Read Mandeali चुणिरे चेले रे काम 4 Bible Online

चुणिरे चेले रे काम 4 - Mandeali bible

चुणिरे चेले रे काम 4

¹जेबे पतरस होर यहुन्ना लोका किन्हें ये बोल्या करहा ऐं थे, ता याजक होर मन्दरा रे स्पाहीया रा सरदार होर सदूकी लोके तिन्हा वाले आये।

²क्यूंकि स्यों बौह्त गुस्से हुई गये क्यूंकि स्यों लोका जो यीसू रा उदाहरण देई किन्हें स्खाहें थे कि, होर परमेसर लोका जो मरिरे मन्झा ले जीउंदा करी सका, जिहां तिन्हें यीसू जो जिउंदा कितेया।

³होर तिन्हें स्यों पकड़ी किन्हें दूजे ध्याड़े तक जेल्हा मन्झ रखे क्यूंकि सांझ हुई गयीरी थी।

⁴पर बचना रे सुणने वाले मन्झा ले कई लोके यीसू पर विस्वास कितेया। होर तिन्हा विस्वासिया री गिणती लगभग पांज हज़ार मर्धा रे बराबर थी। (होर ज्नानिया होर बच्चेया री गिणती नी हुई)

⁵अगले ध्याड़े एह्ड़ा हुएया कि यहूदी मुखिये होर अगुवे होर व्यवस्था स्खाणे वाल़े,

⁶होर माहयाजक हन्ना होर कैफा बडा याजक होर यहून्ना होर सिकंदर होर जितने बडे याजका रे घराने रे थे, सभ यरुस्लेम सैहरा मन्झ कठे हुए गये।

⁷होर चुणिरे चेले जो बीचा मन्झ खड़ा करी किन्हें पुछदे लगे कि, “एस माह्णुं जो ठीक करणे री सामर्थ होर हक तुस्सा जो कुणहें दितेया?”

⁸तेबे पतरसे पवित्र आत्मा ले भर्ही किन्हें तिन्हा किन्हें बोल्या, “हे यहूदी मुखियो होर अगुवे

⁹अगर आज आस्सा ले एक लंगड़े आदमी साउगी कितिरी भलाई रे बारे मन्झ ये पूछ ताछ किती जाया करहा ई कि, ये माह्णुं ठीक किहाँ हुई गया।

¹⁰ता तुस्से सभ होर सारे इस्राएल देसा रे लोक जाणी ले कि नासरता रे यीसू मसीह रे नांऊँआं ले जेस जो तुस्से क्रूसा प्रयाल्हे चढ़ाया, होर परमेसरे मरिरे मन्झा ले जिउंदा कितेया, होर ये माह्णुं तुस्सा रे साम्हणें भला चंगा खड़ीरा।

¹¹यीसू मसीह ही से पात्थर आ जेस जो तुस्से मिस्त्रिए बेकार जाणेया होर से कुण रे खास पात्थर बणी गया।

¹²होर यीसू रे सिवा दूजे रे ज्रीए उधार नी हाई; क्यूंकि स्वर्गा हेठ संसारा मन्झ यीसू रे सिवा होर कोई दूजा नांऊँ नी दितिरा, जेसरे ज्रीए आस्से उद्धार पाई सकीऐ।”

¹³जेबे तिन्हें पतरस होर यहून्ना री हिम्मत देखी, होर ये जाणेया कि ये अनपढ़ होर आम आदमी आ। ता तिन्हा जो हरानी हुई; फेरी स्यों प्छ्याणी गये कि, ये यीसू साउगी रही चुकिरे लोक ऐं।

¹⁴होर तेस माह्णुं जो जेह्ड़ा ठीक हुई गईरा था, पतरसा होर यहुन्ना साउगी खड़ीरा देखी किन्हें, स्यों तिन्हारे व्रोधा मन्झ कुछ नी बोली सके।

¹⁵पर तिन्हा जो सभा ले बाहर जाणे रा हुक्म देई किन्हें, स्यों आपु मन्झ विचार करदे लगे

¹⁶कि “आस्से इन्हा दो माह्णुंआं जो सज़ा नी देई सक्दे!” क्यूंकि यरुस्लेम सैहरा मन्झ रैहणे वाले कई लोक ये जाणहां ऐं कि इन्हें माह्णुंऐ एक नौखा चमत्कार कितेया; होर आस्से लोका किन्हें ये नी बोली सक्दे कि एह्ड़ा कुछ नी हुएआ।

¹⁷पर इधी कठे कि ये गल लोका मन्झ होर ज्यादा फैल्ही नी जाए, आऊआ आस्से तिन्हा जो धमकी देईऐ ताकि स्यों एस नांऊँआं ले फेरी केसी माह्णुं किन्हें गल ना करहे।

¹⁸तेबे तिन्हें से सादेया होर चिताई किन्हें ये बोल्या कि, यीसू रे नांऊँआं ले फेरी कुछ नी बोलणा होर ना स्खाल्णा।

¹⁹पर पतरस होर यहून्ने तिन्हा जो जवाब दितेया कि, तुस्से आप्हुए ई फैसला करा कि, परमेसरा री नजरा मन्झ क्या सही आ कि आस्से परमेसरा रा हुक्म मन्ने या तुस्सा रा हुक्म मन्ने।

²⁰क्यूंकि ये ता आस्सा ले नी हुई सक्दा कि, जो आस्से देख्या होर सुणेया, से ना बोले।

²¹ये सुणने रे बाद तिन्हें चुणिरे चेले जो धमकाई किन्हें छाडी दितेया। क्यूंकि लोका री वजहा ले तिन्हा जो सजा देणे रा कोई वजहा नी मिली। इधी कठे कि जो घटना हुईरी थी तेता री वजहा ले सभ लोक परमेसरा री बड़ाई करहा ऐं थे।

²²क्यूंकि तेस माह्णुं री उमर चाली साला ले ऊपर थी, जेस साउगी ये चमत्कार हुईरा था होर से ठीक हुई गईरा था।

²³पतरस होर यहुन्ना छुटी किन्हें आपणे साथिया वाले आई गये, होर जो कुछ मुख्य याजके होर यहूदी मुखिये तिन्हा किन्हें बोल्या था, तिन्हा जो सुणाई दितेया।

²⁴ये सुणी किन्हें, तिन्हें एक मन हुई किन्हें उची अवाज देई किन्हें परमेसरा किन्हें प्रार्थना किती, हे प्रभु, तू सेई आ जिन्हें स्वर्ग होर धरती होर समुद्र होर जो कुछ तिन्हा मन्झ आ बणाया।

²⁵तैं पवित्र आत्मा रे सक्ति ले आपणे सेऊआदार आस्सा रे बापदादे राजा दाऊदा रे ज्रीए बोल्या कि, अन्यजाति लोके हुल्लड़ किधियो मचाई रा? होर देसा रे लोके बेकार गल्ला किधियो सोची लईरी?

²⁶प्रभु होर तेसरे मसीह रे व्रोधा मन्झ धरती रे राजा खड़ी गये, होर हाकम एक साउगी कठे हुए।

²⁷क्यूंकि सच्च गल येई कि तेरे पवित्र सेऊआदार यीसू रे व्रोधा मन्झ, जेसरा तैं अभिसेक कितेया, हेरोदेस राजा होर पुन्तियुस पिलातुस हाकम भी अन्यजाति लोका होर इस्राएल देसा रे लोका साउगी एस सैहरा मन्झ कठे हुए।

²⁸स्यों कठे हुए ताकि तेरी सामर्थ होर इच्छा रे मताबक जो कुछ पैहले ले ई पक्का हुई चुकिरा था, से ही पूरा हो।

²⁹ऐबे, हे प्रभु, तिन्हारी धमिकया जो सुण; होर आपणे सेऊआदारा जो ये बरदान दे कि, तेरा बचन बिना डरे लोका जो सुणाई सके।

³⁰होर चंगा करणे रे कठे तू आपणा हाथा जो ठीक करणे रे कठे अगे कर; कि चिन्ह होर नौखे काम तेरे पवित्र सेऊआदार यीसू रे नांऊँआं ले किते जाए।

³¹जेबे स्यों प्रार्थना करी बैठे, ता से जगहा जेथी स्यों कठे हुईरे थे हिल्ली गया, होर स्यों सभ पवित्र आत्मा किन्हें भर्ही गऐ, होर परमेसरा रा बचन न्डरे सुणान्दे रैहे।

³²होर विस्वास करणे वाल़ेया री मण्डली एक चित होर एक मना रे थे एथी तक कि कोई भी आपणी जायदाद आपणी नी बोल्दा था, पर सभ चीजा तिन्हा वाले बांडा री थी।

³³होर चुणिरे चेले बड़ी सामर्था किन्हें प्रभु यीसू रे मरिरे मन्झा ले जी उठणा री गुआही देंदे रहे होर तिन्हा सभी पर बड़ी अनुग्रह थी।

³⁴होर तिन्हा मन्झ कोई गरीब नी था, क्यूंकि कुछ विस्वासी जिन्हा वाले जे आपणी जमीन या आपणे घर थे, स्यों आपणी जायदादा रा कुछ हिस्सा बेची देहां ऐं थे, होर फेरी स्यों से सारा पैसा चुणिरे चेले जो देई देहां ऐं थे।

³⁵तेबे से ज्रूरतमंद विस्वासी जो जितनी तेसरी ज्रूरत हुंहाँ ईं थी, तेसरी ज्रुरता रे मताबक हर एकी जो बांडी देहां ऐं थे।

³⁶एक माह्णुं था जेसरा नांऊँ यूसुफ था से लेवी घराने रा था होर साईप्रस टापू मन्झ रैंहयां था। चुणिरे चेले तेसरा नांऊँ बरनबास रख्या था। जेसरा मतलब आ दूजेया जो हिम्मत देणे वाल़ा माह्णुं।

³⁷तेसरी कुछ जमीन थी, जो तिन्हें बेची, होर ढब्बे लई किन्हें चुणिरे चेले जो देई दिते।