Read Mandeali चुणिरे चेले रे काम 10 Bible Online

चुणिरे चेले रे काम 10 - Mandeali bible

चुणिरे चेले रे काम 10

¹कैसरिया सैहरा मन्झ कुरनेलियुस नांऊँआं रा एक आदमी था, जो इतालियानि नांऊँआं री पलटना रा सूबेदार था।

²से परमेसरा रा भक्त था होर से होर तेसरा पूरा खानदान परमेसरा ले डरा था, होर से गरीब यहूदी लोका री ढब्बे देई किन्हें भी मदद करहा था। होर से परमेसरा ले हमेसा प्रार्थना करहा था।

³एक ध्याड़े दप्हैरा रे तीन बजे रे करीब तिन्हें एक साफ-साफ दर्सन देख्या कि परमेसरा रा एक स्वर्गदूत तेस वाले आया होर तेस किन्हें बोल्या करहा, “कुरनेलियुस!”

⁴कुरनेलियुसे से ध्याना किन्हें देख्या, होर डरी किन्हें बोल्या, “हे प्रभु मुंजो दसा क्या गल ई?” तिन्हें तेस किन्हें बोल्या, “तेरी प्रार्थना होर तेरे दान यादगारा रे कठे परमेसरा रे साम्हणें पूजी गईरे।

⁵होर ऐबे याफा सैहरा मन्झ आदमी भेज होर समौन, जेस जो पतरस भी बोल्हा ऐं, एथी सादी ले।

⁶से समौन चमड़े रा धन्दा करणे वाले रे घरा मन्झ रैहया करहा, तेसरा घर समुद्रा रे बाढे आ, होर जेबे तेस आऊंणा तेबे तेस तुस्सा जो परमेसरा री गल्ला दसणी।”

⁷जेबे से स्वर्गदूत जिन्हें जे तेस किन्हें गल्ला किती, चली गया, ता तिन्हें दो सेऊआदारा जो, होर जो तेस वाले हाजर रैंहयां ऐं थे तिन्हा मन्झा ले एक परमेसरा रा भक्त स्पाही सादेया,

⁸होर तिन्हा जो सभ गल्ला दसी किन्हें याफा सैहरा जो पतरसा जो ल्याऊणे रे कठे भेजी दितेया।

⁹दूजे ध्याड़े, जेबे ये तीनो जिन्हा जो कुरनिलिउसे भेजीरा था चल्दे-चल्दे दपैहरा रे टैमा सैहरा वाले पूजे। तेस ही टैमा पतरस प्रार्थना करणे रे कठे छता पर चली गईरा था।

¹⁰होर तेस जो भूख लगी, होर कुछ खाणा चाहां था; पर जेबे खाणा बणदा ही लगीरा था, तेबे पतरसे दर्सन देख्या।

¹¹होर तिन्हें देख्या कि, आसमान खुल्ही गया; होर एक बडी चादरा साहीं कोई चीज हेठ उतरेया करहा ई, तेता जो चारो कुणे ले पकड़ी किन्हें धरती पर तुआरेया करहा था।

¹²तेस पर हर पालतु जानवर, जंगली जानवर होर धरती पर पेटा रे भारे चलणे फिरणे वाले होर आसमाना रे चिड़ु थे, जिन्हा जो मूसा री व्यवस्था रे मताबक यहूदी लोका रे कठे खाणा ठीक नी था।

¹³होर फेरी तेस जो एक अवाज आई कि, “हे पतरस उठ होर इन्हा मन्झा ले मारी किन्हें खाई ले।”

¹⁴पर पतरसे बोल्या, “नीं प्रभु, कधी नी; क्यूंकि मैं कधी कोई अपवित्र या असुद्ध खाणा नी खाध्या।”

¹⁵फेरी दूजी बारी तेस जो अवाज आई कि, “जेस केसी चीजा जो परमेसरे पवित्र बोलिरा, अपवित्र मत बोलणा।”

¹⁶तीन बारी एह्ड़ा ई हुएया; तेबे झटपट से चादर स्वर्गा वखा जो खिंजी किन्हें लई जाया गया।

¹⁷पतरसा रे मना मन्झ दुविधा थी कि जो दर्सन तिन्हें देख्या तेता रा मतलब क्या आ, तेबे स्यों आदमी जो कुरनेलियुसे भेजे, समौना रे घरा रा पता करी किन्हें दुराजे पर आई किन्हें खड़ी गये?

¹⁸तिन्हें बाहर सादी किन्हें पूछेया, “क्या समौन जेस जो पतरस भी बोल्हा ऐं प्रौहणा बणी किन्हें एथी रुकी रा?”

¹⁹पतरस हली तेस दर्सना रे बारे मन्झ सोचेया ई करहा था कि, पवित्र आत्मे तेस किन्हें बोल्या, “तीन माह्णुं तेरी तलासा मन्झ ऐं।

²⁰इधी कठे उठी किन्हें हेठ चली जा, हालांकि स्यों गैर-यहूदी ये पर तू बिना डरे तिन्हा साउगी चली जा; क्यूंकि मैं ई स्यों भेजिरे।”

²¹तेबे पतरसे हेठ आई किन्हें तिन्हा माह्णुंआं किन्हें बोल्या, “देखा, जेसरी तलास तुस्से करेया करहा ऐं, से हांऊँ ई आ; तुस्सा रे आऊणें री वजहा क्या ई?”

²²तिन्हें जवाब दितेया, “कुरनेलियुस सूबेदार जो धर्मी होर परमेसरा ले डरने वाल़ा एक भक्त माह्णुंआं होर हरेक जो तेसरे बारे मन्झ जाणहां ऐं स्यों तेस जो एक नेक माह्णुं समझ्हा ऐं। यहूदी लोका मन्झ तेसरी बड़ी इज्जत ई; तिन्हें एक पवित्र स्वर्गदूता ले एक चेतावनी पाईरी कि, तुजो आपणे घरा सादी किन्हें तुध ले बचन सुणे।”

²³तेबे तिन्हें तिन्हा जो अंदर सादी किन्हें तिन्हारा आदर सत्कार कितेया। होर दूजे ध्याड़े, से तिन्हा साउगी चली गया; होर याफा सैहरा रे कई विस्वासी तेस साउगी चली गये।

²⁴स्यों कैसरिया सैहरा मन्झ पूजे, होर कुरनेलियुस आपणे टब्बरा होर प्यारे दोस्ता जो कठा करी किन्हें तिन्हारा इंतजार करेया करहा था।

²⁵जेबे पतरस अंदर आया करहा था, ता कुरनेलियुसे तेस किन्हें मुलाकात किती, होर पैर बांदी किन्हें प्रणाम कितेया।

²⁶पर तेस जो ठुआल्दे हुए पतरसे बोल्या, “खड़ा हुई जा, हांऊँ भी तेरे साहीं एक माह्णुंआं।”

²⁷होर तेस साउगी गलबात करदा हुएया अंदर गया, होर बौह्त सारे लोका जो कठे देखी किन्हें

²⁸पतरसे तिन्हा किन्हें बोल्या, “तुस्से जाणहां ऐं कि, आस्सा यहूदिया ईलाके रे लोका रे कठे केसी दूजी जाति रे आदमी साउगी कोई मेल जोल रखणा या तेसरे घरा जाणा यहूदी नियमा रे बरख्लाफ आ। फेरी भी परमेसरे मुंजो दसेया कि मैं केसी आदमी जो अपवित्र या असुद्ध नी बोलू।

²⁹इधी कठे हांऊँ जेबे साद्या गया ता बगैर कुछ बोले हांऊँ चली आया ऐबे हांऊँ पूछ्हा कि हांऊँ केस कामा रे कठे सादिरा?”

³⁰कुरनेलियुसे बोल्या कि, “चार ध्याड़े पैहले एस ई टैम दप्हैरा रे तीन बजे हांऊँ आपणे घरा मन्झ प्रार्थना करेया करहा था। अचानक चमकीले कपड़े मन्झ एक आदमी मेरे साम्हणें खड़ी गया।

³¹होर बोल्या, ‘कुरनेलियुस! तेरी प्रार्थना सुणी लईरी होर गरीबा जो दान दितिरे से यादगारा रे कठे परमेसरा रे साम्हणें पूजी गईरे।

³²इधी कठे केसी एकी जो याफा सैहरा जो भेजी किन्हें समौन जो जेस जो पतरस भी बोल्हा ऐं, से सादेया। से समुद्रा रे बाढे चमड़े रा धन्दा करणे वाले रे घरा मन्झ रैहया करहा, होर जेबे तेस आऊंणा तेबे तेस तुस्सा जो परमेसरा री गल्ला दसणी।’

³³इधी कठे मैं तू झटपट सादी लया होर तैं एथी आई किन्हें बौह्त खरा कितेया; ऐबे आस्से सभ एथी परमेसरा रे साम्हणें ऐं, ताकि जो कुछ परमेसरे तुजो बोलिरा तेस जो आस्से सुणी सके।”

³⁴तेबे पतरस ग्लान्दा लगेया; ऐबे हांऊँ पक्का समझी गया कि, परमेसर केसी रा भेदभाव नी करदा।

³⁵बल्कि हर जाति मन्झ जेह्ड़ा भी परमेसरा ले डरहा होर धर्मा रे काम करहा, से तेस जो ग्रहण करा।

³⁶ये सेई सांति रा खुसी री खबर आ जेह्ड़ा इस्राएल देसा रे लोका वाले यीसू मसीह रे ज्रीए भेजिरा, जो सभिरा प्रभु आ।

³⁷ये गल तुस्से जाणहां ऐं कि गलील जिल्ले ले सुर्हू करी किन्हें तिन्हें यहूदिया ईलाके रे कई जगहा मन्झ स्यों काम करणे सुर्हू किते। जो यहून्ना बपतिस्मा देणे वाल़े तिन्हा लोका जो बपतिस्मा देणे ले पैहले प्रचार करेया करहा था।

³⁸तुस्से नासरता रे यीसू रे बारे मन्झ जाणहां ऐं कि परमेसरे किहाँ पवित्र आत्मा होर सामर्था किन्हें तेसरा अभिसेक कितेया था, होर किहाँ यीसूए कई जगहा जाई किन्हें भलाई रे काम करदे हुए लोक ठीक किते, जो सैताना रे स्ताईरे थे। यीसू ये सभ काम करणे रे लायक था क्यूंकि परमेसर तेस साउगी था।

³⁹होर आस्से तिन्हा सभी गल्ला रे गुआह ऐं जो तिन्हें यहूदिया ईलाके होर यरुस्लेम सैहरा मन्झ किते थे, होर यरुस्लेम सैहरा रे यहूदी मुखिये से लकड़ी पर लटकाई किन्हें मारी दितेया।

⁴⁰पर परमेसरे यीसू जो त्रीजे ध्याड़े मरिरे मन्झा ले जिउंदा करी दितेया, होर जाहिर भी करी दितेया।

⁴¹सभ लोके से नी देखेया पर आस्से जिन्हा जो परमेसरे पैहले ले चुणी लया था, होर तेस साउगी तेसरे मरिरे मन्झा ले जिउंदे हूंणे ले बाद खाध्या होर पितेया।

⁴²तिन्हें ई आस्सा जो हुक्म दितेया कि आस्से सारे लोका मन्झ प्रचार करहे होर साबत करहे कि यीसू ही आ जेस जो परमेसरा रे जीउन्देआ रा होर मरिरे रा न्यायी बणाईरा।

⁴³तेसरे सभ नबी गुआही देहां ऐं कि जेस केसी यीसू पर विस्वास करणा, तेस्जो तेसरे नांऊँआं रे ज्रीए पापा री माफी मिलणी।

⁴⁴पतरस ये गल्ला बोल्या ई करहा था कि, पवित्र आत्मा बचना रे सभ सुणने वाले पर दितेया।

⁴⁵होर जितने यहूदी विस्वासी पतरसा साउगी आईरे थे, स्यों सभ हरान हुए कि अन्यजाति लोका पर भी पवित्र आत्मा रा दान दितरा।

⁴⁶क्यूंकि तिन्हें तिन्हा जो अनजाण भासा बोल्दे होर परमेसरा री बड़ाई करदे हुए सुणेया।

⁴⁷एता पर पतरसे बोल्या, “क्या कोई इन्हा जो पाणी ले रोकी सक्हा कि, ये बपतिस्मा नी पाए, जिन्हें आस्सा साहीं परमेसरा ले पवित्र आत्मा पाईरा।”

⁴⁸होर पतरसे हुक्म दितेया कि कुरनेलियुसा रे घरा जो आईरे थे तिन्हा सभी जो यीसू मसीहा रे नांऊँआं ले बपतिस्मा दितेया जाए। तेबे तिन्हें तेस ले अर्ज किती कि कुछ ध्याड़े तक आस्सा साउगी रैह, होर इधी कठे से कुछ ध्याड़े तक तिन्हा साउगी रेहा।