Read Mandeali चुणिरे चेले रे काम 13 Bible Online

चुणिरे चेले रे काम 13 - Mandeali bible

चुणिरे चेले रे काम 13

¹अन्ताकिया सैहरा री कलीसिया मन्झ कई नबी होर उपदेसक थे, बरनबास होर समौन (जेस जो काला आदमी भी बोल्या जाहाँ) होर लूकियुस जो कुरेनी सैहरा ले था, मनाहेम जेसरा हेरोदेस राजे साउगी पालन पोसण हुईरा था होर साऊल।

²जेबे स्यों ब्रता साउगी अराधना करेया करहा ऐं थे, ता पवित्र आत्मे बोल्या, “मेरे कठे बरनबास होर साऊला जो तेस सेऊआ रे कठे लग करा जेसरे कठे मैं स्यों सादिरे।”

³तेबे तिन्हें ब्रत होर प्रार्थना करी किन्हें होर तिन्हा पर हाथ रखी किन्हें परमेसरा रे कामा रे कठे स्यों विदा करी दिते।

⁴इधी कठे साऊल होर बरनबास पवित्र आत्मा रे ज्रीए भेजे गये, स्यों अन्ताकिया सैहरा ले सिलूकिया सैहरा रे बन्दरगाह जो गये; होर तेथी ले जहाजा पर चढ़ी किन्हें साईप्रस टापू रे सलमीसा बन्दरगाह जो चली गये।

⁵होर सलमीसा मन्झ पुज्ही किन्हें, परमेसरा रा बचन यहूदी लोका री यहूदी सभा मन्झ सुणाया; होर यहून्ना जेस जो मरकुस भी बोल्हा ऐं से तिन्हारी सेऊआ करणे रे कठे तिन्हा साउगी था।

⁶होर तेस टापू रे हर गांऊँआं ले हुंदे हुए, पाफुस सैहरा मन्झ पौहुंचे; तेथी तिन्हा जो यहूदिया ईलाके मन्झ बारयीसू नांऊँआं रा एक आदमी मिल्या जो एक जादूगर होर झूठा नबी था।

⁷से एक बौह्त बुद्धिमान आदमी था; से हाकम सिरगियुस पौलुसा रा सेऊआदार था जिन्हें परमेसरा रा बचन सुणने रे कठे बरनबास होर साऊल सादे थे।

⁸पर इलीमास जादुगरे (जेसरे नांऊँआं रा मतलब ही जादूगर आ) तिन्हारा वरोध कितेया, तिन्हारा वरोध करी किन्हें तिन्हें हाकमा जो यीसू पर विस्वास करणे ले रोकणा चाहेया।

⁹तेबे साऊले जेसरा नांऊँ पौलुस भी आ, पवित्र आत्मा ले भर्ही किन्हें तेस जादूगरा वखा जो एक टेक ल्गाई किन्हें बोल्या,

¹⁰“हर किस्मा रे धोखे होर मकारी किन्हें भर्ही रे सैताना रे बच्चे, तू जे सारी धार्मिकता रा दुस्मण आ, क्या तुध प्रभु रे सीधे पैंडे जो टेढा करणा नी छाडणा?

¹¹ऐबे देख, प्रभु तुजो दण्ड देणे वाल़ा; होर तुध कुछ टैमा तक काणे बणी रैंह्णां होर सूरज नी देखी सकणा।” तेबे झटपट धुईं होर न्हयारा तेस पर छाई गया होर से ओरे परे तोप्दा लग्या कि कोई तेसरा हाथ पकड़ी किन्हें तेस जो चलाये।

¹²तेबे हाकमे जो कुछ हुएया, देखी किन्हें होर प्रभु रे उपदेसा ले हरान हुई किन्हें प्रभु यीसू पर विस्वास कितेया।

¹³पौलुस होर तेसरे साथी पाफुस सैहरा ले जहाजा रे ज्रीए पंफुलिया जिल्ले रे पिरगा सैहरा मन्झ आये, होर तेथी यहून्नामरकुस तिन्हा जो छाडी किन्हें यरुस्लेम सैहरा जो वापस चली गया।

¹⁴होर पिरगा सैहरा ले अगे बढ़ी किन्हें पिसिदिया जिल्ले रे अन्ताकिया सैहरा मन्झ पौहुंचे; होर अरामा रे ध्याड़े यहूदी सभा मन्झ जाई किन्हें बैठी गये।

¹⁵होर मूसा री व्यवस्था होर नबी री कताबा जो पढ़ने ले बाद यहूदी सभा रे मुखिये तिन्हा जो संदेसा भेज्या कि, “हे भाईयो, अगर लोका जो उपदेस देणे रे कठे तुस्सा वाले कुछ बचन आ ता तेस जो सुणाऊआ।”

¹⁶तेबे पौलुसे खड़े हुई किन्हें तिन्हो चुप रैहणे कठे हाथा किन्हें इसारा करी किन्हें बोल्या, “हे इस्राएल देसा रे लोको, होर परमेसरा ले डरने वाले अन्यजाति रे लोको, सुणा।”

¹⁷“इन्हा इस्राएल देसा रे लोका रे परमेसरे आस्सा रे बापदादे जो चुणी लया, होर जेबे ये मिस्र देसा मन्झ परदेसी हुई किन्हें रैहें थे, ता तिन्हारी बढ़ौतरी किती; होर आपणी सामर्थ किन्हें तिन्हें स्यों तेथी ले काढे।

¹⁸होर से कोई लगभग चाली साला तक बियाबान जंगला मन्झ बार-बार बोलणे पर भी तिन्हारी सैहन्दा रैंहयां।

¹⁹होर कनान देसा मन्झ सात जातिया रा नास करी किन्हें तिन्हें से देस इस्राएल देसा रे लोका जो विरासता मन्झ देई दिती।

²⁰इन्हा सारी गल्ला जो पुरे हूंणे रे कठे साढे चार सौ साल लगे। परमेसरे लोका री अगुवाई करणे रे कठे समूएल नबी रे टैमा तक न्यायी लोक ठैहराये।”

²¹“जेबे समूएल नबी तिन्हारा अगुवा था तिन्हें एक राजा मान्गेया; तेबे परमेसरे बिन्यामिना रे गोत्रा मन्झा ले कीसा रा मह्ठा साऊल जो राजे रे रूपा मन्झ देई दितेया, होर तिन्हें इस्राएल देसा रे लोका पर चाली साला रे कठे राज कितेया।

²²फेरी परमेसरे साऊला जो राजे रे रूपा मन्झ न्कारने ले बाद दाऊदा जो राजे रे रूपा मन्झ नियुक्त कितेया। परमेसरे तेसरे बारे मन्झ बोल्या कि, ‘मुंजो दाऊद नांऊंआं रा एक माह्णुं जो यिसै रा मह्ठा आ, मेरी इच्छा रे मताबक मिली गईरा। तेस ई मेरी सारी इच्छा पूरी करणी।’

²³एस दाऊदा रे बंसा मन्झा ले परमेसरे आपणे वादा रे मताबक इस्राएल देसा रे उद्धारा रे कठे यीसू मसीह जो भेज्या।

²⁴जेसरे आऊणें ले पैहले यहून्ना बपतिस्मा देणे वाल़े सभ इस्राएल देसा रे लोका बोल्हा था की, ‘पाप करणा छाडी देआ होर बपतिस्मा लउआ होर परमेसरा तुस्सा रे पाप माफ करणे।’

²⁵होर जो काम परमेसरे यहून्ना बपतिस्मा देणे वाल़े जो दितिरा था से काम यहून्ना पूरा करणे वाल़ा ही था, ता तिन्हें बोल्या, ‘क्या तुस्से मुंजो परमेसरा रा भेजिरा मसीह समझ्या करहा ऐं? हांऊँ से मसीहा नी आ! पर मसीह मेरे बाद आऊणें वाल़ा आ, होर हांऊँ एस लायक भी नी हाया कि हांऊँ तेसरे बूटा रे तस्मे खोल्ही सकूं।’”

²⁶“हे भाईयो, तुस्से, जो अब्राहमा री संताना ई; होर तुस्से जो परमेसरा ले डरहा ऐं, तुस्सा वाले ऐस उद्धारा रा संदेस भेजिरा।

²⁷क्यूंकि यरुस्लेम सैहरा रे रैहणे वाले होर तिन्हारे मुखिये, ना ता यीसू मसीह प्छ्याणी सके, होर ना नबिया री गल्ला समझी; जो हर अरामा रे ध्याड़े पढ़ी जाहीं, इधी कठे तिन्हें यीसू जो दोसी ठैहराई किन्हें तिन्हा नबिया रे बोलिरी गल्ला जो पूरा कितेया।

²⁸जेब्की तिन्हा वाले तेस जो मारणे रे कठे कोई दोष नी था, फेरी भी तिन्हें पिलातुस हाकमा ले मांग किती कि से मारी दितेया जाए।”

²⁹“होर जेबे तिन्हें से सब कुछ पूरा करी लितेया जो तेसरे बारे मन्झ पवित्र सास्त्रा मन्झ लिखिरी गल्ला पूरी हुई तेबे तिन्हें से क्रूसा प्रयाल्हे चढ़ाया, होर फेरी क्रूसा ले तुआरी किन्हें डुआर मन्झ रखी दितेया।

³⁰पर परमेसरे तेस जो मरिरे मन्झा ले जिउंदा कितेया।

³¹होर से तिन्हा चेले जो जेह्ड़े तेस साउगी गलील जिल्ले ले यरुस्लेम सैहरा जो आईरे थे, से तिन्हा जो बौह्त ध्याड़े तक सुझ्दा रैंहयां; लोका रे साम्हणें जिन्हें से देखेया ऐबे स्यों ही तेसरे गुआह ऐं।”

³²“होर आस्से तुस्सा जो तेस्सा वाचा रे बारे मन्झ जो परमेसरे आस्सा रे जो बापदादे किन्हें कितिरी थी, ये खुसी री खबर सुणाहें।

³³कि परमेसरे यीसू जो मरिरे मन्झ ले जिउंदा करी किन्हें, सेई वाचा आस्सा रे बंसा रे कठे पूरी किती, जेह्ड़ा दूजे भजन संहिता मन्झ भी लिखिरा कि, ‘तू मेरा मह्ठा आ; आज हांऊँ तुजो आपणे मह्ठे रे रूपा मन्झ जाहिर करहा।’[3]

³⁴होर एस तरीके ले मरिरे मन्झा ले जीऊन्दे करणे रे बारे मन्झ भी कि, से कधी नी सड़े, परमेसरे एह्ड़ा बोलिरा कि; ‘मां तुजो स्यों पवित्र होर पक्की आसिसा देणी जिन्हा जो देणे रा बचन मैं राजा दाऊदा किन्हें कितिरा था।’[4]

³⁵इधी कठे दाऊदे एक होर भजन संहिता मन्झ भी बोलिरा कि; ‘तुध आपणे पवित्र माह्णुं री ल्हासा जो सड़ने नी देणा।’

³⁶क्यूंकि दाऊद ता परमेसरा री इच्छा रे मताबक आपणे टैमा मन्झ सेऊआ करी किन्हें मरी गया; होर आपणे बापदादे मन्झ जाई मिल्या; होर सड़ी भी गया। होर एस गल्ला ले आस्से जाणहां ऐं कि राजा दाऊदे एह्ड़ा आपणे बारे मन्झ नी बोलिरा।

³⁷पर से यीसू रे बारे मन्झ बोल्दा लगिरा था, जेस जो परमेसरे मरिरे मन्झा ले जिउंदा कितेया, से सड़ने नी पाया।”

³⁸“इधी कठे, हे भाईयो; तुस्से जाणी लो कि यीसू रे ज्रीए पापा री माफी री खबर तुस्सा जो दिति जाहीं।

³⁹होर मूसा री व्यवस्था रे मताबक आस्से कधी धर्मी नी बणी सक्दे पर जो परमेसरा पर विस्वास करहा ऐं स्यों यीसू रे ज्रीए धर्मी बणी जाएं।

⁴⁰इधी कठे चतन्न जे रैहया, केते एह्ड़ा नी हो कि, जो नबी री कताबा मन्झ आईरा, से तुस्सा पर घटी जाए कि:

⁴¹‘हे निंदा करणे वालेयो, देखा, हरान हुई जाऊआ होर मरी मिटी जाऊआ; क्यूंकि मैं तुस्सा रे जमाने मन्झ एक काम एह्ड़ा करहा; एह्ड़ा काम कि, अगर कोई तुस्सा किन्हें तेसरी चर्चा करहे, ता तुस्सा कधी विस्वास नी करणा।’”

⁴²जिहां ई बरनबास होर पौलुस यहूदी सभा ले बाहर निकले लोक तिन्हा किन्हें अर्ज करदे लगे कि, अगले अरामा रे ध्याड़े आस्सा जो ये गल्ला दबारा सुणाई जाए।

⁴³होर जेबे यहूदी सभा उठी गयी ता यहूदी लोक होर यहूदी पन्था मन्झ आईरे कई लोके पौलुस होर बरनबासा रे पीछे चलदे लगे; होर तिन्हें तिन्हा किन्हें गल्ला करी किन्हें समझाया कि, परमेसरा री अनुग्रह मन्झ बणी किन्हें रैहया।

⁴⁴अगले अरामा रे ध्याड़े सैहरा रे लगभग सभ लोक परमेसरा रा बचन सुणने जो कठे हुई गये।

⁴⁵पर यहूदी अगुवे भीड़ा जो देखी किन्हें गुस्से हुई गये, होर निंदा करदे हुए पौलुसा री गल्ला रे वरोधा मन्झ बोलदे लगे।

⁴⁶तेबे पौलुसे होर बरनबासे बगैर डरे बोल्या, “जरूरी था कि, परमेसरा रा बचन पैहले तुस्सा जो सुणाया जाए; पर जेबे की तुस्से तेस जो नकारी देयां ऐं, होर आपणे आपा जो अनंत जिन्दगी रे लायक नी बणान्दे, ता देखा, आस्से अन्यजाति लोका वाले जाई करहा ऐं।”

⁴⁷क्यूंकि प्रभुए आस्सा जो ये हुक्म दितिरा, “मैं तू सारी जातिया रे लोका रे कठे प्रयासा बणाईरा; ताकि तुस्सा रे ज्रीए सारा संसारा रा उद्धार हुई सके।”

⁴⁸ये सुणी किन्हें अन्यजाति लोक बौह्त खुस हुए, होर परमेसरा रे बचना री बड़ाई करदे लगे; होर जितने अनंत जिन्दगी रे कठे ठैहराई गईरे थे, तिन्हें विस्वास कितेया।

⁴⁹तेबे प्रभु रा बचन तेस सारे देसा मन्झ फैह्ल्दा लग्या।

⁵⁰पर यहूदी अगुवे भक्त होर उच्च कुला री ज्नानिया जो होर सैहरा रे बडे लोका जो भड़काया, होर पौलुस होर बरनबासा पर जुल्म करी किन्हें तिन्हा जो आपणी देसा री सीमा ले बाहर काढी दितेया।

⁵¹तेबे पौलुस होर बरनबास तिन्हा यहूदी अगुवे रे साम्हणें आपणे पैरा री धूल झाड़ी दिति, ये दसणे रे कठे कि परमेसरे स्यों नकारी दिते, होर तेस परमेसरा तिन्हा जो सजा देणी तेबे स्यों इकुनियुम सैहरा जो चली गये।

⁵²होर अन्ताकिया सैहरा रे चेले खुसी किन्हें पवित्र आत्मा किन्हें भहरदे रैहे।