Read Mandeali चुणिरे चेले रे काम 9 Bible Online

चुणिरे चेले रे काम 9 - Mandeali bible

चुणिरे चेले रे काम 9

¹“एस बीचा मन्झ साऊल प्रभुया रे चेले जो धमकाणे होर मारणे री धुना मन्झ लगिरा था। एथी तक की से बडे याजका वाले गया,

²होर तिन्हें दमिस्क सैहरा रे यहूदी सभा रे नांऊँआं पर चिठिया मांगी ताकि क्या मर्ध, क्या ज्नाने, तिन्हा जो ‘प्रभु यीसू रे पैंडे’ (लोक यीसू रे चेलेया जो ‘पैंडे रे लोक’ बोल्हा ऐं थे) मन्झ चलाहें तिन्हा जो बान्ही किन्हें यरुस्लेम सैहरा मन्झ लई आये।”

³पर जेबे साऊल होर तेसरे साथी चल्दे-चल्दे दमिस्क सैहरा रे नेडे पुज्हेया, ता अचानक आसमाना ले तेसरे चारो तरफ ज्योति चमकी।

⁴होर से जमीना पर पई गया, होर प्रभु री ये अवाज सुणी कि, “हे साऊल, हे साऊल, तू मुंजो किधियो स्ताया करहा?”

⁵तिन्हें पूछेया, “हे प्रभु, तू कुणहां?” तिन्हें बोल्या, “हांऊँ यीसू आ; जेस जो तू स्ताहां।

⁶पर ऐबे उठी किन्हें सैहरा मन्झ जा, होर तेथी कोई एह्ड़ा हूंणा तेस तुजो दसी देणा तुध क्या करणा।”

⁷जो तेसरे साथी थे, स्यों चुपचाप रही गये; क्यूंकि अवाज ता स्यों सुणहां ऐं थे, पर केसी जो नी देख्दे थे।

⁸तेबे साऊल जमीना ले उठेया, पर जेबे हाखिया खोल्ही ता तेस जो कुछ नी सुझ्या, होर स्यों तेसरा हाथ पकड़ी किन्हें दमिस्क सैहरा मन्झा ले लई गये।

⁹होर से तीन ध्याड़े तक नी देखी सकेया, होर ना खादेया होर ना पितेया।

¹⁰दमिस्क सैहरा मन्झ हनन्याह नांऊँआं रा एक चेला था, तेस किन्हें प्रभु यीसूए दर्सना मन्झ बोल्या, “हे हनन्याह!” तिन्हें बोल्या, “हां प्रभु।”

¹¹तेबे प्रभुए तेस किन्हें बोल्या, “उठी किन्हें तेस गली मन्झ जा जेस जो ‘सीधी’ बोल्हा ऐं, होर यहूदा रे घरा मन्झ साऊल नांऊँआं रा एक तरसुस सैहरा रे रैहणे वाले माह्णुं रे बारे मन्झ पूछी ले; क्यूंकि देख, से प्रार्थना करेया करहा।

¹²होर तिन्हें एक दर्सना मन्झ देखिरा कि हनन्याह नांऊँआं रे एक माह्णुंऐ घरा मन्झ आई किन्हें तेस पर हाथ रख्या ताकि से दबारा देखी सके।”

¹³हनन्याहे जवाब दितेया, “प्रभु, मैं एस आदमी रे बारे मन्झ बौह्त लोका ले सुणिरा कि, इन्हें यरुस्लेम सैहरा मन्झ तेरे परमेसरा रे पवित्र लोका साउगी बडी-बडी बुराईया कितिरी।

¹⁴होर एथी भी एस जो मुख्य याजका री तरफा ले हक मिलिरा कि, जो लोक तेरे पर विस्वास करें, तिन्हा सभी जो बान्ही किन्हें यरुस्लेम सैहरा जो लेई जा।”

¹⁵पर प्रभुए तेस किन्हें बोल्या कि, “तू चला जा; क्यूंकि साऊल ता अन्यजाति लोका होर राजे माहराजे, होर इस्राएल देसा रे साम्हणें मेरा नांऊँ रा प्रचार करणे रे कठे मेरा चुणिरा एक जरीआ।

¹⁶मां तेस जो दसणा कि, मेरे नांऊँआं रे कठे तेस जो केह्ड़ा-केह्ड़ा दुःख उठाणा पऊणा।”

¹⁷तेबे हनन्याह तेस घरा मन्झ गया जेथी साऊल रैंहयां करहा था, होर तेस पर आपणा हाथ रखी किन्हें बोल्या, “हे भाई साऊल, प्रभु यीसूए हांऊँ भेजिरा, जो तेरे पैंडे मन्झ तेरे साम्हणें जाहिर हुएया था कि तू दबारा देखी सके होर पवित्र आत्मा किन्हें भर्ही जाए।”

¹⁸होर झटपट तेसरी हाखिया ले छिलके साहीं पये, होर से देख्दा लग्या होर उठी किन्हें बपतिस्मा लया।

¹⁹फेरी खाणा खाणे ले बाद तेस जो ताकत मिली गयी होर से दमिस्क सैहरा रे चेले साउगी कुछ ध्याड़े तक तेथी रैंहयां।

²⁰फेरी से झटपट दमिस्का सैहरा रे यहूदी सभा मन्झ जाई किन्हें यीसू रा प्रचार करदा लग्या कि, यीसू ही परमेसरा रा मह्ठा आ।

²¹होर जिन्हें पौलुसा रा प्रचार सुणया तिन्हा मन्झा ले कई हरान हुई किन्हें बोल्दे लगे, “क्या ये सेई आदमी नी आ जो यरुस्लेम सैहरा मन्झ तिन्हा सभी जो स्ताया करहा था जो यीसू मसीह रे विस्वासी थे? होर एथी भी इधी कठे आईरा था की तिन्हा जो पकड़ी किन्हें मुख्य याजका रे साम्हणें पेस करी सके?”

²²पर साऊल होर ज्यादा सामर्थी हुन्दा चली गया, होर एस गल्ला रा सबूत देई-देई किन्हें कि यीसू ई मसीह आ, होर दमिस्क सैहरा मन्झ रैहणे वाले यहूदी लोका रा मुंह बंद करदा रैहया।

²³होर जेबे साऊला जो दमिस्का सैहरा मन्झ रैहंदे हुए बौह्त ध्याड़े बीती गये, ता यहूदी लोके मिली किन्हें तेस जो मारणे री योजना बणाई।

²⁴पर तिन्हारी योजना साऊला जो पता चली गयी, स्यों ता राती ध्याड़ी फाटका वाले तेस जो मारणे री ताका मन्झ लगी रैंहयां थे।

²⁵पर राती तेसरे चेले से किरडू मन्झ पाया, होर सैहरा रे चारो वखा बणीरी पात्थरा री उची दिवारा रे खोले बठीये रस्सी मन्झ लटकाई किन्हें से हेठ तुआरी दितेया।

²⁶साऊल यरुस्लेम सैहरा मन्झ पुज्ही किन्हें दूजे विस्वासिया साउगी मिलणे रा जतन कितेया; पर स्यों तेस ले डरहा ऐं थे, तिन्हा जो ये विस्वास नी था कि साऊल भी एक चेला बणी चुकिरा था।

²⁷पर बरनबास तेस जो आपणे साउगी चुणिरे चेले वाले लई जाई किन्हें तिन्हा किन्हें बोल्या कि, इन्हें किहाँ दमिस्क सैहरा मन्झ जाणे वाले पैंडे मन्झ प्रभु जो देख्या, होर इन्हें एस किन्हें गल्ला किती; फेरी दमिस्क सैहरा मन्झ इन्हें बड़ी हिम्मता किन्हें यीसू रे नांऊँआं रा प्रचार कितेया।

²⁸चुणिरे चेले बरनबास री गल्ला पर विस्वास कितेया होर साऊल आपु साउगी रखेया। होर से तिन्हा साउगी सारे यरुस्लेम सैहरा मन्झ आऊंदा जांदा रैंहयां।

²⁹से यूनानी भासा बोलणे वाल़े यहूदी लोका साउगी गलबात होर बैहस करहा था; पर स्यों तेस जो मारणे री कोसिस करदे लगे।

³⁰पर ये जाणी किन्हें विस्वासी तेस जो कैसरिया सैहरा जो लई गये होर तेथी ले जहाजा मन्झ बठाई किन्हें तेस जो आपणे तरसुस सैहरा जो भेजी दितेया।

³¹इधी कठे सारे यहूदिया ईलाके, गलील जिल्ले होर सामरिया ईलाके री कलीसिया रा टैम बड़ी सांति किन्हें बितेया; से कलीसिया होर ज्यादा ताकतवर हुंदी लगी, क्यूंकि से कलीसिया प्रभु ले डरी किन्हें आपणी जिन्दगी बिताहीं थी, होर पवित्र आत्मा री सहायता री वजहा ले बौह्त सारे लोक विस्वासी बणे।

³²होर एह्ड़ा हुएया कि पतरस इन्हा सभी जिल्ले मन्झ घुमदे हुए, से तिन्हा परमेसरा रे पवित्र लोका वाले भी गया, जो लुद्धा गांऊँआं मन्झ रैंहयां ऐं थे।

³³तेथी तेस जो एनियास नांऊँआं रा एक आदमी मिल्या जो आठ साला ले बिस्तरे मन्झ पई रैंहयां ऐं था, क्यूंकि तेस जो अद्रंग हुई गईरा था।

³⁴पतरसे तेस किन्हें बोल्या, “हे एनियास! यीसू मसीह तुजो चंगा करहा; उठ, आपणा बिस्तरा चक।” तेबे से झटपट उठी किन्हें खड़ा हुई गया।

³⁵जो लोक लुद्धा गांऊँआं होर सारोन नांऊँआं रे समुद्री किनारे रे मैदानी ईलाके मन्झ रैहयां ऐं थे, तिन्हें एनियास जो देखी किन्हें प्रभु यीसू मसीह पर विस्वास कितेया।

³⁶याफा सैहरा मन्झ एक तबीता (जेस्सा जो यूनानी भासा दोरकास बोल्हे) नांऊँआं री एक विस्वासण रैंहयां ईं थी। से बौह्त सारे भले-भले काम होर गरीबा जो दान देहां ईं थी।

³⁷तिन्हा ध्याड़े जेबे पतरस लुद्दा गांऊँआं मन्झ था, होर दोरकास ब्मार हुई किन्हें मरी गयी; होर तिन्हें तेस्सा री ल्हास न्हाई धुआई किन्हें उपरले कमरे मन्झ रखी दिती।

³⁸होर इधी कठे कि लुद्धा गांऊँ याफा सैहरा रे नेडे था, चेले ये सुणी किन्हें कि पतरस तेथी आ दो माह्णुं भेजी किन्हें तिन्हें अर्ज किती कि, “आस्सा वाले याफा सैहरा मन्झ आऊणें रे कठे देर ना कर।”

³⁹तेबे पतरस उठी किन्हें तिन्हा साउगी चली गया, होर जेबे से पुज्ही गया, ता स्यों तेस जो उपरले कमरे मन्झ लई गये; होर सभ विधवा रोंदी हुई तेस्सा वाले आई किन्हें खड़ी गयी होर जो कुरते होर कपड़े दोरकासे तिन्हा साउगी रैहन्दे हुए बणाईरे थे दसदी लगी।

⁴⁰तेबे पतरसे सभी जो बाहर भेजी दितेया होर घुटने टेकी किन्हें प्रार्थना किती; होर ल्हासा वखा जो देखी किन्हें बोल्या, “हे तबीता उठ।” तेबे तेस्से आपणी हाखिया खोल्ही दिती; होर पतरसा जो देखी किन्हें से उठी बैठी।

⁴¹होर तिन्हें तेस्सा जो आपणा हाथ देई किन्हें उठाया होर परमेसरा रे पवित्र लोक होर विधवा जो सादी किन्हें तेस्सा जो जिउंदी सौंपी दितेया।

⁴²ये गल सारे याफा सैहरा मन्झ फैल्ही गयी; होर बौह्त लोके प्रभु रे नांऊँआं पर विस्वास कितेया।

⁴³होर पतरस याफा सैहरा मन्झ समौन नांऊँआं रे केसी चामड़े रा काम धंधा करणे वाले रे घरा बौह्त ध्याड़े तक रैंहयां।