Read Mandeali चुणिरे चेले रे काम 6 Bible Online

चुणिरे चेले रे काम 6 - Mandeali bible

चुणिरे चेले रे काम 6

¹तिन्हा ध्याड़े जेबे चेलेया री गिणती बौह्त बढ़दी लगी, ता यूनानी भासा बोलणे वाल़े यहूदी चेले, इब्रानी भासा बोलणे वाल़े यहूदी चेलेया पर बड़बड़ करदे लगे कि, हर रोज जेबे खाणा बांडया जाहाँ, तेबे आस्सा री विधवा रा ख्याल नी रख्या जांदा।

²जेबे बारा चुणिरे चेले सुणया कि स्यों क्या सिकायत करेया करहा ऐं ता तिन्हें यरुस्लेमा रे दूजे विस्वासिया जो भी सादी किन्हें तिन्हा किन्हें बोल्या, “ये ठीक नी आ कि आस्से परमेसरा रे बचन रा प्रचार होर उपदेस देणा बंद करी किन्हें खुआणे प्याणे री सेऊआ मन्झ लगी जाए।

³इधी कठे हे भाईयो बैहणो, आपणे मन्झा ले सात खरे आदमिया जो, जो पवित्र आत्मा होर बुद्धि किन्हें भर्हिरे हो, चुणी लऊआ कि, आस्से तिन्हा जो एस कामा पर ल्गाई दे।

⁴पर आस्सा ता प्रार्थना मन्झ होर बचन रा प्रचार होर उपदेस देणा मन्झ लगी रहणा।”

⁵ये गल सारी मंडली जो खरी लगी, होर तिन्हें स्तिफनुस नांऊँआं रे एक आदमी जो, जो विस्वास होर पवित्र आत्मा किन्हें भरीरा था, होर फिलिप्पुस होर प्रखुरूस होर निकानोर होर तिमोन होर परमिनास होर अन्ताकिया सैहरा मन्झ रैहणे वाल़ा निकुलाउस, जो यहूदी पन्था मन्झ आई गईरा था, चुणी लया।

⁶होर स्यों चुणिरे चेले रे साम्हणें ल्यान्दे होर तिन्हें प्रार्थना करी किन्हें एस कामा जो करणे रे कठे नियुक्त कितेया।

⁷होर परमेसरा रा बचन फैहल्दा गया होर यरुस्लेम सैहरा मन्झ चेले री गिणती बौह्त बढ़दी गयी; होर यहूदी याजका रा एक बड़ा समाज यीसू मसीह पर विस्वासा करणे रे संदेसा जो मनी लेया।

⁸स्तिफनुस अनुग्रह होर सामर्था मन्झ भर्ही किन्हें लोका मन्झ बडे-बडे चमत्कार होर चिन्ह दसेया करहा था।

⁹फेरी भी कुछ लोके स्तिफनुसा रा विरोध कितेया ये लोक तेस यहूदी सभा ले थे जेस जो अजाद माह्णुंआं री सभा बोल्हा ऐं थे। ये लोक कुरेनी सैहरा रे होर सिकंदरिया सैहर होर किलकिया होर आसिया रे ईलाके ले थे।

¹⁰पर स्यों स्तिफनुसा रे साम्हणें टिकी नी सके, क्यूंकि पवित्र आत्मा तेस जो बुद्धिमानी किन्हें बोलणे मन्झ मदद करहा था।

¹¹फेरी तिन्हें कुछ लोक लाहल्च देई राजी करी लये ताकि स्यों स्तिफनुसा पर इल्जाम लगाई सको। होर स्यों बोल्दे लगे कि, “आस्से एस जो मूसा होर परमेसरा रे व्रोधा मन्झ निंदा री गल्ला बोल्दे सुणिरा।”

¹²होर तिन्हें स्तिफनुसा रे बरखलाफ यहूदी मुखिये होर व्यवस्था स्खाणे वाल़े भड़काए। तेबे तिन्हें आई किन्हें तेस जो पकड़ी किन्हें माहसभा रे साम्हणें लई आये।

¹³होर तिन्हें झूठे गुआह खड़े किते, जिन्हें स्तिफनुसा पर दोस लगाया होर बोल्या कि, “ये आदमी एस पवित्रजगहा होर मूसा री व्यवस्था रे बरखलाफ बोलणा नी छाडदा।

¹⁴क्यूंकि आस्से तेस जो ये बोल्दे सुणेया कि, एस नासरता रा यीसू ये जगहा ढाई देणी, होर स्यों रुआज बदली देणे जो मूसे आस्सा जो दितिरे।”

¹⁵तेबे सभ लोके जो सभा मन्झ बैठिरे थे, स्तिफिनुसा वखा ध्याना के देख्या कि तेसरा मुंह स्वर्गदूता रे मुंहा साहीं सुझ्या करहा।