Read Mandeali चुणिरे चेले रे काम 8 Bible Online

चुणिरे चेले रे काम 8 - Mandeali bible

चुणिरे चेले रे काम 8

¹जेबे स्तिफनुसा री हत्या हुई तेबे साऊल पूरी तरहा ले तेसरी मौता मन्झ सामिल था होर गुआह भी था। तेस ई ध्याड़े लोक विस्वासी लोका जो बौह्त स्तांदे लगे जो यरुस्लेम सैहरा मन्झ रैहया करहा ऐं थे, सिर्फ चुणिरे चेले ई यरुस्लेमा सैहरा मन्झ रुकिरे रहे होर ज्यादातर विस्वासी लोक यहूदिया ईलाके होर सामरिया ईलाके मन्झ भगी गये।

²होर परमेसरा रे कुछ भक्त आदमिये स्तिफनुसा जो डुआरा मन्झ रखी दितेया; होर तेसरे कठे बड़ा दुःख मणाया।

³पर साऊले कलीसिया जो सताणा सुर्हू कितेया; होर घरा मन्झ घुसी किन्हें विस्वासी भाई होर बैहणा जो घसीटी किन्हें जेल्हा मन्झ पाहां था।

⁴जो लोक तितर-बितर हुई गईरे थे, स्यों खुसी री खबर सुणांदे हुए फिरदे लगे।

⁵होर फिलिप्पुस सामरिया ईलाके रे एक सैहरा मन्झ जाई किन्हें लोका मन्झ मसीह रा प्रचार करदा लग्या।

⁶होर जो गल्ला फिलिप्पुसे बोली तिन्हें लोके सुणी होर जो चिन्ह से दस्हा था तिन्हा जो देखी किन्हें तिन्हें एक मन हुई किन्हें तेसरी गल्ला पर ध्यान दितेया।

⁷होर जेबे फिलिप्पुसे हुक्म देयां था ता बौह्त लोका मन्झा ले दुस्टात्मा बड़े जोरा किन्हें चिंगदी हुई निकली गयी, होर बौह्त सारे अध्रन्गा रे ब्मार होर लंगड़े ठीक हुएया करहा ऐं थे।

⁸होर तेस सैहरा मन्झ लोके बड़ी खुसी मनाई।

⁹तेस सैहरा मन्झ समौन नांऊँआं रा एक आदमी था, जो जादू टोणा करी किन्हें सामरिया सैहरा रे लोका जो हरान करहा था होर आपणे आपा जो बड़ा आदमी बणाहां था।

¹⁰होर तेथी कई सामरी लोक छोटे ले लई किन्हें बड़े तक तेसरी गल मनी किन्हें बोल्हा थे कि, “ये माह्णुं बौह्त सामर्था रे काम करहा, क्यूंकि परमेसरे एस जो बौह्त बड़ी सामर्थ दितिरी।”

¹¹तिन्हें स्यों बौह्त ध्याड़े ले आपणे जादू टोणे रे कामा ले हरान करी रखिरे था, इधी कठे स्यों तेस जो बौह्त मन्हां ऐं थे।

¹²पर जेबे तेथी रे लोके फिलिप्पुसा रा विस्वास कितेया जो परमेसरा रा राजा रा होर यीसू मसीह रे बारे मन्झ खुसी री खबर सुणाहां था ता लोक, क्या मर्ध क्या ज्नाने सब बपतिस्मा लैंदे लगे।

¹³तेबे समौने आपु भी फिलुप्पुसा रे प्रचारा पर विस्वास कितेया होर बपतिस्मा लई किन्हें फिलिप्पुसा साउगी रैहन्दा लग्या, होर चिन्ह होर बडे-बडे चमत्कारा रे काम हुंदे देखी किन्हें हरान हुंहाँ था।

¹⁴जेबे चुणिरे चेले जो यरुस्लेम सैहरा मन्झ थे तिन्हें सुणेया कि सामरिया सैहरा मन्झ परमेसरा रा बचन मनी लईरा ता पतरस होर यहून्ना जो तिन्हा वाले भेज्या।

¹⁵होर तिन्हें तेथी पूजी किन्हें तिन्हारे कठे प्रार्थना किती ताकि स्यों पवित्र आत्मा पाए।

¹⁶क्यूंकि ये हली तक पवित्र आत्मा तिन्हा मन्झा ले केसी जो नी दितरा था, तिन्हा जो ता सिर्फ प्रभु यीसू रे नांऊँआं रा बपतिस्मा ही दितेया गया।

¹⁷तेबे पतरस होर यहून्ना बपतिस्मा देणे वाल़े तिन्हा पर हाथ रखे होर तिन्हें पवित्र आत्मा पाई।

¹⁸जेबे समौने देख्या कि चुणिरे चेले रे हाथ रखणे ले पवित्र आत्मा दितेया जाहाँ, ता तिन्हा वाले ढब्बे ल्याई किन्हें बोल्या,

¹⁹कि “ये सामर्थ मुंजो भी देआ, ताकि हांऊँ जेस केसी पर हाथ रखूं, से पवित्र आत्मा री सामर्थ पाए।”

²⁰पतरसे तेस किन्हें बोल्या, “तेरे ढब्बे तेरे साउगी नास हो, क्यूंकि तैं परमेसरा रा दान ढब्बे किन्हें मुले लैणे रा विचार कितेया।

²¹एस सेऊआ मन्झ ना ता तेरा कोई हिस्सा आ होर ना ई कोई साझ; क्यूंकि तेरा मन परमेसरा रे साम्हणें सच्चा नी आ।

²²इधी कठे तू बुरे विचारा जो सोचणा छाडी दे होर प्रभु ले प्रार्थना कर, हुई सक्हा की प्रभु तेरे मना रे बुरे विचारा जो माफ करी दे।

²³पाप करणा छाडी दे क्यूंकि हांऊँ देख्हा कि, तू कौउड़ी हिर्खा किन्हें भर्ही गईरा होर पापा रे बंधना मन्झ पईरा।

²⁴समौने जवाब दितेया कि, तुस्से मेरे कठे प्रभु ले प्रार्थना करा कि जो गल्ला तुस्से बोलिरी, तिन्हा मन्झा ले कोई मेरे पर नी आई जाए।”

²⁵पतरस होर यहूना गुआही देई किन्हें प्रभु यीसू रा बचन सुणाई किन्हें, यरुस्लेम सैहरा जो वापस चली गये, होर सामरिया ईलाके रे लोक बौह्त गांऊँआं मन्झ खुसी री खबर सुणान्दे रैहे।

²⁶फेरी प्रभु रे एक स्वर्गदूते फिलिप्पुसा किन्हें बोल्या, “उठी किन्हें दक्षिण देसा वखा जो तेस पैंडे पर जा, जो यरुस्लेम सैहरा ले गाजा सैहरा जो जाहाँ, होर ये एक सुनसान पैंडाआ।”

²⁷से उठी किन्हें चली गया। कूस देसा रे एक आदमी आया करहा था जो एक हिजड़ा था, होर कूसीयों री राणी रा मंत्री होर खजांची था, (स्यों आपणी भासा मन्झ राणी जो कन्दाके बोल्हा ऐं थे) होर से अराधना करणे रे कठे यरुस्लेम सैहरा मन्झ आईरा था।

²⁸होर से आपणे रथा पर बैठी किन्हें आपणे देसा जो वापस जाहाँ करा था, होर यसायाह नबी री कताब जोरा किन्हें पढ़दे वापस जाया करहा था।

²⁹तेबे पवित्र आत्मे फिलिप्पुसा किन्हें बोल्या, “नेडे जाई किन्हें तेस रथा साउगी हुई जा।”

³⁰फिलिप्पुस दोड़ी किन्हें रथा वाले पुज्हेया, होर तेस हिजड़े जो यसायाह नबी री कताब पढ़दे हुए सुणेया, होर पूछेया कि, “तू जो पढ़ेया करहा क्या तेता जो सम्झेया करहा?”

³¹तिन्हें बोल्या, “जेबे तक कोई मुंजो नी समझाए ता मां किहाँ समझणा?” होर तिन्हें फिलिप्पुसा किन्हें अर्ज किती कि, रथा पर चढ़ी किन्हें मेरे वाले बैठ। होर फिलिप्पुस तेस साउगी बैठी गया।

³²पवित्र सास्त्रा रा अध्याय जो से पढ़ेया करहा था, से ये था कि; “तेस जो तेस्सा भेडा साहीं काटणे जो लई जाया करहा ऐं थे, होर जिहां छेलू आपणे ऊन तूआरने वाले रे साम्हणें चुपचाप रैंहयां, तिहां ईं तिन्हें भी आपणा मुंह नी खोलेया।

³³से बदनाम कितेया होर तेसरा न्याय नी हुई पाया, होर कोई भी तेसरी बंसा रा ब्खान नी करी सकदा, क्यूंकि तेसरे बच्चे हूंणे ले पैहले ही से मारी दितेया।”

³⁴एता पर हिजड़े फिलिप्पुसा ले पूछेया, “हांऊँ तुध ले अर्ज करहा कि, ये दस कि नबी ये केसरे बारे मन्झ बोल्या करहा, आपणेया केसी दूजे रे बारे मन्झ?”

³⁵तेबे फिलिप्पुसे तेस जो समझाणा सुर्हू कितेया, होर एस ई पवित्र सास्त्रा रे एस बचना ले सुर्हू करी किन्हें तेस जो यीसू री खुसी री खबर सुणाई। तेबे से समझी गया होर तिन्हें यीसू पर विस्वास कितेया।

³⁶पैंडे मन्झ चल्दे-चल्दे स्यों केसी तलाबा पूजे, तेबे हिजड़े बोल्या, “देखा एथी तलाब आ, ऐबे मुंजो बपतिस्मा लैणे रे कठे क्या रूकावट ई?”

³⁷फिलिप्पुसे बोल्या, “अगर तू सारे मना ले विस्वास करहे ता बपतिस्मा लेई सकां।” तिन्हें जवाब दितेया, “हांऊँ विस्वास करहा कि यीसू मसीह ही परमेसरा रा मह्ठा आ।”

³⁸तेबे तिन्हें रथ खड़ा करणे रा हुक्म दितेया, होर फिलिप्पुस होर हिजड़ा दुहें तलाब मन्झ उतरी गये, होर फिलिप्पुस तेस जो बपतिस्मा दितेया।

³⁹तेबे स्यों तलाब मन्झा ले निकली किन्हें गास आई गये, ता प्रभु रा आत्मा फिलिप्पुसा जो चकी किन्हें लई गया, होर हिजड़े से फेरी दबारा नी देख्या, होर से खुसी म्नान्दा आपणे देसा जो वापस गया, क्यूंकि परमेसरे तेसरा उद्धार करी दितेया।

⁴⁰होर फिलिप्पुसा जो अस्दोद सैहरा मन्झ पुजाई दितेया, होर कैसरिया सैहरा पुजणे तक होरी-होरी सैहरा होर गांऊँआं मन्झ जाई किन्हें खुसी री खबर सुणान्दा गया।