Read Mandeali रोमियो 10 Bible Online

रोमियो 10 - Mandeali bible

रोमियो 10

¹हे भाईयो होर बैहणो, मेरे मना री इच्छा होर मेरे आपणे यहूदी लोका रे कठे मेरी प्रार्थना ई कि, परमेसर तिन्हारा उद्धार करहे।

²क्यूंकि हांऊँ तिन्हारी गुआही देहां कि, स्यों परमेसरा रे कठे हिम्मत रखे, पर परमेसरा री सेऊआ करणे री सही समझ तिन्हा वाले नी।

³क्यूंकि स्यों एस गल्ला जो नी मनणा चाहंदे कि परमेसरा किहाँ आपणी नजरा मन्झ लोका जो धर्मी माह्णुं बणा, इधी कठे स्यों आपणे तरीके ले धर्मी हूंणे री कोसिस करहे। क्यूंकि स्यों एस गल्ला जो नी मनणा चाहें थे कि किहाँ परमेसर लोका जो आपणी नजरा मन्झ धर्मी माह्णुं बणा।

⁴क्यूंकि मसीह रे आऊणें ले व्यवस्था रा मकसद पूरा हुआ। होर इधी कठे अगर कोई मसीह पर विस्वास करहा ता परमेसर तेजो आपणी नजरा मन्झ धर्मी माह्णुं बणा।

⁵मूसे नबिये व्यवस्था जो मन्नदे हुए धर्मी माह्णुं बणने रे बारे मन्झ पवित्र सास्त्रा मन्झ ये लिखिरा कि, “जो माह्णुं व्यवस्था रे हुक्मा जो मन्हा, तेस एस वजहा ले ई जिउंदे रैहणां।”

⁶पर विस्वासा रे ज्रीए परमेसरा रे नजरा मन्झ धर्मी माह्णुं बणने रे बारे मन्झ पवित्र सास्त्रा ये लिखिरा कि, “तू ये देख्या बोलदा कि मसीहा जो हेठ ल्याऊणे रे कठे स्वर्गा जो केस जाणा?”

⁷होर ये भी देख्या बोलदा कि, “हेठ पताल लोका मन्झ मसीह जो मरिरे मन्झा ले जिउंदा करणे रे कठे केस जाणा?”

⁸पर एह्ड़ा लिखिरा कि, “परमेसरा रा वचन तेरे वाले आ, होर तेजो तुस्से आपणे मुंहा ले बोली सके होर आपणे दिला मन्झ मन्हां ईं सके।” ये सेई विस्वासा रा बचन आ, जो आस्से प्रचार करहा ऐं।

⁹अगर तू लोका रे साम्हणें यीसू जो प्रभु मन्हां ईं ले, होर आपणे मना मन्झ ये भी विस्वास करहे कि, परमेसरे मसीह जो मरिरे मन्झा ले जिउंदा कितेया, ता परमेसरा पक्का तुस्सा रा उद्धार करणा।

¹⁰होर आस्से आपणे मना ले विस्वास करहे, होर इधी कठे ही परमेसरे आस्सो आपणी नजरा मन्झ धर्मी माह्णुं बणाया। आस्से ये अंगीकार करहे होर मसीह पर विस्वास करहे, इधी कठे आस्सा रा उद्धार हुणा।

¹¹क्यूंकि यसायाह नबिये पवित्र सास्त्र मन्झ मसीह रे बारे मन्झ ये लिखिरा कि, “जो कोई तेस पर विस्वास करघा, तेस सर्मिन्दा नी हूंणां।”

¹²यहूदी लोका होर गैर-यहूदी लोका मन्झ कुछ फर्क नी हाया, इधी कठे कि परमेसर सभिरा प्रभु आ; होर जो मदद रे कठे तेजो हाका पाए तिन्हो बौह्त आसीस देआ।

¹³क्यूंकि पवित्र सास्त्रा मन्झ लिखिरा, “जो कोई प्रभु जो मदद रे कठे हाका पांगा, तेसरा उद्धार हूंणा।”

¹⁴पर जिन्हें लोके प्रभु यीसू मसीह पर विस्वास नी कितेया, ता तिन्हा से मददा रे कठे किधियो हाका पाणी? अगर तिन्हें प्रभु रे बारे मन्झ नी सुणिरा ता तेस पर विस्वास किहाँ करणा? होर स्यों किहाँ सुणी सके जेबे तक कि तिन्हो कोई प्रभु रे बारे मन्झ नी सुणाये?

¹⁵होर कोई तिन्हा वाले जाई किन्हें किधियो सुणाये, जेबे तक कि प्रभुऐ स्यों नी भेजिरे हो? होर इधी कठे पवित्र सास्त्रा मन्झ लिखिरा, “तिन्हा लोका रे पैर कितने बांके ऐं, जो खरी खबरा री खुसी री खबर ल्याए!”

¹⁶पर सभीए तेस खुसी री खबरा पर विस्वास नी कितेया। यसायाह नबी बोल्हा कि, “हे प्रभु, आस्सा री खबरा पर केसिए विस्वास नी कितेया।”

¹⁷इधी कठे विस्वास एस खबरा जो सुणने ले आहूँआं, होर ये खबर से बचन आ जो मसीह रे बारे मन्झ दसी।

¹⁸पर हांऊँ तुस्सा किन्हें बोला कि पक्का यहूदी लोके मसीह रे बारे मन्झ सुणेया ता हूँगा। क्यूंकि पवित्र सास्त्रा मन्झ लिखिरा कि, “तिन्हारी अवाज सारी धरती पर, होर तिन्हारे बचन संसारा रे हर जगहा पूजी गये।”

¹⁹फेरी हांऊँ तुस्सा ले पूछा कि, क्या इस्राएल देसा रे लोक मसीह रे बारे मन्झ नी जाणदे थे? सभी ले पैहले ता ये गल प्रभुए मूसा नबिये किन्हें बोलिरी थी, “मां तुस्सा यहूदी लोका रे मना मन्झ गैर-यहूदी लोका रे ज्रीए जो हकीकता मन्झ एक जाति भी नी, जलनी पैदा करणी, होर मां नर्क्कली जाति लोका रे ज्रीए तुस्सा रे मना मन्झ गुस्सा पैदा करणा।”

²⁰फेरी यसायाह नबिये बड़ी हिम्मता साउगी ये बोल्या जो परमेसरे तेस किन्हें बोलिरा था, “जो मुंजो तोप्दे नी थे, तिन्हें हांऊँ पाई लया; होर जो मुंजो पुछदे भी नी थे, तिन्हा पर हांऊँ जाहिर हुई गया।”

²¹पर इस्राएल देसा रे लोका रे बारे मन्झ परमेसरे यसायाह नबी रे ज्रीए ये भी बोल्हा कि, “हांऊँ सारा ध्याड़ा आपणे हाथ एक हुक्म नी मनणे वाले होर मेरे बरखलाप रैहणे वाली प्रजा री तरफ पसारे रैंहयां कि वापस तिन्हो आपणे वाले आऊणें रे कठे सादी सकूं।”