Read Mandeali चुणिरे चेले रे काम 17 Bible Online

चुणिरे चेले रे काम 17 - Mandeali bible

चुणिरे चेले रे काम 17

¹फेरी पौलुस होर सिलास अम्फिपुलिस होर अपुल्लोनिया सैहरा मन्झ हुई किन्हें थिस्सलुनिके सैहरा मन्झ आये जेथी यहूदी लोका री एक यहूदी सभा थी।

²होर पौलुस आपणे रूआजा रे मताबक तिन्हा वाले चली गया, होर तीन अरामा रे ध्याड़े से पवित्र सास्त्रा ले तिन्हा किन्हें चर्चा करदा रैंहयां।

³होर तिन्हारा मतलब खुल्ही किन्हें समझाहां था कि, मसीह जो दुःख उठाणा, होर मरिरे मन्झा ले जिउंदे हूंणां जरूरी था। होर येई यीसू जेसरे बारे मन्झ हांऊँ प्रचार करहा, से ही मसीह आ।

⁴तिन्हा मन्झा ले कई यहूदी होर परमेसरा रा डर मनणे वाल़े यूनान देसा रे लोका मन्झा ले कईऐ होर बौह्त सारी खास ज्नानिये विस्वास करी लया, होर स्यों पौलुस होर सिलासा साउगी जुड़ी गये।

⁵पर यहूदी लोक डाहा किन्हें भर्ही किन्हें बजारू लोका मन्झा ले कई बुरे माह्णुंआं जो आपणे साउगी म्लाई लया, होर भीड़ ल्गाई किन्हें सैहरा मन्झ दंगा करणे लगे, होर यासोना रे घरा पर हमला करी दितेया होर ये कोसिस करदे लगे कि किहाँ नी किहाँ पौलुस होर सिलासा जो लोका रे साम्हणें लई आये।

⁶पर जेबे तिन्हा जो पौलुस होर सिलास घरा मन्झ नी मिले, ता तिन्हें यासोन होर तेस साउगी कई होर विस्वासी भी पकड़ी लए होर तिन्हें स्यों सैहरा रे हाकमा रे साम्हणें खींजी किन्हें ल्यान्दे, जिन्हें आदमिये यासोन ल्यान्द्रा था तिन्हें चिंगी किन्हें बोल्या, “जेथी भी ये लोक जाएं तेथी परेसानी खड़ी करी दे, होर ऐबे यूँ आस्सा रे सैहरा मन्झ भी आई गये।

⁷होर यासोने स्यों बड़ी इज्जता किन्हें आपणे घरा मन्झ रखे, होर ये सभी रे सभ बोल्हा ऐं कि यीसू ही राजा आ, होर महाराजे रे हुक्मा रा वरोध करहा ऐं।”

⁸जेबे भीड़ा रे लोके होर सैहरा रे हाकमे ये सुणेयां, ता स्यों बौह्त गुस्से हुए होर भड़की गये।

⁹होर सैहरा रे हाकमे यासोन होर बाकि विस्वासी लोका पर जुर्माना लगाई किन्हें तिन्हो जाणे दिते।

¹⁰होर तेस ई रात, विस्वासी लोके पौलुस होर सिलास थिस्सलुनकिया सैहरा ले बाहर बिरिया सैहरा मन्झ भेजी दिते; होर स्यों तेथी पुज्ही किन्हें यहूदी लोका री यहूदी सभा मन्झ गये।

¹¹ये लोक ता थिस्सलुनिके सैहरा रे यहूदी लोका ले भी खरे थे होर तिन्हें बड़ी लगना किन्हें बचन मन्नेया, होर हर रोज पवित्र सास्त्रा मन्झ तोप्दे रैहे कि ये गल्ला जो पौलुसे दसी क्या स्यों सच्ची ई कि नी?

¹²इधी कठे तिन्हा मन्झा ले कईऐ, होर तिन्हा साउगी इज्जतदार यूनान देसा री ज्नानिया मन्झा ले होर कईऐ मर्धे विस्वास कितेया।

¹³पर जेबे थिस्सलुनिके सैहरा रे यहूदी लोक जाणी गये कि, पौलुस बिरिया सैहरा मन्झ भी परमेसरा रा बचन सुणाहां, ता स्यों तेथी भी आई पूजे होर लोका जो भड़कान्दे होर परेसानी खड़ी करदे लगीरे।

¹⁴तेबे विस्वासिये झटपट पौलुसा जो भेजी दितेया कि, जितना दूर हुई सके समुद्रा रे बाढे चली जाए; पर सिलास होर तिमिथियुस बिरिया सैहरा मन्झ रही गये।

¹⁵पौलुसा जो लई जाणे वाले लोके तेस किन्हें एथेंस सैहरा तक गये पर पौलुसा ले ये हुक्म पाई किन्हें बिरिया सैहरा मन्झ वापस आये की सिलास होर तिमिथियुसा जो जल्दी ही तिन्हा वाले भेजी दितेया जाये।

¹⁶जेबे पौलुस एथेंस सैहरा मन्झ तिन्हारा इंतजार करेया करहा था, ता सैहरा जो मूर्ति किन्हें भरीरा देखी किन्हें तेसरा मन दुआस हुई गया।

¹⁷इधी कठे से यहूदी लोका री सभा मन्झ गया होर यहूदी लोक होर परमेसरा रा डर मनणे वाले यूनान देसा रे लोका किन्हें होर चौका मन्झ जो भी लोक तिन्हा जो मिल्हा ऐं थे, तिन्हा किन्हें हर रोज बैहस करहा ऐं थे।

¹⁸तेबे इपिकुरी होर स्तोईकी गुरु भी तेस किन्हें बैहस करदे लगे, होर तिन्हा मन्झा ले कुछ लोके बोल्या, “ये बकवास करणे वाल़ा क्या बोल्हा?” पर होरिये बोल्या कि, “से दूजे केसी होरी देऊआ रा प्रचारक लग्हा, क्यूंकि से यीसू रा, होर मरिरे मन्झा ले जी उठणे रा खुसी री खबर सुणाया करहा था।”

¹⁹तेबे स्यों तेस जो आपणे साउगी अरियुपगुसा नांऊँआ री सभा मन्झ लई गये होर पूछेया, “क्या आस्से जाणी सक्हा ऐं कि, ये नंऊँआं उपदेस जो तू सुणाया करहा, क्या आ?

²⁰क्यूंकि तू नौखी गल्ला आस्सा जो सुणाया करहा, इधी कठे आस्से जाणना चाहें कि इन्हारा मतलब क्या आ?”

²¹इधी कठे कि कई एथेंस सैहरा रे लोको, होर जो परदेसी तेथी रैंहयां थे स्यों आपणा ज्यादातर टैम नौंईं-नौंईं गल्ला बोलणे होर सुणने मन्झ गुजार्हा ऐं थे।

²²तेबे पौलुसे अरियुपगुसा सभा रे साम्हणें खड़े हुई किन्हें बोल्या, “हे एथेंस सैहरा रे लोको! हांऊँ देख्या करहा कि तुस्से हर गल्ला मन्झ बड़े देऊआ जो मनणे वाले ऐ।

²³क्यूंकि मैं घुमदे फिरदे हुए तुस्सा रे अराधना पाठ करणे री चीजा जो देख्या करहा था, ता एक एह्ड़ी बेदी भी मिली, जेस पर ये लिखिरा था कि, ‘अनजाणे इस्वरा रे कठे।’ इधी कठे जेसरी जे तुस्से बगैर जाणे प्छयाणे अराधना करहा ऐं, हांऊँ तुस्सा जो तेसरा बचन सुणाहां।”

²⁴“जेस परमेसरे धरती होर जो कुछ एस संसारा मन्झ आ सभ कुछ बणाईरा, से स्वर्ग होर धरती रा माल्क हुई किन्हें हाथा रे बणाईरे मन्दरा मन्झ नी रैहन्दा।

²⁵तेस जो केसी चीजा री कमी नी ई, इधी कठे से माह्णुं रे हाथा री सेऊआ रा मौहताज नी आ, क्यूंकि से ता आपु ई सभी जो जिन्दगी होर साह होर सब कुछ देहां।

²⁶एक ई माह्णुं ले तिन्हें माह्णुंआं री सभ जातिया बणाई ताकि स्यों सारी धरती पर बसी जाए होर तिन्हें ई लोका रा टैम तय कितेया होर तेस जगहा री, जेथी जे स्यों रैंहयां ऐं, सीमा बान्ही दिती।

²⁷ताकि स्यों परमेसरा जो तोपी सके, हुई सक्हा कि स्यों तेस जो तोपी किन्हें तेस तक पुज्ही सक्हा ऐं; तेबे बी परमेसर आस्सा ले दूर नी आ।

²⁸क्यूंकि तेस मन्झ ई आस्से जिउंदे ऐं, होर चलदे फिरदे, होर तेस मन्झ ई आस्सा रा अस्तित्व आ; ठीक इंहां ई तुस्सा रे कविये भी बोलिरा; क्यूंकि आस्से भी तेसरे बच्चे ऐं।

²⁹इधी कठे परमेसरा रे बच्चे हूंणे रे नाते आस्सा जो कधी ये सोचणा नी चहिए कि परमेसर सोने री, चांदी री या पात्थरा री बणीरी कल्पना या कारीगरा रे हाथा ले बणीरी केसी मूर्ति साहीं आ।

³⁰इधी कठे परमेसरे लोका री अज्ञानता रे युगा जो नजरअंदाज करी किन्हें ऐबे हर जगहा सभ माह्णुंआं जो ये हुक्म देहां कि पाप करणा छाडी देआ।

³¹क्यूंकि तिन्हें एक ध्याड़ा तय कितिरा, जेबे तेस आपणे नियुक्त कितिरे एक माह्णुं रे ज्रीए धर्मा किन्हें संसारा रा न्याय करणा, जिन्हें तेस जो नियुक्त करी किन्हें तेस जो मरिरे मन्झा ले जिउंदा करी किन्हें, तिन्हें सभी जो एस गल्ला रा सबूत दितेया।”

³²जेबे तिन्हें मरिरे मन्झा ले जी उठणा री गल सुणी ता तिन्हा मन्झा ले कुछ ता तेसरी हास्सी डुआन्दे लगे पर कुछ लोके बोल्या, “आस्से एस बारे मन्झ तेरा प्रचार फेरी कधी दबारा सुणघे।”

³³इधी कठे पौलुस सभा ले उठी किन्हें बाहर चली गया।

³⁴पर कई माह्णुं तेस साउगी मिली गये, होर प्रभु पर विस्वास कितेया, जिन्हा मन्झ अरियुपगुस सभा रा सदस्य दियुनुसियुस था, होर दमरिस नांऊँआं री एक ज्नाने होर तिन्हा साउगी होर भी कुछ लोक थे।