Read Mandeali रोमियो 16 Bible Online

रोमियो 16 - Mandeali bible

रोमियो 16

¹हांऊँ एस्सा चिठ्ठी रे ज्रीए फीबे नांऊँआं री मसीह बैहणा रा परिचय तुस्सा साउगी कुराणा चांहा। जो ये चिठ्ठी तुस्सा तक पुजाणी। ये बैहण किंख्रिया सैहरा री कलीसिया री अगुवी ई।

²तुस्से ये जाणी किन्हें तेस्सा रा स्वागत करहा कि तुस्से सभ प्रभु रे लोक ऐं; होर अगर एस्सा जो कुछ चीजा री ज्रूरत हो ता तुस्से मदद करेया। क्यूंकि एस्से मेरी होर मेरे साउगी कईया री मदद कितिरी।

³प्रिसकिल्ला बैहण होर तेस्सा रे लाड़े अक्विला भाई जो मेरा नमस्कार, जो प्रभु यीसू मसीह री सेऊआ रे कामा करणे मन्झ मेरे सहकर्मी ऐं।

⁴तिन्हें मेरे प्राणा रे कठे आपणी जिन्दगी दाऊआ पर ल्गाई रखिरी थी होर सिर्फ हांऊँ नी, पर अन्यजाति लोका री सारी कलीसिया रे लोक भी तिन्हारा धन्यावाद करहा ऐं।

⁵होर तेस्सा कलीसिया रे लोका जो भी नमस्कार, जो तिन्हारे घरा मन्झ कठा हुई। मेरे लाडले दोस्त इपैनितुस भाई जो मेरा नमस्कार, जिन्हें आसिया रे ईलाके मन्झ सभी ले पैहले मसीह पर विस्वास कितेया।

⁶मरियम बैहणा जो भी मेरा नमस्कार, जेस्से जे तुस्सा रे कठे बौह्त ज्यादा मैहनत किती।

⁷अन्द्रुनिकुस भाई होर युनियास बैहण जो भी मेरा नमस्कार जो यहूदी लोक ऐे, होर मेरे साउगी जेल्हा मन्झ थे। इन्हों चुणिरे चेले बौह्त इज्जत देहें, क्यूंकि स्यों मेरे ले पैहले मसीह विस्वासी बणी गईरे थे।

⁸अम्पलियातुस भाई जो भी मेरा नमस्कार, जो प्रभु मन्झ मेरा लाडला दोस्त आ।

⁹उरबानुसा भाई जो भी मेरा नमस्कार, जो मसीह यीसू री सेऊआ करणे रे कामा मन्झ आस्सा रा सहकर्मी आ, होर मेरे लाडले दोस्त इस्तखुस भाई जो भी मेरा नमस्कार।

¹⁰अपिल्लेस भाई जो मेरा नमस्कार, जो परखणी रे बाद भी मसीह पर विस्वास करणे मन्झ मजबूत रह्या। अरिस्तुबुलुस भाईया रे परिवारा जो भी मेरा नमस्कार।

¹¹मेरी यहूदी भाई हेरोदियोन जो नमस्कार। नरकिस्सुस भाई रे परिवारा रे लोक जो मेरा नमस्कार, जो प्रभु यीसू पर विस्वास करहे।

¹²त्रूफैन्ना होर त्रूफोसा दुहीं बैहणा जो नमस्कार, जो प्रभु रे कामा रे कठे मैहनत करही। लाडली दोस्त पिरसिस बैहणा जो मेरा नमस्कार, जो प्रभु रे कामा रे कठे बौह्त ज्यादा मैहनत करही।

¹³रूफुस भाई जो प्रभु रे ज्रीए चुणिरा खास सेऊआदार आ, होर तेसरी माऊ, जो मेरी माऊआ साहीं ई, तिन्हा दुंहीं जो नमस्कार।

¹⁴असुंक्रितुस होर फिलगोन होर हिरमेस होर पत्रुबास होर हर्मास भाईयो होर तिन्हा साउगी रे सारे विस्वासी भाई बैहणीया जो नमस्कार।

¹⁵फिलुलुगुस भाई होर युलिया बैहण होर नेर्युस भाई होर तेसरी बैहण, होर उलुम्पास भाई होर तिन्हा साउगी रे सभ परमेसरा रे पवित्र लोका जो मेरा नमस्कार।

¹⁶जेबे तुस्से संगती करदे आहूँआं ऐं ता आपु मन्झ गले मिली किन्हें एक दूजे जो बड़े प्यारा किन्हें नमस्कार करा। एस जगहा री सभ मसीह कलीसिया रे विस्वासी लोका री तरफा ले तुस्सा जो नमस्कार।

¹⁷ऐबे हे भाईयो होर बैहणो, हांऊँ तुस्सा किन्हें अर्ज करहा कि तिन्हा लोका पर खूब ध्यान देआ, जो लोक तुस्सा रे मन्झ फूट पाहें, होर तिन्हा लोका पर जो तुस्सा जो दितिरे सच्चे उपदेसा रे बरखलाफ भड़काए, जेस ले तुस्सा रा विस्वास कमजोर हुआ। तिन्हा लोका ले दूर रैहया।

¹⁸क्यूंकि एह्ड़े लोक आस्सा रे प्रभु मसीह री सेऊआ नी करदे, पर आपणी व्यक्तिगत इच्छा जो पूरी करहा ऐं, होर चिकनी चुपड़ी गल्ला किन्हें सीधे सादे लोका जो धोखा दें।

¹⁹होर सभ लोक जाणांहे कि तुस्से किहाँ बढ़िया तरीके किन्हें प्रभु रे हुक्मा जो मन्हें; इधी कठे हांऊँ तुस्सा रे बारे मन्झ खुसी मनाहां। पर हांऊँ ये चाहां कि, तुस्से ये जाणने मन्झ कि क्या बांका एता रे कठे बुद्धिमान, होर बुरे कामा रे कठे भोले बणी किन्हें रहो।

²⁰होर सांति देणे वाल़ा परमेसर सैताना जो खत्म करी किन्हें तेस जो तुस्सा रे अधीन करी देणा। हांऊँ प्रार्थना करहा कि आस्सा रा प्रभु यीसू मसीह तुस्सा जो आपणा अनुग्रह देंदा रहे।

²¹तिमिथियुस भाई जो मेरा सहकर्मी आ, होर लूकियुस, यासोन होर सोसिपत्रुस जो मेरा यहूदी भाई आ, तुस्सा सभी जो तिन्हारा नमस्कार।

²²हांऊँ तिरतियुस भी तुस्सा जो नमस्कार करहा। हांऊँ प्रभु रे लोका मन्झ एक आ, होर एस चिठ्ठी जो लिखणे रे कठे पौलुसा री मदद करेया करहा।

²³गयुस भाई री तरफा ले तुस्सा जो नमस्कार। हांऊँ ऐबे तेसरे घरा मन्झ रहा, जेथी कलीसिया रे सारे विस्वासी लोक कठा हुयें। एस सैहरा रा भंडारी इरास्तुस भाई, होर आस्सा रे क्वारतुस भाई रा तुस्सा जो नमस्कार।

²⁴हांऊँ प्रार्थना करहा कि आस्सा रा प्रभु यीसू मसीह तुस्सा जो आपणा अनुग्रह देंदा रहे।

²⁵ऐबे आस्से परमेसरा री बढ़ाई करहे, जो तुस्सा जो मेरे सुणाई री खुसी री खबरा रे ज्रीए यानि यीसू मसीह रे बारे मन्झ कितिरे प्रचार रे मताबक, तुस्सा जो विस्वासा मन्झ मजबूत करी सक्हा। यीसू मसीह रे एस प्रचारे तुस्सा अन्यजाति लोका रे कठे परमेसरा री योजना जो जाहिर करी दितिरा, से योजना जो सुर्हू ले ही भेदा मन्झ ल्कोई रखिरी थी।

²⁶होर जिहां सुर्हू ले परमेसरे हुक्म दितेया होर नबिया रे ज्रीए लिखी गया, ऐबे ये ल्कोईरी गल्ल सब जाति रे लोका मन्झ प्रचार किती गई, ताकि स्यों भी परमेसरा पर विस्वास करणे वाले, होर तेसरे हुक्म मनणे वाले बणी जाऐ।

²⁷यीसू मसीह रे ज्रीए तेस ज्ञानी होर बुद्धिमान परमेसरा री जुग-जुग बढ़ाई हुन्दी रहे। आमीन।