Read Mandeali रोमियो 15 Bible Online

रोमियो 15 - Mandeali bible

रोमियो 15

¹हुई सक्हा कि आस्से जो विस्वासा मन्झ मजबूत ऐं जाणांहे कि इन्हा सभी गल्ला ले कोई फर्क नी पउन्दा, पर आस्से इन्हा कामा जो आपणे आपा जो खुस करणे रे कठे नी करी सकदे। आस्सो तिन्हा लोका रे सक होर डरा पर विचार करणा चहिए जो सोचे ये कि ये चीजा करणा गलत आ।

²आस्सा मन्झा ले हर एक जो आपणे विस्वासी भाई होर बैहणा साउगी खरा करणा चहिए, होर जेता ले से खुस हुई जाये होर आपणे विस्वास जो मजबूत करी सके।

³क्यूंकि मसीहे आपणे आपा जो खुस नी कितेया, पर जिहां पवित्र सास्त्रा मन्झ लिखिरा कि, “तेरे निंदा करणे वाले री मेरी निंदा कितिरी।”

⁴जितनी गल्ला पैहले ले पवित्र सास्त्रा मन्झ लिखी गई, स्यों आस्सा जो स्खाणे रे कठे ई लिखी गईरी कि आस्सो धीरज होर होंसला मिली सके, जो पवित्र सास्त्र आस्सो देआ। ताकि आस्सो से आस मिले जो परमेसरे आस्सा जो देणे रा वादा कितिरा।

⁵होर हांऊँ प्रार्थना करहा कि धीरज होर होंसला देणे वाल़ा परमेसर तुस्सा जो एक दूजे किन्हें सांति साउगी जीणे मन्झ तुस्सा री मदद करहे; जेह्ड़ी मसीह यीसू रे हुक्म मनणे वाले रे कठे सही समझा जां।

⁶ताकि तुस्से सभ मिली किन्हें आस्सा रे परमेसर, प्रभु यीसू मसीह रे बापू री बड़ाई करा।

⁷इधी कठे, जिहां मसीहे तुस्से ग्रैहण कितिरे, तिहां ईं तुस्से भी एक दूजे जो ग्रैहण करा ताकि एह्ड़ा करणे रे लोक परमेसरा री बड़ाई करहे।

⁸हांऊँ बोल्हा आ कि, जो वादा बापदादेया जो दितिरा था, तिन्हा वादे जो पूरा करणे रे कठे होर ये जाहिर करणे रे कठे कि परमेसर सच्चा आ, मसीह यहूदी लोका रा सेऊआदार बणेया।

⁹होर गैर-यहूदी रे लोका भी परमेसर री दया री वजहा ले परमेसरा री बड़ाई करहे, जिहां पवित्र सास्त्रा मन्झ लिखिरा, “इधी कठे मां जाति-जाति रे लोका मन्झ तेरी बढ़ाई करणी, होर तुस्सा रे नांऊँआं रा भजन गाणा।”

¹⁰पवित्र सास्त्रा मन्झ ये भी लिखिरा, “हे जाति-जातिया रे सब लोको, परमेसरा री प्रजा साउगी खुसी मनाऊआ।”

¹¹होर एक होर जगहा पवित्र सास्त्रा मन्झ ये लिखिरा, “हे जाति-जातिया रे सब लोको, प्रभु री बड़ाई करा, होर हे राज्य-राज्य रे सब लोको; तेसरी बड़ाई करा।”

¹²होर फेरी यसायाह नबीये पवित्र सास्त्रा मन्झ लिखिरा, “यिसै[7] री एक बंस आऊंणा, होर अन्यजाति रे लोका रा हाकम हूंणा, तेस पर अन्यजाति रे लोका आस रखणी कि, तेस तिन्हारा उद्धार करणा।”

¹³हांऊँ प्रार्थना करहा कि परमेसर जो तुस्सा जो आस देआ, से तुस्सा जो तेस पर विस्वास करणे रे कारण आपणी बड़ी खुसी होर सांति किन्हें भरे, ताकि पवित्र आत्मा री सामर्था ले तुस्सा री आस होर भी बढ़दी जाए।

¹⁴हे मेरे भाईयो होर बैहणो, हांऊँ आपु भी तुस्सा रे बारे मन्झ पक्का जाणहां कि, तुस्से भी आपु ई भले काम रे भर्ही रे। होर ये जाणांहे कि परमेसर तुस्सा ले क्या चांहा होर एक दूजे जो सिखाई भी सक्हा ऐं।

¹⁵फेरी भी मैं कुछ गल्ला बौह्त हिम्मत करी किन्हें लिखी कि, तुस्सा जो दबारा इन्हा गल्ला जो याद कुराई सकूं। ये तेस अनुग्रह री वजहा ले हुआ, जो परमेसरे मुंजो दितिरा।

¹⁶कि हांऊँ अन्यजाति रे लोका रे कठे मसीह यीसू रा सेऊआदार हुई किन्हें एक याजका साहीं परमेसरा रे वखा ले खुसी री खबरा रा प्रचार करहा। जेस ले अन्यजाति लोका जो जिन्हा जो पवित्र आत्मे पवित्र कितिरा, तिन्हा जो हांऊँ परमेसरा जो चढावे मन्झ चढ़ाई सकूं, जेस ले परमेसरा खुस हूंणा।

¹⁷इधी कठे हांऊँ यीसू मसीह री वजहा ले ही परमेसरा री सेऊआ पर गर्व करी सक्हा।

¹⁸क्यूंकि हांऊँ हिम्मत करी किन्हें बोली सक्हा कि जो काम मसीहे मेरे ज्रीए किते, तेसरी वजहा ले हांऊँ अन्यजाति लोका जो परमेसरा रा हुक्म मनणे रे कठे त्यार करी पाया। होर जेबे तिन्हें मेरी गल्ला सुणी होर मेरे काम देखे, तेबे तिन्हें परमेसरा पर विस्वास कितेया।

¹⁹पवित्र आत्मा रे दितिरे सामर्था ले हांऊँ चिन्ह होर नौखे काम करहा। होर इधी कठे यरुस्लेम सैहरा ले लई किन्हे इल्लुरिकुमा जिल्ले तक हांऊँ जेथी तक गया तेथी मै सारे लोका किन्हें मसीह रे बारे मन्झ खुसी री खबरा रा प्रचार कितेया।

²⁰पर आस्सा रे मना री सभी ले बड़ी इच्छा येई कि, खुसी री खबरा रा प्रचार तिन्हा जगहा मन्झ, जेथी मसीह यीसू रे बारे मन्झ हाल्ले तक नी सुणीरा हो तेथी प्रचार करूं। हांऊँ तेस घर बनाणे वाले साहीं आ जो दूजे री निंऊँआं पर घर नी बणान्दा।

²¹पर पवित्र सास्त्रा मन्झ लिखिरी एस्सा गल्ला जो हांऊँ पूरा करणा चांहां, “जिन्हा वाले तेसरी खुसी री खबरा नी पूजी, तिन्हा ई से देखणा, होर जिन्हें नी सुणेया तिन्हा ई समझणा।”

²²तुस्सा वाले आऊणें रे कठे हांऊँ केसिए बार-बार रोक्या, क्यूंकि हांऊँ इन्हा जगहा मन्झ प्रचार रा काम करेया करहा था।

²³पर ऐबे इन्हा सारी जगहा मन्झ, मैं तिन्हा सभी जो खुसी री खबर प्रचार किती, जिन्हें मसीह रे बारे मन्झ नी सुणीरा था। क्यूंकि कई साल्ला ले मेरी येह इच्छा ई कि हांऊँ तुस्सा किन्हें मिलू इधी कठे ऐबे मां तुस्सा वाले आऊंणा।

²⁴इधी कठे जेबे मां इस्पानिया देसा जो जाणा ता मुंजो आसा ई कि तेथी जांदे हुए मेरी मुलाकात तुस्सा किन्हें हूणीं। होर तुस्सा साउगी संगती करणे मन्झ खुस हुई जांऊँ, होर इस्पानिया देसा रे सफरा कठे तुस्से मेरी मदद करो।

²⁵पर ऐबे ता हांऊँ परमेसरा रे पवित्र लोका जो ढब्बे री मदद करणे रे कठे यरुस्लेम सैहरा जो जाया करहा।

²⁶क्यूंकि मकीदुनिया होर अखाया ईलाके रे लोका जो पुरे दिला ले एस कामा जो करणा खरा लग्या कि जो परमेसरा रे पवित्र लोक यरुस्लेम सैहरा मन्झ ऐे होर गरीब लोक ऐे, तिन्हारी मदद करणे रे कठे कुछ ढब्बे कठ्ठा करूं।

²⁷तिन्हें ये खुसी किन्हें कितेया, यरुस्लेम सैहरा रे लोक तिन्हारे कर्जदार भी ऐं, क्यूंकि परमेसरा ले खरी चीजा जो पाणे रे कठे यहूदी लोका साउगी अन्यजाति रे लोक भी साझी हुए, होर ये बिलकुल ठीक आ कि, एस दुनिया री खरी गल्ला मन्झ अन्यजाति रे लोक साउगी यहूदी लोक साझी हो।

²⁸इधी कठे मां पैहले यरुस्लेम सैहरा जो जाई किन्हें तिन्हो ये कठ्ठा कितिरे ढब्बे देई किन्हें तिन्हारी मदद करणी। तेता ले बाद रोम सैहरा मन्झ आई किन्हें तुस्सा किन्हें मिलणा, होर तेबे इस्पानिया देसा जो चली जाणा।

²⁹होर हांऊँ जाणहां कि, जेबे मां तुस्सा वाले आऊंणा, ता तुस्सा मेरे साउगी मसीह रे दितिरी महान आसीसा मन्झ साझीदार बणना।

³⁰होर हे भाईयो होर बैहणो, हांऊँ प्रभु यीसू मसीह पर आस्सा रे विस्वासा री वजहा ले होर तेस प्यारा री वजहा ले जो पवित्र आत्मे दितिरी, हांऊँ तुस्सा ले बिनती करहा कि तुस्से सभ मेरे कठे मेरे साउगी परमेसरा ले बौह्त ईमानदारी किन्हें प्रार्थना करहा।

³¹कि परमेसर मुंजो यहूदिया ईलाके मन्झ रैहणे वाले अविस्वासी लोका ले बचाई रखे। होर ये ढब्बे री मदद जो हांऊँ यरुस्लेम सैहरा रे मन्झ लेई जाई करहा, एता ले तेथी रैहणे वाले परमेसरा रे पवित्र लोका जो खुसी मिली सके।

³²होर ये भी कि हांऊँ परमेसरा री इच्छा ले तुस्सा वाले खुसी साउगी आऊ, होर तुस्सा साउगी रही किन्हें अराम पांऊँ।

³³हांऊँ प्रार्थना करहा कि सांति देणे वाल़ा परमेसर तुस्सा सभी साउगी रहे। आमीन।