Read Mandeali चुणिरे चेले रे काम 24 Bible Online

चुणिरे चेले रे काम 24 - Mandeali bible

चुणिरे चेले रे काम 24

¹पांज ध्याड़े ले बाद हनन्याह बडे याजका ले कुछ यहूदी मुखिये होर तिरतुल्लुस नांऊँआं रे एक वकीला जो साउगी लई किन्हें कैसरिया सैहरा मन्झ आये; होर तिन्हें हाकमा रे साम्हणें पौलुसा रे बरखलाफ इल्जाम लगाये।

²जेबे पौलुसा जो सादेया गया ता तिरतुल्लुस तिन्हा पर इल्जाम ल्गाई किन्हें बोल्दा लग्या कि, “हे माहप्रतापी फेलिक्स, तुस्सा री वजहा ले आस्से बड़ी सांति किन्हें रैंहयां करहा ऐं होर तुस्सा री दूर दृस्टी ले देसा मन्झ कई सुधार हुईरे।

³एता जो आस्से हर जगहा होर हर तरहा ले धन्यावादा समेत मन्हां ऐं।

⁴पर इधी कठे कि आस्से तुस्सा रा ज्यादा टैम बर्बाद नी करणा चाहंदे, हांऊँ तुस्सा ले अर्ज करहा कि, आस्सा री दो गल्ला सुणी लऊआ।

⁵आस्से ये जांच करी लई कि जेथी भी ये आदमी जांहाँ ये यहूदी लोका जो विद्रोह करहा; ये आदमी एक एह्ड़े कुपन्था रा मुखिया जेस पन्था जो लोक नासरी रे पीछे चलने वाले रा पन्थ बोल्हा ऐं।

⁶इन्हें मन्दरा जो भ्रस्ट करणे रा जतन कितेया, होर आस्से ये इधी कठे पकड़ेया; आस्से एसरा न्याय आपणी यहूदी व्यवस्था रे मताबक करणा चाहें थे।

⁷पर पलटना रा मुखिये लूसियासे जबरदस्ती एस जो आस्सा ले छुड़ाई लया।

⁸होर आपणे लोका जो हुक्म दितेया कि एस पर इल्जाम लगाणे वाल़ेया जो तेरे साम्हणें आऊणें रा हुक्म दितेया। जिन्हा गल्ला रे बारे मन्झ आस्से तेस पर इल्जाम ल्गाया करहा ऐं, अगर तुस्से आपु ई तेस ले पूछ ताछ करघे ता तुस्सा जो इन्हा सभ गल्ला री सच्चाई तुस्सा जो पता लगी जाणा।”

⁹यहूदी अगुवे भी एसरा साथ देई किन्हें बोल्या कि, यूँ गल्ला बिल्कुल ठीक ई।

¹⁰जेबे हाकमे पौलुसा जो बोलणे रे कठे इसारा कितेया ता तिन्हें जवाब देई किन्हें बोल्या, “हांऊँ ऐं जाणी किन्हें कि तू बौह्त साला ले एस देसा रे लोका रा फैसला करहा, इधी कठे हांऊँ चाऊआ किन्हें आपणा बचाव पेस करहा।

¹¹तू आपु जाणहां कि, जेबे ले हांऊँ यरुस्लेम सैहरा रे मन्दरा मन्झ अराधना करणे रे कठे आईरा, मुंजो बारा ध्याड़े ले ज्यादा नी हुए।

¹²तेथी इन्हें मुंजो ना ता मन्दरा मन्झ, ना ता यहूदी सभा मन्झ होर ना ई केसी सैहरा मन्झ केसी किन्हें चर्चा करदे या दंगा कुरांदे देख्या।

¹³होर ऐबे तेरे साम्हणें जो इल्जाम ये मुंजो पर ल्गाया करहा ऐं तिन्हा जो साबित नी करी सकदे।

¹⁴पर हांऊँ तेरे साम्हणें मन्हां कि, ये यहूदी अगुवे सोचे की हांऊँ ‘प्रभु यीसू रे पैंडे’ रे मताबक चला जेस जो ये लोक कुपंथ बोल्हा ऐं। हांऊँ आपणे बापदादे रे परमेसरा री अराधना करहा, हांऊँ हरेक तेस गल्ला मन्झ विस्वास करहा जो मूसा री व्यवस्था दस्हा ई, होर जो नबिया रे कताबा मन्झ लिखीरी ई।

¹⁵होर हांऊँ परमेसरा मन्झ तेहड़ी ई आस करहा, जिहां आपु ऐं लोक रख्हा ऐं कि परमेसरा धर्मी होर पापी लोक, दुहें मरिरे मन्झ ले जिउंदे करणे।

¹⁶इधी कठे हांऊँ भी परमेसर होर लोका रे साम्हणें हमेसा आपणी अंतरात्मा जो सुद्ध रखणे री कोसिस करहा।”

¹⁷“बौह्त साला ले बाद हांऊँ आपणे गरीबा जो दान देणे, होर परमेसरा रे कठे बलि चढ़ाणे रे कठे यरुस्लेम सैहरा मन्झ आईरा था।

¹⁸तेस ही टैम इन्हें मन्दरा मन्झ मुंजो सुद्ध हूंणे रे रुआजा जो पूरा करदे देखिरा। ना तेथी कोई भीड़ देखी थी होर ना कोई दंगा, पर तेथी आसिया देसा रे कुछ यहूदी लोक थे।

¹⁹अगर मेरे बरखलाफ तिन्हा वाले कुछ बोलणे जो आ, ता तिन्हा आसिया रे ईलाके रे यहूदी लोको जो तेरे साम्हणें हाज़र हुई किन्हें मुंजो पर इल्जाम लगाणे चहिए।

²⁰या ये लोक जो एथी ऐं स्यों ई दसे कि जेबे हांऊँ यहूदी माहसभा रे साम्हणें खड़ीरा था, तेबे तिन्हें मेरे मन्झ क्या खोट पाया?

²¹सिर्फ एक गल्ला पर मेरे पर दोस लगाई सके कि जेबे हांऊँ तिन्हारे बीचा मन्झ खड़ीरा था मैं चिंगी किन्हें बोल्या था, ‘पर ये मुकद्दमा मेरे पर इधी कठे चल्या करहा क्यूंकि हांऊँ विस्वास करहा की परमेसरा लोका जो मरिरे मन्झा ले जी उठाणे।’”

²²फेलिक्से हाकमे जो एस “प्रभु यीसू रे पैंडे” जो भली भांति जाणहां था, तिन्हें तिन्हा जो ये बोली किन्हें टाल्ली दितेया कि, “जेबे पलटना रे मुखिया लुसियासा आऊंणा, ता तेबे ई मां एस मुकद्दमे रा फैसला करणा।”

²³होर तिन्हें सूबेदारा जो हुक्म दितेया कि, पौलुसा जो निगरानी मन्झ रख्या, पर इतनी अजादी देआ की तेसरे खास दोस्त आई किन्हें तेसरी सेऊआ करी सके।

²⁴होर कुछ ध्याड़े ले बाद फेलिक्स हाकमे आपणी लाड़ी द्रुसिल्ला साउगी लेई किन्हें कैसरिया सैहरा मन्झ आया; होर तेसरी लाड़ी एक यहूदी ज्नाने थी। फेलिक्से पौलुसा जो सादी किन्हें तेस विस्वासा रे बारे मन्झ जो यीसू मसीह पर आ, तेस ले सुणेया।

²⁵पर जेबे पौलुस धार्मिकता, आपणे आपा पर काबू रखणा, होर आऊणें वाले न्याय रे बारे मन्झ बोल्या करहा था, ता फेलिक्स हाकम डरी गया होर बोल्या, “एस टैम तू चली जा, मौका मिल्घा ता मां तू दबारा सादी किन्हें गला करणी।”

²⁶हलांकि फेलिक्स हाकम पौलुसा री बोलिरी गल्ला ले डरहा था। फेरी भी पौलुसा जो बार-बार सादी किन्हें तेस किन्हें गल्ला करदा रैंहयां ऐं था, क्यूंकि तेस जो लगहा था, की पौलुसा जेल्हा ले छुटणे रे कठे तेस जो पैसे देणे।

²⁷पर जेबे दो साल बीती गये, ता पुरकियुस फेस्तुस फेलिक्स री जगहा हाकम बणेया, क्यूंकि फेलिक्स हाकम यहूदी लोका जो खुस करणा चाहां था इधी कठे तिन्हें पौलुसा जो जेलखाने मन्झ ई रैहणे दितेया।