Read Mandeali रोमियो 11 Bible Online

रोमियो 11 - Mandeali bible

रोमियो 11

¹इधी कठे हांऊँ पूछा, क्या परमेसरे आपणी प्रजा जो छाडी दितेया? नी कधी नी; हांऊँ भी ता इस्राएल देसा रा आ: अब्राहमा रे बंस होर बिन्यामिना रे गोत्रा मन्झा ले आ।

²परमेसरे आपणी से प्रजा नी छाडी, जेस जो तिन्हें पैहले ले ई चुणी लितिरा। तुस्से जाणदे कि, पवित्र सास्त्र एलिय्याह नबी रे बारे मन्झ क्या लिखिरा कि से इस्राएल देसा रे लोका रे व्रोधा मन्झ परमेसरा ले सिकायत करहे।

³से बोल्हा कि, “हे प्रभु, तिन्हें तेरे नबी घात किते, होर तुस्सा री वेदिया सटी दिती; होर तेरे हुकमा जो मनणे वाल़ा हांऊँ कल्हा ई रही गईरा, होर स्यों मुंजो भी मारणा चांहे।”

⁴पर तेबे परमेसरे एलिय्याह नबी किन्हें बोल्या, “मैं आपणे कठे सात हजार माह्णुं रखी छाडीरे जिन्हें बाल देऊआ री पूजा करणे रे कठे घुटने नी टेके।”

⁵होर तिहां ईं एस टैम परमेसरा रे अनुग्रहा री वजहा ले इन्हा यहूदी लोका मन्झा ले कुछ लोक बचीरे जिन्हों परमेसरे आपणे लोक बणने रे कठे चुणिरा।

⁶अगर परमेसरे तिन्हो आपणे अनुग्रहा ले चुणिरा, ता फेरी ये खरे कामा जो पूरा करी किन्हें नी हुआ। अगर ये खरे कामा री वजहा ले हुआ ता फेरी अनुग्रह, अनुग्रह नी रैंहयां।

⁷ता नतीजा ये हुआ, हालांकि इस्राएल देसा रे लोक चाहें थे कि परमेसर तिन्हो आपणी नजरा मन्झ धर्मी माह्णुं बणाए, पर एह्ड़ा नी हुआ। पर परमेसरे जिन्हों चुणेया तिन्हो आपणी नजरा मन्झ धर्मी माह्णुं बणाया। बाकि लोके ढीठ हुई किन्हें परमेसरा रे हुकमा जो टाल्ली दितेया।

⁸यसायाह नबी रे ज्रीए जेह्ड़ा पवित्र सास्त्रा मन्झ लिखिरा कि, “परमेसरे तिन्हो आजा तक कमजोर दिमाग देई दितेया, होर एह्ड़ी हाखिया दिती जो नी देखी सके, होर एह्ड़े कान दिते जो नी सुणें।”

⁹होर राजा दाऊद अर्ज करी किन्हें बोल्हा, “स्यों धाम खांदे टैम अचानक एक पक्षी साहीं जाला मन्झ फसी किन्हें पकड़ी जाएं, होर एक डांगरे साहीं खोले मन्झ पई जाएं, ताकि तिन्हो ठीक ढंगा किन्हें सजा मिले।

¹⁰तिन्हारी हाखिया एह्ड़ी काणी हुई जाये ताकि स्यों देखी नी सको, होर तू हमेसा परेसानिया जो देई किन्हें तिन्हारी पीठा जो झुकाई किन्हें रख्या।”

¹¹हांऊँ पूछा, क्या यहूदी लोक ठोकर लगणे री वजहा ले नास हुई गईरे? नी कधी नी! पर तिन्हें परमेसरा रे हुक्म नी मनणे री वजहा ले अन्यजाति लोका रा उद्धार हुआ, ताकि इस्राएला देसा रे लोक तिन्हें ले जल्हे।

¹²इस्राएल लोका रा परमेसरा रे हुक्म नी मनणा, अन्यजाति लोका रे कठे भलाई री वजहा हुई; ता जेबे इस्राएली लोका परमेसरा वखा जो वापस आऊंणा ता अन्यजाति लोका रे कठे कितनी ज्यादा भलाई हूणीं।

¹³हांऊँ तुस्सा अन्यजाति लोका किन्हें ये गल्ला बोल्हा। जेब्की हांऊँ अन्यजाति लोका रे कठे चुणिरे चेले आ, ता हांऊँ आपणी सेऊआ री बड़ाई करहा।

¹⁴ताकि किहाँ नी किहाँ हांऊँ आपणे यहूदी लोका मन्झ जल्नी कुराई किन्हें तिन्हा मन्झा ले एकी रा भी उद्धार करी सकूं।

¹⁵क्यूंकि जेबे इस्राएल लोका जो छाडी दितेया ता संसारा रे बाकि लोका रा परमेसरा किन्हें मेल मिलाप हुआ। ता इस्राएला रे लोका रा यीसू जो मसीह ग्रहण करणा, केसी रा मरिरे मन्झा ले जिउंदा हूंणे रे बराबर हूणा।

¹⁶हांऊँ इस्राएला रे लोका रे बारे मन्झ तुस्सा जो ये उदाहरण देआ, आस्सा यहूदी लोका रा ये रुआज आ कि जेबे आस्से रोटी बणाने रे कठे आटा बाटे ता पैहला पेड़ा आस्से परमेसरा रे कठे[4] रखे। अगर ये एक पेड़ा परमेसरा रा ता ये पूरा बाटीरा आटा भी परमेसरा रा। होर डाला रा उदाहरण भी एह्ड़ा ही आ, अगर जड़ परमेसरा री ता पांगे भी तेसरे हूणें।

¹⁷होर इस्राएला रे लोक खेती वाले जैतूना रे पांगे साहीं ऐ, होर अब्राहम, इसहाक होर याकूब एस डाला री जड़ा साहीं आ। होर अगर एस जैतूना रे डाला रे कुछ पांगे तोड़ी दिते जाए, होर तू जो एक जंगली जैतूना रे डाला रे पांगे साहीं आ होर तेता पर कलम करी दिती जाए, ता यहूदी लोका जो मिलणे वाली आसिसा रा फायदा तुस्सा जो भी हुआ। ठीक तिहां ही जिहां जंगली जैतूना रे डाला रे पांगे जो खेती वाले डाला री जड़ा ले रस मिला।

¹⁸ता तुस्से तिन्हा टूटीरे पांगे जो कम देख्या समझ्दे। तुस्से किहाँ बडयाई करी सके क्यूंकि तू सिर्फ एक पांगा ई आ। ता याद रख्या कि तू जड़ा जो नी पर जड़ तुजो सम्भाल्हा ई।

¹⁹फेरी तू ये बोली सक्हा कि, “परमेसरे यहूदी लोका जो तेस टूटीरे पांगे साहीं नकारी दितेया कि से अन्यजाति रे लोको जो अपनाई ले जो कलम कितिरी पांगे साहीं।”

²⁰ये सच्च आ, स्यों ता विस्वास नी करणे री वजहा ले तोड़ी गई, पर तू आपणे विस्वासा री वजहा ले बणी रैंहयां पर बडयाई देख्या करदा, पर एस गल्ला ले डर तेरे किन्हें क्या हुई सक्हा था।

²¹क्यूंकि जेबे परमेसरे असली पांगे पर दया नी किती, ता तेस तुस्सा पर भी दया नी करणी जो सिर्फ कलम कितरे पांगे।

²²इधी कठे परमेसरा री दया होर सख्ती रे बारे मन्झ ध्याना किन्हें सोचा! परमेसरे यहूदी लोका रे प्रति सख्ती बरती, जिन्हें तेसरा हुक्म नी मन्नेया। परमेसरे तुस्सा पर दया किती, पर अगर तू एस दया जो नी समझ्हा ता तुध पर सख्ती बरती जाणी।

²³होर अगर स्यों यहूदी लोक जो पांगे साहीं काटी दितिरे थे, अगर स्यों परमेसरा वाले वापस आई किन्हें विस्वास करहे, ता स्यों दबारा डाला किन्हें कलम किते जाणे, क्यूंकि परमेसर ये करणे रे लायक आ।

²⁴क्यूंकि अगर तू जो जंगली जैतूना रा पांगा आ तू काटीरा हो, होर जंगली हूंणे रे बाद भी एक खरे जैतूना रे डाला किन्हें कलम करी दितिरा हो, ता ये जो खरे जैतूना रे ही पांगे ऐं, इन्हारे कठे ता होर भी असान आ कि तिन्हो आपणे ई जैतूना रे डाला किन्हें दबारा कलम करही किन्हें जोड़ी दितिरा हो।

²⁵हे भाईयो होर बैहणो, हांऊँ चाहां कि तुस्से एस गुप्त सच्चाई जो समझी लो ताकि तुस्से बडयाई ना करो। होर इस्राएल रे लोका रे बारे मन्झ गुप्त सच्चाई ये ही कि जेबे तक सब अन्यजाति रे लोक मसीह वाले नी आई जांदे, तेबे तक इस्राएल देसा रे कुछ लोका एह्ड़े ही ढीठ बणी रैंह्णां।

²⁶होर इंहां करी किन्हें जेबे सारे अन्यजाति रे लोका मसीहा वाले आई जाणा तेबे परमेसरा सारे इस्राएल देसा रे लोका रा उद्धार करणा। जिहां पवित्र सास्त्रा मन्झ लिखिरा कि, “छुड़ाणे वाल़ा सिय्योन[5] सैहरा ले आऊंणा, होर याकूबा रे बंसा मन्झ ले अभक्ति दूर करणी

²⁷होर तिन्हा साउगी मेरी येई वाचा हूणीं, जेबे मां तिन्हारे पाप माफ करी देणे।”

²⁸यहूदी लोक परमेसरा रे दुस्मण बणी गईरे, क्यूंकि तिन्हें खुसी री खबरा पर विस्वास नी कितेया, होर एता ले तुस्सा रा फायदा हुआ। पर परमेसर तिन्हा किन्हें प्यार करहा, क्यूंकि तिन्हारे बाप-दादेया जो दितिरी वाचा रे मताबक परमेसरे स्यों आपणे लोक हूंणे रे कठे चुणी लितिरे थे।

²⁹क्यूंकि परमेसर आपणे दाना ले, होर बुलाहटा ले कधी पीछे नी हटदा।

³⁰क्यूंकि जिहां तुस्से अन्यजाति रे लोके पैहले परमेसरा रा हुक्म नी मन्या, पर ऐबे परमेसरे तुस्सा पर दया कितिरी, क्यूंकि ऐबे इस्राएली लोके परमेसरा रे हुक्म नी मन्नदे।

³¹ऐबे तुस्सा पर दया हुईरी इधी कठे परमेसरा तिन्हा पर भी दया करणी।

³²क्यूंकि सभ लोक परमेसरा रा हुक्म नी मन्नदे होर इधी कठे परमेसरा तिन्हा किन्हें कैदी वाल़ा सलूक करहा। पर से एह्ड़ा इधी कठे करहा कि से सभी पर दया करी सके।

³³वाह! परमेसरा रा धन, बुद्धि होर ज्ञान सच्चे ई महान ऐं! तेसरे विचार जो कोई बयान नी करी सकदा, होर तेसरे पैंडे जो कोई नी समझी सकदा।

³⁴“प्रभु री बुद्धि जो कोई नी समझी सकदा? या कुण तेस जो सलाह देई सक्हा?

³⁵या कुन्हें पैहले तेस जो कुछ दितेया जेसरा बदला तेस जो दितेया जाए? एह्ड़ा कोई नी आ।”

³⁶क्यूंकि सभ कुछ परमेसरा री तरफा ले आ, होर तेसरे ज्रीए ही बणी रैहयां, होर तेसरे ही महिमा रे कठे आ। हांऊँ प्रार्थना करहा कि लोक परमेसरा री महिमा जुग-जुग करदे रहे। आमीन।