Read Mandeali यहून्ना 9 Bible Online

यहून्ना 9 - Mandeali bible

यहून्ना 9

¹फेरी यीसू होर तेसरे चेले जांदे हुए एक माह्णुं देख्या जो जन्मजात काणा था।

²होर यीसू रे चेले तेस ले पुछदे लगे, “हे गुरु, कुन्हें पाप कितिरा था कि ये काणा जम्मेया, इन्हें माह्णुंऐ, या तेसरे माऊ-बापू?”

³यीसूए जवाब दितेया कि, “ना ता इन्हें पाप कितिरा था, ना एसरे माऊ-बापू। पर ये काणा इधी कठे जम्मेया ताकि परमेसरा रे काम जाहिर हो।

⁴जिन्हें हांऊँ भेज्या, आस्सा जो तेसरे काम ध्याड़ी-ध्याड़ी करणे जरूरी ऐं। एह्ड़ी रात आऊणें वाली ई जेबे कोई काम नी करी सक्दा।

⁵जेबे तक हांऊँ संसारा मन्झ आ, तेबे तक संसारा रा प्रयासा आ।”

⁶ये बोली किन्हें यीसूए जमीना पर थुक्या होर तेस थूका ले माटा गिला बणाया, होर से माटा तेस काणे री हाखिया पर मलेया

⁷यीसूए तेस किन्हें बोल्या, “जा आपणा मुंह सिलोहा रे तलाबा मन्झ धोई ले।” (सिलोहा रा मतलब आ भेज्या गईरा) होर तिन्हें जाई किन्हें हाखिया धोई, होर से देख्दा हुआ वापस आया।

⁸तेबे तेसरे पड़ोसी होर जिन्हें लोके से पैहले भीख मांग्दा देखिरा था, स्यों लोक बोल्दे लगे, “क्या ये से नी आ, जो बैठी किन्हें भीख मांग्हां था?”

⁹कई लोके बोल्या, “ये सेई आ,” होरिये बोल्या, “नीं-नीं ये सिर्फ तेस साहीं आं,” तिन्हें आप्हुए बोल्या, “हांऊँ सेई आ।”

¹⁰तेबे स्यों तेस ले पुछदे लगे, “तू किहाँ देख्दा लगेया?”

¹¹तिन्हें जवाब दितेया कि, “यीसू नांऊँआं रे एक माह्णुंऐ गिला माटा लया, होर मेरी हाखिया पर मली किन्हें मेरे किन्हें बोल्या कि, ‘जा होर सिलोहा रे तलाबा मन्झ हाखिया धोई ले।’ इधी कठे हांऊँ तलाबा मन्झ गया होर आपणी हाखिया धोई होर देख्दा लग्या।”

¹²तिन्हें तेस ले पूछेया, “से माह्णुं केथी आ?” तिन्हें बोल्या, “हांऊँ नी जाणदा।”

¹³जेस ध्याड़े यीसूए गिला माटा ल्गाई किन्हें तेस काणे जो ठीक कितेया था से अरामा रा ध्याड़ा था। इधी कठे तेस माह्णुं जो लोक फरीसी लोका वाले लई गये।

¹⁴

¹⁵दबारा फरीसी लोके तेस ले पूछेया, “तू किहाँ देख्दा लग्या?” तिन्हें तिन्हा किन्हें बोल्या, “यीसूए मेरी हाखिया पर माटा ल्गाया, फेरी मैं आपणी हाखिया धोई होर ऐबे हांऊँ देखदा लगेया।”

¹⁶एता पर कई फरीसी लोक बोल्दे लगे, “ये माह्णुं परमेसरा री तरफा ले नी आ, क्यूंकि से अरामा रा ध्याड़ा नी मन्नदा।” होरिये बोल्या, “एक पापी माह्णुं किहाँ एह्ड़े चिन्ह दसी सक्हा?” होर एस गल्ला जो लेई किन्हें तिन्हा मन्झ फूट पई गयी।

¹⁷तिन्हें तेस काणे किन्हें दबारा बोल्या, “तिन्हें जे तेरी हाखिया खोल्ही, तू तेसरे बारे मन्झ क्या बोल्हा?” तिन्हें बोल्या, “से एक नबी आ।”

¹⁸पर यहूदी अगुवे जो लोका पर विस्वास नी हुआ कि ये काणा था होर ऐबे देखी सकां। इधी कठे तिन्हें तेसरे माऊ बापू सादे,

¹⁹होर तिन्हें, तिन्हा ले पुछी लया कि, “क्या ये तुस्सा रा मह्ठा आ? जेस जो तुस्से बोल्हा ऐं कि काणा जम्मिरा था। फेरी ऐबे किहाँ देखदा लगेया?”

²⁰तेसरे माऊ-बापू तिन्हा जो जवाब दितेया होर बोल्या, “आस्से ता जाणहां ऐं कि ये आस्सा रा मह्ठा आ, होर ये बी काणा जम्मिरा था।

²¹पर आस्से ये नी जाणदे कि ऐबे ये किहाँ देख्दा लग्या, होर ये नी जाणदे कि कुने तेसरी हाखिया ठीक करी दिती; से बच्चा नी आ, तेस ले ई पूछा, तेस आपणे बारे मन्झ आपु बोली देणा।”

²²यूं गल्ला तेसरे माऊ-बापू इधी कठे बोली क्यूंकि स्यों यहूदी अगुवे ले डरहा ऐं थे; क्यूंकि यहूदी एका करी चुकिरे थे कि, अगर कोई बोले कि से मसीह आ, ता तेस जो यहूदी सभा ले बाहर काढी देआ।

²³इधी कठे तेसरे माऊ-बापू बोल्या, “से बच्चा नी आ; तेस ले ऐं पूछा।”

²⁴तेबे तिन्हें से माह्णुं जो काणा था दूजी बारी सादेया होर तेस किन्हें बोल्या, “परमेसरा रे साम्हणें कसम खाई किन्हें सिर्फ सच्च बोल, क्यूंकि आस्से जाणहां ऐं कि जिन्हें तू ठीक कितेया से एक आदमी पापी आ।”

²⁵तिन्हें जवाब दितेया, “हांऊँ नी जाणदा कि से पापी आ, या नी आ। हांऊँ एक गल जाणहां कि हांऊँ काणा था होर ऐबे देखदा लगेया।”

²⁶तिन्हें तेस किन्हें दबारा बोल्या कि, “तिन्हें तेरे साउगी क्या कितेया? होर किहाँ तेरी हाखिया ठीक किती?”

²⁷तिन्हें तिन्हा किन्हें बोल्या, “मैं ता तुस्सा किन्हें पैहले बोली दितिरा, पर तुस्से नी सुणेया; ऐबे दूजी बारी किधियो सुणना चाहें? क्या तुस्से भी तेसरे चेले बणना चाहें?”

²⁸तेबे स्यों तेस जो बुरा भला बोल्दे लगे, “तू ई तेसरा चेला आ! आस्से ता मूसा रे चेले ऐं!

²⁹आस्से जाणहां ऐं कि परमेसरे मूसा किन्हें गल्ला किती, पर एस आदमी जो नी जाणदे कि से केथी ले आईरा।”

³⁰तिन्हें तिन्हा जो जवाब दितेया, “ये ता हरानी री गल ई कि तुस्से नी जाणदे कि से केथी ले आईरा, तेबे बी तिन्हें मेरी हाखिया ठीक करी दिती।

³¹आस्से जाणहां ऐं कि परमेसर पापिया री नी सुणदा पर अगर कोई परमेसरा री अराधना करहा, होर तेसरी इच्छा पर चलदा हो, ता से तेसरी सुणा आ।

³²संसारा रे सुरूआता ले ये कधी सुणने मन्झ नी आया कि, केसिए भी जन्मजात काणा ठीक कितिरा हो।

³³अगर ये आदमी परमेसरा री तरफा ले नी हुन्दा, ता से कुछ भी नी करी सक्दा था।”

³⁴तिन्हें तेस जो जवाब दितेया कि, “तू ता बिलकुल पापा मन्झ जम्मिरा, होर तू आस्सा जो स्खादा लगिरा?” होर ये बोली किन्हें यहूदी अगुवे से यहूदी सभा ले बाहर काढी दितेया।

³⁵यीसूए ये सुणेया, यहूदी अगुवे से यहूदी सभा ले बाहर काढी दितेया। यीसू तेस माह्णुं किन्हें मिलेया होर तेस ले पुछेया, “क्या तू परमेसरा रे मह्ठे पर विस्वास करहा?”

³⁶तिन्हें जवाब दितेया कि, “हे जनाब, से परमेसरा रा मह्ठा कुणहां कि हांऊँ तेस पर विस्वास करूं?”

³⁷यीसूए तेस किन्हें बोल्या, “तैं से देखिरा; होर जो तुध किन्हें गल्ला करेया करहा, सेई आ।”

³⁸होर तिन्हें बोल्या, “हे प्रभु, हांऊँ तेरे पर विस्वास करहा। होर तिन्हें यीसू री अराधना किती।”

³⁹तेबे यीसूए बोल्या, “हांऊँ एस संसारा मन्झ न्याय रे कठे आईरा, ताकि जो नी देख्दे स्यों देखे, होर जो देख्हा ऐं स्यों काणे हुई जाए।”

⁴⁰जो फरीसी लोक तेस साउगी थे, तिन्हें ये गल्ला सुणी किन्हें तेस किन्हें बोल्या, “क्या तू एह्ड़ा बोलणा चाहां कि आस्से भी काणे ऐं?”

⁴¹यीसूए तिन्हा किन्हें बोल्या, “अगर तुस्से काणे हुंदे ता पापी नी बणदे पर ऐबे बोल्हा ऐं कि, ‘आस्से देख्हा ऐं,’ इधी कठे तुस्सा रा पाप बणी रैंहयां।”