Read Mandeali चुणिरे चेले रे काम 21 Bible Online

चुणिरे चेले रे काम 21 - Mandeali bible

चुणिरे चेले रे काम 21

¹जेबे आस्से तिन्हा ले विदा हुई किन्हें जहाजा ले हुई किन्हें रवाना हुए ता आस्से सीधे कोसा टापू मन्झ पूजे, होर दूजे ध्याड़े आस्से रुदुसा टापू मन्झ पूजे, होर तेथी ले आस्से पतरा टापू मन्झ पूजे;

²होर आस्सा जो तेथी ले एक जहाज फिनिके ईलाके जो जांदा हुएया मिल्या, होर तेस जहाजा पर चढ़ी किन्हें आस्से आपणा सफर सुर्हू कितेया।

³आस्सा जो परले वखा जो साईप्रस टापू सुझ्दा लग्या, पर आस्से तेस जो छाडी किन्हें सीरिया ईलाके री तरफा जो मुड़ी गये, होर जहाजा जो सुर सैहरा मन्झ समान तुआरणा था, इधी कठे आस्से भी तेथी उतरी गये।

⁴तेथी आस्सा जो कुछ चेले मिले होर आस्से तिन्हा साउगी तेथी सात ध्याड़े तक रहे; तिन्हें पवित्र आत्मा रे ज्रीए बार-बार पौलुसा किन्हें बोल्या कि, यरुस्लेम सैहरा मत जांदे।

⁵जेबे सात ध्याड़े पुरे हुए, ता आस्से तेथी ले चली पये; होर सभ ज्नानिया बच्चे समेत सैहरा ले बाहरा तक आस्सा जो पुजांदे आये, होर आस्से समुद्रा रे बाढे घुटने टेकी किन्हें प्रार्थना किती।

⁶होर एक दूजे ले विदा लई किन्हें आस्से जहाजा पर चढ़ी गये; होर स्यों आपणे-आपणे घरा जो वापस हुई गये।

⁷सुरा सैहरा ले जहाजा ले सफर करदे हुए आस्से पतुलिमयिसा सैहरा मन्झ पौहुंचे ता आस्सा रा जहाजा रा सफर खत्म हुआ, होर विस्वासिया किन्हें मिली किन्हें तिन्हा साउगी एक ध्याड़े रैहे।

⁸दूजे ध्याड़े आस्से तेथी ले चली किन्हें कैसरिया सैहरा मन्झ आये, होर फिलिप्पुस जो खुसी री खबरा रे प्रचारका जेहड़ा सात सेऊआदारा मन्झा ले एक था होर जेस जो यरुस्लेम सैहरा मन्झ विधवाओ री सेऊआ करणे रे कठे नियुक्त कितिरा था, आस्से तेसरे घरा जाई किन्हें रैहे।

⁹तेसरी चार कुआरी मह्ठीया थी; जो भविस्यवाणी करहा ई थी।

¹⁰जेबे आस्से तेथी बौह्त ध्याड़े तक रही चुके, ता अगबुस नांऊँआं रा एक नबी यहूदिया ईलाके ले आया।

¹¹तिन्हें आस्सा वाले आई किन्हें पौलुसा रे कमरा रा पटा लया, होर आपणे हाथ पैर बान्ही किन्हें बोल्या, “पवित्र आत्मा ऐं बोल्हा कि, ‘जेस आदमी री कमरा रा ऐं पटा आ, से यरुस्लेम सैहरा मन्झ यहूदी लोका इंहां बान्हणा, होर अन्यजाति लोका रे हाथा मन्झ सौंपणा।’”

¹²जेबे आस्से ये सुणेया ता आस्से होर तेथी रे लोके पौलुसा ले यरुस्लेम सैहरा जो नी जाणे री विनती किती।

¹³एता पर पौलुसे जवाब दितेया कि, “तुस्से क्या करेया करहा ऐं कि, रोई-रोई किन्हें मेरा दिल तोड़हा ऐं, हांऊँ ता प्रभु यीसू रे नांऊँआं रे कठे यरुस्लेम सैहरा मन्झ सिर्फ बान्हेया जाणे रे कठे नी, पर मरणे रे कठे भी त्यार आ।”

¹⁴जेबे से नी मन्नेया ता आस्से ये बोली किन्हें चुप हुई गये कि, “प्रभु यीसू री इच्छा पूरी हो।”

¹⁵तिन्हा ध्याड़े ले बाद दबारा आस्से त्यारी करी किन्हें यरुस्लेम सैहरा जो चली पये।

¹⁶कैसरिया सैहरा ले भी कुछ चेले आस्सा साउगी चल्लीरे थे, स्यों आस्सा जो मनासोन नांऊँआं रे एक पुराणे चेले वाले लई गये, जो साईप्रस टापू ले था, ताकि तेसरे घरा आस्से रही सके।

¹⁷जेबे आस्से यरुस्लेम सैहरा मन्झ पूजे, ता विस्वासी लोक बड़ी खुसी किन्हें आस्सा किन्हें मिले।

¹⁸दूजे ध्याड़े पौलुस आस्सा जो लई किन्हें याकूबा वाले लई गया, जेथी सभ कलीसिया रे अगुवे कठे हुईरे थे।

¹⁹तेबे तिन्हें तिन्हा जो नमस्कार करी किन्हें, जो-जो काम परमेसरे तेसरी सेऊआ रे ज्रीए अन्यजाति लोका मन्झ किते थे, एक-एक करी किन्हें सभ दसे।

²⁰तिन्हें ये सुणी किन्हें परमेसरा री महिमा किती, फेरी तेस किन्हें बोल्या, “हे भाई, तू जाणहां कि, यहूदी लोका मन्झा ले कई हजार लोके विस्वास कितेया; होर सभ मूसा री व्यवस्था जो बड़े वफादारी किन्हें मनाएं।

²¹होर इन्हा यहूदी विस्वासिया जो तेरे बारे मन्झ ये दसेया जाहाँ कि तू अन्यजाति लोका मन्झ रैहणे वाल़े यहूदी लोका जो मूसा री व्यवस्था जो नी मनणे रा उपदेस देहां, होर तिन्हा किन्हें बोल्हा कि स्यों ना ता आपणे बच्चेया रा खतना कराए होर ना ई आपणे यहूदी रीति रूआजा पर चले।

²²इधी कठे क्या कितेया जाए? तिन्हा ये जरुर जाणी लैणा कि तू एथी आई चुकिरा।”

²³“इधी कठे जो कुछ आस्से तुध किन्हें बोल्हा ऐं, तेह्ड़ा ई कर; एथी आस्सा वाले चार आदमिये, जिन्हें परमेसरा री मांगिरी मन्नत पूरी करणी।

²⁴इन्हा लोका जो लई जा होर तिन्हा साउगी आपणे आपा जो सुद्ध करणे रे रुआजा जो पूरा कर; होर तिन्हारे कठे खर्चा दे कि, स्यों आपणे मूंड मुंडवाईले, तेबे सभी लोका जो पता लगी जाणा कि, जो गल्ला तिन्हें तेरे बारे मन्झ सुणीरी, तेता मन्झ कोई सच्चाई नी ई, बल्कि तू ता आपु ई मूसा री व्यवस्था रे मताबक जिन्दगी जीहां।”

²⁵“जेथी तक विस्वास करणे वाले अन्यजाति लोका रा सवाल आ, आस्से तिन्हा जो एक चिठ्ठी लिखी किन्हें भेजिरी कि, लोका रे ज्रीए मूर्तिया जो चढ़ाई रे खाणे जो मत खांदे, होर व्यभिचार होर गला घुटी किन्हें मारिरे डांगरे रा मास होर खूना ले बच्ची किन्हें रहे।”

²⁶तेबे दूजे ध्याड़े पौलुस तिन्हा माह्णुंआं साउगी जाई किन्हें आपणे आपा जो सुद्ध कितेया होर मन्दरा मन्झ गया की तेस तरिका जो दसे कि, जेबे सुद्ध करणे रे रुआजा रे ध्याड़े पुरे हूंणे होर तिन्हा मन्झा ले हर एकी रे कठे बलि चढ़ाई जाणी।

²⁷जेबे स्यों सात ध्याड़े पुरे हूंणे ई वाले थे, ता आसिया रे ईलाके रे यहूदी लोक पौलुसा जो मन्दरा मन्झ देखी किन्हें सभ लोका जो उकसाया, होर पौलुसा जो पकड़ी लया।

²⁸फेरी स्यों चिंगी किन्हें बोल्दे लगे, “हे इस्राएल देसा रे लोको, आऊआ आस्सा री मदद करा; ये सेई आदमी आ, जो लोका रे, होर मूसा री व्यवस्था रे, होर एस जगहा रे व्रोधा मन्झ हर जगहा सभ लोका जो स्खाहां, एथी तक कि यूनान देसा रे लोक भी मन्दरा मन्झ ल्याई किन्हें तिन्हें एस पवित्रजगहा जो गन्दा करी दितेया।”

²⁹तिन्हें ये इधी कठे बोल्या की तिन्हें से एता ले पैहले इफिसुस सैहरा रे रैहणे वाले त्रुफिमुस जो पौलुसा साउगी सैहरा मन्झ देख्या था, होर समझ्हा ऐं थे कि, पौलुस तेस जो मन्दरा मन्झ लई आईरा।

³⁰तेबे यरुस्लेम सैहरा रे कई लोक पौलुसा पर गुस्सा हुए होर मन्दरा रे आंघणा मन्झ हाला पई गया, होर लोक दौड़ी किन्हें कठे हुए, होर तिन्हें पौलुस पकड़ी किन्हें मन्दरा ले बाहर रगड़ी किन्हें लई आंदेया, होर मन्दरा रे द्वारपाले मन्दरा रे दुराजे झटपट बंद करी दिते।

³¹जेबे स्यों तेस जो मारी देणा चाहें थे, तेबे ई पलटना रे मुखिया जो खबर मिली कि यरुस्लेम सैहरा मन्झ कई लोक दंगा फसाद करेया करहा ऐं।

³²तेबे से झटपट कुछ स्पाही होर सूबेदार साउगी लई किन्हें पौलुसा पर हमला करणे वाले यहूदी लोका वाले दौड़ी किन्हें आया, होर जेबे लोके सेनापति होर स्पाही देखे ता तिन्हें पौलुस मारणा पिटणा बंद करी दितेया।

³³तेबे पलटना रे मुखिये नेडे आई किन्हें पौलुस पकड़ी लया; होर से बंदी बणाई लया; तिन्हें तेस जो दो जंजीरा किन्हें बान्ह्णे रा हुक्म दितेया। फेरी तिन्हें पूछेया कि, “ये कुणहां होर इन्हें क्या कितिरा?”

³⁴पर भीड़ा मन्झा ले कोई कुछ होर कोई कुछ चिंगदे रैहे, होर एस हले-गूले मन्झ से जाणी नी पाया कि सच्चाई क्या ई, इधी कठे तिन्हें हुक्म दितेया कि तेस जो किले मन्झ लई चला।

³⁵पौलुस जेबे पैड़ीया वाले पुज्हेया ता बेकाबू भीड़ा री वजहा ले स्पाहीया जो पौलुस चकी किन्हें लई जाणा पया।

³⁶क्यूंकि लोका री भीड़ ये चिंगदी हुई तेसरे पीछे पईरी थी कि “तेस जो मारी देआ! तेस जो मारी देआ!”

³⁷होर जेबे स्पाही पौलुसा जो किले मन्झ लई जाणे वाले थे, ता तिन्हें पलटना रे मुखिये किन्हें बोल्या, “क्या मुंजो हुक्म आ कि हांऊँ तुध किन्हें कुछ बोलूं?” तिन्हें बोल्या, “क्या तू यूनानी भासा जाणहां?”

³⁸“क्या तू मिस्र देसा रा ता नी आ, जिन्हें जे कुछ टैम पैहले सरकारा रे व्रोधा मन्झ विद्रोह सुर्हू कितेया था होर चार हजार खतरनाक खूनी लोका री अगुवाई करेया करहा था?”

³⁹पौलुसे बोल्या, “नी हांऊँ एक यहूदिया ईलाके रे माह्णुंआं, होर मसहूर देस किलकिया ईलाके रा तरसुस सैहरा रे रैहणे वाल़ा आ; होर हांऊँ तुध किन्हें अर्ज करहा कि, मुंजो लोका किन्हें गल्ला करणे दे।”

⁴⁰जेबे तिन्हें हुक्म दितेया, ता पौलुसे पैड़ीया पर खड़ी किन्हें लोका जो हाथा रा इसारा कितेया की चुप हुआ, तेबे पौलुस तिन्हा किन्हें इब्रानी भासा मन्झ बोल्दा लग्या।