Read Mandeali चुणिरे चेले रे काम 12 Bible Online

चुणिरे चेले रे काम 12 - Mandeali bible

चुणिरे चेले रे काम 12

¹तेस टैम हेरोदेस राजे कलीसिया रे कुछ माह्णुंआं जो दुःख देणे रे कठे बन्धी बनाये।

²तिन्हें यीसू रे चुणिरे लोका मन्झ ले यहून्ना रे भाई याकूबा जो तलवारा किन्हें मारी दितेया।

³होर जेबे तिन्हें देख्या कि, यहूदी लोक एस गल्ला ले खुस हुंहाँ ऐं, ता तिन्हें पतरसा जो भी पकड़ी लया: स्यों ध्याड़े अस्जेह्ड़ी रोटी रे साजे रे ध्याड़े थे।

⁴होर हेरोदेसे पतरस जो पकड़ी किन्हें जेल्हा मन्झ पाई दितेया, होर रखवाली रे कठे, होर चार-चार स्पाहीया रा चार-चार दल रे पैहरे मन्झ एस इरादे ले रख्या कि फसहा रे साजे ले बाद तेस जो बाहर लोका रे साम्हणें लई आये।

⁵होर जेबे बौह्त ध्याड़े ले जेल्हा मन्झ पतरसा री रखवाली हुएया करहा ई थी, कलीसिया तेसरे कठे एक मना ले परमेसरा ले प्रार्थना करदी रही।

⁶जेस ध्याड़े हेरोदेस राजा तेस जो तिन्हारे साम्हणें ल्याऊणे वाल़ा था, ता पिछली राती पतरस दो जंजीरा किन्हें बान्हिरा दो स्पाहीया रे बीचा मन्झ सोया करहा था: होर पैहरेदार दुराजे वाले जेल्हा री रखवाली करेया करहा ऐं थे।

⁷तेबे झटपट प्रभु रा एक स्वर्गदूत पतरसा वाले खड़ी गया, होर तेस कमरे मन्झ प्रयासा चमक्या: होर तिन्हें पतरसा री पसली पर हाथ मारी किन्हें जगाया, होर बोल्या, “उठ, जल्दी कर।” होर तेसरे हाथा ले जंजीरा खुल्ही किन्हें पई गयी।

⁸तेबे स्वर्गदूते तेस किन्हें बोल्या, “त्यार हो, होर आपणे बूट पैन्ही ले।” तिन्हें तेह्ड़ा ई कितेया, फेरी तिन्हें तेस किन्हें बोल्या, “आपणा चोगा पैन्ही किन्हें मेरे पीछे-पीछे आई जा।”

⁹से निकली किन्हें तेसरे पीछे हुई गया; पर ये नी जाणदा था कि, जो कुछ स्वर्गदूत करेया करहा, से सच्च था; तिन्हें सोचेया कि से कोई दर्सन देख्या करहा।

¹⁰तेबे स्यों पैहले होर दूजे पैहरे ले निकली किन्हें तेस लोहे रे फाटका वाले पूजी गये, जो सैहरा वखा जो लेई जा; से तिन्हारे कठे आपणे आप खुल्ही गया; होर स्यों निकली किन्हें एक ई गली ले हुई किन्हें गये, इतने मन्झ स्वर्गदूता तेस जो छाडी किन्हें चली गया।

¹¹तेबे पतरसा जो होस आई होर तिन्हें बोल्या, “ऐबे मैं सच्चे जाणी लया कि प्रभुए आपणा स्वर्गदूत भेजी किन्हें हांऊँ हेरोदेस राजे रे हाथा ले बचाई लया, होर यहूदी अगुवे री सारी आस तोड़ी दिती।”

¹²इन्हा गल्ला जो सोची किन्हें, की परमेसरे से केस तरीके के बचाई लया, से यहून्ना री माऊ मरियमा रे घरा आया, जेस जो मरकुस बोल्हा ऐं। तेथी बौह्त विस्वासी लोक कठे हुई किन्हें प्रार्थना करेया करहा ऐं थे।

¹³जेबे तिन्हें फाटका री ताकी खटखटाई; रुद्दा नांऊँआं री एक सेऊआदारीणी दुराजे वाले ऐं देखणे रे कठे तेथी आई कि, कुण दुराजा खटखटाया करहा?

¹⁴होर पतरसा री अवाज प्छयाणी किन्हें तेस्से खुसी रे मारे दुराजा नी खोलेया; पर दोड़ी किन्हें अंदरा गई, होर दसेया कि पतरस दुराजे वाले खड़ीरा।

¹⁵तिन्हें तेस्सा किन्हें बोल्या, “क्या तू पागल ई।” पर तेस्से बड़ी दृढ़ता के बोल्या कि सच्चे से पतरस आ; तेबे तिन्हें बोल्या, “तेसरा स्वर्गदूत हूंणां।”

¹⁶पर पतरस दुराजा खटखटान्दा रैंहयां: होर जेबे तिन्हें ताकी खोल्ही, होर तेस जो देखी किन्हें हरान हुई गये।

¹⁷तेबे पतरसे तिन्हा जो हाथा रा इसारा कितेया कि, चुपचाप रैहया; होर तिन्हा जो दसेया कि, प्रभु मुंजो किहाँ करी किन्हें जेल्हा ले काढी किन्हें लई आया फेरी तिन्हें बोल्या कि, “याकूब होर भाईया जो ये गल बोली देआ।” तेबे से निकली किन्हें दूजी जगहा जो चली गया।

¹⁸भ्यागा ई जेल्हा मन्झ स्पाहीया मन्झ बड़ा हाल्ला पया कि, पतरसा केथी आ?

¹⁹जेबे हेरोदेस राजे पतरसा जो तोपणे रा हुक्म दितेया पर से तेस जो नी मिल्या। ता तिन्हें पैहरेदारा ले पूछ ताछ किती जेबे तिन्हें कोई जबाब नी दितेया होर हेरोदेसे तिन्हा जो मारणे रा हुक्म दितेया, होर हेरोदेस यहूदिया ईलाके जो छाडी किन्हें कुछ ध्याड़े तक कैसरिया सैहरा मन्झ जाई किन्हें रैहन्दा लग्या।

²⁰हेरोदेस राजा सुर होर सैदा सैहरा रे लोका किन्हें बौह्त ज्यादा गुस्सा था। तेबे एक ध्याड़े सुर होर सैदा सैहरा रे कुछ लोक एक झुंड बनाई किन्हें कैसरिया सैहरा जो आये ताकि हेरोदेस राजे किन्हें मुलाकात करी सके। होर तिन्हें बलास्तुस राजी करी लया जो हेरोदेस राजे रा एक खास कर्मचारी था, ताकि स्यों तेसरे ज्रीए हेरोदेस राजे जो ये दसी सके कि सुर होर सैदा सैहरा रे लोक तेस किन्हें मेल मलाप करणा चाहें; क्यूंकि तिन्हारे देसा रा पालण पोसण हेरोदेस राजे रे देसा ले हुंहाँ था।

²¹होर एक ध्याड़े हेरोदेस राजा तिन्हा सैहरा ले आईरे लोका किन्हें मिलणे रे कठे मनी गया, होर आपणी राजवस्त्र पैन्ही किन्हें राजगद्दी पर बैठया होर लोका जो भाषण देंदा लग्या।

²²लोक चिलांदे लगे, “ये ता माह्णुं रा नी पर परमेसरा री अवाज ई।”

²³इधी कठे, हेरोदेसे परमेसरा री महिमा करणे ले बजाय लोका ले आपणी महिमा कुराई, तेस ई टैम प्रभु रे एक स्वर्गदूते से बीमार करी दितेया, होर तेस जो कीड़े पई गये, होर जल्दी ई से मरी गया।

²⁴पर परमेसरा रा बचन बढ़दा होर फैह्ल्दा गया।

²⁵जेबे बरनबास होर साऊल आपणी सेऊआ यहूदिया ईलाके मन्झ पूरी करी चुके, ता स्यों यहून्ना, जेस जो जे मरकुस भी बोल्हा ऐं, तेस जो साउगी लई किन्हें यरुस्लेम सैहरा ले अन्ताकिया सैहरा मन्झ वापस आई गये।