Read Mandeali चुणिरे चेले रे काम 26 Bible Online

चुणिरे चेले रे काम 26 - Mandeali bible

चुणिरे चेले रे काम 26

¹राजे अग्रिप्पे पौलुसा किन्हें बोल्या, “तुजो आपणे बारे मन्झ बोलणे रा हुक्म आ।” तेबे पौलुसे हाथा रा इसारा कितेया की चुप हुआ तेबे से आपणे बचाऊआ मन्झ बोल्दा लग्या,

²“हे राजा अग्रिप्पा, जितनी गल्ला रा यहूदी अगुवे मुंजो पर इल्जाम ल्गाहें, आज तेरे साम्हणें तिन्हारा जवाब देणे रे कठे हांऊँ आपणे आपा जो धन्य सम्झहा।

³खास करी किन्हें इधी कठे, क्यूंकि तू यहूदी लोका रे सभ रीति रूआजा होर तिन्हारे विवादा जो जाणहां ऐं, इधी कठे हांऊँ अर्ज करहा कि, तू सब्रा रखी किन्हें मेरी सुणी ले।”

⁴“कई यहूदी लोक जाणहां ऐं कि बचपना ले ई मैं आपणी जिन्दगी केस तरीके ले जी, स्यों जाणहां ऐं कि जेस सैहरा मन्झ मेरा जन्म हुआ तेथी हांऊँ किहाँ रैहया होर स्यों ये भी जाणहां ऐं कि आपणी जुआनी मन्झ जेबे हांऊँ यरुस्लेम सैहरा मन्झ था तेबे मेरी जिन्दगी केह्ड़ी थी।

⁵स्यों मुंजो बचपना ले जाणहां ऐं होर अगर स्यों चाहे ता एस गल्ला री गुआही देई सक्हा ऐं कि, मैं एक फरीसी लोका मन्झा ले एक हुई किन्हें आपणे धर्मा रे सभी ले खरे पन्था रे मताबक चल्या।

⁶होर ऐबे तेस्सा वाचा री आसा री वजहा ले जो परमेसरे आस्सा रे बापदादा किन्हें कितिरी थी, मेरे पर मुकद्दमा चल्या करहा।

⁷तेस्सा वाचा रे पुरे हूंणे री आस लगाए हुए, आस्सा रे बारा गोत्र आपणे सारे मना ले राती ध्याड़ी परमेसरा री अराधना करदे आईरे। हे राजा, एस ई उम्मीदा रे बारे मन्झ यहूदी लोक मुंजो पर इल्जाम ल्गाहें।

⁸सभा मन्झ बैठीरे सारे यहूदी लोका किन्हें पौलुसे बोल्दा लगेया, तुस्सा जो ये विस्वास करहा ऐं कि परमेसर मरिरे जो जिउंदा करहा, ता तुस्सा जो एस्सा गल्ला रा विस्वास कि नी करदे कि परमेसरे यीसू भी मरिरे मन्झ ले जिउंदा हुई गया।”

⁹“मैं भी समझीरा था कि नासरता रा यीसू रे नांऊँआं रे व्रोधा मन्झ मुंजो बौह्त कुछ करणा चहिए।

¹⁰होर मैं यरुस्लेम सैहरा मन्झ एह्ड़ा ई कितेया; होर मुख्य याजका ले हक पाई किन्हें बौह्त सारे परमेसरा रे पवित्र लोक जेल्हा मन्झ पाए, होर जेबे तिन्हा जो मारेया जाहाँ था, ता हांऊँ भी तिन्हारे व्रोधा मन्झ बराबर सैहमत था।

¹¹होर हरेक यहूदी सभा मन्झ हांऊँ तिन्हा जो ताड़ना दुआई-दुआई किन्हें यीसू री निंदा कुराहां था, एथी तक कि गुस्से रे मारे एह्ड़ा पागल हुई गया कि, बाहर दूजे सैहरा मन्झ भी जाई किन्हें तिन्हा जो स्ताहां था।”

¹²“एह्ड़ी धुना मन्झ जेबे हांऊँ मुख्य याजका ले हक री चिठ्ठी होर हुक्म पाई किन्हें दमिस्क सैहरा जो जाया करहा था।

¹³ता हे राजा, पैंडे मन्झ दोपहरा रे टैमा मैं आसमाना ले सूरजा रे तेजा ले बढ़ी किन्हें एक जोत आपणे गास होर आपणे साउगी चलणे वाले रे चारो तरफ चमक्दी देखी।

¹⁴होर जेबे आस्से सभ जमीना पर पई गये, ता मैं इब्रानी भासा मन्झ, मेरे किन्हें ये बोल्दे हुए मैं अवाज सुणी कि, ‘हे साऊल, हे साऊल, तू मुंजो किधियो स्ताया करहा? मेरी इच्छा रे खलाफ लड़ना तेरे कठे बेकार आ।’”

¹⁵“होर मैं पूछेया, ‘हे प्रभु तू कुणहां?’ प्रभुए जवाब दितेया, ‘हांऊँ यीसू आ जेस जो तू स्ताहां।

¹⁶पर ऐबे तू उठ होर आपणे पैरा पर खड़ा हुई जा। हांऊँ तेरे साम्हणें इधी कठे जाहिर हुएया कि तुजो एक सेऊआदारा रे रूपा मन्झ नियुक्त करूं, होर जो कुछ तैं मेरे बारे मन्झ देख्या होर जो कुछ मां तुजो दसणा, तेता रा तू गुआह रैहया।

¹⁷होर मां तू तेरे लोका ले होर अन्यजाति लोका ले बचान्दे रैंहणां; जिन्हा वाले हांऊँ ऐबे तुजो इधी कठे भेज्हा,

¹⁸कि तू तिन्हारी हाखिया खोल्हे, ताकि स्यों नह्यारे ले प्रयासे वखा जो, होर सैताना रे हका ले परमेसरा वखा जो फिरे; ताकि परमेसर तिन्हारे पापा री माफ करहे, होर तिन्हा लोका साउगी विरासत पाए, जेह्ड़े मेरे पर विस्वास करणे ले पवित्र हुई चुकिरे।’”

¹⁹“इधी कठे हे राजा अग्रिप्पा, मैं स्वर्गा ले मिलिरे एस दर्सना री गल नी टाल्ली।

²⁰पर पैहले दमिस्क सैहरा रे, फेरी यरुस्लेम सैहरा रे रैहणे वाल़ेया जो, तेबे यहूदिया ईलाके रे मन्झ होर अन्यजाति लोका मन्झ ये प्रचार करदा रैहया कि, पाप करणा छाडी देआ होर परमेसरा वखा जो फिरा होर एह्ड़ा काम करा ताकि तुस्सा री जिन्दगी ले पता लगी सके कि तुस्से आपणे पापा ले पस्चाताप करी लईरा।

²¹इन्हा गल्ला री वजहा ले यहूदी लोक मुंजो मन्दरा मन्झ पकड़ी किन्हें मारणे री कोसिस करहा ऐं थे।

²²पर आज तक मुंजो परमेसरा री मदद मिल्दी रही, होर इधी कठे हांऊँ छोटे होर बडे सभी लोका रे साम्हणें गुआही देआ। जो गल्ला नबिये होर मुसे नबिये बोलिरी कि, स्यों हूंणे वाली ई; हांऊँ बस तिन्हा गल्ला जो छाडी किन्हें होर कुछ नी बोल्दा।

²³कि मसीहा जो दुःख उठाणा पऊणा, होर तेस ई सभी ले पैहले मरिरे मन्झा ले जी उठणा, आस्सा रे लोका मन्झ होर अन्यजाति लोका मन्झ तेस ज्योति रा प्रचार करणा जेस ले तिन्हारा उधार हूंणा।”

²⁴पौलुस जेबे आपणे बचाऊआ मन्झ इन्हा गल्ला जो बोल्या करहा था कि फेस्तुस हाकमे चिंगी किन्हें बोल्या, “हे पौलुस तेरा दमाग खराब हुई गईरा! तेरी ज्यादा पढ़ाई ऐं तू पागल बणाई दितिरा।”

²⁵पर पौलुसे बोल्या, “हे माहप्रतापी फेस्तुस हाकम, हांऊँ पागल नी आ, पर सच्चाई होर बुद्धि री गल्ला बोल्हा।

²⁶राजा भी जेसरे साम्हणें हांऊँ निडर हुई किन्हें बोल्या करहा, ये गल्ला जाणहां, होर मुंजो विस्वास आ कि, इन्हा गल्ला मन्झा ले कोई तेस ले नी छुपिरी, क्यूंकि ये सारी गल्ला गुप्ता मन्झ नी हुईरी।

²⁷हे राजा अग्रिप्पा! नबिये जो लिखिरा, क्या तू तेता मन्झ विस्वास करहा? हांऊँ जाणहां कि तू विस्वास करहा।”

²⁸होर अग्रिप्पे पौलुसा किन्हें बोल्या, “क्या तू इतनी असानी किन्हें मुंजो मसीहा रे लोक बणाणा चाहां?”

²⁹पौलुसे जवाब दितेया, “थोह्ड़े टैमा मन्झ, या ज्यादा टैमा मन्झ, परमेसरा ले मेरी प्रार्थना ई कि ना सिर्फ तू बल्कि स्यों सभ, जो भी आज मुंजो सुणेया करहा ऐं जिहां मैं यीसू पर विस्वास कितरा तिहां ईं तिन्हा भी विस्वास करणा, पर हांऊँ नी चाहन्दा की स्यों भी मेरे साहीं बन्धना मन्झ रहे।”

³⁰तेबे हाकम होर राजा अग्रिप्पा होर तेसरी छोटी बैहण बिरनिके होर तिन्हा साउगी बैठणे वाले सभ उठी किन्हें चली गये;

³¹होर जांदे-जांदे आपु मन्झ बोल्दे लगे, “ये आदमी एह्ड़ा ता कुछ नी करदा, जो मौता री सजा या जेल्हा मन्झ पाणे रे लायक हो।”

³²अग्रिप्पे फेस्तुस हाकमा किन्हें बोल्या, “अगर ये आदमी महाराजे से आपणे न्याय करणे री मांग नी करदा, ता एस छुटी जाणा था।”