Read Mandeali चुणिरे चेले रे काम 25 Bible Online

चुणिरे चेले रे काम 25 - Mandeali bible

चुणिरे चेले रे काम 25

¹फेस्तुस यहूदिया ईलाके रा हाकम बणने रे तीन ध्याड़े ले बाद से कैसरिया सैहरा ले यरुस्लेम सैहरा जो गया।

²तेबे मुख्य याजके, होर यहूदी अगुवे, तेस पर इल्जाम लगाए होर तेस ले अर्ज किती।

³होर ये छूट मांगी कि से पौलुसा जो यरुस्लेम सैहरा जो भेजी दे, क्यूंकि स्यों तेस जो पैंडे मन्झ ई मारणे वाले थे।

⁴तेबे फेस्तुस हाकमे जवाब दितेया कि, पौलुस ता कैसरिया सैहरा मन्झ कैद आ होर हांऊँ आपु तेथी जाणे वाल़ा आ।

⁵फेरी तिन्हें बोल्या, तुस्सा मन्झा ले जो खास-खास आदमिये, स्यों मेरे साउगी चली पऊआ; होर अगर इन्हें आदमिये कोई अपराध कितिरा ता तेथी तेस पर इल्जाम लगाए।

⁶यरुस्लेम सैहरा मन्झ आठ दस ध्याड़े बिताई किन्हें फेस्तुस कैसरिया सैहरा जो वापस चली गया; तेथी पूजी किन्हें अगले ध्याड़े तिन्हें राजगद्दी पर बैठी किन्हें हुक्म दितेया कि, पौलुसा जो हाज़र कितेया जाए।

⁷जेबे से पेस हुएया ता यरुस्लेम सैहरा ले आईरे यहूदी अगुवे तेस जो घेरी किन्हें खड़ी गये, तिन्हें तेस पर बौह्त सारे इल्जाम लगाये पर तिन्हा वाले कोई सबूत नी थे।

⁸पौलुसे आपणा बचाव करदे हुए बोल्या, मैं ना ता यहूदी लोका री व्यवस्था, ना मन्दर होर ना महाराजे रे बरखलाफ कोई पाप कितेया।

⁹पर फेस्तुस हाकमे यहूदी अगुवे जो खुस करणे रे कठे पौलुसा जो जवाब दितेया, क्या तू चाहां कि हांऊँ इन्हा इल्जामा रा सुनवाई यरुस्लेम सैहरा मन्झ करूं?

¹⁰पर पौलुसे बोल्या, एस टैम हांऊँ महाराजे री राजगद्दी मन्झ खड़ीरा, मेरा सुनवाई एथी ई हूंणां चहिए। मैं यहूदी लोका रे व्रोधा मन्झ कोई अपराध कितिरा, होर एस गल्ला जो तू भी जाणहां।

¹¹अगर हांऊँ अपराधी आ, होर मौता री सजा रे लायक कोई काम कितिरा, ता हांऊँ मरणे ले नी डरदा। पर अगर तिन्हारे ल्गाईरे इल्जामा मन्झा ले कोई गल सच्ची नी हुई, ता मुंजो तिन्हारे हाथा मन्झ सौंपणे रा हक केसी जो नी आ। येई महाराजे ले मेरी प्रार्थना ई कि से ही मेरा न्याय करहे।

¹²तेबे फेस्तुस्से हाकमे मन्त्रिया किन्हें सलाह करणे ले बाद जवाब दितेया, तू चाहां कि महाराज तेरा न्याय करहे, इधी कठे ऐबे तुध महाराजे रे साम्हणें पेस हूंणां।

¹³कुछ ध्याड़े ले बाद राजा अग्रिप्पा होर तेसरी छोटी बैहण बिरनिके कैसरिया सैहरा मन्झ फेस्तुस हाकमा किन्हें मिलणे रे कठे आये।

¹⁴जेबे स्यों तेथी कई ध्याड़े बिताई चुके ता फेस्तुस हाकमे राजे रे साम्हणें पौलुसा रे मुकद्दमे जो एस तरहा समझाया, एथी एह्ड़ा आदमी आ, जेस जो फेलिक्स हाकमे कैदी बणाई किन्हें एथी छाडी गईरा था।

¹⁵जेबे हांऊँ यरुस्लेम सैहरा मन्झ था मुख्य याजके होर यहूदी मुखिये तेस पर इल्जाम लगाए होर अर्ज किती कि एस जो मौता री सजा मिले।

¹⁶तेबे मैं जवाब दितेया कि रोम देसा रे लोका रा ये रूआज नी आ कि केसी आदमी जो, जेबे तक कि इल्जाम लगाणे वाले रे साम्हणें खड़े हुई किन्हें आपणे बचाऊआ मन्झ जवाब देणे रा मौका ना मिले; तेस जो सजा रे कठे सौम्पेया जाए।

¹⁷इधी कठे जेबे यहूदी मुखिये मेरे साउगी कैसरिया सैहरा मन्झ आये ता मैं बगैर देर किते अगले ध्याड़े ई राजगद्दी पर बैठी किन्हें पौलुसा जो ल्याऊणे रा हुक्म दितेया।

¹⁸जेबे इल्जाम लगाणे वाले बोलणे रे कठे खड़ी गये ता तिन्हें तेस पर एह्ड़ा कोई इल्जाम नी ल्गाया जेह्ड़ा कि हांऊँ सोचेया करहा था।

¹⁹तिन्हो आपणे धर्मा री बिधिया जो लेई किन्हें मतभेद था होर यीसू नांऊँआं रे एक माह्णुं रे बारे मन्झ जो मरी चुकिरा, पर पौलुसा तेसरे जिउंदे हूंणे रा दावा करहा।

²⁰हांऊँ समझी नी पाया करदा था कि इन्हा गल्ला री छानबीन किहाँ करूं, इधी कठे मैं पौलुसा ले पूछेया कि क्या तू यरुस्लेम सैहरा जो जाणे जो त्यार आ, ताकि तेथी इन्हा गल्ला रे बारे मन्झ तेरा फैसला हुई सके।

²¹पर जेबे पौलुसे अर्ज किती कि महाराज ही मेरा न्याय करहे; ता मैं हुक्म दितेया कि, जेबे तक तेस जो महाराजे वाले नी भेजी देऊँ, तेसरी रखवाली किती जाए।

²²तेबे अग्रिप्पे फेस्तुस हाकमा किन्हें बोल्या, हांऊँ भी तेस आदमी री सुणना चाहां; तिन्हें बोल्या, तू तेसरी काल्ला सुणी लया।

²³दूजे ध्याड़े जेबे राजा अग्रिप्पा होर तेसरी छोटी बैहण बिरनिके बड़ी धूम धामा किन्हें होर पलटना रे मुखिये होर सैहरा रे खास-खास लोक भी दरबारा मन्झ पूजे, ता फेस्तुस हाकमे हुक्म दितेया कि, स्यों पौलुसा जो लई आये।

²⁴फेस्तुस हाकमे बोल्या, हे राजा अग्रिप्पा, होर एथी कैसरिया सैहरा मन्झ मौजूद सभ इज्जतदार लोको! जेह्ड़े एथी आस्सा साउगी ये, तुस्से एस आदमी जो देख्या करहा ऐं जेसरे बारे मन्झ यरुस्लेम सैहरा मन्झ कई यहूदी लोक होर एथी कैसरिया सैहरा मन्झ भी कई लोके चिंगी किन्हें मेरे किन्हें अर्ज किती कि पौलुसा रा जिउंदा रैंहणां ठीक नी आ।

²⁵पर मैं जाणी लया कि इन्हें मौता री सजा रे लायक कोई एह्ड़ा काम नी कितिरा था, होर इधी कठे कि इन्हें आप्हुए अर्ज किती कि महाराज ही तेसरा न्याय करहे, ता मैं एस जो रोम सैहरा मन्झ भेजी देणे रा फैसला कितेया।

²⁶फेरी भी मेरे वाले एसरे बारे मन्झ आपणे माहराज जो लिखणे रे कठे कोई पक्की गल नी ई; इधी कठे मैं तुस्सा सभी रे साम्हणें खास कर, हे राजा अग्रिप्पा, तेरे साम्हणें ल्यान्दिरा, ताकि पूछ ताछ करणे ले बाद मुंजो कुछ लिखणे जो मिली जाए।

²⁷कुछ भी हो मुंजो केसी कैदी जो तेसरा दोष-पत्र बगैर त्यार किते तेथी भेजी देणा कुछ ठीक नी लग्या।