Read Mandeali चुणिरे चेले रे काम 11 Bible Online

चुणिरे चेले रे काम 11 - Mandeali bible

चुणिरे चेले रे काम 11

¹चुणिरे चेले होर विस्वासियो जो यहूदिया ईलाके मन्झ थे सुणेया कि, अन्यजाति लोके भी परमेसरा रा बचन मनी लईरा।

²होर जेबे पतरस यरुस्लेम सैहरा मन्झ आया, ता यहूदी विस्वासी लोक तेस किन्हें बैहस करदे लगे,

³कि “तैं अन्यजाति लोका रे घरा जाई किन्हें तिन्हा साउगी खाणा खाध्या।”

⁴तेबे पतरसे जेह्ड़ा सुर्हू ले हुआ से बारी-बारी सब दसेया,

⁵“हांऊँ याफा सैहरा मन्झ प्रार्थना करेया करहा था, तेबे मै एक दर्सन देख्या कि, एक बडी चादरा साहीं कोई चीज हेठ उतरेया करहा ई, तेता जो चारो कुणे ले पकड़ी किन्हें आसमाना ले धरती पर तुआरेया करहा ऐं, फेरी से चादर उतरी किन्हें मेरे वाले आई।

⁶जेबे मैं तेस पर ध्याना किन्हें देख्या ता पालतु जानवर, जंगली जानवर होर धरती पर पेटा रे भारे चलणे फिरणे वाले होर आसमाना रे चिड़ु थे, जिन्हा जो मूसा री व्यवस्था रे मताबक यहूदी लोका रे कठे खाणा ना थी।

⁷होर फेरी मैं एक अवाज सुणी कि, ‘हे पतरस उठ होर इन्हा मन्झा ले मारी किन्हें खाई ले।’

⁸पर मैं बोल्या, ‘नीं प्रभु, कधी नी; क्यूंकि मैं कधी कोई अपवित्र या असुद्ध खाणा नी खाध्या।’

⁹एता रे जवाबा मन्झ आसमाना ले दूजी बारी अवाज आई कि, ‘जेस केसी चीजा जो परमेसरे पवित्र बोलिरा, अपवित्र मत बोलणा।’

¹⁰तीन बारी एह्ड़ा ई हुएया; तेबे से सभ कुछ स्वर्गा वखा जो खिंजी लिती गया।”

¹¹“तेस ई टैम जेथी हांऊँ रुकिरा था, तेस घरा मन्झ तीन माह्णुं आई पौहुंचे, तिन्हा जो मेरे वाले कैसरिया सैहरा ले कुरनेलियुसे भेजिरा था।

¹²पवित्र आत्मे मुंजो तिन्हा साउगी बिना डरे जाणे जो बोल्या; होर ये छेह भाई भी मेरे साउगी गये होर आस्से तेस आदमी रे घरा मन्झ गये।

¹³होर तिन्हें बोल्या कि, मैं एक स्वर्गदूता जो आपणे घरा मन्झ खड़ीरे देख्या, जिन्हें मेरे किन्हें बोल्या कि, ‘याफा सैहरा मन्झ आदमी भेजी किन्हें समौन जो जेस जो पतरस भी बोल्हा ऐं, सादी ले। होर जेबे तेस आऊंणा तेबे तेस तुस्सा जो परमेसरा री गल्ला दसणी।

¹⁴होर जेबे तेस तुस्सा किन्हें ये गल्ला करणी, जेसरे ज्रीए परमेसरा तु होर तेरा सारा टब्बर बचाणा।’

¹⁵जेबे हांऊँ गल्ला करदा लग्या, ता पवित्र आत्मा तिन्हा पर तेस ई तरीके किन्हें दितेया गया, जेस तरीके ले सुर्हू मन्झ पिन्तेकुस्ता रे साजे रे ध्याड़े आस्सा जो दितिरा था।

¹⁶तेबे मुंजो प्रभु रा से बचन याद आया कि, ‘यहून्ना बपतिस्मा देणे वाल़ा ता पाणी किन्हें बपतिस्मा देहां था पर तुस्सा जो पवित्र आत्मा रा बपतिस्मा मिलणा।’

¹⁷इधी कठे जेबे कि परमेसरे तिन्हा जो भी दान दितेया, जो आस्सा जो प्रभु यीसू मसीह पर विस्वास करणे ले मिल्या था; ता मैं कुणहां जो परमेसरा जो रोकी सक्हा था।”

¹⁸ये सुणी किन्हें, स्यों यहूदी विस्वासी चुप रैहे, होर परमेसरा री बड़ाई करी किन्हें बोल्दे लगे, “ता परमेसरे अन्यजाति लोका जो भी अनंत जिन्दगी पाणे रे कठे पापा जो छाडी किन्हें मसीहा पर विस्वास करणे रा दान दितिरा।”

¹⁹जो लोक स्तिफनुसा रे मरणे रे बाद यरुस्लेम सैहरा जो छाडी किन्हें तितर-बितर हुई गये थे, होर दूरा-दूरा तक फिनिके ईलाके होर साईप्रस टापू होर अन्ताकिया सैहरा तक जाई पूजीरे थे, ये यहूदी लोका जो छाडी किन्हें केसी होरी जो यीसू री खुसी री खबर नी सुणाहें थे।

²⁰पर तिन्हा मन्झा ले कुछ विस्वासी साईप्रस टापू होर कुरेनी सैहरा रे थे, जो अन्ताकिया सैहरा मन्झ आई किन्हें यूनानी भासा बोलणे वाल़े जो भी यीसू री खुसी री खबर सुणान्दे लगे।

²¹होर प्रभु री सामर्थ तिन्हा पर थी, होर बौह्त अन्यजाति लोक विस्वास करी किन्हें प्रभु वखा जो फिरी गये।

²²तेबे तिन्हारी चर्चा यरुस्लेम सैहरा री कलीसिया रे सुणने मन्झ आई, होर तिन्हें बरनबास अन्ताकिया सैहरा मन्झ भेज्या।

²³से तेथी पूजी किन्हें, होर परमेसरा रे अनुग्रह जो देखी किन्हें खुस हुएया; होर सभी जो उपदेस दितेया कि तन मन ल्गाई किन्हें प्रभु मन्झ बणी रहो।

²⁴बरनबास एक भला मानस था; होर पवित्र आत्मा किन्हें भरीरा था: होर बौह्त सारे लोक प्रभु वाले ल्याई गये।

²⁵तेबे बरनबास अन्ताकिया सैहरा जो छाडी किन्हें साऊला जो तोपणे रे कठे तरसुस सैहरा जो चली गया।

²⁶होर जेबे से साउला किन्हें मिल्या तेबे से अन्ताकिया सैहरा मन्झ ल्यान्देया, होर एह्ड़ा हुएया कि बरनबास होर साउला एक साल तक कलीसिया साउगी मिलदे होर बौह्त लोका जो प्रभु यीसू रा उपदेस देंदे रैहे, होर चेले जो सभी ले पैहले अन्ताकिया सैहरा मन्झ ही मसीहा रे लोक बोल्या गया।

²⁷तिन्हा ध्याड़े कई विस्वासी जो नबी थे, यरुस्लेम सैहरा ले अन्ताकिया सैहरा मन्झ आये।

²⁸तिन्हा मन्झा ले अगबुस नांऊँआं रे एकी नबिये खड़े हुई किन्हें पवित्र आत्मा री प्रेरणा ले ये भविस्यवाणी किती कि, कई देसा मन्झ बौह्त भयानक अकाल पऊणे। जेबे रोम देसा रा सम्राट क्लौदियुस राज करेया करहा था तेस टैम ये अकाल पये।

²⁹तेबे चेले फैसला कितेया कि, हर एक आपणी-आपणी सामर्थ रे मताबक यहूदिया ईलाके मन्झ रैहणे वाले मसीही रे विस्वासियो री सेऊआ रे कठे कुछ भेजणे रा फैसला कितेया।

³⁰होर तिन्हें एह्ड़ा ई कितेया; होर बरनबास होर साऊला रे हाथ कलीसिया रे अगुवे वाले कुछ ढब्बे भेजी दिते।