Read Mandeali चुणिरे चेले रे काम 23 Bible Online

चुणिरे चेले रे काम 23 - Mandeali bible

चुणिरे चेले रे काम 23

¹होर पौलुसे, यहूदी माहसभा पर एक टेक ल्गाई किन्हें देख्या, होर बोल्या, “हे भाईयो, मैं आज तक परमेसरा रे कठे बिल्कुल सच्चे अंतरात्मा किन्हें जिन्दगी बिताई।”

²पौलुसा जो ये बोलदे हुए सुणी किन्हें हनन्याह बडे याजके, तिन्हारी जो पौलुसा वाले खड़ीरे थे, तेसरे मुंहा पर थप्पड़ मारणे रा हुक्म दितेया।

³जेबे पौलुसा जो केसिए थप्पड़ मारेया ता पौलुसे तेस किन्हें बोल्या, “हे पाखंडी! परमेसरा तुजो सजा देणी; क्या तू मूसा री व्यवस्था रे मताबक मेरा न्याय करणे रे कठे बैठिरा कि, मूसा री व्यवस्था रे व्रोधा मन्झ मुंजो थप्पड़ मारणे रा हुक्म देआ करहा।”

⁴पौलुसा रे नेडे खड़ीरे लोके बोल्या, “परमेसरा रे बडे याजका रा बेज्जती करणे री हिम्मत तुजो किहाँ हुई?”

⁵पौलुसे जवाब दितेया, “मुंजो ता पता ई नी कि ये बडा याजक आ; क्यूंकि ये पवित्र सस्त्रा मन्झ लिखिरा की, ‘आपणी प्रजा रे प्रधाना बुरा नी बोलणा चहिए।’”

⁶तेबे पौलुसा जो ये पता चल्या कि तिन्हा मन्झा ले आधे सदूकी लोके ऐं, होर आधे फरीसी लोक ऐं, ता माहसभा मन्झ तिन्हें जोरा किन्हें बोल्या, “हे भाईयो, हांऊँ फरीसी आ, होर फरीसी खानदाना रा आ, पर ये मुकद्दमा मेरे पर इधी कठे चल्या करहा क्यूंकि हांऊँ आसा करहा की परमेसरा लोका जो मरिरे मन्झा ले जिउंदे करणे।”

⁷जेबे तिन्हें ये गल बोली ता फरीसी लोका होर सदूकी लोका मन्झ झगड़ा हुन्दा लग्या; होर सभा मन्झ फूट पई गयी।

⁸क्यूंकि सदूकी लोके रा विस्वास था कि, ना ता मरिरे मन्झ ले जी उठणा आ, ना स्वर्गदूत होर ना दुस्टात्मा ई; पर फरीसी लोका जो इन्हा सभी गल्ला मन्झ विस्वास करहा ऐं थे।

⁹तेथी बौह्त रौल्आ पया, कुछ व्यवस्था स्खाणे वाल़े जो फरीसी लोका मन्झा ले थे उठी किन्हें बैहस करदे हुए बोल्दे लगे, “एस आदमी मन्झ आस्से कोई खोट नी पांदे, अगर केसी दुस्टात्मे या केसी स्वर्गदूते एस किन्हें गल्ला किती ता फेरी क्या हुएया?”

¹⁰जेबे बौह्त झगड़ा हुई गया, ता पलटना रे मुखिये एस डरा ले कि केते स्यों पौलुसा रे टुकड़े-टुकड़े नी करी दे, इधी कठे स्पाहीया जो हुक्म दितेया कि, स्यों हेठ जाई किन्हें पौलुसा जो महासभा रे सदस्या ले लग करी किन्हें स्पाहीया रे किले मन्झ लई जाऊआ।

¹¹तेस ई रात प्रभु यीसूए तेस वाले आई किन्हें बोल्या, “हे पौलुस, हिम्मत कर, क्यूंकि जिहां तैं यरुस्लेम सैहरा मन्झ मेरी गुआही दिती, तिहां ईं तुजो रोम सैहरा मन्झ भी गुआही देणी पऊणी।”

¹²होर जेबे हल्ली ध्याड़ा ई था, ता यहूदी लोके एका कितेया, होर कसम खाध्ही कि, जेबे तक आस्से पौलुसा जो मारी नी दे, तेबे तक आस्सा ना ता कुछ खाणा ना ता पीणा।

¹³जिन्हें जे ये कसम खाध्ही थी, स्यों चाली ले भी ज्यादा थे।

¹⁴तिन्हें मुख्य याजका होर यहूदी मुखिये वाले आई किन्हें बोल्या, “आस्से ये कसम खाध्ही री कि जेबे तक पौलुसा जो नी मारी दे, तेबे तक आस्सा ना ता कुछ खाणा ना ता पीणा।

¹⁵इधी कठे ऐबे माहसभा समेत पलटना रे सरदारा जो समझाऊआ कि, पौलुसा जो तुस्सा वाले लई आये, ये भाना मारेया कि तुस्से तेसरे बारे मन्झ ठीक ढन्गा किन्हें पूछ ताछ करणा चाहें, एता ले पैहले कि से एथी पूजे, आस्से तेस जो मारणे रे कठे त्यार ऐं।”

¹⁶पर पौलुसा रे भाणजे जो पौलुसा जो मारने रे साजिसा रे बारे मन्झ भनक लगी गई, इधी कठे से किले मन्झ जाई पुज्हेया होर पौलुसा जो सभ कुछ दसी दितेया।

¹⁷पौलुसे सूबेदारा मन्झा ले एकी जो आपणे वाले सादी किन्हें बोल्या, “एस जुआना जो पलटना रे मुखिये वाले लई जाऊआ, ये तेस किन्हें कुछ बोलणा चाहां।”

¹⁸इधी कठे सुबेदारे पौलुसा रे भाणजे जो पलटना रे मुखिये वाले लई जाई किन्हें बोल्या, “पौलुस कैदी ऐं मुंजो सादी किन्हें ये अर्ज किती कि, ये जुआन पलटना रे मुखिया किन्हें कुछ बोलणा चाहां; एस जो तेस वाले लई जा।”

¹⁹पलटना रे मुखिये तेसरा हाथ पकड़ी किन्हें, होर लग जे लई जाई किन्हें पूछेया, “मेरे किन्हें क्या बोलणा चाहां?”

²⁰होर तिन्हें बोल्या, “यहूदी अगुवे एका करी लईरा कि, तेरे ले अर्ज करहे कि, काल पौलुसा जो माहसभा मन्झ ल्याए, एह्ड़ा लगे कि तुस्से पौलुसा बारे मन्झ ठीक ढन्गा किन्हें छानबीन करणा चाहें।

²¹पर तिन्हारी ये अर्ज मत सुणदा, क्यूंकि चाली ले भी ज्यादा लोक पौलुस जो मारणे रे इंतजारा मन्झ ऐं, होर तिन्हें ये कसम खाध्ही री कि जेबे तक स्यों पौलुसा जो नी मारी दे, तिन्हा ना ता कुछ खाणा होर ना पीणा; बस ऐबे तिन्हा जो तुस्सा री हां रा इंतजार आ।”

²²फेरी पलटना रे मुखिये से हुक्म देई किन्हें जुआन भेजी दितेया कि, “केसी किन्हें मत बोल्दा कि तैं ये गल मुंजो दसी दितिरी।”

²³होर पलटना रे मुखिये दो सूबेदारा जो सादी किन्हें बोल्या, “दो सौ स्पाही, सत्तर घुड़सवार, होर दो सौ भाले वाले स्पाही जो कैसरिया सैहरा जो जाणे रे कठे त्यार रखा, रातके नो बजे निकल्या।

²⁴पौलुसा री सुआरी रे कठे घोड़े रा भी इन्तजाम रखणा होर तेस जो बचाई किन्हें फेलिक्स हाकमा वाले लई जा।”

²⁵पलटना रे मुखिये हाकम जो एक चिठ्ठी भी लिखी,

²⁶“माहप्रतापी फेलिक्स हाकमा जो रोम देसा रा सम्राट क्लौदियुस लुसियासा रा नमस्कार!

²⁷एस आदमी जो यहूदी लोक पकड़ी किन्हें मारी देणा चाहेया, पर जेबे हांऊँ जाणी गया कि ये रोम देसा रा लोक आ, ता मैं आपणे स्पाहीया साउगी जाई किन्हें ये बचाई लया।

²⁸हांऊँ तेस वजहा जो जाणना चाहां था जेस वजहा ले तेस पर दोस ल्गाया करहा ऐं थे, हांऊँ तेस जो माहसभा मन्झ लई गये,

²⁹तेबे मैं जाणी गया कि, स्यों आपणी यहूदी व्यवस्था रे चर्चा रे बारे मन्झ तेस पर इल्जाम ल्गाहें, पर मारे जाणे लायक या बंदी बणाए जाणे रे लायक तेस मन्झ कोई दोस नी आ।

³⁰होर जेबे मुंजो खबर मिली कि, तिन्हें एस जो मारणे री योजना बणाईरी, ता मैं एस जो झटपट तेरे वाले भेजी दितेया, होर तेस पर इल्जाम लगाणे वाले यहूदी लोका जो भी हुक्म दितेया कि, स्यों एसरे बरखलाफ ल्गाईरे इल्जामा जो तेरे साम्हणें रखे।”

³¹तेस राती स्पाहिये पलटना रे मुखिये हुक्मा जो पूरा कितेया होर स्यों रातो रात ई पौलुसा जो अन्तपतरिसा सैहरा मन्झ लई आये।

³²फेरी दूजे ध्याड़े घुड़सवारा जो पौलुसा साउगी कैसरिया सैहरा मन्झ जाणे रे कठे छाडी दितेया होर स्पाही आपु यरुस्लेम सैहरा रे किले जो वापस आये।

³³तिन्हें कैसरिया सैहरा मन्झ पुज्ही किन्हें हाकमा जो चिठ्ठी दिती; होर पौलुसा जो भी तेसरे साम्हणें हाजिर कितेया।

³⁴हाकमे चिठ्ठी पढ़ी किन्हें पूछेया कि, “क्या ये किलकिया ईलाके रा आ?”

³⁵होर जेबे से ये जाणी गया कि से किलकिया देसा रा आ; ता तेस किन्हें बोल्या, “जेबे तेरे पर इल्जाम लगाणे वाले यहूदी लोका आऊंणा, ता मां तेरे मुकद्दमे री सुणवाई करणी।” होर तिन्हें हुक्म दितेया कि पौलुसा जो हेरोदेस राजे रे किले मन्झ निगरानी मन्झ रखे।