिरफ्तार करी किन्हें कि नी ल्यान्देया?

⁴⁶स्पाहिये जवाब दितेया कि, “केसी माह्णुंऐ कधी भी एह्ड़ी नौखी गल नी किती।”

⁴⁷फरीसी लोके तिन्हा जो जवाब दितेया, “क्या तुस्से भी भरमाई जाई चुकिरे?

⁴⁸क्या यहूदी मुखिये या फरीसी लोका मन्झा ले केसिए भी यीसू पर विस्वास कितेया?

⁴⁹पर ये लोक जो मूसा री व्यवस्था नी जाणदे, स्यों ही यीसू पर विस्वास करहा ऐं। परमेसरा रा स्राप इन्हा लोका पर आ।”

⁵⁰नीकुदेमुसे जो फरीसी अगुवे मन्झा ले एक था, से पैहले ई राती आई किन्हें यीसू किन्हें मिली चुकिरा था, तिन्हें तिन्हा किन्हें बोल्या,

⁵¹“क्या आस्सा री यहूदी व्यवस्था केसी आदमी जो जेबे तक कि पैहले तेसरी सुणी किन्हें जाणी नी ले कि, से क्या करहा, सजा देहां?”

⁵²तिन्हें तेस जो जवाब दितेया, “क्या तू भी गलील जिल्ले रा आ? पवित्र सास्त्रा मन्झ तोप तेबे तुजो पता लगणा कि गलील जिल्ले ले कोई नबी जाहिर नी हूंणां।”

⁵³तेबे सभ कोई आपणे-आपणे घरा जो चली गये।